نہال صغیر
مالی خسارے کے ناقابل برداشت بوجھ کے سبب بالآخر ملی گزٹ بند ہوگیا ۔اسے بند کرتے ہوئے ایک انٹر ویو میں اس کے مالک و مدیر نے کہا بڑے دکھ کا اظہار کرتے ہوئے کہا کہ میڈیا قوم کی ترجیحات میں شامل ہی نہیں ہے۔میڈیا میں اپنی پیٹھ بنانے کیلئے سب سے پہلے تو اس کی اہمیت کو جاننا ضروری ہے ۔چار سال قبل فلسطینی قائد اسمٰعیل ہانیہ نے کہا تھا کہ آج جنگیں صرف میڈیا کے ذریعہ لڑی اور جیتی جارہی ہیں ۔یہ آج کے دور کی ناقابل تردید حقیقت ہے ۔اس سے کوئی انکار نہیں کرسکتا ۔غالبا دس یا پندرہ سال قبل مہاتر محمد نے او آئی سی کے اجلاس میں مسلمانوں کے یا مسلم دنیا کا میڈیا کی بات کی تھی ۔غالبا اسی کے بعد الجزیرہ کا قیام عمل میں آیا تھا ۔یہ دو مثالیں ان لوگوں کی دی گئی ہیں جو دو الگ الگ مسلم ملکوں سے تعلق رکھتے ہیں ۔میڈیا کی کیا اہمیت ہے اسے آپ یوں سمجھ سکتے ہیں کہ سب سے زیادہ پرامن مذہب اسلام کو دہشت گردی پھیلانے والا مذہب مشہور کروادیا گیا اور مسلمانوں کو دہشت گرد قرار دے دیا گیا ۔میڈیا کایہ اثر ہے کہ اپنے وطن سے ہزاروں میل کی دور پر واقع عراق و شام میں اپنی آزادی کیلئے لڑنے والے مجاہدین آج دہشت گرد قرار دیئے جاچکے نیز اسی میڈیا کے دجالی ذرائع پر یقین کرتے ہوئے ہمارے سیکڑوں علماء روزانہ مجاہدین کو کافر اور دہشت گرد ہونے کا فتویٰ دیتے رہتے ہیں ۔حالانکہ یہی علمائے دین اکثر معاملات میں یہ کہتے نہیں تھکتے کہ میڈیا جھوٹ بولتا ہے ۔یعنی اپنے مطلب کی بات ہو تو آمنا صدقنا اور اپنے خلاف ہو تو مسترد کردینا اب یہ ہمارے ان بزرگوں کا وطیرہ بن گیا ہے ۔ان مختصر واقعات و حالات کو بیان کرنے سے یہ سمجھانا مقصود تھا کہ میڈیا کیا ہے اور وہ کیا کرسکتا ہے ؟ایسے میں ہمارا ذرائع ابلاغ نہ ہونا کتنی بڑی بد نصیبی کی بات ہے ۔جس حد تک ممکن ہے اور جتنے بھی ابلاغ کے ذرائع ہمارے پاس ہیں اس سے تو یقینا کچھ نہ کچھ ہماری باتیں لوگوں تک پہنچ رہی ہیں ۔لیکن ہم نے چونکہ اس کے مقصد اور اہمیت کو دیر میں جانا یا اب بھی ہم اس موڈ میں نہیں ہیں کہ اسے زیادہ اہمیت دیں اس کا انجام یہ ہے کہ ہمارے خلاف جس قدر شدت سے پروپگنڈہ ہے اس کے جواب میں ہمارا ردعمل صفر کے برابر ہے ۔
میڈیا نے عوام کی ذہن سازی کی ہے ان کے ذہن میں وہ بٹھایا ہے جو ان کا مقصد تھا ۔جیسا کہ اوپر کہاگیا کہ انہوں نے عوام کو یہ باور کرادیا کہ اسلام دہشت گردی کی تعلیم دینے والا مذہب ہے اور مسلمان دہشت گردہیں ۔حالانکہ سینکڑوں بار یہ اعداد شمار بتایا جاچکا کہ دہشت گرد کے طور پر جتنی بھی تنظیموں کا نام فہرست میں شامل کیا گیا ہے اس میں اکثریت غیر مسلموں کی ہے ۔لیکن بات وہی ہے کہ ہمارا میڈیا ہوتا تو اس بات کو دن رات اپنی نشریات میں بتاتا جس سے یقینا عوام کے ذہنوں کی صفائی ہوتی ۔پہلے مسلمانوں کی زبان اردو ہوا کرتی تھی تب اردو کے اخبارات و رسائل کی بہت بڑی تعداد کتابوں کی دکانوں پر نظر آتے تھے ۔تب بہت حد کم از کم مسلمان تو یہ جانتے تھے کہ حقیقت کیا ہے لیکن اب مسلمانوں کی اکثریت بھی اردو سے ناواقف ہو چکی ہے ۔اب عام مسلمان بھی ہندی انگریزی اور دیگر مقامی زبان کو ہی ترجیح دینے لگے ہیں یا پھر یہ سمجھ لیں کہ حکومت اور اس کی مشنری نے ایسا کیا کہ مسلمان اردو سے دور ہوتے گئے ۔انگریزی ،ہندی اور مقامی زبان کے اخبارات و رسائل پڑھتے ہیں ۔ان میں بھی وہی زہر پھیلایا جاتاہے ۔اس کی وجہ سے ان کے ذہن بھی مسموم ہو رہے ہیں ۔دوسرے تو دوسرے اب خود مسلمانوں کا ذہن بھی یہ سوچنے پر مجبور ہو گیا ہے مسلمانوں میں کچھ نہ کچھ ایسی کمی ہے تب ہی تو اس طرح کی باتیں کی جارہی ہیں ۔ایسے حالات میں اب جہاں خود کو اردو سے وابستہ رکھنے کی زیادہ ضرورت ہے وہیں اس بات کی بھی ضرورت ہے کہ ہم اپنے ذرائع ابلاغ کو دیگر زبانوں میں بھی ڈھالیں ۔لیکن یہ سب صرف زبان ہلادینے سے ہی ہو جائے گا ۔ہمارے پاس علاء الدین کا کوئی چراغ تو ہے نہیں کہ جن آکر ہمارے مسائل حل کردے گا ۔ہم جب اردو کے اخبارات و رسائل کی ہی سرپرستی ہی نہیں کرسکتے تو دیگر زبانوں میں اپنے ذرائع ابلاغ کو کیسے توسیع دے سکتے ہیں ۔ہفتہ روزہ سیرت کن حالات سے گذر کر آپ کے ہاتھوں میں پہنچتا ہے وہ بس ہم ہی جانتے ہیں ۔آج تک ایسا کوئی نہیں ملا جو بغیر کسی جد و جہد کے ہمیں اس نوعیت مدد کرے کہ کوئی پریشانی نہ ہو ۔لیکن ہم میں ایساکوئی فکر مند شاید ہے ہی نہیں یا اگر ہے تو اس کے پاس جذبہ تو ہوگا لیکن وہ مدد کرنے سے معذور ہوگا ۔جو قوم ایک ہفتہ روزہ کی سرپرستی نہیں کرسکتی اس سے کیا توقع کہ وہ کسی اور زبان میں اخبار یا کوئی میڈیا ہائوس قائم کرسکے ۔حال کی مثال ہمارے سامنے ہے کہ پچھلے سولہ برسوں سے جاری ملی گزٹ 2016 کی آخری شمارہ کے بعد اشاعت بند ہو چکی ہے ۔اس سے قبل سید شہاب الدین (اللہ ان کی زندگی میں برکت دے اور انہیں ان کے قوم کے تئیں خلوص زندگی بھر کی جد و جہد کو قبول کرے )کا مسلم انڈیا بھی بند ہو چکا ہے ۔مسلم انڈیا نے مسلمانوں کے تعلق سے اعداد شمار کا جو خزانہ مسلم انڈیا نے جمعہ کیا وہ کسی نے آج تک نہیں کیا ۔اگر ہم اسی طرح بے حسی کا شکار ہے تو پھر صرف باتیں کرنے اور ماتم کناں رہنے سے مسائل حل نہیں ہوں گے ۔مسائل تو صرف عمل سے حل ہو ں گے ۔اس لئے حرکت میں آئیں اور عمل کی طرف قدم بڑھائیں ۔ 

نہال صغیر
نجیب کہاں ہے ؟یہ سوال مرکزی حکومت کے حلق کی ہڈی بن چکا ہے ۔ہر چند کہ حکومت کی موجودہ حکمت عملی ایک چپ ہزار پریشانیوں سے بچائو والی ہے ۔لیکن یہ عام انسانوں کیلئے ہے کسی سربراہ مملکت یا حکومت کیلئے نہیں ۔اسے تو جواب دینا ہی ہوگا خواہ وہ پارلیمنٹ میں دے یا باہر عوام کے سامنے ۔تعجب کی بات یہ ہے کہ ہماری پولس اور خفیہ ایجنسیوں کو بے گناہ نوجوان دہشت گرد کی صورت میں مل جاتے ہیں۔کوئی کسی ریاستی سربراہ کو مارنے کا خیال دل میں لاتا ہے اور انہیں خبر ہو جاتی ہے اور وہ اس کا قتل کرکے بہادری کے تمغے سینوں پر سجالیتے ہیں ۔لیکن دو ماہ سے زیادہ ہو گیا یہ نجیب کو نہیں ڈھونڈ پائے ہیں ۔ اب اپنی خجالت اور شرمندگی مٹانے کیلئے دہلی پولس نجیب کے اہل خانہ پر الزام دھر رہی ہے کہ ان لوگوں نے ہی نجیب کو کہیں چھپا رکھا ہے ۔ہمیں جگہ بجگہ نجیب کے والدہ کی تڑپتی اور سسکتی اپنی آنکھوں میں مایوسی اور بے بسی کی تصویر لئے نظر آجاتی ہیں ۔ان کو دیکھ کر میں نے اکثر احتجاجی جلوسوں میں لوگوں کو اپنی آہوں اور سسکیوں پر قابو پاتے دیکھا ہے ۔بھلا کوئی ماں کیوں کہ اپنی ہی جوان اولاد کو چھپا کر ملک بھر میں اس کی گمشدگی کی تشہیر کرتی پھرے گی ؟لیکن جن کو انسانیت چھو کر بھی نہیں گئی وہ اس طرح کے الزامات عائد کریں تو اس پر تعجب کا اظہار بھی نہیں کیا جاسکتا ہے ۔دہلی پولس اور اس کا اسپیشل سیل بھی انہی میں سے ہے جنہیں انسانیت سے کوئی سروکار نہیں ہے ۔یہی وہ پولس فورس ہے جس نے درجن بھر سے زائد مقدموں میں مسلم نوجوانوں کو بے گناہ پھنسایا جو بعد میں عدالت سے با عزت بری ہوئے ۔جامعہ سالیڈریٹی فورم نے ان سارے مقدموں اور اس میں پولس کے متعصبانہ رویہ کو ایک دستاویز کی صورت میں شائع کیا جس کے اہم حصے اردو ٹائمز میں بھی قسط وار شائع ہو چکے ہیں ۔میڈیا کی خبروں کے مطابق ہفتہ کی صبح چار بجے نجیب کے آبائی گائوں میں اس کے گھر پر دہلی پولس نے اچانک گھس کر اسی غنڈہ گردی کا ارتکاب کیا جس کے لئے یہ فورس جانی جاتی ہے اور اس کی انہی بری عادتوں پر دہلی کے وزیر اعلیٰ اروند کیجریوال نے ’ٹُھلے ‘ کہا تھا جس پر بھکت قسم کے میڈیا اور صحافیوں نے کافی ہنگامہ آرائی کی تھی ۔خیر پورے ہندوستان کی نظر نجیب کی گمشدگی میں دہلی پولس کی مجرمانہ غفلت پر ٹکی ہوئی ہے ۔لیکن انہیں ذرہ برابر اس بات کا خیال نہیں کہ پولس کو عوام دوست ہونا چاہئے نا کہ عوام دشمن جس کے نام سے بھی شریف لوگوں کی نیندیں حرام ہو جائیں اور بدمعاش اور مجرمانہ ذہنیت کے لوگ ان کے سایہ میں پروان چڑھیں جیسا کہ جے این یو میں آر ایس ایس اور بی جے پی کی ساختہ پرداختہ اکھل بھارتیہ ودیارتی پریشد کے غنڈے پل بڑھ رہے ہیں جن پر نجیب کے اغوا کا الزام ہے ۔

جلال الدین اسلم، نئی دہلی
موبائل نمبر: 09868360472

کہتے ہیں کہ جنگل میں جب مور ناچتا ہے تو اپنے رنگارنگ پَروں کو دیکھ کر جھوم اٹھتا ہے اور خود کو دنیا کا سب سے حسین اور خوبصورت پرندہ سمجھنے لگتا ہے، لیکن جب اس کی نظر اپنے پیروں پر پڑتی ہے تو وہ افسردہ ہوجاتا ہے۔ اسی طرح بیشہ اُردو کے مور مورنیاں بھی جب کسی ہال میں اردو کے نام پر کوئی پروگرام یا فنکشن کرتے ہیں تو اردو کے پروفیسر، ڈاکٹر، دانشور، صحافی، ادیب و شاعر سبھی جمع ہوتے ہیں اور اردو کا گن گان اس طرح کرتے ہیں کہ یہ ایک مہذب، لطیف، میٹھی اور شگفتہ زبان ہے جو لوگوں کے دلوں کو موہ لیتی ہے اور اس کا چرچا اتنے زور و شور سے ہونے لگتا ہے کہ ہال کے در و دیوار گونج اٹھتے ہیں اور ایسا محسوس ہونے لگتا ہے کہ جیسے ’سارے جہاں میں دھوم ہماری زباں کی ہی ہے‘۔ لیکن جب یہی دانشور طبقہ اپنے اپنے گھروں کو لوٹتا ہے تو اپنے گھرو ںکو اُردو سے خالی دیکھ کر مور کی طرح افسردہ نہیں ہوتا بلکہ بے شرمی سے بستر استراحت پر پُرسکون سانس لیتا ہے اور شرمندگی انہیں اٹھانی پڑتی ہے جو سچ مچ اُردو کے بہی خواہ اور محب اُردو ہیں۔ وہ جو اردو کی ترویج و اشاعت کے لیے اپنے دن و رات ایک کیے ہوئے ہوتے ہیں۔
اردو کی قسمت کا حال عجیب و غریب ہے۔ پرانی پرانی اردو بستیاں اگر اُجڑ رہی ہیں تو نئی نئی بستیوں کے بسنے کی خبریں بھی ملتی رہتی ہیں لیکن یہ بستیاں ہیں کہاں؟ کم از کم ہمیں تو نہیں معلوم۔ ہمارے ارد گرد تو ویرانیوں نے ہی ڈیرہ ڈال رکھا ہے۔ چاروں طرف کھنڈر ہی کھنڈر نظر آرہا ہے۔ ہوسکتا ہے اردو کے بڑبولے دانشوروں نے کسی خاص علاقے میں اردو کی نئی نئی بستیاں بسائی ہوں جہاں عام لوگوں کی پہنچ ممکن نہ ہو اور شاید اس لیے بھی کہ بڑے لوگوں کی بستیاں زبان و تہذیب عام لوگوں کی زبان و تہذیب سے دور ہی ہوا کرتی ہیں۔ یہی وجہ ہے کہ یہ عوامی زبان اب خواص کی ہی ہوکر رہ گئی ہے۔ اتنی خواص کہ اس کے دانشور جب کچھ کہتے ہیں، لکھتے ہیں تو اردو کے کم پڑھے لکھے لوگ ہونقوں کی طرح ایک دوسروں کو دیکھنے لگتے ہیں اور دلوں کو موہ لینے والی زبان لوگوں کے دلوں کو چھوئے بغیر ہی سروں سے گزر جاتی ہے۔
میرے ایک پڑوسی نے بھی مجھ سے ایک روز شکایت کی کہ آپ آسان زبان استعمال نہیں کرتے جس کی وجہ سے آپ کی بہت سی باتیں ہمارے سروں سے گزر جاتی ہیں، تو میں نے انہیں مجروح سلطان پوری کا ایک واقعہ سنایا کہ مجروح صاحب ایک مشاعرے میں بڑے لہک لہک کر شعر سنا رہے تھے کہ اچانک ان کے کانوں میں کچھ نوجوانوں کی بات چیت سنائی دی۔ نوجوان آپس میں محو گفتگو تھے کہ بڈھا شعر تو بہت اچھا پڑھتا ہے مگر اتنی اونچائی سے پڑھتا ہے کہ ہمارے سروں سے گزر جاتا ہے۔ مجروح صاحب نے برجستہ جواب دیا کہ ’’بیٹے ہمیں اس اونچائی تک پہنچنے میں ساٹھ سال لگ گئے اور تم ساٹھ منٹ میں ہی اس اونچائی تک پہنچنا چاہتے ہو تو یہ کیسے ممکن ہے۔ ہاں کچھ تم ہم تک پہنچنے کے لیے کوشش کرو اور کچھ ہم تم تک پہنچنے کی کوشش کرتے ہیں۔‘‘
یہ واقعہ سن کر ہمارے پڑوسی صاحب خاموش ہوگئے اور میں سوچ میں پڑگیا کہ زبان کے تعلق سے اہل زبان کب تک اور کہاں تک نیچے اترتے رہیں گے یا کہاں تک اتارے جاتے رہیں گے۔ اگر ہم اس تعلق سے عمیق نگاہی سے کام لیں تو ہمیں معلوم ہو کہ زبان کے بارے میں صرف ہم ہی نہیں ہمارے بڑے بھی شاکی رہے ہیں۔ جناب مولانا الطاف حسین حالیؔ کو بھی یہ شکوہ رہا ہے کہ:
کوئی محرم نہیں ملتا جہاں میں
مجھے کہنا ہے کچھ اپنی زباں میں
مولانا کی زبان تو کچھ زیادہ ہی معرّب و مفرّس تھی کون سمجھتا؟ مگر آج تو معرب و مفرس جیسے الفاظ سمجھنے والا بھی بہ استثنائے استاد محترم مولانا رحمت اللہ فاروقی کے، اگر کوئی ملے گا تو چراغ لے کر ڈھونڈنے پر ہی ملے گا۔ لیکن مولانا تو بغیر ڈھونڈے ہی اپنے مقام پر مل جاتے ہیں بشرطیکہ آپ کو ان کے معمولات کا علم ہو کہ کس وقت وہ گھر میں ملیں گے اور کس وقت راقم کی نشست گاہ پر ملیں گے۔ سیدھے سادے وضع دار آدمی ہیں، گھر سے سیدھے مسجد یا راقم السطور کی رہائش گاہ پر موجود ہوتے ہیں۔ آپ ان کے گھر پر فون کریں گے تو یہی جواب ملے گا کہ فاروقی صاحب اسلم صاحب کے یہاں ہوں گے۔
ہاں تو ہم یہ عرض کرنا چاہ رہے تھے کہ رحمت اللہ فاروقی صاحب بھی ’’ایک منظر ہیں۔۔۔ مگر بے ربط پس منظر میں ہیں۔‘‘ یہ انہیں کا جگر ہے کہ وہ آج بھی اخبارات کے لیے مضامین و اداریے وغیرہ جب املا کراتے ہیں تو ’’بوندا باندی‘‘ کو بھی ’’تقاطرِ امطار‘‘ تحریر فرما دیتے ہیں۔ مولانا موصوف کے ایسے بہت سے الفاظ ہیں جو اہل زبان کے لیے باعث سند ہیں تو کم علموں کے لیے باعث زحمت بنے رہتے ہیں۔
مولانا الطاف حسین حالیؔ کی عربی، فارسی تو کیا، آج ہماری زبان اردو سمجھنے والے بھی مولانا فاروقی جیسے خال خال ہی پائے جاتے ہیں۔ جب تک آپ اپنی زخمی زبان کی انگریزی الفاظ سے ’’ڈریسنگ‘‘ نہ کرلیں، لوگ ہونقوں کی طرح اپنا منہ کھولے حیرت سے آپ کا منہ تکتے رہتے ہیں کہ یہ شخص:
’’بک رہا ہے جنوں میں کیا کیا‘‘
شاید ایسی ہی صورت حال دیکھ کر مرزا غالبؔ خالق لفظ و بیان سے فقط یہ طعن آمیز دعا مانگ کر ایک کنارے ہوگئے تھے کہ ’’کچھ نہ سمجھے خدا کرے کوئی‘‘۔
مگر ہمارے ایک شاعر کے لیے یہ صورت حال درد شکم بن گئی، انہیں کہیں سے افاقہ جب نہیں ہوا تو قبرستان جاکر اپنا شعر سنا آئے کہ:
اب تو زندوں میں نہیں کوئی سمجھنے والا
میں نے اے اہل قبور! ایک غزل لکھی ہے
ایک روز ہمارے ایک دوست نے ہمیں فون پر ہدایت فرمائی ’’آسان لکھا کیجیے‘‘ اور جواباً پھر چچا غالبؔ کا ایک شعر پڑھنے کو جی چاہا مگر باز رہے کہ اب اس شعر کو بھی اہل قبور ہی سمجھیں گے کہ:
آسان کہنے کی کرتے ہیں فرمائش
گویم مشکل، وگرنہ گویم مشکل
 بہرحال ہم اپنے علم کے مطابق لکھتے تو آسان ہی ہیں لیکن ہمارے دوستوں، قارئین و کمپوزیٹر صاحب وغیرہ کو اگر مشکل ہوتی ہے تو اور آسان لکھنے کی سعی کریں گے۔ مگر ہم جب اپنے نوجوانوں کو اپنی زبان سیکھنے کو تو کیا پڑھنے سے بھی گریزاں پاتے ہیں تو علامہ اقبال کی زبان میں ’’لہو مجھ کو رلاتی ہے جوانوں کی تن آسانی‘‘ کہنا پڑتا ہے۔ دیکھا تو یہی جارہا ہے کہ ہمارا نوجوان اپنی زبان، اپنی تہذیب و تمدن سے دور بہت دور ہوتا جارہا ہے۔ آخر یہ نوبت آئی کیسے؟ ہمیں سنجیدگی سے غور کرنا ہوگا۔
کالم کا اختتام ہوا جاتا ہے اور ہم ابھی تک زبان کی مشکل اور سہل بیانی کے ہیر پھیر میں ہی پھنسے پڑے ہیں اور مولانا حالیؔ کے اس مصرعے کی تاویل ہی کرتے رہے کہ ’’کوئی محرم نہیں ملتا جہاں میں ‘‘۔
ہمیں جو کچھ کہنا ہے اس میں سے کچھ کہنے کی تو ابھی تک نوبت ہی نہیں آئی مگر خیر، ہم کہہ کر ہی رہیں گے۔ آج نہیں تو کل کہیں گے۔ اس کالم کو آپ اسی طرح صدائے توجہ طلبی سمجھ لیجیے جس طرح کہ ہوائی اڈوں، اسٹیشنوں وغیرہ پر اردو زبان میں اعلان شروع کرنے سے پہلے ایک نسوانی آواز آپ کو پکارتی ہے کہ ’’تاواجو فرمائیے۔‘‘
سو، آپ سے کہنا تو ہے، مگر
مجھے کہنا ہے کچھ اپنی زباں میں
معاف کیجیے، اس وقت الیکشن کی ہماہمی اور غلغلہ ہے، اس وقت رونما ہونے والے حالات پر کچھ روشنی ڈالنی چاہیے تھی لیکن ہم زبان و ادب کا گلہ لے بیٹھے۔ یہ بھی ضروری تھا کیونکہ الیکشن کی ترش و تلخ سرگرمیوں میں ادب ہی ایک ذریعہ ہے جو ناکامی و کامیابی کی صورت میں پیدا ہونے والی دوریوں کو قریب تر کردیتا ہے۔ کاش اس موقع پر کوئی اپنی زبان کو بھی یاد رکھتا تو شاید نہ مولانا الطاف حسین حالیؔ کو کسی نا محرم سے شکایت ہوتی اور نہ ہی مرزا غالبؔ کو ہی کوئی گلہ ہوتا کہ ’’کچھ نہ سمجھے خدا کرے کوئی‘‘۔
بہرکیف، مولانا حالیؔ اور مرزا غالبؔ دونوں ہی زبان و ادب کے شہسوار تھے۔ انہوں نے اپنے اپنے دور میں جس طرح کی ناقابل فراموش خدمات انجام دی ہیں اسے کوئی سمجھے یا نہ سمجھے وہ اب تو زبان و ادب کی تاریخ میں امر ہوچکی ہیں۔

 ممتاز میر ۔ برہانپور

ہمارے حفاظتی دستوں کے حالات کی جو جھلکیاں آج ہمیں دیکھنے کو مل رہی ہیں اس میں نیا کچھ نہیں ہے ،کوئی اچنبھے کی بات نہیں ہے۔اکا دکا خبر اس سے پہلے بھی آتی رہی ہے مگر اب چونکہ’’ دیش بھکتوں ‘‘کی حکومت ہے اسلئے غالباًہر کوئی یہ سمجھ رہا ہے کہ یہی وہ وقت ہے جب اپنی شکایات کا ازالہ کر وایا جا سکتا ہے۔یہ نتیجہ ہے اپنی دیش بھکتی کولارجر تھین لائف بنا کر پیش کرنے کا ۔ورنہ ان کی حقیقت تاریخ آزادی کو جاننے والے جانتے ہیں۔

۱۹۹۹ میں کارگل جنگ کے دوران بھی جب انہی دیش بھکتوں کی حکومت تھی ،اور جنگ کے بعد میں بھی بڑی خوفناک قسم کی شکایات منظر عام پر آئیں تھیں۔فی الوقت جو شکایات ہیں وہ تو زمانہء امن کی ہیں اور فوجی و نیم فوجی دستوں کی ذاتی شکایات ہیں مگر کارگل جنگ کی شکایات کا تعلق تو براہ راست دفاع وطن سے تھا ۔جنگ کیوں پیش آئی اور دوران جنگ کن مسائل کا سامنا کرنا پڑا اس کی تحقیق وتفتیش کے لئے سبرامینم کمیٹی وجود میں لائی گئی تھی ۔اس کی تحقیق کا اہم نکتہ فوجیوں کے پاس دشمن سے لڑنے کے لئے ناکافی سازوسامان کا ہونا بتایا گیا تھا ۔اس طرح اس زمانے میں ایک خاتون صحافی نے جو کہ خود موقعے پر گئی تھی اپنے مضامین میں لکھا تھا کہ ہمارے سپاہیوں کے پاس برف پر لڑنے کے لئے خصوصی جوتے بھی نہیں تھے اور اس مخصوص جنگ کو لڑنے کے لئے جن آلات کی ضرورت ہوتی ہے اس کی بھی ہمارے پاس کمی تھی ۔چلئے کوئی بات نہیں ۔یہ کہہ سکتے ہیں کہ اس وقت بھی مودی جی کے دوست نواز شریف ہی بر سر اقتدار تھے اور جنگ اچانک شروع کرکے انھوں نے واجپئی جی کی پیٹھ میں چھرا گھونپا تھا اسلئے اس خصوصی جنگ کی ہماری تیاری نہیں تھی( معلوم نہیں یہ عذر کس حد تک قابل قبول ہو سکتا ہے)مگر جنگ کے بعد کیا ہوا ؟اس کے بعد تو بہت مشہور تابوت گھوٹالہ ہوا تھا ۔کہتے ہیں کہ اسی گھوٹالے سے توجہ ہٹانے کے لئے اکشر دھام حملہ وجودمیں آیا تھا۔

قاسم سید
جمہوریت میں سر گنے جاتے ہیں، تعداد اہمیت رکھتی ہے لیاقت نہیں۔ جھوٹ جیت جاتا ہے سچائی چھپ جاتی ہے۔ جس کے پاس ووٹ کی طاقت ہوتی ہے اس کو ارباب اقتدار ہوں یا حزب اختلاف جھک کر سلام کرتے ہیں، آگے پیچھے گھومتے ہیں، کورنش بجا لاتے ہیں اور اس کے تمام نخرے برداشت کرتے ہیں۔ مٹھی خالی ہو تو آواز میں بھی تمکنت نظر نہیں آتی۔ جمہوریت بنیادی طور پر ووٹوں کا کھیل ہے جو یہ کھیلنا جانتے ہیں وہ انتخابات سے پہلے اور اس کے بعد بھی سیاست و اقتدار کے فواکہات و ثمرات سے فیض یاب ہوتے ہیں۔ ان کی خوشی کا خیال رکھا جاتا ہے۔ کوئی ایسا قدم نہیں اٹھایا جاتا کہ وہ ناراض ہوں۔ ہندوستان میں سیاست کا مطلب ذات پات کا اعداد و شمار اور مذہبی شناخت ہے۔ بھلے ہی الیکشن کمیشن کا ضابطہ اخلاق کچھ بھی کہے، سپریم کورٹ کی ہدایت کچھ بھی ہوں پر نالہ وہیں گرتا ہے حتیٰ کہ ٹکٹ دیتے وقت بھی اس کا خاص پاس و لحاظ رکھا جاتا ہے اور باضابطہ تشہیر بھی کی جاتی ہے۔ مختلف ذاتوں کی بڑی مضبوط سیاسی پارٹیاں موجود ہیں، مثلاً یادو کے مفادات کی محافظ سماجوادی پارٹی اور آر جے ڈی جب بھی اقتدار میں آتی ہیں یادو کا دبدبہ اور غلبہ صاف نظر آتا ہے۔ آر ایل ڈی کا لبادہ کوئی ہو مگر وہ جاٹوں کے نمائندے کی شناخت رکھتی ہے۔ کانگریس اور بی جے پی قومی سطح کی پارٹیاں ہیں، مگر اعلیٰ ذاتوں کا تحفظ اور ہندوتو کا فروغ ان کا بنیادی مقصد ہے۔ کانگریس روڈمیپ تیار کرتی ہے اور بی جے پی اس پر عمل کرتی ہے۔ مختلف صوبوں میں موجود علاقائی پارٹیاں وہاں کی زبان و تہذیب کا تحفظ کرتی ہیں، مثلاً تامل ناڈو کی اناڈی ایم کے اور ڈی ایم کے یہ موقع بموقع اقتدار میں حصہ دار رہی ہیں یا کلی اختیارات کی مالک۔
اس پورے کھیل میں سب سے زیادہ خسارہ میں ملک کی سب سے بڑی اقلیت یعنی مسلمان رہتی ہے، اس کی دو وجوہات ہیں۔ اس نے آزادی کے بعد کانگریس کو اپنا ملجا و ماویٰ اور قسمت کا مالک بنادیا۔ اپنی ڈور ہاتھ میں تھمادی۔ انھوں نے جو بہتر سمجھا کیا۔ اسی دوران ایک ایسی لیڈرشپ تخلیق کی جس نے ملت سے زیادہ پارٹی کی وفاداری، غلامی کو ترجیح دی، وہیں مسلم جماعتوں نے بھی اس میں عافیت سمجھی کہ اپنے لئے اس سائبان میں ایک گوشہ تلاش کرکے ان کی سلامتی کی دعائیں کریں۔ سیکولر پارٹیوں کی تعداد بڑھتی گئی مگر وہ اس ’سیاسی گنگوتری‘ سے نکلی ہیں، اس لئے کانگریس کی تمام خصوصیات بدرجہ اتم پائی جاتی تھیں۔ مسلمانوں کا ہنکاکر اس باڑے سے اس باڑے میں پہنچایا جاتا رہا، چنانچہ پورے ملک میں مشکل سے سو ایسے لیڈر ہوں گے جو مسلمانوں کے مفادات اور ان کے حقوق کی بازیابی کی جدوجہد کرتے دکھائی دیے مگر ان کی ڈور کانگریس یا کسی اور سیکولر کہی جانے والی پارٹی سے بندھی رہی، بعض جاں نثاران ملت بھی دکھائی دیتے رہے۔ انھوں نے اپنی پوری زندگی کھپادی۔ کیرالہ کی سیاست میں مسلم عنصر کو نہ کانگریس نظر انداز کرسکی اور نہ ہی لیفٹ، دونوں ’فرقہ پرستوں‘ سے ہاتھ ملاتے رہے، کیونکہ سیاسی مجبوری تھی۔ اترپردیش میں ڈاکٹر فریدی مرحوم نے مخلوط سیاست کا تجربہ دہرایا اور کامیابی و ناکامی دونوں حصہ میں آئیں۔ حیدرآباد میں مجلس اتحاد المسلمین نے اقتدار میں شراکت کی، کیونکہ اس کی مٹھی میں چند فیصد ووٹ تھے۔ اترپردیش میں کسی زمانہ میں نیشنل لوک تانترک پارٹی سے بی ایس پی انتخابی اتحاد پر مجبور ہوئی اور پیس پارٹی کا سماجوادی پارٹی سے ہوا۔ قومی ایکتادل کا حال ہی میں بی ایس پی سے ہوا، یعنی جب بھی مسلمانوں کے ووٹوں کا چند فیصلہ بھی لیڈرشپ کے ہاتھ میں نظر آیا، نام نہاد سیکولر پارٹیوں نے ٹھوڑی میں ہاتھ ڈال کر سمجھوتہ کیا۔ یہ تلخ حقیقت ہے کہ جنتا پارٹی کی پیدائش نے سیاست کے آداب بدل دیے۔ پہلی بار سیکولر اور کمیونل کی باریک لکیر بھی مٹادی گئی اور بھارتیہ جن سنگھ اس کا ناگزیر حصہ بن گئی۔ یہی غلطی وی پی سنگھ کے عہد میں دہرائی گئی جب جنتادل نے راجیو گاندھی کو ہٹانے کے لئے بی جے پی سے ہاتھ ملایا۔ ملک نے یہ بھی نظارہ دیکھا کہ وی پی سنگھ سرکار کا ایک پایہ لیفٹ اور دوسرا رائٹ سنبھالے ہوئے تھا اور پھر سب سیکولر رہے۔ رفتہ رفتہ بی جے پی کی رفتار بڑھتی گئی اور وہ دو سے 280 پر پہنچ گئی۔ یہ سب ایسے دور میں ہوا جب مسلم قیادت کے ہاتھ میں ٹیکٹیکل ووٹنگ کے نام کا طوطا آگیا۔ اس کی معروف تشریح یہ ہے کہ جو بی جے پی کو ہرائے اس کو ووٹ دو۔ گزشتہ تین دہائیوں سے مسلم قیادت اور مسلم جماعتوں نے خواہ وہ سیاسی ہوں یا مذہبی، یہ تعویذ گلے میں ڈال لیا اور اسے حرز جان بنالیا۔ اٹھتے بیٹھتے سوتے جاگتے اسی کا ورد ہونے لگا۔ جب بھی الیکشن آتا ٹیکٹیکل ووٹنگ کی چیخ و پکار سنائی دینے لگتی ہے۔ پانچ سال تک سیاسی سرگرمیوں سے دور رہنے والے انتخابات سے عین قبل یہ راگ الاپنا شروع کردیتے ہیں۔ گستاخی کی معافی کے ساتھ کیا ہمیں یہ معلوم نہیں کرنا چاہئے کہ حضور عالی مقام آپ کا سیاسی تدبر اور گراں قدر حکمت عملی سر آنکھوں پر، مسلمانوں نے کبھی سوال نہیں کیا، کیونکہ انھیں لگا کہ یہ دافع شر ہے اور بی جے پی اڑن چھو ہوجائے گی، لیکن ہوا اس کے برعکس، یعنی بی جے پی کو ہرانے کا نعرہ مستانہ کچھ اثر نہیں دکھا سکا۔ بی جے پی کا دائرہ بڑھتا گیا، وہ ریاستوں پر قابض ہوتی گئی اور لوک سبھا میں ممبران کا ہر الیکشن کے بعد اضافہ ہوتا گیا۔ سوال یہ ہے کہ جب پانچ سال تک سیکولر پارٹیاں برسراقتدار رہتی ہیں تو وہ ان پانچ سالوں میں آخر کرتی کیا ہیں کہ پھر پانچ سال بعد فرقہ پرستی کی بڑھتی طاقت کا خوف دلایا جاتا ہے۔ کیا ان کی پالیسیاں غیرمؤثر رہتی ہیں یا پھر وہ اندرون ہاتھ ملائے رہتے ہیں۔ آخر بار بار یہ خوف سر پر کیوں سوار کردیا جاتا ہے۔ جب ملک کے اندر کم وبیش 60 سال تک زیادہ تر ریاستوں اور مرکز میں سیکولر پارٹیاں اقتدار میں رہی ہیں تو آرایس ایس اور اس کے قبیلہ کو کس طرح اور کیوںکر طاقت ملتی گئی۔ ٹیکٹیکل ووٹنگ کے مطلوبہ نتائج کیوں برآمد نہیں ہوئے؟ تو کیا اس پر نظرثانی نہیں کرنی چاہئے۔ آخر منفی ووٹنگ کیوں کرائی جاتی ہے؟ کسی کو ہرانے کی بجائے جتانے کا نعرہ کیوں نہیں لگایا جاسکتا۔ اگر واقعی سیکولر پارٹیاں بی جے پی کو خطرہ سمجھتی ہیں تو ایک پلیٹ فارم پر کیوں نہیں آجاتیں، کیوں ایک نشان سے الیکشن نہیں لڑتیں۔ کیا سب سے بڑے بے وقوف مسلمان ہی لگتے ہیں۔ کیا ان کے سینگ نکلے ہوئے ہیں اور پھر مسلم قیادت کیوں دھڑوں میں تقسیم ہے، وہ متحدہ طور پر ایک آواز میں کسی پارٹی کے پلڑے میں ووٹ کا فیصلہ نہیں کرتی۔
اس کی وجہ صاف ہے مسلم قیادت بھی خانوں میں تقسیم ہے۔ اگر کوئی بھتیجا اپنے چچا کا وجود برداشت نہیں کرسکتا اور اپنے باپ سے بھی لڑجاتا ہے تو یہی حال ادھر بھی ہے۔ کسی کی وفاداریاں سماجوادی پارٹی کے ساتھ ہیں تو کسی نے رشتہ وفاداری کانگریس سے باندھ رکھی ہے۔ کسی کے دل میں بی ایس پی کے لئے پیار امڈا جاتا ہے تو کوئی بائیں بازو کے لئے مرنے مٹنے کو تیار ہے۔ سب کی اپنی اپنی ترجیحات ہیں، حالانکہ لوک سبھا الیکشن میں مسلم ووٹوں کو بے حیثیت کردیا گیا، اس سے زیادہ شرمناک بات اور کیا ہوسکتی ہے کہ اترپردیش جیسے بڑے صوبہ سے جہاں مسلمانوں کا ووٹ فیصد کم و بیش 20 فیصد ہے، ایک بھی مسلم ممبر پارلیمنٹ نہیں ہے۔ کیا یہ ہماری حکمت عملی کی بدترین ناکامی نہیں ہے۔ کبھی اس پر بھی غور کیا کہ آخر یوپی میں اس وقت صرف سونیا گاندھی اور راہل گاندھی کانگریس سے اور سماجوادی پارٹی کے پانچ ممبران ملائم پریوار کے ہی کیوں جیت سکے، یہ کیسا اتفاق ہے؟ اور اب ایک دوسرے کا گریبان پکڑنے والے باہم شیر و شکر ہونے کا مظاہرہ کررہے ہیں تو کیا اب ان کی ساری مخالفتیں واقعی ختم ہوگئی ہیں یا اپنی چمڑی بچانے کے لئے ایک جگہ آنے پر مجبور ہیں، جیسے لالو اور نتیش بدترین دشمنی کو بھلاکر اپنا وجود برقرار رکھنے کے لئے ایک دوسرے کے دوست بن گئے اور جیسے ہی مفادات کا ٹکرائو ہوگا نتیش پھر بی جے پی کے پالے میں چلے جائیں گے۔ ملائم سنگھ اپنے بیٹے کو مسلم مخالف کہہ کر ہندو ووٹروں میں ان کی امیج بہتر بنانا چاہتے ہیں، وہیں اپنے بھائی رام گوپال کو بی جے پی کا ایجنٹ بتاتے نہیں تھکتے اور امت شاہ سے خفیہ ملاقاتوں کا انکشاف کرتے ہیں، پھر بھی ہمارے کانوں پر جوں نہیں رینگتی۔ سیکولرازم اور فرقہ پرستی کے نعرے صرف ڈھونگ ہیں، سیاسی ضرورتوں کے تحت دوست اور دشمن بدلتے رہتے ہیں۔ جس کو جب جس کی ضرورت ہوئی اس کے ساتھ ہولیا۔ اب کوئی یہ زبان کھولنے کو تیار نہیں کہ پانچ سال کا حساب تو لے لیجئے۔ مظفرنگر، بجنور، دادری پر سوال کرلیجئے۔ گزشتہ انتخابی منشور میں مسلمانوں کو ریزرویشن دینے اور اردو میڈیم اسکول کھولنےکے وعدے کے بارے میں دریافت کرلیجئے۔ کیا یہ سوالات پوچھنا بھی بی جے پی کی مدد کرنا ہوگا۔ کیا وضاحتیں طلب کرنے سے بھی بی جے پی مضبوط ہوجائے گی؟ کیا ملائم سنگھ کے رام گوپال پر دیے بیانات کا بھی حقیقت معلوم کرنا بی جے پی کا ساتھ دینا ہوگا۔ یہ کون سی سیاست ہے، یہ کیسی ذہنیت ہے، یہ کون سا نظریہ ہے؟ یہ غلامانہ سوچ کا کون سا پہلو ہے؟ اگر غیرمشروط طور پر کسی کے پلو سے باندھنا ہے تو پھر مظفرنگر اور ہاشم پورہ کی شکایت کرنا کوئی معنی نہیں رکھتا، کیونکہ ہم واقعی ایسی جامد سوچ کی سزا کے مستحق ہیں، پھر شور مچانے کا حق نہیں، آنکھوں پر پٹی باندھیں، اپنی انگلی تھمائیں اور جہاں کہا جائے ٹھپہ لگا آئیں۔ رہے نام اللہ کا۔

مجلس ممبئی کے صدر شاکر پٹنی کے مطابق اکبرالدین اویسی دوروزہ ممبئی دورہ کے بعد حید ر آباد لوٹ جائیں گے اس کے بعد وہ پھر سے 2 ؍فروری سے 19 ؍فروری تک ممبئی کے دورے پر آئیں گے ۔اس کے پروگرام ترتیب دیئے جارہے ہیں ۔پچھلے دنوں یوم جمہوریہ کے موقعہ پر مجلس کے ممبئی صدر دفتر پر جھنڈ ا سلامی کا پروگرا ہوا ۔اس موقعہ پر اپنی تقریر میں ممبئی مجلس اتحاد المسلمین کے صدر عبد الرحمن شاکر پٹنی نے ایک بار پھر ممبئی میونسپل انتخابات میں مجلس کی فیصلہ کن جیت کے عزم کا اظہار کیا ۔انہوں نے کہا کہ مجلس ممبئی میونسپل میں اہم کردار ادا کرے گی ۔ اس کا اول روز سے ہی عوام کی خدمت ترجیحی مقاصد میں سے ہیں۔انہوں ایک بار پھر اس بات اعادہ کیا کہ اگر نام نہاد ہمارے لیڈروں نے عوامی مفاد میں خصوصا مسلمانوں اور پسمادہ طبقات کیلئے کام کیا ہوتا تو ہمیں انتخابی سیاست میں آنے کی ضرورت ہی نہیں پڑتی لیکن ستر برسوں کی ناکامی اور محرومی سے قوم کو باہر نکالنے اور قوم کو عزت وقار کی زندگی کی طرف لوٹانے کیلئے ہم نے عملی سیاست میں حصہ لیا ہے اور ہم یہ دکھانے کی مقدور بھر کوشش کریں گے کہ عوام کی خدمت کیسے کی جاتی ہے۔ہم نے پہلے بھی کہا ہے کہ ہمارے نمائندے کارپوریشن میں پہنچیں گے تو وہ پسماندہ محلوں کی ترقی پر خصوصی دھیان دیں گے اور ہم آج بھی اپنے اس موقف پر قائم ہیں ۔ 

مجلس اتحاد المسلمین ممبئی کے صدر دفتر میں پریس کانفرنس  میں ممبئی میونسپل انتخاب کیلئے اپنے امیدواروں کی پہلی فہرست جاری کرتے ہوئے ۔تصویر:شہزاد منصوری

ممبئی:مجلس اتحاد المسلمین نے آج یہاں ممبئی میونسپل انتخابات کے امیدواروں کی پہلی فہرست جاری کی ہے ۔ جس میں 18 امیدواروں کے ناموں کا اعلان کیا گیا ہیجس میں دو غیر مسلم امیدواربھی شامل ہیں ۔
پارٹی ممبئی صدر دفتر میں ممبئی شہر صدر شاکر پٹنی نے امیدواروں کے ناموں کا اعلان تلنگانہ سے خصوصی طور پر ممبئی آئے مجلس کے رکن اسمبلی احمد بلالہ اور ریاستی اسمبلی میں مجلس کے رکن وارث پٹھان کی موجودگی میں کیا ۔اس موقعہ پر اخبار نویسوں سے خطاب کرتے ہوئے مجلس کے قائدین نے کہا کہ ان کی پارٹی پورے شہر میں تقریباًپچاس سیٹوں پرقسمت آزمائی کرے گی اور انہیں توقع ہے کہ مجلس کے امیدواروں کو زیادہ تر حلقوں میں کامیابی حاصل ہو گی ۔رکن اسمبلی احمد بلالہ نے کہا کہ مجلس کے لیڈران اسد الدین و اکبر الدین اویسی نے ممبئی کے مسلمانوں سے وعدہ کیا تھا کہ اگر مجلس کے امیدواروں کو نمایاں کامیابی حاصل ہوئی تو ممبئی میونسپل کارپوریشن کے 37ہزار کروڑ کے بجٹ کی ایک خطیر رقم کو مسلم علاقوں میں خرچ کرنے پر مجبور کریں گے نیز یہی بات ان کے انتخابی منشور میں بھی شامل ہو گی جس کا جلد ہی اجرا کیا جائے گا ۔احمد بلالہ نے اخبار نویسوں کو مزید بتایا کہ کانگریس سمیت دیگر پارٹیوں کے لیڈران بھی ایم آئی ایم میں شامل ہورہے ہیں اور انہیں غیر مشروط طور پر پارٹی میں شامل کیا جائے گا ۔انہوں نے مزید کہا کہ دیگر سیاسی پارٹیوں سے مجلس میں شامل ہونے والے لیڈران کو میونسپل انتخابات میں ٹکٹ دینے کا حتمی فیصلہ پارٹی ہائی کمان ہی کرے گی۔جب ان سے یہ دریافت کیا گیا کہ گذشتہ بیس برسوں سے کانگریس کی خاتون میونسپل کاؤنسلر وقار النساء انصاری ایم آئی ایم میں شامل ہوئی ہیں تو انہوں نے اس بات سے انکار کیا اور کہا کہ دیگر سیاسی پارٹیوں سے تعلق رکھنے والے بیشتر لیڈران کی ایم آئی ایم میں آمد متوقع ہے اور جلد ہی یہ بات بھی ظاہر ہو جائے گی ۔اخباری نمائندوں سے گفتگو کرتے ہوئے مجلس کے قائدین اس بات سے بھی انکار کیا کہ پارٹی میں کسی قسم کی کوئی بے چینی ہے ۔انہوں نے کہا کہ یہاں جو بھی آیا ہے یا آئندہ آئے گا اس کا صرف ایک ہی مقصد ہے عوام کی خدمت ۔مجلس کی پہچان ہی کا ہے ۔ہمارا کام ہی ہماری پہچان بنے گا ۔ایک اخباری نمائندے کے اس سوال پر کہ مجلس کا کسی پارٹی سے کوئی الائنس نہیں ہے پھر کیوں امیدواروں کی فہرست جاری کرنے میں تاخیر ہو رہی ہے ۔ان کا کہنا تھا کہ ہمارے پاس امیدواروں کی درخواست زیادہ ہے جس میں سے ہمیں زیادہ بہتر امیدواروں کا انتخاب کرنا مقصود ہے ۔
اس موقعہ پر رکن اسمبلی وارث پٹھان نے اخبار نویسوں کو بتایا کہ پارٹی کی یہ پہلی فہرست ہے اور جلد ہی دوسری فہرست جاری کردی جائے گی جس میں دیگر ناموں کا اعلان کیا جائے گا ۔جن امیدواروں کے ناموں کا اعلان کیا گیا ہے اس میں ممبئی شہر سے چار امیدوارجبکہ مضافات سے تعلق رکھنے والے 14امیدوار بھی شامل ہیں ۔جن ناموں کا اعلان کیا گیا ہے وہ اس طرح ہیں ۔محمد شمیم اعظمی چارکوپ20 ،شاکر نصیرالدین شیخ ڈندوشی43 ،نسرین فہیم خان ڈندوشی44 ،شیخ فردوس عارف اندھیری66 ،شگفتہ حسین چودھری باندرہ87 ،ایڈووکیٹ عادل کھتری باندرہ96 ،گلناز قریشی باندرہ 92 ،شریف ابراہیم گوونڈی139 ، محمد عمران اکرم قریشی چاندیولی162 ،سجاتا رمیش بھالے راؤ سائین دھاراوی189 ،عمر اسد بائیکلہ 208 ،محمد عادل قریشی بائیکلہ211 ،حاجی نثار احمد چاند شیخ ممبا دیوی221 ،پشپا بلراج دھاراوی 188 ،جمال خان چاندیولی 164 ،نازمین سکندر خان ملاڈ مالونی 49 ،گل میناز بیگم دھاراوی سائین 187 ،اور متین نائیک بائیکلہ 209 ۔
اخبار ی کانفرنس میں ممبئی مجلس جنرل سیکریٹریز حاجی عبد الحمید شیخ،سید عابد اور آصف خان بھی موجود تھے۔

نہال صغیر

مصنفہ :رعنا ایوب ۔ترجمہ محمد ضیاء اللہ ندوی
ہندوستانی صحافت میں تہلکہ نے جو سنگ میل طے کیا ہے وہ اب تک کسی کے حصہ میں نہیں آیا ،رعنا ایوب بھی اسی سے وابستہ ایڈیٹر رہ چکی ہیں ۔زیر نظر کتاب’ گجرات فائلس ،پس پردہ حقائق کا انکشاف ‘میں انہی واقعات کو پیش کیا گیا ہے جو ہر حالات سے با خبرانسان واقف ہے ۔یہ کتاب اس سے مستثنیٰ صرف ان معنوں میں ہے کہ ان حالات اور واقعات میں سے بھی جو حقائق عام میڈیا میں نہیں آپائے تھے وہ یہاں پیش کئے گئے ہیں ۔کتاب پہلے انگریزی میں آئی تھی اور اب اسے اردو میں پیش کرنے کا قابل فخر کارنامہ ’مضامین ڈاٹ کام ‘ اور ان کی ٹیم نے انجام دیا ہے ۔کتاب کی تقریظ جسٹس بی این سری کرشنا نے لکھی ہے۔وہ شروع میں ہی سنسکرت کے ایک اشلوک سے اس کی شروعات کرتے ہیں جس کا اردو ترجمہ بھی پیش کیا گیا ہے ۔اردو ترجمہ ہے ’’حقیقت کا چہرہ طلائی مکھوٹے میں چھپادیا گیا ہے ،اے پوشان ،اٹھو اور سچے دھرم کی خاطر اس کی نقاب کشائی کرو‘‘ ۔یہاں اس کتاب میں پوشان کا کردار رعنا ایوب نے ادا کرتے ہوئے گجرات کے بعض پس پردہ حقائق جن پر سیاسی قوت نے اپنے ظلم و جبر کی دبیر چادر ڈال رکھی تھی ، اسے بے نقاب کرنے کا جوکھم بھرا کارنامہ انجام دیا ۔کتاب پڑھ کر جہاں آپکے پسینے چھوٹ جائیں گے کہ اب آگے کیا ہوگا ؟وہیں ایسے مواقع بھی آتے ہیں جب آپ مسکرائے بنا نہیں رہ سکتے مثال کے طور پر رعنا اس کتاب کے صفحہ 78 پر خاتون پولس اہلکار کے ساتھ فلم دیکھنے جاتی ہیں فلم کی نمائش کے شروع میں ہی خاتوں پولس اہلکار نے جو کچھ کہا وہ کافی دلچسپ ہے وہ لکھتی ہیں ’’ فلم نے تہلکہ کے ذریعہ کئے گئے کام کا اعتراف کیا تو اوشا نے چپکے سے مجھ سے کہا ،تم نے تہلکہ کے بارے میں سنا ہے ۔یہ بد معاشوں کی ایک ٹولی ہے ۔اپنے فون میں کیمرہ لگا کر یہ لوگ ادھر ادھر گھومتے پھرتے ہیں اور خفیہ طریقے سے لوگوں کی تفتیش کرتے ہیں ۔ انہوں نے گجرات میں ہمارے لوگوں کی بھی خفیہ تفتیش کی تھی ۔اپنے بھولپن کو مزید بڑھانے کی کوشش کرتے ہوئے میں نے پوچھا :’تہلکہ ‘ کیا ہے ؟کوئی ٹی وی چینل ہے ؟نہیں ،نہیں ۔یہ ایک ویب سائٹ ہے ۔کبھی مت دیکھنا اس کو ۔انڈیا کے بارے میں ساری غلط باتیں ہوتی ہیں ۔فلم دیکھتے ہوئے اوشا نے جواب دیا ‘‘۔رعنا نے اتنے خشک عنوان کو اتنے خوبصورت پیرائے میں لکھا ہے اس کا مجھے اندازہ نہیں تھا ۔کتاب کافی دلچسپ ہے جسے پڑھ کر جہاں پس پردہ حقائق کا ادراک ہوگا وہیں آپ کو محسوس ہوگا کہ یہ کتاب کسی بہترین ناول نگار کی تصنیف ہے ۔جبکہ یہ موجودہ حالات میں ملک کی حقیقت کی عکاس ہے ۔مترجم محمد ضیاء اللہ ندوی کا کمال ہے کہ انہوں نے ترجمہ کرتے ہوئے اس کی روح کا خیال رکھا جس نے کتاب کو اردو کے قالب میں مزید بہتر انداز عطا کردیا ۔یقینا یہ اردو قاری کیلئے ایک قیمتی تحفہ ثابت ہوگی۔اس کتاب کو جتنا ممکن ہو سکے اردو داں حلقہ تک پہنچائیں تاکہ رعنا ایوب جیسی صحافیہ کی مزید حوصلہ افزائی ہو سکے ۔ممبئی میں کتاب حاصل کرنے کیلئے مکتبہ جامعہ ،محمد علی روڈ نزد بھنڈی بازار میں موبائل نمبر 8108307322 پر رابطہ کرسکتے ہیں ۔

نہال صغیر
رشدی کی شیطانی آیات کا ادبی زبان میں جواب دینے والے محمد سعید علی میاں ٹولکر نے اپنی تازہ تصنیف ’’اللہ اور ملا ‘‘ سے کچھ لوگوں کو چونکایا ہے ۔انہوں نے شیطانی آیات کا جواب ’’رحمانی آیات ‘‘ لکھ کر دیا تھا۔ میرے خیال میں یہ ایک بہترین کوشش تھی جس کی پذیرائی کی جانی چاہئے ۔زیر نظر کتاب ’’اللہ اور ملا ‘‘ میں انہوں نے سلسلہ وار قرآن سنت سے اللہ کی قدرت کاملہ اور اس کی عظمت و بزرگی کی وضاحت کی ہے۔ساتھ ہی انہوں نے یہ بھی بتانے کی کوشش کی ہے کہ اللہ کے بارے میں ہمارے دور میں کیسے کیسے نظریات قائم ہو گئے ہیں ۔انہوں نے اس کی بنیاد پر اپنے قلم کی نوک کو نشتر کی طرح استعمال کرکے غلط نظریات کا آپریشن کرکے اس کے تدارک کی کوشش کی ہے ۔معلوم ہوا کہ ان کی کتاب پر جلد بازی میں کچھ افراد کے ذریعہ اعتراض کرتے ہوئے اسے واپس لینے کا دبائو ڈالا گیا ۔جبکہ اس کی توضیح نہیں کی گئی کہ کیوں ؟ میں نے ہفتہ وار اخبار کے اعتراض کے چند نکات کے مطابق مطالعہ کیا اور تسلسل کے ساتھ آدھی سے زیادہ کتاب پڑھ چکا ہوں لیکن کہیں کوئی ایسی بات نہیں ملی جس سے اس کتاب کو کلی طور سے مسترد کردیا جائے ۔ہاں کچھ باتیں انہوں نے ایسی لکھی ہیں جس سے ہر شخص کا متفق ہونا ضروری نہیں ہے اور نا ہی اس کیلئے کسی کو مجبور کیا جاسکتا ہے ۔مجھے بھی ان کی بعض باتوں یا دعووں سے اتفاق نہیں ہے جیسے انہوں نے کتاب کے سرورق پر نام کے نیچے لکھا ہے ’پوری اسلامی دنیا کیلئے پہلی مدلل کتاب‘لیکن اس کا مطلب یہ نہیں ہے کہ ان کے اس ایک دعوے کی بنیاد پر ہم ان کی علمی کاوش کو یکسررد کردیں ۔ایسے ہی شدت پسندانہ رویہ کی وجہ سے مسلمانوں میں اہل علم و تفتیش اور محققین کمیاب ہوتے جارہے ہیں ۔جن کا ذہن اس جانب کام کرتا ہے تو وہ ایسے اذہان کے خوف سے کونے میں سمانے کو ہی بہتر تصور کرتے ہیں کہ کون جائے خواہ مخواہ ان سے الجھنے !اس کا نجام یہ ہے پوری ملت پر جمود کی سی کیفیت طاری ہے ۔مذکورہ کتاب ہمیں سوچنے اور غور فکر کی دعوت دیتی ہے۔مصنف نے لہجہ ذرا سخت اپنایا ہے ۔اس لئے کچھ لوگوں کو گراں بار ہے ۔ہر شخص کی سوچ و فکر یکساں نہیں ہوتی ہے ۔ ہمیں یہ قبول ہے کہ مصنف نے سخت لہجہ کے بجائے حکیمانہ طرز اپنایا ہوتا تو زیادہ بہتر ہوتا ۔لیکن جس طرح ڈاکٹروں کی دو قسمیں ہوتی ہیں ۔ایک صرف مرض کی تشخیص کرکے دوا دے دیتا ہے جبکہ دوسرا ناقابل علاج مرض کیلئے عمل جراحی سے کام لیتا ہے ۔مصنفین اور محققین و ناصح بھی دو طرح کے ہوتے ہیں ۔ایک صرف نصیحت کرکے خامیوں کی نشاندہی کرکے خاموش ہوجاتا ہے جبکہ دوسرا ذرا سختی کے ساتھ ان خامیوں اور اس کے برے اثرات کی جانب اشارہ کرتا ہے۔ 160 صفحات پر مشتمل 150/= روپئے میں دستیاب یہ ایک بہترین کتاب ہے ۔اردو زبان کے ساتھ خود اردو والے جو سلوک کرتے ہیں وہ اس کتاب کے ساتھ بھی ہے، املا اور ٹائپنگ کی غلطیاں بہت ہیں ۔جگہ بجگہ اردو کے بجائے مصنف کا کوکنی لہجہ غالب آجاتا ہے ۔مزید جانکاری یا کتاب کی دستیابی کے لئے مصنف سے ان کے موبائل نمبر 7507480947 پر رابطہ کرسکتے ہیں ۔مصنفین ،محققین اور اہل علم کی قدر کیجئے یہ کسی بھی قوم کا بہت بڑا سرمایہ ہوتے ہیں ۔ان کی غلطیوں کی جانب متوجہ ضرور کیجئے لیکن ان کی عزت و تکریم میں محض معمولی اختلاف کی بنیاد پر کمی مت کیجئے ۔

جلال الدین اسلم، نئی دہلی
موبائل نمبر: 09868360472

چاروں طرف بھانت بھانت کی بولیاں ہیں، کان پڑی آواز سنائی نہیں دے رہی۔ ہر ایک اپنا راگ الاپ رہا ہے۔ کنفیوژن ہے، جھوٹ ہے، دھوکہ ہے اور دنیا بھر کے کھوٹے سکے ہیں جو سچے سکوں کے دھوکے میں اپنے دام کھرے کرنے کے چکر میں لگے ہوئے ہیں۔ ایسے میں میرے پیارے دیس واسیو! اپنے قدم پھونک پھونک کر رکھنے کی ضرورت ہے۔ بہت احتیاط تم پر لازم ہے۔
میرے پیارے لوگو! شعبدے باز اپنی اپنی ڈفلیاں لیے اپنے اپنے راگ سناکر تمہیں اپنے ڈھب پر لانا چاہتے ہیں۔ ان میں سے کوئی مسلمانوں کا نعرہ لگاکر پوری امت مسلمہ کی جمع پونجی لوٹ لینا چا ہتا ہے اور کوئی اپنا پورا زور لگاکر اپنے حلق کا پھنسا کانٹا  نکالنے میں لگا ہوا ہے۔ یہی نہیں بلکہ بعض تو مسلمانوں کا اجتماعی شیرازہ بکھیرنے میں اپنی پوری قوت صرف کیے ہوئے ہیں اور کو ئی ملک کے جمہوری آئین سیکولر کردار چھین لینے کے درپے ہے۔ ملک کی سب سے قیمتی شے گنگا جمنی تہذیب پر شب خون مارنے میں بھی بہت سے آگے آگے ہیں، کوئی کہانی سنانے کا ماہر ٹھگ ہے اور ایسا سماں باندھتا ہے کہ اچھے بھلے سمجھ دار انسان کو اس کے جھوٹ پر سچ کا گمان ہونے لگتا ہے۔ کوئی اپنے چہرے کی ’نورانیت‘ فروخت کر رہا ہے اور کوئی اپنے جبہ و دستار کی قیمت لگاکر تمہیں اپنا بنالینے کی کوشش میں ہے۔ مگر اصل میں سب اپنی اپنی ڈگڈگی بجا بجاکر مریدوں کی تلاش میں ہیں کہ بھولے بھالے انسانوں کے نفس کو اپنے اندھے مقلد پیرو کاروں سے زیادہ کوئی چیز لذت دہن نہیں ہوتی۔ میرے پیارے بھائی بہنو! اپنے کان دل و دماغ کھلے رکھنا۔ بدلائو کے نام پر کہیں دھوکا نہ کھا جانا۔ یہ بدلائو کیا ہے جس کا بار بار ذکر ہو رہا ہے اسے اپنے کانوں، ذہنوں اور آنکھوں سے خوب دیکھ سمجھ اور پرکھ لینا۔
میرے پیارو! نفس تو شیطان کا بھی استاد تھا۔ یہ نفس ہی تھا جس نے عزازیل کو اس کے علم و عباد ت کے باوجود ایسا دھوکہ دیا کہ اسے محبوب سے مبغوض ترین بنا ڈالا۔ الیکشن کا دور دورہ ہے۔ آج پھر چاروں جانب نفس کے ڈسے ہوئے انسان نما بھیڑیوں کے غول کے غول پھر رہے ہیں۔ کسی نے اپنے قلم کو کمان بناکر تمہیں ڈسنے یا شکار کرنے کی ٹھانی ہے تو کوئی ٹی وی پر اپنے زور بیان کے ساتھ براجمان ہوکر تمہیں چکنی چوپڑی باتوں سے گمراہ کرنے کے لیے درپے ہے۔ کوئی ہمدرد کے لبادے میں، کوئی رہنما کے ’گیٹ اپ‘ میں، کوئی ’علم‘ کے نام پر محض ’معلومات‘ بیچ کر تمہارے اخلاص کا خریدار ہے تو کوئی تمہیں بہتر مستقبل فراہم کرنے کے نام پر دھوکہ دے رہا ہے۔ میرے پیارے لوگو! یہ موقع ہے ہر پل جاگتے رہنے کا۔ ذرا سی پلک جھپکی، تمہارا سب کچھ لٹ جائے گا۔ ہمیشہ اپنی نظر اپنے شعبدہ باز ہمدردوں کے اصل اور پس پردہ ان کے مقاصد کی تلاش پر جمائے رکھنا۔
 میری پیاری مائوں بہنو! آج ہم جس دور سے گزر رہے اور جن حالات سے دوچار ہیں یہ سب قرب قیامت کی نشانیوں میں ہے۔ میری دینی بہنو! قرب قیامت کا دور دجال کا دور ہے جسے آپ کے اور میرے نبی محترمؐ نے انسانی تاریخ کا سب سے بڑا فتنہ قرار دیا تھا۔ دجال اور دجل دراصل دھوکے اور فریب ہی کے عربی نام ہیں۔ ساحران فرعون کی طرح عہد حاضر کے ’ساحران دجال‘ بھی ا تنی مختلف، منفرد اور لاجواب چالوں کے ساتھ آپ کے سامنے آرہے ہیں کہ اس عہد کے موسیٰؑ کو بھی کنفیوژ ہی کرڈالیں۔ ذرا ا پنے ارد گرد نظر دوڑائیں، ہزاروں رسیاں اور لاٹھیاں سانپ اور ازدہے بن کر موسیٰؑ کے معجزے کو محض جادو ثابت کرنے کی سرتوڑ کوشش میں ہیں۔ ایسے میں میری بہت محترم بہنو! ذرا دیکھ بھال کر اپنی رائے یا حق رائے دہی کا استعمال کرنے سے پہلے ٹھنڈے دماغ کے ساتھ سوچ سمجھ کر فیصلہ کرنا ہے۔
میرے دینی بھائیو اور نوجوانو! تمہیں مداریوں کی ڈگڈگی کی مسحور کن آواز میں خود کو کھو نہیں دینا ہے، تمہیں تو ملت کا بیش قیمت اثاثہ ہو، ا گر تم کھوگئے تو گویا پوری ملت کھوگئی۔ یاد رکھو! تم قافلہ اصحاب بدر کا تسلسل ہو جسے اس خطرناک عہد میں دین کی اس عظیم امانت کو بحفاظت اگلی نسلوں تک پہنچانا ہے۔ تم عمر فاروقؓ اور عمر بن عبدالعزیزؒ کے وارث ہو۔ تم نے شاہ ولی اللہؒ، امام غزالیؒ، ابن تیمیہؒ اور مجدد الف ثانی ؒ سے رہنمائی حاصل کی ہے۔ تم نے ملت کی نابغۂ عصر شخصیات کی بصیرت سے اپنے دل و دماغ کو منور کیا ہے۔ تم اس گھٹا ٹوپ تاریکی میں پہاڑوں کے چراغ ہو۔ تم تاریکیوں کی شکار انسانیت کے لیے روشنی کے پیامبر ہو، یہ سب مارگزیدہ ہیں او رتمہارے پاس تریاق ہے، دیکھنا بہک نہ جانا۔
انسانیت اندھوں کی قیادت میں خطرناک پہاڑی راستوں پر چل رہی ہے اور صرف تمہارے پاس ہی بینائی ہے۔ یہ اندھیروں کے شکار ہیں اور تمہارے ہاتھوں میں چراغ ہے۔ ایسے میں اگر تم راستہ کھوبیٹھے۔۔۔ تم کسی شعبدہ باز، کسی بہروپئے، کسی ٹھگ کا شکار ہو گئے تو یاد رکھنا، ملت کے مستقبل کی نسلیں تمہیں معاف نہیں کریں گی۔ ان دھوکے بازوں سے بچنے کا ایک ہی راستہ ہے۔۔۔ صرف ایک ہی راستہ۔۔۔ خدا کی قسم بس ایک ہی طریقہ۔۔۔ قرآن و حدیث و دینی لٹریچروں سے اپنا بھرپور اور قریبی تعلق استوار کرلو۔ اپنی اجتماعیت کی تمام تر تلخیوں کے باوجود جہاں جتنا اور جیسے بھی ممکن ہو اپنی بات آگے پہنچاتے رہو۔ یعنی قرآن، اخوت اور دعو ت کا وہ راستہ اختیار کرلو جو سورہ کہف میں کہفی زندگی گزارنے کے لیے اللہ تعالیٰ نے درج فرمایا ہے اور کسی نئی آواز، نئی بات، نئے رہنما، نئی دعوت، نئی فکر، نئی شخصیت، نئی روشنی، نئے لٹریچر کو اس وقت تک قبول نہ کرو جب تک اسے اچھی طرح پرکھ نہ لو، اس کے ماضی اور مستقبل کے عزائم کو، اس کے دعوئوں کو اور اس کے کردار کی روشنی میں جانچ نہ لو، چھان پھٹک نہ لو، اللہ او راس کے دین رسولؐ اور ان کی اُمت کے ساتھ اس کی وفاداری کو پرکھ نہ لو، تب تک اس کی محض باتوں، دعوئوں اور ساحری سے اس کے بارے میں نہ خود کوئی رائے قائم کرو اور نہ ہی کسی رائے کو آگے بڑھائو، خود سمجھ نہ پائو تو اپنے صاحب الرائے اور صائب الرائے لوگوں سے پوچھ لو اور ان پر بھروسہ کرو، دامِ ہم رنگ زمیں سے بچنے کا یہی نسخہ ہے۔
کسی نے کیا خوب کہا ہے:

دے رہے ہیں جو لوگ تمہیں رفاقت کا فریب
ان کی تاریخ پڑھوگے تو دہل جائو گے
تم ہو اک زندہ جاوید روایت کے چراغ
تم کوئی شام کا سورج ہو کہ ڈھل جائو گے

بیشک اگر مسلمان سچ مچ مسلمان ہوجائے تو وہ ڈھال تو ہوسکتا ہے مگر ڈھل نہیں سکتا۔ آج پورا عالم اسلام، اسلام دشمنوں کے نرغے میں ہے۔ طرح طرح کے بہتان اور تہمتوں کا طوفان برپا ہے اور پوری قوم تماشائی بنی ہوئی ہے۔ یہ صورتِ حال گزشتہ دہائیوں سے بنی ہوئی ہے اس میں کسی خاص ملک کی تخصیص بھی نہیں رہی، ہمارا ملک بھی اس سے بری نہیں۔ جب سے اس ملک میں فرقہ واریت نے جگہ بنائی ہے مسلمانوں کا عزت کے ساتھ جینا بھی دوبھر ہوگیا ہے۔ وہ ملک جو دنیا کا دوسرا بڑا جمہوری ملک کہلاتا ہے، آئین و قانون جمہوری قدروں پر محیط ہے لیکن یہ سب کچھ کاغذوں اور قانونی مسئلوں میں ہی پایا جاسکتا ہے۔ ملک کے ہر شہری کو عملاً برابر کے حقوق حاصل نہیں۔ ہمارے ملک کے انتخابات بھی اس بات کے گواہ ہیں کہ ہر انتخاب ذات پات، علاقائیت، زبان و مذہب کی بنیادوں پر ہی لڑا جاتا رہا۔ ملک کی سب سے بڑی سیکولر پارٹی کانگریس کی پوری انتخابی تاریخ گواہ ہے کہ اس کا کوئی بھی الیکشن فرقہ واریت سے پاک رہا ہو۔ یہی وجہ ہے کہ آج ملک میں مذہب کے نام پر برادری اور علاقائیت کے نام پر درجنوں سیاسی تنظیمیں سرگرم عمل بھی ہیں اور انتخابات میں انہیں بنیادوں پر حصہ بھی لیتی ہیں۔ سپریم کورٹ کو تو چاہیے تھا کہ مذہب کی بنیاد پر الیکشن لڑنے پر پابندی لگانے کے ساتھ ساتھ ان تمام سیاسی جماعتوں کے نام و نشان تک ختم کردینے کا حکم دیتی جن کے نام اور کام فرقہ واریت پر مبنی ہیں۔ اسی طرح الیکشن پر خرچ ہونے والی مد کی حد مقرر کردینی چاہیے۔ ایسی صورت میں ہی صاف ستھرے انتخابات بھی ہوسکتے ہیں اور جمہوریت ا ور جمہوری قوانین کی روح بھی بحال رہ سکتی ہے۔ اور ساتھ ہی مسلمانوں پر لگنے والے الزامات کی حقیقت بھی سب کے سامنے آجائے گی۔
بہرحال میرے بھائیو بہنو! الیکشن الیکشن کا کھیل جاری ہے۔ ہر مداری، ہر جادوگر اور ہر شعبدے باز اپنے اپنے کرتب دکھا رہے ہیں اور ہر ایک کا دل جیت لینے میں ایک دوسرے کو مات دے رہے ہیں۔ اب دیکھنا یہ ہے کہ اس ہار جیت میں ہمارا سیکولر آئین جیتتا ہے یا فرقہ پرستوں کا وہ طائفہ جسے عام زبان میں فاشسٹ کہتے ہیں۔
٭٭٭

محی الدین غازی

ہندوستانی شہری کی حیثیت سے ہندوستانی مسلمانوں نے انتخابی عمل میں شرکت کا سب سے پہلا تجربہ 1920 میں کیا، اور اس کے بعد سے مسلمان انتخابی سیاست کے تجربات سے مسلسل گذررہے ہیں۔ایک صدی مکمل ہونے کو ہے لیکن اب تک یہی محسوس ہوتا ہے کہ مسلمان سیاسی شعور کے معاملہ میں اپنے ہم وطنوں سے کافی پیچھے ہیں، اور اب تک ان کا سیاسی شعور بالغ نہیں ہوسکا ہے۔ اسباب کئی ہوسکتے ہیں، ان اسباب پر ذرا کھل کر گفتگو ہو بس یہی اس مضمون کا مقصد ہے۔میرے خیال میں سیاسی بلوغ اور پختگی کی دو اہم علامتیں ہیں، پہلی یہ کہ سیاسی میدان میں کچھ خاص لوگوں کی اجارہ داری قائم نہ ہوسکے ، بلکہ نئے ہمت ور کھلاڑیوں کو اپنے جوہر دکھانے کا پورا موقعہ حاصل ہو۔ دوسری یہ کہ اگر معاشرہ کے کچھ لوگ اقدار پر مبنی سیاست پر یقین رکھتے ہیں، تو ان کو ان اقدار کی پاس داری کا پورا پورا موقعہ حاصل ہو، اور کوئی مصلحت ان کے پاؤں کی زنجیر اور راستے کی رکاوٹ نہ بن جائے۔مسلمانوں کی سیاسی پسماندگی اور ناپختگی کا ایک مظہر یہ ہے کہ ان کے درمیان نئی سیاسی قوتوں کو ابھرنے کا موقعہ نہیں ملتا ہے، دوسرا مظہر یہ  ہے کہ اقدار پر مبنی سیاست کے لئے ساز گار ماحول حاصل نہیں ہے۔ بظاہر ہر فرد اقدار واخلاق کا حامی نظر آتا ہے، لیکن جب انتخابات کا نقارہ بجتا ہے تو ساری اقدار پسندی دھری کی دھری رہ جاتی ہے اور دو بیمار رجحان ذہن ودماغ پر سوار ہوجاتے ہیں۔ ایک یہ بیمار رجحان کہ ووٹوں کو بٹوارے سے بچانے کے لئے کسی ایک بظاہر مضبوط امیدوار کی طرف سب جھک جائیں، دوسرا یہ بیمار رجحان کہ فسطائیت کے مقابلے میں مضبوط تر امیدوار کی غیر مشروط حمایت اور تائید کردی جائے۔ووٹوں کے تقسیم ہوجانے کا خوف مسلمانوں کے دل ودماغ میں اس طرح بیٹھا ہوا ہے کہ انہیں اپنی صواب دید کے مطابق کوئی فیصلہ نہیں کرنے دیتا۔ سیاسی بازیگر اس خوف کا خوب کثرت سے استعمال کرتے ہیں۔ سیاسی رہنمائی کرنے والے دانش ور بھی اس خوف سے باہر نکل کر نہیں سوچ پاتے۔بے سروپا حوالے دے کر کچھ امیدواروں کو بیٹھ جانے کی صلاح دی جاتی ہے، تو کچھ کو بے وزن کردیا جاتا ہے، کہ اس بار سروں پر منڈلاتے خطرے کو روکو اگلی بار آپ کو بھی موقعہ دیں گے، وہ اگلی بار کبھی نہیں آتا، اور خطرہ ہر بار حاضر ہوجاتا ہے۔مثال کے طور پر حیدرآباد میں مجلس کے کارکن دوسرے مقابل امیدواروں یا پارٹیوں کے خلاف ماحول بنانے کے لئے پروپیگنڈہ کرتے ہیں کہ ان نئے امیدواروں کی وجہ سے ووٹ تقسیم ہوسکتے ہیں ، اور اگر ووٹ آپس میں تقسیم ہوگئے تو کوئی دوسرا نکل جائے گا، اور جب یہی پارٹی مہاراشٹر پہونچتی ہے تو وہاں کی سیکولر پارٹیاں اس کے خلاف پروپیگنڈہ کرتی ہیں کہ مجلس یہاں مسلمانوں کے ووٹ بانٹنے کی نیت سے آئی ہے۔
دراصل ہر ہندوستانی شہری کو الیکشن میں کھڑے ہونے کا حق حاصل ہے، اور ہر شہری کو اپنے من پسند امیدوار کو ووٹ دینے کا حق حاصل ہے، البتہ کسی کو اخلاقا بھی یہ حق حاصل نہیں ہے کہ وہ کسی بھی امیدوار کو یا ووٹر کو یہ الزام دے کہ اس کی وجہ سے اس کے من پسند امیدوار کے ووٹ تقسیم ہوئے اور وہ جیت نہیں سکا۔ اس طرح کی غیر جمہوری الزام بازی سیاسی بچکانہ پن کا پتہ دیتی ہے۔ووٹوں کے بٹوارے کو زیادہ اہمیت دینے کا سب سے بڑا نقصان یہ ہے کہ مسلمانوں کے درمیان نئی سیاسی قوت اور قیادت کو نشوونما کے لئے سازگار ماحول نہیں مل پاتا ہے، ایمان داری اور فلاح وبہبود کا جذبہ اور نعرہ لے کر کچھ ہمت ور اٹھتے ہیں، لوگ ان کے قدر دان بھی ہوجاتے ہیں، لیکن پھر خوف اور اندیشے کی ایک لہر چلتی ہے اور یوں سارے ووٹ گھاگ بازیگروں کی جھولی میں اس طرح جاگرتے ہیں کہ گویا لاکھوں عوام میں چند سو بھی اصول پسند اور قدروں کے پاس دار نہیں تھے۔فسطائیت کے غلبے اور ووٹوں کے بٹوارے کا حوالہ دے کر ہر انتخاب کے موقعہ پر نئے کھلاڑیوں کی بری طرح ہمت شکنی کردی جاتی ہے، اور پرانے کھلاڑیوں کو ان کی خراب پرفارمینس کے باوجود اپنے اوپر مسلط رہنے دیا جاتا ہے۔ بہت ساری دینی جماعتیں اور دانش ورانہ تنظیمیں بھی سیاسی رہنمائی کے نام پر اس بچکانہ کھیل میں شریک ہوجاتی ہیں، ہوسکتا ہے اس سے چھوٹی مدت کے فائدے کچھ حاصل ہوجاتے ہوں لیکن طویل مدت کے فائدوں سے عوام کلی طور سے محروم رہتے ہیں۔اور اس طرح سیاسی بلوغ اور پختگی کی عمر ایک صدی گزرنے پر بھی نہیں آتی ہے۔
دراصل سیاسی پختگی کا تقاضا یہ ہے کہ آدمی اس کو ووٹ دے جو اس کی نظر میں سب سے بہتر ہو، نہ کہ اسے جو ہو تو اخلاقی لحاظ سے دیوالیہ مگر جیتنے کی پوزیشن میں بتایا جاتا ہو۔ حالانکہ وہ جیتنے کی پوزیشن میں صرف  اس لئے دکھائی پڑتا ہے کہ ہر شخص فیصلہ اس کی شخصیت کے بجائے اس کی پوزیشن کو دیکھ کر کررہا ہوتا ہے، وہ بھی لوگوں کی کمزوری جانتا ہے اس لئے اپنی شخصیت سے بے پرواہ ہوکر اپنی پوزیشن کو بڑا دکھا نے کے لئے الٹے سیدھے ہتھکنڈے استعمال کرتا ہے۔پھر اس میں کیا حرج ہے کہ جیت تو ایک بد کردار آدمی کی ہو، لیکن ایک دیانت دار آدمی کو ہارنے کے باوجود ان سب لوگوں کے ووٹ ملیں جو دیانت داری کے قدر دان ہیں، کہ یہ بات ریکارڈ میں تو رہے کہ عوام کے درمیان دیانت داری کے قدردان بہر حال پائے جاتے ہیں، سارے کے سارے چڑھتے سورج کے پجاری نہیں ہیں۔
اگر بٹوارے کے اس بیمار تصور سے بالاتر ہوکر نئے افراد کو اپنے سیاسی جوہر دکھانے کا پورا موقعہ دیا جائے، تو ممکن ہے دو چار انتخابات کے نتائج عوام کی چاہ کے بالکل خلاف آجائیں، ہوسکتا ہے دوچار مرتبہ  ایسے لوگ جیت جائیں جن سے دشمنی اور خطرہ ہو، لیکن عوام کی مخلصانہ اور بے لوث ہمت افزائی سیاسی کھلاڑیوں کی ایک زبردست کھیپ ضرور تیار کردے گی، جس کے بہت سارے افراد آگے چل کر عوام کے سچے قائد اور ان کے مفادات کے مضبوط محافظ بن سکیں گے، یہ فائدہ بہت بڑا ہوگا ان وقتی نقصانات کے مقابلے میں جو اس راستے میں اٹھانا پڑ سکتے ہیں۔ظاہر ہے جب انتخابات کا ہنگامہ برپا ہو، یہ سبق عام کرنا بہت مشکل ہے، لیکن دو انتخابوں کے درمیانی وقفے میں جو کافی طویل ہوتا ہے، پوری قوت کے ساتھ اس پیغام کو عام کرنا اچھی ماحول سازی اور مثبت مزاج سازی کے لئے ضرور مفید ہوگا۔نئی پارٹیوں اور تازہ ہمت وروں کو اس کی اہمیت ضرور سمجھنا چاہئے، مبادا ان کے جذبے اور سپنے مسلمانوں کے ناپختہ ونابالغ شعور کی نذر ہوجائیں۔