Showing posts with label Muslim Worlds. Show all posts

بالفور اعلامیہ : ایک اعلامیہ جس نے مشرق وسطیٰ کو ہمیشہ ہمیشہ کے لیے بدل دیا

 


شیخ سلیم


2 نومبر 1917 کو برطانوی حکومت نے ایک یک طرفہ طور پر ایسی دستاویز یا شاہی فرمان جاری کیا جو بیسویں صدی کی اُمت مسلمہ کو سب سے زیادہ نقصان پہنچانے والی دستاویز یا فیصلہ مانی جاتی ہے۔ برطانوی وزیر خارجہ آرتھر جیمز بالفور کے قلم سے لکھی گئی تھی اس دستاویز میں برطانیہ نے فلسطین میں یہودی قوم کے لیے ایک قومی وطن کے قیام کی حمایت کا اظہار کیا۔ یہ کوئی عام سفارتی بیان نہیں تھا بلکہ اس دور کی استعماری ذہنیت اور انگریزوں کی اسلام دشمنی کی عکاسی کرتا تھا، اپنے عروج کے دور میں سامراجی یورپی سلطنتیں یہ سمجھتی تھیں کہ انہیں دور دراز خطوں کے مستقبل کا اُنکے عوام  سمیت فیصلہ کرنے کا حق حاصل ہے، چاہے وہاں رہنے والے لوگوں کی خواہش اور رضامندی حاصل ہو یا نہ ہو۔

سلسلہ  بالفور اعلامیے سے پہلے شروع ہو چکا تھا پہلی عالمی جنگ کے دوران برطانیہ نے عرب باشندوں کی حمایت سلطنت عثمانیہ کے خلاف حاصل کرنے کی کوشش کی، جس کا مقصد خلافت عثمانیہ کو کمزور کرنا اور ختم کرنا تھا جو سامراجی طاقتوں کی آنکھوں میں کھٹکتا تھا جو ملت اسلامیہ کے اتحاد کی علامت تھی اور جس نے مشرق وسطیٰ اور یورپ کے ایک بڑے حصے پر تقریباً چار صدیوں تک حکومت کی تھی۔

مکموہن حسین خط و کتابت (1915-1916) کے ذریعے برطانیہ نے مکہ کے شریف حسین بن علی کو عرب بغاوت شروع کرنے کے لیے آمادہ کیا اور جنگ کے بعد ایک آزاد عرب وطن کی حمایت کا جھوٹا وعدہ کیا۔ ان یقین دہانیوں پر اعتماد کرتے ہوئے جون 1916 میں عرب بغاوت کا آغاز ہوا۔ ہزاروں عرب جنگجوؤں نے، جن کی مدد برطانوی افسران بشمول ٹی ای لارنس (لارنس آف عربیہ) کر رہے تھے، عثمانی فوجی مقامات پر حملے کیے، اہم حجاز ریلوے کو تباہ کیا، کلیدی شہروں پر قبضہ کیا اور اکتوبر 1918 میں اتحادی افواج کو دمشق میں داخل ہونے میں مدد دی۔ انہی افواج نے بیت المقدس پر قبضہ کیا



عربوں کی اس کاوش نے عرب صوبوں پر عثمانی کنٹرول کو کمزور کرنے اور مشرق وسطیٰ میں اتحادیوں کی فتح کو طاقت فراہم کرنے میں اہم کردار ادا کیا۔

مگر عربوں کو بغاوت کے لیے آمادہ کرتے ہوئے بھی برطانیہ اور فرانس نے خفیہ طور پر سائکس پیکو معاہدہ (1916) پر مذاکرات کیے تھے، جس کے تحت عرب دنیا کے بڑے حصے کو اپنے اپنے دائرہ اثر میں تقسیم کیا گیا یعنی بانٹ لیا گیا جنگ کے بعد جرمنی کی شکست ہوئی برطانیہ اور فرانس فاتح قرار پائے فاتح ممالک نے لیگ آف نیشنز قائم کی اور اس کے مینڈیٹ نظام نے اس انتظام کو باقاعدہ شکل دے دی۔ برطانیہ نے فلسطین، ٹرانس جورڈن (موجودہ اردن) اور عراق کا اقتدار سنبھالا، جبکہ فرانس نے شام اور لبنان کا اقتدار حاصل کیا۔ عرب آزادی کا جھوٹا وعدہ ایک سراب ثابت ہوا وعدہ کبھی مکمل طور پر پورا نہ ہوا۔ بلکہ حالات نے ثابت کیا عثمانی حکومت کو برطانوی اور فرانسیسی استعماری حکومت سے بدل لیا ہے، اور اسے جنگ کے دوران کیے گئے وعدوں کو انگریز اور فرانسیسی بھول گئے ۔

یہی وہ پس منظر تھا جس میں برطانیہ نے بالفور اعلامیہ جاری کیا، جس میں فلسطین میں یعنی اُمت مسلمہ کے قلب میں ایک یہودی وطن کی حمایت کا اظہار کیا گیا۔ اس وقت فلسطین کے باشندوں کی بھاری اکثریت عرب مسلمانوں اور عیسائیوں پر مشتمل تھی۔ ان سے کبھی مشورہ نہیں کیا گیا تھا یہ اس اعلامیے پر کی جانے والی بنیادی تنقیدوں میں سے ایک ہے اور اسے استعماری فیصلہ سازی کی بھیانک مثال کے طور پر بڑے پیمانے پر پیش کیا جا سکتا ہے، جس میں مقامی آبادی کی خواہشات کوخود غرض سامراجی مفادات کے تابع کر دیا گیا۔برطانیہ کے محرکات جنگی حکمت عملی اور سامراجی عزائم سے تشکیل پائے تھے۔ فلسطین نہر سویز کے قریب ایک اہم ترین مقام پر واقع ہے، جو برطانیہ کو ہندوستان اور اس کی عالمی سلطنت کے بڑے حصے سے جوڑنے والا اہم راستہ تھا۔ برطانوی رہنماؤں کا یہ بھی خیال تھا کہ صیہونی تحریک کی حمایت سے جنگ کے دوران برطانیہ کی سفارتی پوزیشن مضبوط ہوگی اور مشرق وسطیٰ میں اس کا طویل مدتی اثر و رسوخ بڑھے گا۔اس کے نتائج گہرے اور دیرپا تھے۔ برطانوی مینڈیٹ کے دور میں فلسطین کی طرف یہودی نقل مکانی میں خاطر خواہ اضافہ ہوا، جبکہ یہودی اور مقامی فلسطینی عربوں کے درمیان کشیدگی بھی بڑھتی گئی۔ 1948 میں برطانوی مینڈیٹ کے خاتمے نے اسرائیل کی ریاست کے قیام اور پہلی عرب اسرائیل جنگ کا راستہ ہموار کیا، اس وقت تک برطانیہ نے یہودیوں کو مضبوط اور فلسطینیوں کو انتہائی کمزور کر دیا تھا اور اس طرح سے دنیا کے سب سے طویل اور پیچیدہ تنازعات میں سے ایک کا آغاز ہوا۔

فلسطینیوں کے لیے بالفور اعلامیہ بے گھری، بے دخلی اور بے وطنی کی طویل تاریخ کا اعلان تھا ساٹھ لاکھ سے زیادہ فلسطینی اپنے گھروں سے باہر نکال دیئے گئے ہیں اکثر اردن لبنان اور شام میں پناہ گزینوں کے طور پر آباد ہیں جبکہ صیہونیت کے حامیوں کے لیے یہ اعلامیہ صدیوں کے ظلم و ستم کے بعد یہودی قوم کی قومی امنگوں کی بین الاقوامی سطح پر تسلیم اور ان کے وطن کے قیام کی جانب ایک اہم قدم ثابت ہوا اور 1948 میں اسرائیل کا قیام عمل میں آیا ۔

ایک صدی سے زیادہ گزرنے کے بعد بھی بالفور اعلامیے کے اثرات مشرق وسطیٰ کو متاثر کرتے چلے آ رہے ہیں۔ تاریخ گواہ ہے کہ لندن میں کیا گیا ایک استعماری فیصلہ، جو فلسطین کی مقامی آبادی کی رضامندی کے بغیر لیا گیا، نے ایک ایسے تنازعے کو جنم دیا جس نے اس خطے کو پوری طرح بدل دیا جو ختم ہونے کا نام ہی نہیں لے رہا 1967 سے اسرائیل نے مغربی کنارے کے مقبوضہ علاقوں میں یہودی بستیوں کو لگاتار وسعت دی ہے، یہودی آباد کاروں کی تعداد دن بدن بڑھتی جارہی ہے مقامی فلسطینی عربوں کو روز روز تشدد اور قتل و غارتگری کا سامنا ہے فلسطینیوں کی زمین کو بتدریج ٹکڑوں میں تقسیم کیا گیا ان پر قبضہ کیا گیا ہے اور ان کی نقل و حرکت کی آزادی کو شدید طور پر محدود کر دیا گیا ہے۔



 غزہ کی پٹی برسوں سے محاصرے میں ہے، جس کی وجہ سے بہت سے مشاہدین، بشمول انسانی حقوق کی تنظیمیں، اسے "کھلی جیل" کہتے ہیں۔ اکتوبر 2023 میں غزہ جنگ شروع ہونے کے بعد سے غزہ کا بڑا حصہ فوجی کارروائیوں سے تباہ ہو چکا ہے۔ غزہ کے محکمہ صحت کے مطابق ہزاروں ستر ہزار سے زیادہ فلسطینی، جن میں بہت سی خواتین اور بچے شامل ہیں، ہلاک ہو چکے ہیں، جبکہ انسانی بحران تباہ کن سطح پر پہنچ چکا ہے۔ اس کے ساتھ ساتھ اسرائیل ہمسایہ ممالک کے ساتھ بار بار فوجی تصادم میں بھی مصروف رہا ہے اور حال ہی میں ایران کے ساتھ براہ راست جنگ میں بھی شامل ہوا ہے۔ یہ استعماری ناانصافی، بالفور اعلامیہ جدید دور کی سب سے زیادہ اثر انداز ہونے والی سیاسی دستاویزات میں سے ایک ہے، جس کے اثرات اب بھی ایک صدی سے زیادہ گزرنے کے بعد مشرق وسطیٰ کی سیاست، تنازعات اور انسانی مصائب کو شکل دے رہے ہیں۔

متعدد تاریخ دانوں کا کہنا ہے کہ برطانیہ 1900 سے 1945 کے دوران قرضوں میں ڈوبا ہوا تھا اور اسی وجہ سے یہودیوں کا طرفدار تھا کیونکہ اس نے ان سے قرض لیا تھا  برطانیہ اس عرصے میں بہت بھاری قرضوں تلے تھا، خاص طور پر پہلی عالمی جنگ کے بعد کے جنگی قرضے، اور یہودی بینکار، خاص طور پر روتھشلڈ خاندان، انیسویں صدی سے یورپی حکومتوں بشمول برطانیہ کو بڑے پیمانے پر قرض دیتے رہے تھے، اور والٹر روتھشلڈ ہی وہ شخص تھے جنہیں بالفور اعلامیے کا خط براہ راست بھیجا گیا تھا۔ لیکن یہ دعویٰ کہ برطانیہ نے یہ اعلامیہ یہودی سرمایہ کاروں کے قرضوں کے بدلے میں جاری کیا، کئی مؤرخین کا خیال ہے کہ یہودیوں کے سرمائے نے برطانیہ کی مدد کی اور برطانیہ نے یہودیوں کی۔بعض مؤرخین کے نزدیک اس کی وجوہات جنگی حکمت عملی، امریکی اور روسی یہودیوں کی حمایت اتحادیوں کے حق میں حاصل کرنے کی خواہش، مشرق وسطیٰ میں جنگ کے بعد کے اثر و رسوخ پر فرانس کے ساتھ مسابقت، اور بعض برطانوی عہدیداروں کی صیہونیت کے ساتھ حقیقی نظریاتی ہمدردی بھی تھی، جس کی تصدیق 1917 کی کابینہ کی دستاویزی گفتگو سے بھی ہوتی ہے۔ "برطانوی پالیسی پر یہودی مالیاتی کنٹرول" کا یہ بیانیہ  کئی تاریخ دانوں میں رائج رہا ہے، اور اس سے انکار کیا جائے تو ایسی کوئی وجہ نظر نہیں آتی۔

 

تري دوا نہ جنيوا ميں ہے ، نہ لندن ميں

فرنگ کي رگ جاں پنجہ يہود ميں ہے علامہ اقبال

 

یا صبا حاہ ! یا صبا حاہ !



عمر فراہی

وقت کے رسول صلی اللہ علیہ وسلم نے کوہ صفا کی چوٹی سے مکہ کے لوگوں کو اسلام کی دعوت کیلئے پکارا تو یا صبا حاہ ! یا صبا حاہ !کا وہی نعرہ لگایا جو کسی بستی پر حملے کے وقت پکارنے والا پکارتا ہے ۔اس نعرے کے بعد جب مکہ کے لوگ آپﷺ کی طرف متوجہ ہوئے تو آپ نے کہا کہ اگر میں کہوں کہ پہاڑ کے عقب سے ایک لشکر تم پر حملہ کرنے کی تیاری کر رہا ہے تو کیا میرا یقین کرو گے ۔
کہنے کا مطلب یہ ہے کہ قومیں پہلے بھی دوسری قوموں پر غالب آنے کیلئے سازشیں کیا کرتی تھیں اور ان میں لوگوں کو خبر کرنے والے بھی ہوتے تھے وہ آج بھی موجود ہیں ۔ہاں اس غالب آنے کی حکمت عملی میں جو فرق آیا ہے وہ یہ کہ پہلے ایک قبیلہ دوسرے قبیلے پر چھپ کر شب خون مارا کرتا تھا اور قتل عام کر کے دوسرے قبیلوں کے مویشی اور کھانے پینے کے سامان لوٹ لیا کرتا تھا۔ موجودہ مہذب جمہوری معاشرے میں یہی کام سلیقے سے نام نہاد قانون کے دائرے میں انجام دیاجاتا ہے۔ پکارنے والا آج بھی الفاظ و معنی کے تفاوت کے ساتھ اپنے پکارنے کا کام کر رہا ہے ۔فرق اتنا ہے کہ اب یا صبا حاہ ! کی یہ آواز عالمی اور قومی میڈیا کی طرف سے لگائی جاتی ہے اور لوگوں کو اسلامی دہشت گردی کے عنوان سے مسلمانوں کی اذان ،نماز ،قرآن اور حجاب سے ہوشیار کیا جاتا ہے ،جبکہ حقیقت میں یہ پکارنے والے ہی ایک مذہب کے لوگوں پر شب خون مارنے کی مسلسل تیاری میں رہتے ہیں اور کئی مسلم ملکوں کو باقاعدہ عالمی ادارے اقوام متحدہ کی حمایت سے تباہ و برباد بھی کر دیا گیا ہے ۔بیسویں صدی میں مذہب کو سیاست سے جدا کر کے گلوبلائزیشن کے عنوان سے اقوام متحدہ کا جو تصور سامنے آیا ہمارے بزرگوں نے بھی خوشی خوشی اس قومی یک جہتی کے فلسفے کو تسلیم کرتے ہوئے قوم رسول ہاشمی ﷺکے عالمی اسلامی تصور کو رد کردیا ۔دیگر  قوموں نے یقیناًابلیس کے اس لادینی نظام کو پوری طرح قبول کر لیا ہے لیکن پاکستان سے لیکر افغانستان ،ایران، عراق ،مصر، ترکی ،یمن ،فلسطین ،صومالیہ، لیبیا اورچچنیا وغیرہ میں مسلمانوں کی مکمل آبادی ابھی بھی پوری طرح ایک سیکولر اسلام کو قبول کرنے کو تیار نہیں ہے ۔یہی وجہ ہے کہ وہ جو اقوام متحدہ کے بانی اور حکمراں ہیں انہوں نے ان ممالک پر شب خون مار کر انہیں تباہ و برباد کرنے کی پوری کوشش کی ہے ۔باقی برما ، سری لنکا اورفرانس وغیرہ میں جہاں اللہ کا نام لینے والے اقلیت میں ہیں اور ان پر وہاں کے حکمراں اور سیاستداں جو ظلم کر رہے ہیں اقوام متحدہ خاموش ہے ؟
عافیہ صدیقی پس زنداں ہے اور آسیہ بی بی جیل کے باہر ۔مذہبی ہم آہنگی اور قومی یک جہتی کا مطلب تو یہ ہے کہ آسیہ کی رہائی کیلئے تحریک چلانے والے عافیہ کی رہائی کیلئے بھی تحریک چلاتے ۔کبھی غور کرنا کہ دبئی کے حکمراں کی بیٹی شہزادی لطیفہ جو اپنے فرانس کے غیر مسلم بوائے فرینڈ سے شادی کرنے کیلئے اپنے ملک سے فرار ہونے کی کوشش میں تھی وہ ابھی اپنے باپ راشد المکتوم کے حکم پر نظر بند ہے اس کی رہائی کیلئے تو آزادی نسواں کی علمبردار تنظیمیں سرگرم نظر آتی ہیں اور ابھی حال میں انہوں نے امریکہ کے نئے صدر جو بائیڈن سے بھی لطیفہ کی رہائی کیلئے دبئی کے حکمراں پر دباؤ ڈالنے کیلئے کہا ہے لیکن اسی جوبائیڈن سے عافیہ صدیقی اور مصر کی جیلوں میں قید اخوانی بہنوں کی رہائی کی کوئی درخواست اور تحریک اٹھتی ہوئی نظر نہیں آ رہی ہے تو اس لئے کہ عافیہ اور اخوانی بہنیں باعمل مسلمان ہیں جبکہ آسیہ عیسائی ہے اور لطیفہ ایک آزاد خیال عورت ہے اور اپنے دین سے بغاوت پر آمادہ ہے !
اس معاملے میں مسلم ممالک کے حکمرانوں کا رویہ تو مایوس کن ہے ہی کچھ مذہبی جماعتیں اور ان کے علماء بھی کم قصوروار نہیں ہیں ۔موجودہ دور جمہوریت میں قوم رسول ہاشمی ﷺکے نمائندوں کو جو مواقع میسر ہیں وہ بھی یا صبا حاہ ! یا صبا حاہ ! کے نعرے کے ساتھ اپنی قوم کو جگانے کی جرأت تو کر رہے ہیں لیکن وہ اپنے محدود وسائل اور کوہ صفا جیسی بلندی کے مقامات سے محروم ہونے کی وجہ سے اپنے خلاف ہونے والی سازشوں سے مکمل طور پر باخبر نہیں ہیں ۔ہم اپنی اسی بے خبری اور ضعیفی کی وجہ سے ہر روز کسی نہ کسی سرخی میں رہتے ہیں ۔یہی تقدیر کے قاضی کا فتویٰ بھی ہے اور اسی جرم ضعیفی کی سزا ہلاکت اور تباہی بھی ہے !
کبھی کسی اخلاق اور تبریز کو جئے شری رام کے نعرے لگا کر گھسیٹ کر مار دیا جاتا ہے کبھی قرآن کے تعلق سے شیطان رشدی یا رضوی کا جن باہر آ جاتا ہے کبھی کسی آصفہ تو کبھی آصف کو اس کے آصف ہونے کی سزا ملتی ہے ۔کبھی کسی سرکاری نصاب میں اسلامی دہشت گردی کو موضوع بنا کر مسلمانوں کو دہشت گرد ثابت کرنے کا واقعہ سامنے آتا ہے تو بے چاری صوفی سنتوں کی جماعت جس نے کبھی زمین کے اوپر کی بات ہی نہیں کی اسے بھی فساد فی الارض کی دفعہ کویڈ 19 کے جرم میں گرفتار کر لیا جاتا ہے ۔
سوشل میڈیا پر بحث ہو رہی تھی کہ ایم بی بی ایس کی کسی میڈیکل کی کتاب میں تبلیغی جماعت کے خلاف کوئی منفی تبصرہ کیا گیا ہے جسے خیر سے چند باخبر مخلص نوجوانوں کی مداخلت پرپبلشر نے حذف تو کر دیا ہے لیکن کیا اس کی خبر تبلیغی جماعت والوں کو بھی ہے۔ اس تعلق سے میں نے مسجد میں تبلیغی نصاب پڑھ کر اٹھ رہے چند نوجوانوں سے پوچھا کہ بھائی آپ لوگوں کو پتہ ہے کہ کسی میڈیکل کی کتاب میں آپ کے خلاف کچھ لکھا گیا ہے ۔کچھ نے تو برجستہ جواب دیا کہ نہیں ہمیں نہیں معلوم ۔کچھ جو تھوڑا عمر دراز تھے یا سال چھ مہینے کے چلے سے فارغ نظر آرہے تھے انہوں نے بہت ہی اطمینان سے جواب دیا کہ بھائی اسلام کے خلاف تو ہر دور میں ایسی سازشیں ہوتی رہی ہیں ہم لوگ دین کا کام کر رہے ہیں اللہ ہماری حفاظت کرے گا اور کبھی کبھی اللہ اپنے دشمنوں سے بھی اپنے دین کا کام لے لیتا ہے ۔میں نے ان سے زیادہ بحث نہیں کی، لیکن دل میں سوچنے لگا کہ ایمان کی محنت کرنے والے ان بھائیوں کا ایمان کتنا پختہ ہے کہ وہ اپنا کام کر رہے ہیں اور ان کے خلاف سازشیں کرنے والوں کے خلاف لڑنے کیلئے اللہ نے سمیع اللہ خان اور ایس آئی او کے بچوں کو کھڑا کر دیا ۔
تبلیغی بھائی اکثر کہتے ہیں کہ کامیابی اگر حکومت میں ہوتی تو فرعون ناکام نہ ہوتا ۔کاش یہی بات افغانی ملاؤں ، مصر کے اخوانی جوانوں ،فلسطین اور کشمیر کے حریت پسندوں کے ساتھ ساتھ طیب اردگان ،محمد بن سلمان ، السیسی اور عمران خان وغیرہ کو بھی سمجھ میں آجاتی اور وہ سب سیاست اور حکومت کے غلیظ کاروبار کو اپنے ملک کے بدمعاشوں کو سونپ کر دعوت دین کے کام میں لگ جاتے ۔ملت کے اس فکری تضاد پر میں اپنی بات حالی کی اس دعائیہ نظم پر ختم کرتا ہوں کہ  ؎  ائے خاصہ خاصان رسل وقت دعا ہے /امت پہ تری آکے عجب وقت پڑا ہے /جس دین کے مدعو تھے کبھی قیصر و کسریٰ /خود آج وہ مہمان سرائے فقراء ہے / جو دین کہ تھا شرک سے عالم کا نگہبان /اب اس کا نگہبان اگر ہے تو خدا ہے

طالبان : یہ خاکی زندہ تر، پائندہ تر، تابندہ تر نکلے




   نہال صغیر ۔ ای میل  sagheernehal@gmail.com 

علامہ اقبال نے مومن کے تعلق سے ایک بات کہی تھی ؎ جہاں میں اہلِ ایماں صورتِ خورشید جیتے ہیں/اِدھر ڈُوبے اُدھر نکلے، اُدھر ڈُوبے اِدھر نکلے۔ اقبال کے اسی بندہ مومن کی زندہ مثال طالبان ہیں جن کی بے پناہ قربانیوں کے سبب ملت سر اٹھا کے جینے کے قابل ہے ورنہ کچھ اس کی خامیوں اور کچھ اغیار کے پروپگنڈوں نے تو مسلمانوں کو دنیا کی ذلیل ترین مخلوق کے مشابہ بنادیا تھا ۔ مگر اللہ کا وعدہ ہے کہ وہ مومنین صادقین کی مدد کرنے سے اپنا ہاتھ نہیں روکے گا ۔ اللہ کا وعدہ سچا ہے مگر یہ ہم پر ہے کہ ہم اپنے مومن ہونے اور اللہ کے پاکباز بندوں میں اپنا نام لکھوانے میں کس حد تک کامیاب ہوتے ہیں ۔ طالبان کو دنیا بدنام کرتی رہی ، ان کے خلاف جھوٹے پروپگنڈے ہوتے رہے اور صرف اسلام دشمن قوتیں ہی نہیں مسلک کے قیدی مولوی اور ان کے مرید مسلمان نیز مسلمانوں کی ہمدردی کا دعویٰ کرنے والے سیکولر لبرل جمہوریت پرست طبقہ بھی طالبان کو ہدف تنقید بناتا رہا اور امریکہ کے آگے سرنگوں رہا مگر بقول اوریا مقبول جان ملا عمر ؒ نے کہا تھا ’میں اپنی زندگی میں ایسا کوئی بھی کام نہیں کروں گا جس سے مسلمانوں کو شرمندہ ہونا پڑے‘۔ ملا عمر ؒ اور ان کے ساتھیوں نے یہ ثابت کردیا کہ وہ مسلمانوں کے وقار بلند کرنے والے لوگ ہیں ۔
حضرت عمر رضی اللہ عنہ نے کہا تھا کہ اسلام نے ہمیں عزت بخشی ہے ۔ یہ بات قیامت تک کیلئے اٹل ہے کوئی اسلام سے الگ ہٹ کر اگر عزت تلاش کرے گا تو وہ ذلیل و رسوا ہوگا ۔ تاریخ کے صفحات ایسے افرادسے بھرے پڑے ہیں جنہوں نے اسلام میں عزت پائی ، انہیں فرعون وقت نے ذلیل و رسوا کرنے کی کوشش کی مگر جیسا کہ اللہ کا وعدہ ہے کہ ’عزت تو الله اوراس کے رسول اور مومنین ہی کے لیے ہے لیکن منافق نہیں جانتے‘ سورہ منافقون آیت ۸ ۔اللہ نے اپنے نیک بندوں کیلئے عزت مختص کررکھی ہے کسی کو یہ سمجھ میں آئے یا نہیں آئے ویسے طالبان کے ساتھ امریکی سمجھوتہ سے تو یہ بات سمجھ میں آجانی چاہئے ۔ کتنے متکبرانہ انداز میں جارج بش نے کہا تھا طالبان ختم ہوگئے ۔ مگر آج دنیا نے دیکھ لیا کہ جو ٹھیک ٹھیک اسلام نافذ کرنا چاہتا ہے اس کیلئے مشکلات دنیا کے شیاطین کی جانب سے کھڑی تو کی جاسکتی ہیں مگر اللہ اپنے مسلم بندوں کو رسوا نہیں ہونے دے گا ،وہ انہیں عزت دے کر رہے گا ۔طالبان کےمعاہدہ کی پہلی شق ہی ان کے کامل ایمان کیلئے کافی ثبوت ہے جس میں انہوں نے کہا ہے کہ وہ افغانستان کے سبھی اداروں کو اسلامی خطوط پر ترقی دیں گے ۔ 
غلامی ایسی نحوست بھری چیز ہے جس میں انسان خود کو پہچاننا بھول جاتا ہے ۔ دنیا میں ہم اس کی کئی مثالیں دیکھ سکتے ہیں ۔ خود وطن عزیز کی پچاس فیصد سے زائد تعداد رکھنے والی آبادی برہمنوں کی غلامی میں اپنی خودی کو اتنی بھول چکی ہے کہ وہ ہندو نہیں ہوتے ہوئے بھی سارے ہندو رسم و رواج مناتی ہے ۔ حالانکہ ان کے لیڈر انہیں بتاتے نہیں تھکتے کہ وہ ہندو نہیں ہیں اور ہندو کے نام پر ان کے حقوق پر ڈاکہ ڈالنے کی سازش کی جارہی ہے مگر وہ پندرہ فیصد والی آبادی میں برہمنیت کے علمبرداروں کی سازش کا شکار ہوکر مسلمانوں کی دشمنی میں دیوانے ہورہے ہیں اور یوں اپنا ہی نقصان کررہے ہیں ۔ یہ لوگ تو خیر تین ہزار سال کی غلامی کے سبب اس ذہنی سطح تک پہنچے ہیں مگر اسی ملک میں مسلمانوں کی حالت محض ستر پچھتر برسوں میں یہ ہوگئی ہے کہ وہ مسلمانوں کی کسی بڑی کامیابی کو ماننے کیلئے تیار ہی نہیں ہوتے ۔ غلطی عام مسلمانوں کی بھی نہیں ہے ،یہ ان عناصر کے پھندے ہیں جو عافیت پسند ہیں اور مغرب یا امریکہ کے ٹکنالوجی اور اس کی ترقی سے مرعوب ہیں ۔اس مرعوبیت میں یہ حضرات قوم پر بھی مایوسی مسلط کرنے کی کوشش کرتے ہیں ۔ ایسے لوگ طالبان اور امریکہ کے درمیان سمجھوتے کو شک کی نظر سے دیکھ رہے ہیں ۔ ان کا ماننا ہے کہ یہ سمجھوتہ کامیاب نہیں ہوگا یا پھر ان کا یہ ماننا ہے کہ طالبان نے یہ سمجھوتہ گر کر کیا ہے اور طالبان کی جیت نہیں ہار ہے ۔ اس طرح کے خیالات پیش کرنے والے افراد قوم کو مغالطہ میں رکھنا چاہتے ہیں ۔ وہ یہ چاہتے ہیں کہ جیسے وہ بزدل ہیں ویسے ہی پوری قوم بن جائے ۔ لیکن اللہ کا شکر ہے کہ پوری ملت بزدلی کے مرض میں مبتلا نہیں ہوئی ہے ۔ 
اگر طالبان امریکہ سے خائف ہوتے اور وہ کمزور پڑتے تو امریکہ کبھی ان سے سمجھوتہ نہیں کرتا مگر طالبان کے دبائو نے امریکیوں کو مجبور کیا کہ وہ سمجھوتہ کرلیں اور یوں اپنے آٹھ دس ہزار فوجیوں کو موت کے منھ سے بچاکر لے جائیں ۔ اس کے برعکس یہ صحرا نشین طالبان پوری دنیا سے بے نیاز اور دنیاوی قوت سےبے خوف ہوکر گوریلا جنگ لڑتے رہے اور بالآخر فرعونی قوت کو ان کے آگے گھٹنے ٹیکنے پڑے ۔کئی سال قبل طالبان کی روسیوں پر فتح کی ضمن میں شاہنواز فاروقی نے لکھا تھا اور اپنی کسی تقریر میں اس کا حوالہ بھی دیا تھا کہ جو کچھ طالبان نے حاصل کیا ہے اگر یہ کسی مغربی ملک کو میسر ہوا ہوتا تو پانچ ہزار سے زائد کتابیں محض اس موضوع پر شائع ہوچکی ہوتیں ۔مگر غلام ذہنیت اور ٹکنالوجی کی مرعوبیت کے سبب مسلمانوں کے دانشور طبقہ کو یہ بات ہضم ہی نہیں ہوتی کہ طالبان نے محض چالیس سال میں دنیا کی دوبڑی طاقتوں کو شکست دے کر تاریخ رقم کردی ہے ۔یہ اس دانشور طبقہ کا ہی حال نہیں ہے مسلمانوں کے درمیان کئی اہم تحریکی شخصیت کا بھی یہ خیال ہے کہ مسلمان اس دور میں کوئی کارنامہ انجام دے ہی نہیں سکتے ۔ جیسے ایک بار نوجوانوں کی تنظیم کے ایک ذمہ دار سے یہ کہا گیا کہ امریکہ میں دو مسلم تنظیمیں اتنی متحرک ہیں کہ وہ کئی اہم پالیسی پر اثر انداز بھی ہوتی ہیں تو یہ بات انہوں نے تسلیم ہی نہیں کی ۔ ان کا کہنا ہے کہ امریکہ کے آگے کچھ نہیں ہو سکتا وہ جو چاہے گا وہی ہوگا ۔ ان کے اس طرح کے خیال سے بلاشبہ یہ کہا جاسکتا ہے کہ ان کا اس امر پر ایمان کمزور ہے کہ اس کائنات کا نظام اللہ چلا رہا ۔
بہر حال امریکہ طالبان کے ساتھ سمجھوتہ کرچکاہے اور سمجھوتہ کوئی اسی وقت کرتا ہے جب وہ سامنے والے سے مقابلہ کی سکت نہیں رکھتا اور یہ اسی طرح حقیقت ہے جیسا کہ دن کے وقت سورج ۔ذرا سوچئے کفار قریش نے حدیبیہ میں مسلمانوں کے ساتھ سمجھوتہ کیوں کیا ؟ جبکہ اس سے قبل وہ مسلمانوں سے گفتگو کو تیار نہیں تھے ، ان کو اس قابل ہی نہیں سمجھتے تھے کہ ان سے کسی قسم کا تعلق رکھا جائے ۔ مگر جب کفار قریش کو یہ یقین ہو گیا کہ مسلمان ایک بڑی طاقت بن چکے ہیں اور جلد یا بدیر وہ پورے عرب پر چھاجائیں گے تو انہیں سمجھوتہ کی میز پر آنا ہی پڑا ۔ اسلام کسی سے اسی وقت تک لڑنے کی تاکید کرتا ہے جب تک وہ لڑنا چاہئے ، اگر وہ صلح چاہے تو اسلام فوراً صلح کو اہمیت دینے کی بات کرتا ہے ۔ کیوں کہ اسلام کے نزدیک بلا عذر کسی انسان کوقتل کرنا پوری انسانیت کا قتل ہے ۔
طالبان سے بھی جب امریکہ نے صلح کی پیش کش کی تو انہوں نے اپنی شرائط کے ساتھ اسے قبول کیا ۔غور کیجئے ایک وقت تھا جب افغانستان کو طالبان سے پاک کرنے کی بات کی گئی تھی ، دنیا کی ساری قوتیں اس پر متفق تھیں لیکن طالبان ہمیشہ اصولوں کی بات کرتے رہے ۔امریکہ چونکہ طالبان کو صفحہ ہستی سے مٹانے کے عہد کے ساتھ آیا تھا اس لئے اس کی اس میں بڑی سُبکی تھی کہ جنہیں اس نے مٹانے کا عزم کیا تھا ان کو (قوت کے معاملہ میں) اپنا ہم پلہ سمجھتے ہوئے مذاکرات کرے ۔ اس سُبکی سے بچنے کیلئے اوبامہ کے دور میں اچھے اور برے طالبان کی اصطلاح ایجاد کی گئی اور گفتگو کرنے کیلئے اچھے طالبان کا انتخاب کیا گیا ، حالانکہ طالبان جو تھے وہی اب بھی ہیں ۔ان کی گفتگو کے انداز زمین پر چلنے پھرنے کا طریقہ ان کے لباس وغیرہ کچھ بھی تو نہیں بدلا ۔وہ جہاں بھی گئے جس سے بھی گفتگو کی اسی عاجزی و انکساری والے رویہ کے ساتھ لیکن اسلامی اقدار کی روشنی میں ، مسلمانوں کے عزت و وقار کو سامنے رکھتے ہوئے ۔اب کسی کو وہ لوگ جاہل احمق اور دہشت گرد نظر آتے ہیں تو اسے اپنے دماغ کا علاج کرانے کی ضرورت ہے ۔
طالبان کے عروج پر علامہ اقبال کا ایک شعر صادق آتا ہے ؎ نکل کے صحرا سے جس نے روما کی سلطنت کو اُلٹ دیا تھا/سُنا ہے یہ قُدسیوں سے مَیں نے، وہ شیر پھر ہوشیار ہو گا۔ وہ شیر طالبان کی صورت میں ہوشیار ہوچکا ہے اور وہ دوسرے شیروں کو جو کہیں اخوان المسلمین اور حماس کی شکل میں موجود ہیں اور جو فرعونی جبر کا مقابلہ پامردی کے ساتھ کررہے ہیںانہیں بھی قوت بخشے گا کیوں اللہ کے نبی ﷺ نے کہا مومن ایک عمارت کی طرح ہے جس کی ایک اینٹ دوسرے کو قوت دیتی ہے ۔علامہ اقبال نےاسپین وغیرہ میں مسلمانوں کی ماضی کے باقیات دیکھ کر اپنے جذبات کا اظہار کرتے ہوئے سوال کیا تھا ؎کون سی وادی میں ہے، کون سی منزل میں ہے/عشقِ بلا خیز کا قافلۂ سخت جاں!۔ علامہ رحمتہ اللہ علیہ کی روح کو ان کے سوالوں کاجواب افغان طالبان کی صورت میں مل گیا ؎ افغان باقی، کُہسار باقی/اَلْحُکْمُ لِلّٰہ! اَلْمُلْکُ لِلّٰہ!۔

افغانستان : الہ کے اصل مفہوم اور نظریے کی فتح


  
عمر فراہی ۔ ای میل  :  umarfarrahi@gmail.com

بالآخر افغانستان میں امریکہ اور طالبان کے بیچ قطر کی راجدھانی دوحہ میں جہاں طالبان کا ہیڈ کوارٹر پہلے سے موجود تھا امن معاہدے پر دونوں ملکوں کے نمائندوں نے دستخط کر دئیے ہیں ۔ امید کی جارہی ہے کہ برسوں سے اس خطے میں جو خونریزی کا ماحول تھا اب اس میں کمی آئے گی یا اس پر قابو پالیا جائے گا ۔ لیکن ابھی بھی ایک طبقہ شک اور شبہے میں مبتلا ہے کہ کیا اس معاہدے سے افغانستان میں امن دیرپا ثابت ہوگا ۔ ان کا خدشہ یہ ہے کہ اسی طرح کا معاہدہ تو سرد جنگ کے خاتمے کے بعد روس اور افغان مجاہدین کے درمیان بھی ہوا تھا مگر اس کے بعد کیا ہوا ۔مجاہدین آپس میں ہی لڑ پڑے اور اپنے ہی بھائیوں کے خون کے پیاسے ہو گئے۔بات تو صحیح ہے کہ جس طرح افغانستان میں اور بھی کئی دھڑے ہیں اور خود کابل میں ایک نام نہاد منتخب حکومت موجود ہے یہ معاہدہ کہاں تک اپنی کامیابی کی دہلیز تک قدم رکھ پائے گا کہا نہیں جاسکتا۔ہمارا بھی خیال یہی ہے کہ امریکہ کے افغانستان چھوڑنے کے بعد بھی طالبان کیلئے اتنی جلدی خطے میں امن قائم کرنا بہت آسان اس لئے نہیں ہوگا کیوں کہ خود امریکہ چور دروازے سے اپنے ہم خیال گروہوں کی مدد سے باز نہیں آئے گا ۔ لیکن اگر امریکہ نے ایسا کیا تو طالبان جن سے کہ اس معاہدے میں وعدہ لیا گیا ہے کہ وہ القاعدہ سے تعلقات منقطع کر لیں گے ان کا استعمال کر سکتے ہیں ۔
خیر جو بھی ہو سن اسی کی دہائی کے افغان مجاہدین جن میں برہان الدین ربانی، گلبدین حکمت یار، رشید دوستم اور ملا مسعود خان کی کمان میں مجاہدین کے کئی گروہ اس معاہدے میں شامل تھے۔ 2020 کے طالبان اور افغانستان میں کئی تبدیلیاں آچکی ہیں ۔آج کا معاہدہ صرف امریکہ اور طالبان کے درمیان نہیں طے پایا ہے بلکہ یوں کہا جائے کہ یہ معاہدہ امارت اسلامیہ افغانستان اور یونائیٹیڈ اسٹیٹ آف امریکہ کے درمیان طے پایا ہے ۔ امریکہ چاہتا تھا کہ اس معاہدے میں افغان حکومت کو بھی شامل کیا جائے مگر طالبان نے امریکہ کے اس مطالبہ کو اس لئے رد کر دیا کہ افغانستان میں ابھی بھی طالبان کی امارت اسلامیہ افغانستان کی حکومت قائم ہے اور امریکہ کو ان کے اس دعوے کو تسلیم کرکے ہی معاہدہ کرنا ہوگا یعنی ابھی بھی افغانستان میں طالبان ہی اصل حکمران ہیں جبکہ کابل حکومت امریکہ کی مدد سے ناجائز طریقے سے بنائی گئی ہے ۔
اس معاہدے کا مطلب صاف ہے کہ طالبان جن علاقوں پر قابض ہیں امریکہ نے فی الحال ان کے وجود کو تسلیم کر لیا ہے اور ماضی میں کابل پر کس کی حکومت ہوگی یہ افغانستان کے عوام طے کریں گے اور معاہدے کے تحت امریکہ کو کسی طرح کی مداخلت کا حق نہیں ہوگا ۔ہونا تو یہ چاہئے تھا کہ امریکہ نے جس طرح فوجی طاقت سے طالبان سے کابل اور قندھار کے علاقوں کو چھینا تھا امریکہ دوبارہ پرامن طریقے سے ان شہروں کو طالبان کو سونپ کر جاتا لیکن کہیں نہ کہیں اگر امریکہ کی اپنی نیت میں کھوٹ ہے تو کہیں طالبان نے بھی مستقبل کے لائحہ عمل کے طور پر پیچھے ہٹ کر پسپائی قبول کر لی ہے ۔ لیکن یہ بات تو طے ہے کہ اب طالبان کیلئے کابل اور قندھار تک جانے کا راستہ صاف ہو چکا ہے اور اس معاہدے میں جس طرح پاکستان نے کلیدی کردار ادا کیا ہے جیسا کہ ابھی حال ہی میں ڈونالڈ ٹرمپ نے احمدآباد کے اسٹیڈیم میں خطاب کے دوران افغانستان کا تذکرہ کرتے ہوئے عمران خان کی تعریف کی ایک بار پھر پاکستان یہ چاہے گا کہ طالبان کابل پر حکومت بنا لیں اور اس حکومت کو اقوام متحدہ میں تسلیم بھی کر لیا جائے۔یاد رہے پچھلی بار بھی طالبان کی حکومت کو سب سے پہلے پاکستان نے تسلیم کیا تھا بعد میں سعودی عرب نے بھی منظوری دے دی تھی ۔ اب عالمی حالات تھوڑےسے بدلے ہوئے ہیں ۔
اس بار ترکی اور ملیشیا کے ساتھ کئی اور مسلم ممالک کے ساتھ ساتھ یوروپی ممالک بھی طالبان حکومت کو تسلیم کرنے کیلئے آگے آسکتے  ہیں ۔ممکن ہے کہ روس چین یا خود امریکہ میں سے بھی کوئی طاقت آگے بڑھ کر اسے تسلیم کرنے کی پہل کریں ۔وقت کا تقاضہ تو یہ ہے کہ اس خطے میں دائمی امن کےمدنظر بھارت بھی پہل کرے جیسا کہ نومبر 2013 میں گوا میں منعقد ایک کانفرنس کے دوران ترون تیج پال کو ایک سیکس اسکینڈل کے ذریعے پھنسایا گیا تھا اس کانفرنس میں بھارت سے محمود مدنی اور طالبان کے ترجمان ملا عبدالسلام ضعیف کو بھی مدعو کیا گیا تھا۔اس اجلاس میں محمود مدنی کی شمولیت ملا عبدالسلام ضعیف کی وجہ سے تھی تاکہ محمود مدنی کی دستار سے ملا ضعیف کے سامنے ہندوستانی مسلمانوں کا ملائی چہرہ پیش کیا جائے۔ٹائمس آف انڈیا نے ایک چھوٹے سے کالم میں اس خبر کا تذکرہ کر دیا تھا ورنہ حکومتی سطح پر ملا عبدالسلام ضعیف کے اس دورے کو بہت مشتہر نہیں کیا گیا اور نہ ہی ان کے اس دورے کا سبب ہی معلوم ہو سکا لیکن اندازہ کیا جاسکتا ہے کہ اس وقت کے صدر اوبامہ نے عراق سے جس طرح امریکی فوجوں کا مکمل انخلاء کر لیا تھا افغانستان سے بھی آدھی فوج بلا لی تھی بھارت کو اندازہ تھا کہ افغانستان سے امریکی فوجوں کے انخلاء سے طالبان کا عروج لازمی ہے اس لئے کیوں نہ حفظ ماتقدم کے تحت سفارتی عمل کو آگے بڑھایا جائے۔بعد میں بھارت نے حالات کو کچھ اپنے حق میں دیکھتے ہوئے بہت سنجیدگی نہیں دکھائی ۔ خاص طور سے ٹرمپ کے صدر بنتے ہی ایسا لگا کہ وہ ایک بار پھر افغانستان میں اپنی مہم تیز کر دیں گے اور تیز کیا بھی مگر ڈونالڈ ٹرمپ نے شاید اقبال کے بقول ابلیس کا فرمان ٹھیک سے پڑھا نہیں تھا ۔ ابلیس کہتا ہے کہ؎ وہ فاقہ کش کہ موت سے ڈرتا نہیں ذرا/رُوحِ محمدؐ اس کے بدن سے نکال دو /فکرِ عرب کو دے کے فرنگی تخیّلات/اسلام کو حِجاز و یمن سے نکال دو /افغانیوں کی غیرتِ دیں کا ہے یہ علاج/مُلّا کو اُن کے کوہ و دمن سے نکال دو ۔
امریکہ عرب حکمرانوں کی فکر پر فرنگی تخیلات غالب کرنے میں تو کامیاب ہو سکا ہے لیکن ملاؤں کو ان کے کوہ و دمن سے نکالنے کی بجائے خود نکلنے کا راستہ پانے کیلئے ان سے معاہدہ پر مجبور ہو گیا ۔افغانی ملاؤں کی یہی سب سے بڑی فتح ہے کہ روس کے بعد دوسری سپر پاور امریکہ کو بھی ان کے جذبہ حریت کو تسلیم کرنا پڑا ۔دیکھتے ہیں حالات آگے کیا رخ اختیار کرتے ہیں لیکن یہ بات تو طے ہے کہ اس بار سرد جنگ کی طرح کے حالات نہیں ہیں ۔اس وقت افغان مجاہدین کئی دھڑوں میں بٹے ہوئے تھے اس بار طالبان امارت اسلامیہ افغانستان کے تحت نہ صرف متحد اور منظم ہیں بلکہ انہیں حکومت کا تجربہ بھی ہے ۔
قوی امید ہے کہ کچھ مزاحمت کے بعد افغانیوں کو دوبارہ امن کا ماحول میسر ہو جائے گا ۔ ویسے طالبان کے پانچ سالہ دور میں مکمل امن ہی تھا جو امریکہ کی مداخلت کی وجہ سے ناپید ہو چکا تھا ۔خود 2001 سے 2020 تک کے سفر میں طالبان جن کے بارے میں کئی منفی افواہیں اڑائی گئی انہوں نے ثابت کیا کہ وہ متحد ہیں اور افغانستان میں ان کے وجود کو تسلیم کئے بغیر امن ایک ٹیڑھی کھیر ہی ثابت ہوگا ۔اللہ کرے افغانیوں کو امن کا ماحول نصیب ہو ۔اب یہ تو آنے والے حالات ہی طے کریں گے کیوں کہ ابھی بھی کچھ طاقتیں نہیں چاہتیں کہ ایسا ہو ۔یہ سوال اپنی جگہ ،مگر دوسرا سوال اللہ کے ان بندوں سے ہے جو امریکہ کی زبان بولتے ہوئے کبھی افغانیوں کو مجاہد اور طالبان کو دہشت گرد بولتے اور تسلیم کرتے ہوئے‌نظر آئے اب وہ نئے طالبان کیلئے کیا لقب استعمال کرتے ہیں؟ 
کیا یہ معاہدہ امریکہ اور دہشت گردوں کے درمیان طے پایا ہے ؟نہیں امریکی نمائندوں نے باعزت طریقے سے اپنے ان مخالف حکمرانوں سے معاہدہ کیا ہے جو کبھی امارت اسلامیہ کے نام سے افغانستان کے حاکم تھے ۔مشکل یہ ہے کہ اب امریکہ نے اپنی زبان بدل دی تو کیا اہل ایمان بھی اپنی زبان بدل دیں گے ؟۔دیکھئے غور کیجئے اور سوچئےکہ کہیں آپ الہ کے اصل مفہوم اور نظریے کے باغی تو نہیں ہیں ؟

شام کی شام غریباں



پروفیسر محسن عثمانی ندوی             
    مسلمانوں کو آنحضرت ۃﷺنے تعلیم دی ہے کہ وہ مسلمان بھائیوں کے مسائل سے واقف رہنے کاپورا اہتمام کریں یہاں تک کہ ایک حدیث کا مفہوم یہ ہے کہ جو شخص مسلمانوں کے امور سے واقف نہ ہو اور ان کی پریشانیوں کو دور کرنے کا اہتمام نہ کرے وہ مسلمانوں میں سے نہیں ہے ۔ اس حدیث  کا تقاضہ ہے کہ ہم اپنے شامی بھائیوں کے مصائب کے بارے میں جانیں  اور جو ممکن ہو اس سے دریغ نہ کریں ۔ ملک شام سے وابستگی  کا حکم بھی ہے حدیث میں حکم ہے’’ علیکم بالشام‘‘ یعنی  ملک شام سے تمہارا خصوصی تعلق ہونا چاہئے ۔ پھر ملک شام کے بارے میں آپ نے فرمایا’’ یجتبی الیہا خیرتہ من عبادہ ‘‘ یعنی اللہ کے بہترین بندے  اس سرزمین کے لئے چنے جاتے ہیں ۔ آج اگر احساس کی شدت موجود ہے  تو ہزاروں میل کی دوری سے مظلومین شام کا یہ نوحہ غم جو کبھی  بیوہ کی زبان سے اور کبھی یتیم کی زبان سے یا اور کسی محزون وغم نصیب کی صد ابن کر بلند ہوتا ہے  ہمارے کانوں تک پہونچ سکتا ہے’’غم کا فسانہ کس کو سنائیں ۔ ٹوٹا ہوا دل کس کو دکھائیں ‘‘ اور ’’ اے خاصہ خاصان رسل  وقت دعا ہے ‘‘
    حدیث نبوی کے مطابق دنیا کے تمام مسلمان ایک جسد واحد کے مانند ہیں اگر کسی ایک عضو کو کوئی تکلیف پہونچتی ہے تو سارا جسم  بخار اور درد سے تڑپتا ہے ۔ آج ہم مسلمانوں کا دل بہت غمزدہ ہے ، آج شامی مسلمانوں کی تکلیف سے اور غم سے سارے مسلمان غم زدہ ہیں ۔ دنیا میں بہت سے خطہ ارض ہیں جہاں قتل وغارتگری کا بازار گرم ہوتا ہے لیکن پھر یہ قتل وغارتگری ایک دن رک جاتی ہے لیکن ایک سرزمین ایسی ہے جہاں خون ریزی رکنے کا نام نہیں لیتی ہے ۔ دن گذر جاتے ہیں ہفتے اور مہینے اور برس گذر جاتے ہیں خون کی پیاس نہیں بجھتی ہے ، قاتل کا دست سفاک قتل سے بازنہیں آتا ہے ۔ پہلے درعا پھر دیر الزور پھر حلب اور اب غوطہ دمشق ، پہلے بھی جان بچانے کے لئے لوگ سمندروں میں کود گئے تھے اور پھر کشتیاں پانی میں ڈوب گئی تھیں ایلان کردی جیسے بچوں کی لاشیں انسانیت کو پکارتی رہیں ، پھر حلب میں ملبے کے نیچے دبا ہوا بچہ احمد اپنی معصومیت کے ساتھ آوازیں دیتا رہا ۔ پانچ سالہ جنگ میں پچاس ہزار سے زیادہ معصوم بچے مارے گئے ۔ اب پھر وہی شام ہے ، وہی شبخون ہے اور وہی خوں آشامی ہے ۔ غوطہ دمشق میں ظلم وتشدد کا طوفان ہیٍ ہر شخص لہو لہان ہے ۔ سکونتی عمارتیں  مسمار  ہو گئی  ہیں  مسجدیں شہید ہوگئی ہیں اسپتال منہدم  ہو گئے ہیں اس بار غوطہ دمشق میں خون کی ندی میں  مظلوم شامی مسلمان غوطہ زن ہیں  شام کیٍ کماندار ناوک فگن ہیں اور حاکم شام کے فوجی کھلے آسمان سے بمباری کرکے سیکڑوں معصوم انسانوں کی زندگی کا چراغ بجھا رہے ہیں ۔ غم کا فسانہ روز و شبانہ  ہے ۔ یہ سلسلہ۲۰۱۱ سے شروع ہوا ور رکنے کا نام نہیں لیتا ہے ۔ گذشتہ چند روز کے اندر غوطہ دمشق میں ۱۸۰۰ اشخاص کی زندگی کا چراغ گل ہوچکا ہے  ۸  لاکھ اشخاص سیریا میں  ظالم  بشار الاسد اور اس کے حلیفوں کے ہاتھ سے شہید ہوچکے ہیں اور ایک کروڑ چالیس لاکھ سے زیادہ  ہجرت کر چکے  ہیں اب تک لاکھوں زندگیاں ایک حکمراں کی ضد اور رعونت  کے آگے قربان ہوچکی ہیں اور لاکھوں  انسان اپنا گھر بار اپنی تجارت اور ملازمت چھوڑ کر افتاں وخیزاں لرزاں اور ترساں ، چاک گریباں خوں بداماں راہ فرار اختیار کرچکے ہیں اب نہ ان کا کوئی گھر ہے نہ در ہے نہ آشیانہ ہے بس سر کے اوپر خیموں کا سائبان ہے جو پڑوسی ملک ترکی نے اپنے یہاں مہیا کردیا ہے
    ان جاںگسل حالات میں غیرت سے عاری اور حمیت سے خالی بعض مسلم عرب ملک ہیں جو سیریا میں جو کچھ ہو رہاہے اس کے بس تماشہ بیں ہیں اور ان میں بعض حکمراں ہیں جو بت خانے کی تعمیر میں لگے ہوئے ہیں یاوہ ملک ہیں جو مقدس  سرزمین کے تقدس کی پرواہ کئے بغیر تین سو سینما ہاوس کی تعمیر کا ’’عظیم الشان‘‘ منصوبہ رکھتے ہیں اورامریکی کلچر کو در آمد کرنا چاہتے ہیں  اور اپنے شبستان عیش میں اپنی دولت سے داد عیش دے رہے  ہیں ۔ غوطہ کے مظالم پرخلیجی تعاون کونسل  یا عرب لیگ کی  طرف سے  مذمت کا کوئی بیان بھی ابھی تک نہیں آیا ہے ۔ ایسا لگتا ہے کہ خون خشک ہوگیا ہے یا خون پانی بن گیا ہے  حالانکہ انسان وہ ہے جس کے اندر انسانیت کا درد پایا جائے جو سب کے غم کواپنا غم بنائے اور جو مسلمان ہوتے ہوئے  مسلمانوں پر ظلم  دیکھے اور اس پر وہ نہ تڑپے وہ مسلمان نہیں ہے  حدیث میں ہے جو مسلمان مسلمانون کے معاملات کا اہتمام نہ کرے اور پریشانیوں کو دور کرنے کی فکر نہ کرے وہ مسلمان نہیں ۔ یہ عرب حکمراں بے حس  ہیں ، بے ضمیرہیں اور اس لائق نہیں ہیں کہ حکمرانی کریں ۔ کیا انہوں نے قرآن کی یہ آیت  نہیں پڑھی  وما لکم لا تقاتلوں فی سبیل اللہ والمنستضعفین من الرجال والنساء والولدان الذین یقولون ربنا اخرجنا من ہذہ القریۃ الظالم اہلہا  واجعل لنا من لدنک ولیا واجعل  لنا من لدنک نصیرا ( النساء ۷۵)  ترجمہ : کیا وجہ ہے کہ تم اللہ کی راہ میں  ان بے بس مردوں ، عورتوں اور بچوں کی خاطر نہ لڑو جو کمزور پا کر دبا دیئے گئے ہیں اور فریاد کررہے ہیں کہ خدایاہم کو اس بستی سے نکال  جس کے باشندے ظالم ہیں اور اپنی طرف سے  ہمارا کوئی حامی اور مددگار پیدا کردے ۔
   دنیا میں بدی اور خباثت  کی سب سے بڑی علامت بشار الاسد ہے جس کی فوج  ہر طرف ملک میں رقص بسمل کا تماشہ دکھا کر اب غوطہ دمشق میں عمارت شکن اور زمین شگاف بمباری میں مصروف ہے جس میں ہر روز سیکڑوں مرد اور عورتیں اور بچے  لقمہ اجل بن رہے ہیں ۔ قیامت سے پہلے قیامت کا منظر ہے دھماکوں اور شیل باری  سے زمین پر لرزہ طاری ہو جاتا  ہے  بموں کا دھواں آسمان تک بلند ہورہا ہے عمارتیں تاش کے پتے کی طرح زمین بوس ہورہی ہیں ۔ غوطہ دمشق ایک ملبہ میں تبدیل ہورہا ہے اور اس کے بڑے حصہ پر اب شامی فوج کا قبضہ ہورہا ہے ۔ روسی مشیرکار بھی بشار کی  رہنمائی اور کمک کے لئے بر سر موقعہ موجود ہیں ۔ دنیا میں مختلف تنظیمیں اس ظلم کے خلاف صدائے احتجاج بلند کررہی ہیں لیکن عرب دنیا کی طرف سے احتجاج کی کوئی آواز  بلند نہیں  ہوتی ہے ، جیسے شامی ان کے بھائی نہ ہوں دشمن ہوں ۔ اقوام متحدہ نے ایک ماہ کی جنگ بلندی  کی قرار داد منظورکی ہے لیکن اس پرعمل درآمد نہ دارد ۔ بعض طاقتیں روس سے مداخلت کی اپیل کررہی ہیں ۔ میر کی سادگی بھی ضرب المثل  ہو گئی ہے ’’ میر کیا سادہ  ہیں ۔۔۔‘‘
     شام اس وقت ایک ایسے جسم کے مانند ہے جس کے اعضاء کٹے ہوئے اور بکھرے ہوئے ہیں اور اس کے جسم کو مثلہ کرنے میں تمام بڑی طاقتیں اور چھوٹی طاقتیں شریک ہیں ۔ شام کے مزاحمتی گروپ  جس میں اسلام پسند بھی شامل ہیں  اس کو توڑنے میں ترکی کے سوا سب متحد ہیں ۔ حلب ہو یا درعا ، حمص ہو یا دیر الزوریا غوطہ دمشق ہر جگہ زمین خون مسلم سے لالہ زار ہے ۔ سقوط شام پرعرب اسلامی دنیا میں سکوت صبح وشام طاری ہے حقیقت یہ ہے کہ ان عرب مسلم ملکوں پر مرگ غیرت اور مرگ حمیت اورمرگ دوام طاری ہے ۔ کچھ خیر وخیرات کے اچھے کاموں کے باوجود یہ اچھی حکومتیں نہیں ہیں اگر شام میں آبادی بجائے مسلمانوں کے عیسائیوں کی ہوتی اور ان کے ساتھ یہ خون ریزی اور خون آشامی کا معاملہ ہوتا تو دنیا چیخ پڑتی ۔ شام کی جنگ کے تمام فریق ۔ مسلمان  مجاہدین مزاحمتی گروپ اور ترکی کو چھوڑ کر۔ سب خوش ہیں کہ اسلام کا نام لئے بغیر مسلمانوں کے جسم کی تکابوٹی کی جارہی ہے ۔ اور ان بڑی طاقتوں کوخوب معلوم ہے کہ پڑوس کے عرب ملک بے طاقت اور بے حیثیت ہیں وہ کچھ نہیں کرسکتے ، وہ عشرت کدوں میں داد عیش دینے کے سوا کچھ نہیں جانتے جن کو آتا نہیں دنیا میں کوئی فن وہ یہی عرب ہیں ۔ صلاح الدین ایوبی کی قبر بھی دمشق میں ہے اور صلیبی طاقتوں کو صلیبی جنگ : کا حوالہ دیئے بغیرصلاح الدین ایوبی  سے  بدلہ لینے کا موقعہ ہاتھ آیا ہے ۔ مسجد اقصی  صلیبیوں کے قبضہ میں ہے اور اب یروشلم میں امریکہ کا سفارت خانہ جلد ہی کھلنے والاہے ۔ عیسائی دنیا  بیت المقدس  مقدونیہ اور قسطنطنیہ پر مسلمانون کا قبضہ کبھی فراموش نہیں کرسکتی ہے ۔ عیسائی دنیا چاہتی ہے کہ پوری دنیا شور ناقوس کلیسا سے گونج اٹھے اور نغمہ توحید اور گلبانگ ا ذاں کہیں سنائی نہ دے ۔ اسے مسلمانوں سے انتقام لینا ہے اور پایان کار مرغان حرم کے سب سے مقدس آشیانہ  پر قبضہ کرنا ہے  ۔خادم الحرمین کو اس کی خبر نہیں ۔ بے ید بیضاء ہے پیران حرم کی آستیں ۔
   شام وہ بدقسمت ملک ہے جس میں ایک نہیں ظلم وستم کے خونیں پنجے بہت سے ہیں داعش کو ختم کرنے کے نام پر روس اور امریکہ دونوں مسلسل شہری علاقوں پر بم باری کرکے عمارتوں کو منہدم کرتے رہے ہیں مسجدوں اور اسپتالوں تک کو نشانہ بنایا گیا ہے اور ان دونوں آقائوں کی فضائی سرپرستی میں بشار الاسد کی فوج فتح کا جھنڈا بلند کرتی رہی ہے ایران کی آرمی بشار کی فوج کے ساتھ لڑتی رہی ہے حزب اللہ نے بھی بشار کی مد کرنے میں کوتاہی نہیں برتی ہے ۔ یہ سب طاقتیں مل کر خون کی ہولی کھیلتی رہی ہیں بالکل ابتداء میں جب یہ بیرونی طاقتیں میدان میں نہیں کودی تھیں شام کے مجاہدین نے جنہیں باغی کہا جاتا ہے ملک کے اسی فی صدی علاقوں پر زمینی قبضہ کرلیا تھا اور ایسا لگتا تھا کہ پورے ملک شام پر باغیوں کا قبضہ اب چند روز کی بات ہے ۔ اور اسلامی فکر اور جذبہ سے سرشار باغی ملک کے درو بست پر قبضہ کرلیں یہ اسرائیل اور بڑی طاقتوں کے لئے ناقابل برداشت بات تھی اور اسرائیل کا وجود خطرہ میں پڑ سکتا تھا ۔ بشار الاسد کے ظالمانہ رویہ کے باوجود دنیا کی طاقتیں اسی پیکر ظلم حاکم کو کو برسراقتدار دیکھنا چاہتی تھیں اور ایران کے نزدیک ایک شیعی اقتدار خواہ وہ کیسا ہی برا ہو سنی اقتدار سے بہتر ہے ۔ ایران کی یہی شیعی توسیع پسندانہ پالیسی شام کے علاوہ عراق میں یمن میں بحر ین میں ہر جگہ جاری ہے ۔ اس کا تقریب بین المذاہب کا نعرہ مکر وفریب کے ایک جال کے سوا کچھ نہیں ۔
        قرآن  کے حکم کے رو سے شام کے مسلمانوں کی مدد مسلمانوں پرواجب ہے جس طرح اہل فلسطین کی مدد واجب ہے ۔ شام میں جن لوگوں کے ہاتھ میں انقلاب کی قیادت تھی ان کی ذہنی اور فکری وابستگی اخوان المسلمون کے ساتھ تھی اور خلیج کے حکمرانوں کا حال یہ ہے کہ انہیں لفظ اخوان کے الف سے بھی ڈر لگتا ہے اور اسی لئے انہوں نے محمد مرسی کی حکومت کا تختہ الٹنے میں بڑی طاقتوں کی پوری مدد کی اور خلیجی حکومتوں کے حاکموں کے کفش بردار مفتی حضرات  اخوان پر اور ان تمام علماء پر جو اخوان کے طرفدار تھے دہشت گردی کا الزام لگاتے رہے ۔ علم دین اور افتاء کی ایسی رسوائی چشم فلک نے کم دیکھی ہوگی ۔ کہا جاتا ہے کہ مسلم عرب ملکوں کو بڑی طاقتوں کا خوف ہے اس لئے وہ  شام کی کوئی مدد نہیں کرسکتے تھے ۔ یہان سوال یہ ہے کہ آپ شمالی کوریا کر طرح بڑی طاقت کیوں نہیں بن سکے پٹرو ڈالر اور سیال سونا آپ کودیا گیا تھا آپ نے اس کا مصرف کیوں نہیں لیا آپ نے سائنس اور ٹکنالوجی میں ترقی کیوں نہیں کی ۔ اورکیوں پوری قوم کو صارفین کی قوم بنا دیا ۔ کیا قرآن میں  یہ حکم نہیں ہے کہ تمہارے پاس  ایسے اسلحے ہوں کہ  دین اسلام کے دشمن  اور تمہارے  دشمن (  آج کے زمانہ میں اسرائیل اور امریکہ وغیرہ ) خوف سے لرزہ براندام  ہو جائیں ۔ تصور کیجئے کہ  شام کے پڑوسی عرب ملکوں میں کوئی ملک اگر  اسرائیل یا مغربی ملکوںکی طرح طاقتور ہوتا تو کیا  بشار کو یہ جرآت  ہوتی کہ ڈکٹیٹر بن کر  شامی مسلمانوں پر ظلم کرے  یا کیا ایران کو ہمت ہوتی کہ وہ بشار کا حلیف بن کر سنی مسلمانوں پر ظلم  ڈھائے  یا کیا  روس کی ہمت ہوتی کہ شام کے معصوموں پر بمباری کرے ۔ کیا یہ خلیجی ملکوں کا جرم نہیں ہے کہ وہ پٹرول کی دولت سے صرف عیش کرتے ہیں اور اپنے ملک کو صنعتی اعتبار سے طاقتور نہیں  بناتے ہیں ۔ اگر وہاں کے باشعور مسلمان  حکومت کے خلاف کھڑے ہوجائیں  اور حکومت کو بدلنے کی کوشش کریں توان کو قصور وار نہیں ٹھرایا جاسکتا کیونکہ وہاں کے حاکموں نے  قرآن  کے حکم کو پامال کیا ہے ، آج  خلیجی ملکوں کا ایک ولی عہد سلطنت  ترکی کو جس نے شامیوں کی مدد کی ہے  بدی کا محور قرار دیتا ہے، وہ شخص قرار دیتا ہے جو سرزمین مقدس کو  بدی کی آماج گاہ بنانے پر تلا ہوا ہے  اور وہاں  کے بڑے مفتی سے لے کر چھوٹے مفتی تک سب کی زبانیں  خاموش ہیں۔منبر ومحراب حق گوئی کے لئے  ترس رہے ہیں ۔
      شام بحیرہ روم کی مشرقی  کنارے پر واقع  ایک بے حد خوبصورت اور شاداب ملک ہے اس کے مغرب میں لبنان اور شمال میں ترکی ہے اور مشرق میں  عراق ہے اور جنوب میں اردن واقع ہے یہ دو کروڑ کی آبادی کا ملک ہے اس میں ۹۰ فی  صد سے زیادہ مسلمان ہیں  غالب اکثریت سنیوں کی ہے ۔ لوگ  خلیجی ملکوں کی  طرح امیر نہیں ہیں کیونکہ پٹرول کی پیداوار کم ہے لیکن ان کے معاشرتی اخلاق  بہت بہتر ہیں ان میں شرافت ہے اور دلجوئی اور دلنوازی  ہے ۔ فرانس کے اقتدار کے ختم ہونے کے کچہ عرصہ کے بعد  حافظ الاسد نے اقتدار پر قبضہ کرلیا تھا  جو علوی شیعہ تھا اور فوج میں ملازم تھا چونکہ فوج میں علویوں کی تعداد بہت زیادہ تھی اس لئے اس نے بزور طاقت اقتدار پر قبضہ کرلیا اور دینی ذہن رکھنے والوںاور اخوان کو کچلنا شروع کیا  اس کے مرنے کے بعد اس کا بیٹا تخت اقتدار پر بیٹھا  اور اس نے باپ سے زیادہ ظلم کئے ۔ پورے ملک میں ایمرجنسی جیسی حالت ہمیشہ رہی ۔ کسی کو تحریر وتقریر کی اجازت نہیں تھی یہان تک کہ سیرت کے جلسے بھی بندمکانوں میں  منعقد ہوتے تھے ۔ بشار الاسد کے مظالم کے خلاف ۱۵ مارچ ۲۰۱۱ ء کوشام میں مظاہرے شروع ہوئے  جس کو اس نے آہنی  ہاتھوں سے کچل دیاپھر پورے ملک میں  مظاہروں کا سلسلہ شروع ہوگیا اور طاقت سے ان پرامن مظاہ روں کوروکنے کی وجہ بغاوت کے شعلے آسمان سے باتیں کرنے لگے  پھر وہ وقت آیا کہ ملک  کی سرزمین  کا ۸۰ فی صد حصہ بشار کے قبضہ سے نکل کر باغیوں کے قبضہ میں چلا گیا  جن کی قیادت کرنے والوں میں دینی ذہن کے لوگ  اور اخوان المسلمون  کے لیڈر تھے ۔ امریکہ اور اسرائیل دونوں  خوف کی نفسیات میں مبتلا تھے بشار کو ہٹا کر اخوان کو برسر اقتدار لانا  بساط شطرنج  پڑ اسرائیل کے، لئے شہ مات کے مرادف  تھا ۔ چنانچہ مذاکرات  کی میز سے ان چہروں کو ہٹایا گیا  جن پر دینی جماعت کا ٹھپہ  لگا ہوا ہوا تھا  ۔ چنانچہ دینی ذہن کے مجاہدین نے جبہۃ النتصرۃ ، جیش الاسلام اور عفلق الشام  وغیرہ  کے نام سے  اپنی تنظیمیں قائم کرلیں  دینی جماعتوں نے اپنی سرگرمیاں جاری رکھیں اور پھرر وس اور امریکہ دونوں نے  ان کو اپنا  نشانہ بنایا شامی فوج کے نشانہ پر وہ پہلے سے تھیں ۔ یہ وہ جماعتیں تھیں جو شدید مظالم کے خلاف  کھڑے ہونے والوں میں صف اول میں تھیں  انہوں نے نام نہاد مذاکرات سے خود کو الگ رکھا اور مذاکرات کا منصوبہ بنانے والوں  نے بھی  ان سے زیادہ دلچسپی نہیں  لی ۔ مصر ہو یا تیونس ہو لیبیا ہو یا شام ہو ہر جگہ انقلابات کی اصل وجہ وہ شدید ظلم ہے جو ان ملکوں میں  حاکم اپنے عوام پر کرتے تھے  اور کسی کو شکایت کرنے اور احتجاج کرنے کی اجازت نہیں تھی ۔ آزادی تحریر وتقریردنیا میں تمام ملکوں میں ہر انسان کا بنیادی  حق سمجھا جاتا ہے ۔ اس دور کی جمہورت کے نقطہ نظر سے بھی اور اسلامی شریعت کے اعتبار سے بھی شکایت احتجاج اور تنقید ہر شہری کا حق ہے لیکن شام میں اور بہت سے ملکوں میں انسانیت کا نہیں بلکہ جنگل کا قانون رائج ہے وہان ہر طاقتور حکمران کمزور پر ظلم کرنے کا عادی  ہے وہاں کا ماحول ایسا ہے کہ ظالم کی ثناخوانی ہے اور قاتل کی پذیرائی ہے اور انصاف کی رسوائی ہے ،  وہ ایک تالاب ہے جس میں ہر بڑی مچھلی چھوٹی مچھلی کو کھا جاتی ہے ۔ یہان بڑی مچھلی وہ ہے جس کے پاس فوج ہے ، پولیس ہے حکومت کی طاقت ہے اور ہر طرح کے ہتھیار ہیں ۔ اسلامی تاریخ میں  متعدد اسلامی تحریکیں اسی فوجی اور حکومتی طاقت سے کچل دی گئی ہیں سانحہ کربلا صرف ایک بار تاریخ میں نہیں پیش آیا ہے بلکہ باربار پیش آتا رہتا ہے ۔ اس لئے کہ ان تحریکوں کے ہاتھ میں  ہتھیار نہیں ہوتے اور حکومت کی طاقت نہیں ہوتی ۔ اس لئے ہر دور کا یزید انہیں پسپائی اختیار کرنے پر مجبور کردیتا ہے ۔
      مسلمانوں میں بعض اصحاب فکر ایسے بھی ہیں جن کا کہنا ہے کہ دینی ذہن اور تحریک کے لوگوں کوشام میں اور کئی ملکوں میں شکست کا سامنا ہوا کیونکہ جب تک طاقت کا توازن نہ ہو اور حکومت سے مقابلہ کی طاقت نہ ہو انقلاب کی کوشش نہیں کرنی چاہئے ۔ حقیقت یہ ہے کہ باغی گروپ شام میں  کامیابی کی دہلیز تک پہونچ گیا تھا ۸۰ فی صد  ملک پر باغی مجاہدین کا قبضہ تھا ۔ کیا یہ طاقت کافی نہیں تھی کہ حکومت کے ظلم وستم کی خلاف  اور بے دینی اور اباحیت کی  حکمرانی کے خلاف باشعور عوام کھڑے ہوں ۔ یہ بیرونی طاقتیں تھیں جوحکومت کی کمک پر آگئیں ۔ ایران جسے بشار سے ربط خصوصی تھا  میدان میں کود پڑا تاکہ نام نہاد شیعی حکومت کوبچایا جائے ایرانی ملیشیا حزب اللہ کے سپاہی شیعی حکومت کو بچانے کے لئے شامی فوج کے شانہ بشانہ لڑنے کے لئے سامنے آگئے ۔ اس پر بھی انقلاب بردوش مجاہدین اور باغیوں کا پلڑا بھاری ہورہا تھا  اب شامی حکومت نے روس کو کو دعوت دی کہ وہ آئے  اور گرتی ہوئی حکومت کو سنبھالا دے ۔ روس ایک عالمی طاقت ہے اسے اپنے روایتی حلیف شام کی مدد بھی کرنی تھی اور افغانستان میں شکست کا بدلہ بھی لینا تھا  اور ملک شام میں اپنے اقتصادی مفادات کی حفاظت بھی کرنی تھی ۔داعش کے نام پر روس نے شام کی مزاحمتی فوج پر خوب بمباری کی اور یہ مزاحمتی فوج وہ ہے جو بشار کے خلاف بر سر پیکار ہے ۔ روسی طیارے آسمان  سے مجاہدین اور مزاحمتی فوج پرجنہیں فری سیرین آرمی  بھی کہا جاتا ہے  آگ برسانے لگے اور پھر حلب انقلابیوں یا باغیوں یا فری سیرین آرمی  کے ہاتھ سے نکل گیا ۔شام میں جو جنگ کا منظرنامہ ہے وہ چھوٹے پیمانہ پر عالمی جنگ کا منظر نامہ ہے ۔ یہاں روس بھی بشار کی حمایت میں  بمباری کر رہا ہے اور داعش سے کہیں زیادہ  مزاحمتی گروپ کو  نشانہ بنارہا ہے   اور امریکہ نے داعش کو ختم کرنے کے نام پر اپنی فضائی فوج  ملک کی ویرانی میں اضافہ کرنے کے لئے لگا دی ہے  ایران کی بری فوج  زمینی لڑائی میں بشار کی فوج کا ساتھ دے رہی ہے اور حزب اللہ کے فوجی بھی  شامی فوج کے مدد گار ہیں۔ یہ کہنا غلط ہے کہ شام میں آزادی اور انقلاب  کا نعرہ بلند کرنے والوں نے بشارالاسد سے شکست کھائی ہے انہوں نے تو بشار الاسد کو زمین کے بڑے حصہ سے بے دخل کردیا تھا۔ انہوں نے دراصل  روس اور امریکا اور ایران  اور حزب اللہ کی  متحدہ فوج سے شکست کھائی ہے ۔  ، محدود پیمانہ پر ترکی کی فوجی مداخلت بھی سرحد پر کردوں پر کنٹرول کرنے کے لئے موجود ہے یہ کرد وہ  ہیں جو ترکی میں بھی خلفشار پیدا کرتے ہیں اور امریکہ کی ہمدردیاں کردوں کے ساتھ ہیں  ۔شام کی بہتی گنگا میں یا دریائے فرات میںسب ہاتھ دھورہے ہیں،مرنے والے سب شام کے مسلمان ہیں ۔شام ایک بہت  بڑا  مذبح بن گیا ہے  جس میں رات دن  انسانوں  کا خون بہہ رہا ہے ۔اور دنیا تماشہ بیں بنی ہوئی ہے ۔  سقوط شام پر اسلامی عرب  دنیا میں مرگ دوام ہے سکوت صبح وشام ہے ۔
      مسلم دنیا کے خلاف عالمی سازش ہے ۔ مغربی ملکوں نے مسلم ملکوںکو اپنا آلہ کار بنایا ہے خلیجی ملکوں  کی مدد سے جمہوری اور دستوری  حکومت کا مصرمیں  تختہ پلٹا گیا ہے ۔ سعودی عرب کے ذریعہ  قطر کا بائیکاٹ باہمی  افتراق  پیداکرنے کی  ایک سازش ہے  سعودی عرب نے اسرائیل کے لئے ہندوستان کو فضائی راہ داری بھی دے دی ہے  وصال یار میں اور’’ من تو شدم  تو من شدی ‘‘ میںیعنی سعودی عرب اور اسرائیل کی دوستی میںجوکسر باقی ہے وہ بھی جلدپوری ہوجائے گی  اور پھر’’ معتدل اسلام ‘‘ کا نعرہ ۔  اندازہ کیا جاسکتا ہے کہ سعودی عرب مغرب کے  جال میں کس قدر پھنس چکا ہے۔ سعودی  عرب ہی میں شاہ فیصل بھی ہوا کرتے تھے  جو اخوان المسلمین کے خیرخواہ اور ہمدرد تھے  اوراب  موجودہ سعودی حکمراں اخوان  پر دہشت گردی کا  جھوٹا الزام  لگاتے ہیں کیونکہ امریکی آقا  یہی چاہتے ہیں  اکتوبر ۱۹۷۳ کی جنگ میں  جب اسرائیلی فوج نے  امریکی اسلحہ کی مدد سے مصر کو شکست  فاش دی تھی تو یہی شاہ فیصل تھے جنہوں نے  امریکہ اوراسرائیل کے ہم نوا مغربی ملکوں کو  پٹرول کی سپلائی روک دی تھی جس سے امریکی معیشت  غیر معمولی طور پر متاثر ہوئی ۔ پٹرول پمپ پر کئی کیلومیٹر کی لائینیں  نظر آنے لگی تھیں، ایک شدید  اقتصادی بحران  پیدا ہوگیا تھا ۔مغربی طاقتوں نے اسرائیل پر دباو ڈال کر  فوجوں کے واپسی پر مجبور کیا  اور اسرائیل کو صحرائے سینا کو خالی کرنا پڑا تھا ۔ آج وہی سعودی عرب ہے جہاں  شاہ فیصل کے جانشین  شاہ سلمان اور ان کے ولی عہداب  زلیخائے تہذیب حاضر یعنی  امریکہ کے چشم وابرو  کے اشارے پر چل رہے ہیں ۔ اس صورت حال کی اس سے بہتر  تصویر نہیں ہوسکتی ہے  جو ایک فارسی شاعر نے کھینچی ہے  ۔
                             
             غنی روز سیاہ پیر کنعاں  را  تماشا کن
                                           کہ نور دیدہ اش روشن کند چشم زلیخا را
              شاعر کہتا ہے کہ ضعیف پیر کنعاں( یہ استعارہ ہے حضرت یعقوب کا ، یہاں شاہ فیصل کوتصور کیجئے ) کی سیاہ بختی اور تیرہ نصیبی  ذرا  دیکھنے  کے لا ئق ہے کہ اس کے  نور دیدہ  لخت جگر ( سعودی ولی عہد)نے  زلیخا ئے تہذیب  کی ہوس پوری کرکے اسے  روشن چشم اوردلشاد کردیا ۔    
   اسلام اور مسلمانوںکا درد  ترکی کو ضرور ہے  لیکن امریکہ نے ترکی میں انقلاب کی سازش  کرکے  اردگان کو محتاط کردیا ہے وہ مجبور ہے کہ روس اور ایران کے ساتھ رشتہ نہ توڑے  اور تعلقات قائم رکھے ۔ شام اس کے لئے پل صراط ہے  اور اسے سنبھل کرکے  چلنا ہے  اور اس نے اپنی جنگ کرد  ملیشیا  تک محدود رکھی ہے ۔ لیکن اس نے لاکھوں شامی مہاجرین کو پناہ دی ہے  اس کی نیکی اور شرافت اور وسیع القلبی اوردینی حمیت  کا یہ سب سے بڑا ثبوت ہے ۔
  شام میں جنگ بندی پر اتفاق کے باوجود عملی طور پر  بموں سے حملے جاری ہیں ۔ آزادانہ انتخابات اور عبوری حکومت کے قیام کا وقت کب آئے گا  اللہ بہتر جانتا ہے ۔ امریکہ کی فوجی مداخلت بھی روس کی جارحیت کو روک نہیں سکی ہے ۔ ترکی کی زیادہ پیش فدمی  ایران کے لئے دعوت مبارزت بن چائے گی ۔ بظاہرابھی  افق پر اندھیرا ہے ،کہیں دور تک روشنی کی کرن نظر نہیں آتی ہے سفینہ ساحل نجات تک کب پہونچے گاکسی کونہیں معلوم ۔جب  ہر ناخدا سے  امید کا سر رشتہ ٹوٹ جاتا ہے تب غیب سے خدا کی کارسازی  کا ظہور ہوتا ہے ۔  وہ ’’ فعال لما یرید‘‘  ہے ۔  ’’وللہ جنود السموات والارض ‘‘۔ آسمان اور زمین کے تمام لشکر اس کے قبضہ قدرت میں ہیں ۔ مشیت الہی کے تحت  حضرت یوسف کو اندھے کنویں میں ڈال  دیا گیا  تھا  پھر ان کو غلام بنا کر بازار مصر میں فروخت کردیا گیا تھا  اور یہ سلسلہ اسباب  اس لئے تھا کہ ایک دن ان کو مصر کا بااختیار فرماں روا بنا دیا جائے ۔ یہ بات پہلے کسی کو نہیں معلوم تھی  حضرت یوسف کو بھی نہیں معلوم تھی ۔شام میں یہ سب کیوں ہورہاہے  اور اللہ کو کیا منظور ہے نہیں معلزم ۔ انسان بس احکام الہی کی پیروی  کا مکلف ہے ۔ جزا اور انعام  اللہ ضرور عطا کرتا ہے  ظالم کو ظلم کی سزا ضرور ملتی ہے  اور وہ کیفر کردار تک پہونچتا ہے اور ہمیں دعا بھی کرنی چاہئے اللہم خذہ  أخذ عزیز مقتدر ۔  لیکن دعاکب قبول ہوگی  یہ سب پردہ تقدیر  میں ہے ۔ اللہ کے ارادوں کو کوئی نہیں جان سکتا ہے
                                                     فرزیں سے بھی  پوشیدہ  ہے شاطر کا ارادہ

ستیزہ کار رہا ہے ازل سے تاامروز


   
عمر فراہی  ۔  ای میل  :umarfarrahi@gmail.com
   
خلافت کے بعد ملوکیت اور ملوکیت کے بعد بادشاہت میں در آئی خرابیوں پر ابھی تک بحث کا خاتمہ بھی نہیں ہوا تھا کہ اٹھارہویں صدی کے مادی انقلاب اور لبرل طرز سیاست نے مسلمانوں کو ایک اور فتنے میں مبتلا کردیا۔ بدلتے ہوئے جدید جمہوری ماحول میں جن اسلام پسند حکمرانوں اور علمائے دین نے احیاء اسلام کی تحریک کو پھر سے زندہ کرنے کی کوشش کی تو ان کے اپنے عقیدتمندوں نے ان کی تحقیق و تحریک پر غوروفکر کرنے کی بجائے اپنے اپنے پسند کی دیومالائی کہانیاں تخلیق کرلی ہیں ۔کسی کیلئے مصطفیٰ کمال پاشا اور جمال ناصر محترم ٹھہرے تو کوئی کہتا ہےکہ قذافی اس لیے مدبر تھا کیونکہ اس نے لیبیا کو کہاں سے کہاں تک پہنچا دیا ۔کسی کیلئے آل سعود ناقابل تسخیر و تنقید ہیں تو اس لیےکہ وہ خادم الحرمین شریفین ہیں۔ایرانیوں نے آیت اللہ خمینی کے جدید شیعی انقلاب کے استعماری عزائم کی تکمیل کیلئے پورے مشرق وسطیٰ کو خون میں نہلا دیا ہے اور ممکن ہے آنے والی دہائی میں یہ آگ پورے عالم وسطیٰ کو اپنی آغوش میں سمیٹ لے پھر بھی ایک طبقہ انہیں اپنا روحانی قائد تسلیم کرتا ہے ۔برصغیر کے تناظر میں جناح اور مولانا ابوالکلام آزاد کے تقابلی کردار کا عنوان آج بھی زیر بحث ہے ۔سوال یہ نہیں ہے کہ ان میں کون اپنے مقصد میں کامیاب ہوا اور کون ناکام ۔سچ تو یہ ہے کہ کسی بھی شخصیت کی کامیابی اور ناکامی اس کے حق اور ناحق پر ہونے کی دلیل نہیں ہوتی اور اگر کسی علاقے کی ترقی ٹکنالوجی اور خوشحالی اس ملک اور قوم کے حکمرانوں کے تدبر کی علامت ہوتی تو اپنے وقت کی ترقی یافتہ اور خوشحال اسپین اور مغلیہ سلطنتوں کا زوال نہ ہوتا اور رسول عربی ﷺ ناخواندہ اور پسماندہ عربوں کو لیکر وقت کے سپر پاور ملک فارس اور روم کے فتح کی پیشن گوئی نہ کرتے۔ اور پھر جن انبیائے کرام کی دعوت کو ٹھکرا دیا گیا یا وہ شہیدکر دیے گئے کیا ان کے تدبر اور تفکر میں کوئی نقص تھا ؟ فرعون کی اپنی سلطنت بھی اپنے وقت کی ترقی یافتہ اور طاقتور حکومت تھی ۔اسے گمان ہی نہیں تھا کہ اس کی سلطنت کا بھی کبھی زوال ہوگا اور اس کی سلطنت کی تباہی کا منصوبہ اس کے محل میں ہی تیار ہورہاہے ۔صرف فرعون ہی کیوں قرآن میں قوم ثمود قوم عاد اور نمرود جیسی بے شمار طاقتور قومیں اور سلطنتیں تھیں جنھوں نے پہاڑوں کو کھود کر مضبوط عمارتیں اور قلعے بنالیے تھے کہ دیکھیں اب کون نبی انہیں پتھروں کی بارش کے عذاب سے ڈراتا ہے ۔لیکن اللہ کا عذاب ایسے راستوں سے آتا ہے کہ انسان اس کا گمان بھی نہیں کرسکتا ۔ایسے بھی بادشاہ پیدا ہوئے ہیں جن کی حکومتوں میں کبھی موت ہی نہیں ہوئی ۔جب حضرت ابراہیم علیہ السلام نے نمرود سے کہا کہ میرے رب کی بندگی اختیار کر لو کیوںکہ وہی زندگی اور موت کا مالک ہے تو نمرود نے کہا کہ یہ تو میرے اختیار میں بھی ہے اور پھر اس نے اپنی جیل میں قید ایک  شخص کو قتل کرکے اور دوسرے کو رہا کرکے اپنی ہٹ دھرمی کا مظاہرہ کیا ۔یہ خوشحالی ،ترقی اور انہونی سب اللہ کی آزمائش ہے اور اس کے ہونے نہ ہونے میں اللہ ہی کا اختیار ہے۔ انسان یہ دعویٰ نہیں کرسکتا کہ یہ سب اس کے منصوبے اور ارادے کی وجہ سے ہورہا ہے ۔ہاں انسان صرف ان لوگوں کے خطوط پر جو اللہ کے نیک بندے تھے خواہ وہ اصحاب کہف ہی کیوں نہ ہوں حق کی جدوجہد اور صراط مستقیم کا پابند ہے ۔ لیکن باوجود اس کے کہ اصحاب کہف کسی حکومت اور سلطنت کے مالک نہیں رہے اللہ نے رہتی دنیا تک ان کے ذکر کو بلند کردیا ۔ان کے بعد اسی ریاست میں دین بھی غالب آیا یہ تصویر اللہ نے بظاہر اصحابِ  کہف کو زندہ کرکے عام لوگوں پر آشکارکر دیا کہ تم صرف حق کی جہدوجہد کے پابند ہو ،رہا سوال کامیابی اور ناکامی کا تو اکثر اس جدوجہد میںنسلیں بھی ختم ہوجاتی ہیں ۔اصحاب کہف کے اس قصے میں آج کے مومنوں کیلئے نشان عبرت ہے کہ وہ باطل کی ظاہری کامیابی اور اپنی ناکامی سے مایوس ہونے کی بجائے جہاں تک ہوسکے حق کی جدوجہد جاری رکھیں ۔یہی خالق کا اپنی مخلوق سے مطالبہ ہے ۔کربلا کے میدان میں حضرت حسین رضی اللہ عنہ شہید ہو کر بھی حق پر تھے اور یزید ناحق پر تھا۔یہ اقتدار اور سیاسی کشمکش کا معاملہ نہیں لوگوں میں یزید کے خلاف جو بے چینیاں تھیں اور حضرت حسین رضی اللہ عنہ کو یزید سے نجات کیلئے لوگوں کے جو خطوط آرہے تھے حضرت حسین رضی اللہ عنہ نے تو صرف ظالم حکمراں کے خلاف کوچ کرکے اسلام پرعمل کیا۔ اس بات پر ابھی تک کے علماء کا اتفاق ہے اور شاید یہ اتفاق ہی ہے کہ سخت گیر عالم علامہ ابن تیمیہ سے لیکر کٹر سے کٹر وہابی علماء نے بھی اپنے بچوں کا نام یزید رکھنے میں کراہیت محسوس کی ۔پچھلے سو ڈیڑھ سو سال کی تاریخ میں سعود خاندان میں بھی مجھے یزید نام کا کوئی عالم یا حکمراں نظر نہیں آیا۔ خیر یہ کوئی دلیل نہیں ہے لیکن میں یہ بات اس لیے لکھنے کیلئے مجبور ہوں کہ کچھ لوگ آج بھی یزید کو رضی اللہ عنہ اور رحمت اللہ علیہ لکھنے کی ضد پر قائم ہیں ۔یہ لوگ اپنے بیٹوں کا نام بھی شوق سے یزید رکھ سکتے ہیں کسی کو کیا اعتراض ہوسکتا ہے ۔فتنوں کے دور میں جہاں سلف صالحین کی عزت و احترام اور حق ناحق کی تمیز کا خاتمہ ہورہا ہے وہاں ابوجہل اور ابولہب کی طرح تھوڑی سی ہٹ دھرمی سے اسلام کا کیا نقصان ہونے والا ہے ۔
ستیزہ کار رہا ہے ازل سے تاامروز
چراغ مصطفوی سے شرار بولہبی
یزید کو رحمۃ اللہ علیہ کہنے یا یزیدی ذہنیت کو اپنے لیے رحمت قرار دینے والے کیا خود کو ایرانی رافضی صدر روحانی کی فہرست میں شمار کرنا پسند کریں گے ؟
ایرانی صدر حسن روحانی نے اپنے ایک بیان میں شام کے ڈکٹیٹر بشارالاسد کو بہترین مزاحمت کار کہا ہے !
السیسی مظلوم ہے اور اخوان جنہیں ہتکڑیاں لگا کر جیلوں میں ڈال دیا گیا وہ ظالم !
کس نے سیسی کی حمایت کی؟
کون بشر کی حمایت کررہا ہے ؟
کیا فرق ہے دونوں میں؟
صرف لاشوں کا !
اقبال نے ظالموں کے بت بنا کر پرستش کرنے والے مسلمانوں کے بارے میں کیا خوب کہا ہے کہ  ؎  یہ دور اپنے براہیم کی تلاش میں ہے/صنم کدہ ہے جہاں لاالہ الااللہ
 عمر فراہی

آہ ! وہ تیرِنیم کش ...!



عمر فراہی  ۔  ای میل  :  umarfarrahi@gmail.com

میر سپاہ نا سزا ، لشکریاں شکستہ صف/آہ ! وہ تیر نیم کش جس کا نہ ہو کوئی ہدف۔اقبال کہتے ہیں کہ جس لشکر کا امیر نااہل اور نالائق ہو اس کی مثال اس بدبخت بے حس اور شکستہ صف فوج کی طرح ہےجس کی ساری تگ دو ایسی ہی ہے جیسے کوئی بددلی سےہوا میں تیر چلائے ،نہ کمان ہی زور سے کھینچی گئی ہو نہ ہی تیر ہی کسی نشانے پر پھینکا گیا ہو ۔
اقبال نے تقریباً اسی نوے سال پہلے جب یہ بات کہی تھی تو اس وقت مسلمانوں میں ہزاروں علمائے دین اور ذہین افراد بھی موجود تھے۔ ہونا تو یہ چاہئیے تھا کہ ملت اپنے فکر و عمل کے فنا ہونے کا سبب اور اپنی شان وشوکت کے زوال کا حل ڈھونڈھتی لیکن ہوا یہ کہ ملت اسلامیہ اپنے درمیان سے اجتماعی دانشمندی اور دانشمند علماء اور اقبال سے بھی محروم ہوگئی۔یہ بھی سچ ہے کہ کل کی بنسبت آج مسلمان ہزاروں مدارس کالج اور یونیورسٹیوں کی تعلیم سے مستفید ہورہے ہیں پھر بھی نرگس اور بھی شدت کے ساتھ اپنی بےنوری پہ نوحہ خواں ہےاورکسی دیدہ ور کے انتظار میں ہے ۔پچھلی دہائیوں میں علماء کا ایک بہت بڑا دور مسلکی مناظرے بازی میں گذر گیا ۔یہ وہ دور تھا جب مسلمانوں کے علماء اور دانشوروں کی اپنی ساری جدوجہد اپنے فکری زوال کو عروج میں بدلنے کی جستجو اور تحقیقی تصنیفات میں گذرنا چاہئے تھا لیکن ایک مسلک نے دوسرے مسلک پر کیچڑ اچھالنے میں گذار دیا ۔دنیا کہاں سے کہاں چلی گئی کچھ مسلمانوں کو ہر سال رمضان کے مہینے میں اس بحث میں الجھا ہوا پایا جاتا ہے کہ تراویح نفل ہے یا سنت ۔تراویح آٹھ رکعت ہے یا بیس ۔ہونا تو یہ چاہئے کہ جس کو جو سمجھ میں آتا ہے اس پر عمل کرے اور اپنے مسلک کی دیگر فلاح بہبود کی مصروفیات کیلئے منصوبے تجویز کرے تاکہ اس کے اس فلاح و بہبود کے کام سے دیگر مسلک اور مذہب کے لوگ بھی مستفید ہوں ۔جیسا کہ ارشاد ربانی بھی ہے کہ’’اب دنیا  میں وہ بہترین گروہ تم ہو جسے دنیا میں ہدایت و اصلاح کیلئے میدان میں لایا گیا ہے ۔تم نیکی کا حکم دیتے ہو بدی سے روکتے ہو اور اللہ پر ایمان رکھتے ہو ‘‘۔
لیکن ابھی بھی ہو وہی رہا ہے جو اسلام اور انسانی فطرت دونوں کے خلاف ہے۔اپنی ذات اور فرقے سے وابستگی اور دوسرے مسلک کے خلاف جھوٹ اور بہتان کے لامتناہی بحث اور عنوان سے بچوں کے ذہن میں نفرت اور تصادم کا جو ماحول پیدا ہو رہا ہے مسلمانوں کے اپنے درمیان یہ صورتحال بذات خود بھی برما فلسطین کشمیر اور چچنیا کی شورش سے کم نہیں ہے ۔یہ تو اچھا ہے کہ ہمارے ذہنوں کا یہ فساد ہند و شدت پسندوں کے خوف سے قابو میں ہے ورنہ ہندوستان کے بیس کروڑ مسلمانوں کی حالت پاکستان افغانستان ایران عراق شام اور مصر سے مختلف نہ ہوتی جہاں پچھلی ایک صدی سے مسلمان آپس میں ہی متصادم ہیں۔ اس کی وجہ اس کے سوا اور کچھ نہیں کہ مسلمانوں کی اکثریت نہ صرف اپنی اسلامی غیرت اور حمیت سے محروم ہے بلکہ انسانی فطرت میں جو تعمیری سوچ اور رحم کے جذبات پائے جاتے ہیں اس کا بھی فقدان ہے ۔ جس طرح ہندوستانی سیاستدانوں نے اپنی کمزوری کو چھپانے کیلئے یہاں کے باشندوں کو لسانی ، علاقائی اور مذہبی عصبیت میں الجھا رکھا ہے ہماری اپنی مسلکی عصبیت کی شدت بھی عروج پر ہے ۔ایک بار کا واقعہ ہے جب آٹھویں کلاس میں پڑھ رہی ہماری بچی سے اس کے ساتھ پڑھ رہی ایک دوسری بچی نے پوچھا کہ تم لوگ وہابی ہو ؟ بچی نے کہا کہ یہ کیا ہوتا ہے دوسری بچی نے کہا ارے پاگل چوبیس نمبر ! ہماری بچی  نے پھر کہا مجھے یہ سب سمجھ میں نہیں آتا میرے پاپا نے بتایا ہے کہ ہم لوگ مسلمان ہیں ۔دوسری بچی نے پھر کہا کہ میں جب اپنے گھر کے پاس بس سے اتری تو دیکھی تیرے پاپا غیر مقلدوں کی مسجد سے نماز پڑھ کر نکل رہے ہیں۔بچی نے کہا کہ یہ غیر مقلد کیا ہوتا ہے دوسری بچی نے کہا تم کو نہیں معلوم یہ لوگ آپ صلی اللہ علیہ وسلم کی شان میں گستاخی کرتے ہیں ۔میری بچی نے کہا اچھا چھوڑ یہ سب بات میں اپنے پاپا سے پوچھونگی کہ یہ سب کیا ہے۔بچی نے گھر آکر جب یہ بات بتائی تو مجھے بالکل تعجب نہیں ہوا کہ ہمارے مسلم معاشرے میں کتنے بچپن سے بچوں کے ذہن میں مسلکی عصبیت کا زہر گھول دیا جاتا ہے ۔سوال یہ ہے کہ کیا یہی اسلام ہے؟۔ ٹھیک ہے آپ دوسروں سے اختلاف رکھیں جو انسان کی فطرت میں بھی ہے لیکن کیا یہ ضروری ہے کہ اختلاف صرف نفرت اور بغض پیدا کرنے کیلئے ہی ہو۔اختلاف امن اور انصاف کے حصول اور نافذ کرنے میں بھی ہوسکتا ہے۔ ہمارے سامنے حضرت معاویہ ؓ اور حضرت علیؓ اور عائشہ صدیقہ رضی اللہ تعالی عنہا کا اختلاف ایک نمونہ ہے کہ کس طرح حضرت علی ؓاور عائشہ ؓ نے اور بعد میں حضرت حسنؓ اور معاویہؓنے امت کے درمیان فساد کو رفع دفع کرنے کیلئے آپس میں مصالحت اختیار کر لی۔ کیا کبھی ہم نے اپنے بچوں سے یہ پوچھا کہ اسلام کیا ہے اور آپ مسلمان کیوں ہیں؟ کیا ہم نے اپنے بچوں کو کبھی یہ بتایا کہ اسلام ایک تحریک اور دین کا نام ہے اور دین کے معنی اس نظام کے ہوتا ہے جہاں انصاف ہو ۔جیسا کہ قرآن کی یہ آیت ہم ہر نماز میں دہراتے ہیں کہ’مالک یوم الدین یعنی دین کے دن کا مالک مطلب انصاف کے دن کا مالک‘۔قرآن کی ایک دوسری آیت ہے کہ ان الدین عند اللہ الاسلام ’اللہ کے نزدیک بہترین دین اسلام ہے‘۔
قرآن میں اللہ نے یہ بات اس لئے کہی کیونکہ کہ اللہ جانتا تھا کہ انسانوں کی دنیا میں دوسرے دین اور حکمراں بھی ہونگے اور مسلمانوں کے گروہ اس نظام سیاست کی طرف بھی مائل ہوسکتے ہیں اس لیئےاللہ نے پہلے ہی آگاہ کردیا کہ اصل دین یعنی نظام سیاست اور انصاف تو اسلام اور قرآن ہی ہے۔اس پوری بحث کا مدعا یہ ہے کہ اسلام صرف یہ نہیں ہے کہ لوگوں کی عبادت کا طریقہ کیا ہے اسلام یہ ہے کہ انسان ظالم اور مظلوم کے درمیان تمیز کرنا سیکھے اور دنیا میں مسلمان اللہ کے خلیفہ کی حیثیت سے لوگوں کے درمیان انصاف کے علمبردار ہونے کا حق ادا کرے اور یہ اسی وقت ممکن ہے جب قونو بالقسط کے علمبردار نظام سیاست پر غالب ہوں ۔
دوسروں کو اس کی تمیز رہے یا نہ رہے لیکن ایک مسلمان کو  دنیا کے حالات پر تبصرہ کرتے وقت یہ نہیں دیکھنا چاہیے کہ ظالم کون ہے اور مظلوم کا مذہب اور عقیدہ کیا ہے ؟بہت افسوس ہوا اس وقت جب سوشل میڈیا پر برما کے مظلوم مسلمانوں کی حمایت اور ہمدردی کو لیکر بھی کچھ مسلم نوجوانوں نے کبڈی کبڈی کھیلا۔ کسی نے سعودی عرب کی فراخ دلی کے قصیدے گائے اور انہیں عالم اسلام کا قائد اور مسیحا قرار دیا تو کہیں ترکی کے اسلام پسند رہنما طیب اردگان کی پزیرائی میں زمین و آسمان کے قلابے ملائے ۔اس بیچ میرجعفروں نے مسلکی تنازعے کا فائدہ اٹھاتے ہوئے یہ افواہ بھی اڑائی کہ ترکی فوجوں نے برما پر حملہ کردیا ہے ۔اگر یہ بحث غیروں میں پڑھی اور سنی جائے تو کیا ان کے حلقوں میں مسلمانوں کی جہالت کا مذاق نھیں اڑایا جائے گا ۔ یا مسلم تنظیمیں جو ہر روز غیر مسلموں میں اسلام کی دعوت اور حالات کے تعلق سے بیداری کی جدوجہد میں مصروف ہیں ان کے اوپر اس کے اثرات کیا ہونگے۔کوئی آپ کو بھلے ہی جواب نہ دے کہ پہلے آپ خود اسلام سے واقف اور بیدار ہوجائیں پھر ہمیں درس دینا لیکن دل ہی دل میں وہ آپ کی بیوقوفی پر اسی طرح ہنسے بغیر نہیں رہ سکتا جیسے کہ اکثر کالج وغیرہ میں جب کوئی پروفیسر اپنے سبجیکٹ پر ہوم ورک کیے بغیر کسی عنوان کی تشریح کرتے ہوئے بھٹک جائے تو بچے دل ہی دل میں یا پروفیسر کی غیر حاضری میں مذاق اڑانا شروع کردیتےہیں اور پھر ایسا بھی ہوتا ہےکہ بچے ایسے پروفیسروں کے لیکچر کو بہت اہمیت نہیں دیتے ۔شاید یہی وجہ ہے کہ قومی میڈیا ہمارے اداروں اور مسلم دانشوروں کی طرف سے قومی مسائل پر ہونے والے بہت اہم اجلاس اور سمپوزیم وغیرہ کو زیادہ توجہ نہیں دیتا۔
افسوس مدارس کے موجودہ نظام اورفضلا کی سوچ پر بھی ہوتا ہے کہ انہیں آج بھی نہ جانے کیسی تعلیم دی جارہی ہے کہ وہ ظلم اور ناانصافی پر مبنی عام تبصرے کو بھی مسلک مذہب اورفرقہ وارانہ نظریے سے دیکھتے ہیں جبکہ اسی ملک ہندوستان میں سگاریکا گھوش ،برکھا دت ،تیستاسیتلواد، ارون دھتی رائے ،کنہیا کمار ، ہرش مندر ،رام پنیانی ، امریکی دانشور نوم چومسکی، اپوروا نند، مہیش بھٹ اورسنجیو بھٹ جیسے بہت سارے ہندو صحافی اور دانشور بھی جب اپنا قلم اور زبان کو جنبش دیتے ہیں تو یہ نہیں دیکھتے کہ ان کا مذہب مسلک اور ملک کیا ہے اور وہ مسلمانوں کے کس مسلک کی حمایت کرتے ہیں ۔کلبرگی ،پنسارے ،نریندر دابھولکر اور کرکرے کو شاید اپنی اسی انصاف پسندی کی سزا ملی ہے ۔گور ی لنکیش نے وہ کام کیا جو مسلمانوں کیلئے خاص تھا اور باالآخر شہید کر دی گئی ۔ وہ تو ہمارے خلاف ہونے والی ناانصافی کی وجہ سے ہمیں مسلمان سمجھ رہے ہیں لیکن ہم ؟ شاید اب ہمیں دوسری قوموں سے سیکھنا ہوگا کہ اسلام دنیا سے ظلم اور ناانصافی کے خاتمے کا نام ہے نہ کہ قوم اور مسلک کے نام پر اندھی تقلید کا ۔ اقبال بالکل درست کہتے ہیں کہ  ؎
آہ !وہ تیرے نیم کش جس کا نہ ہو کوئی ہدف

انسانی تاریخ کے عروج و زوال میں بنت حوا کاکردار اور عرب کے موجودہ فرعون ..!



عمر فراہی ۔ ای میل  :  umarfarrahi@gmail.com

مصر میں جمہوری طریقے سے منتخب صدر ڈاکٹر مرسی کے خلاف فوجی بغاوت اور ان کی حمایت میں سڑکوں پر اتری بھیڑ پر جس طرح رمضان کے مہینے میں گولیاں برسائی گئیں یہ حادثہ خود اپنے آپ میں کسی ظلم عظیم سے کم نہیں تھا ۔لیکن اس کے بعد نہ صرف ڈاکٹر مرسی کے ساتھ نہتے مظاہرین کو بھی پابند سلاسل کیا گیابلکہ مجھے یاد نہیں ہے کہ مغلیہ سلطنت اور سلطنت عثمانیہ کے آخری دور تک اسلام کی تیرہ سو سالہ سیاسی تاریخ میں کسی مسلم حکومت میں کبھی بنت حوا کو بھی وہ چاہے کسی بھی مذہب اور قوم سے تعلق رکھتی ہوں ہتکڑیاں لگا کر پابند سلاسل کیا گیا ہو۔لیکن اکیسویں صدی میں یہ کارنامہ مصر کے یہود نواز فوجی ڈکٹیٹر السیسی نے انجام دیا اور اس ظلم کی حمایت عرب کے دیگر موجودہ فرعونوں نے بھی کیا اور ابھی تک مسلسل کیا جارہا ہے۔اکیسویں صدی کی اس فرعونیت سے پہلے یہ کارنامہ اسی مصر میں جمال ناصر اور شام میں حافظ الوحشی کے ذریعےانجام دیا گیا ۔مشہورو معروف سماجی خدمت گار زینب الغزالی کو نو سال اور شام کے ایک کالج میں زیر تعلیم ایک مسلم دوشیزہ مریم دباغ کو پانچ سال تک سلاخوں کے پیچھے جس خوفناک اذیت اور تشدد سے گذارا گیا یہ پوری داستان انہیں کی زبانی ان کی تصنیف "زنداں کے شب وروز" اور "صرف پانچ منٹ" میں پڑھا جاسکتا ہے۔اس کے علاوہ امریکی اور ایرانی حکومتوں میں عافیہ صدیقی اور ریحانہ جبار کے ساتھ جو ہورہا ہے اور جو ہوچکا ہے موجودہ مہذب جمہوری تاریخ سے پہلے قرآن میں فرعون کا تذکرہ آتا ہے جس نے ایک پوری قوم کی عورتوں کو قیدی بنا کر ان کی اولادوں کو اس لئےقتل کرنا شروع کردیاتھا کیونکہ اس کے نجومیوں کی پیشن گوئی تھی کہ بنی اسرائیل کا ایک نوجوان اس کی سلطنت کو تباہ کرنے کیلئے پیدا ہونے والا ہے۔اس کے برعکس خلفائے راشدین کے بعد سلسلہ ملوکیت میں بھی مسلم حکمرانوں کی اتنی غیرت زندہ تھی کہ انہوں نے بنت حوا کی عفت و عصمت پر کبھی کوئی آنچ نہیں آنے دی۔حجاز بن یوسف کو مسلم دور حکومت میں ایک ظالم اور جابر حکمراں کے طور پر جانا جاتا ہے لیکن پھر بھی اس نےہندوستان کی سرحد میں ایک عرب قافلے کو قیدی بنا لیےجانے پر اپنی فوج کو کوچ کرنے کا حکم دے دیا اور پھر محمد بن قاسم کی قیادت میں راجہ داہر سے جو معرکہ آرائی ہوئی اس واقعے کوتاریخ کےسنہرے باب میں شمار کیا جاتا ہے ۔تاریخ میں معتصم با اللہ کے اُس واقعے کو تمام مورخین نے نقل کیا ہے کہ اس نے اپنی سرحد کے باہر ایک عرب لڑکی کے اغوا کر لیے جانے اور اس کی اس چیخ وپکار پر کہ یا معتصم باللہ مجھے بچاؤ اپنی فوج کو اسی وقت کوچ کرنے کاحکم دیااور اس وقت تک بھوکا اور پیاسا اپنی فوج کو لیکر سفر کرتا رہا جب تک کہ اس نے لڑکی کو آزاد نہیں کروا لیا ۔ایک واقعہ اسی صدی میں طالبان کے دور کا ہے جب برطانیہ کی ایک خاتون جرنلسٹ ایون ریڈلی چوری چھُپے طالبان کی جاسوسی کرنے کیلئے ان کی سرحد میں داخل ہوگئی اور گرفتار ہوگئیں۔ طالبان نے نہ صرف ان کی عزت وعصمت کی حفاظت کی بلکہ انہیں بعد میں رہا بھی کردیا اور ایون ریڈلی نے رہائی کے بعد برطانیہ پہنچ کر اپنے اسلام میں داخل ہونے کا اعلان بھی کردیا ۔داعش جسے ایک خونخوار دہشت گرد تنظیم کہا جاتا ہے اور اس کی دہشت گردی کے تعلق سے تحریکی، سلفی ،دیوبندی اور شیعہ سبھی متفق ہیں جب انہوں نے 2013 میں موصل پر قبضہ کیا تو ان کے قبضے میں تقریباً چالیس ہندوستان کی نرسیں بھی آئیں اور انہیں یہ خوف لاحق ہوگیا کہ شاید اب ان کی عزت آبرو محفوظ نہ رہ پائے، اسپتال کے تہ خانوں میں چھپ گئیں ۔ کسی ذرائع سے داعش کے لوگوں سے رابطہ کرکے ہمارے ملک نے جب ان کی واپسی کا نظم کیا اور داعش کے لوگوں نے تہ خانوں میں چھپی نرسوں کو باہر آنے کیلئے کہا تو وہ ساری نرسیں خوف سے لرز رہی تھیں اور بیشتر تہ خانے سے آنے کو بھی آمادہ نہیں تھیں ، مگر جب انہوں نے دھمکی دی کہ اگر وہ باہر نہیں آتی ہیں تو پوری عمارت کو بارود سے اڑا دیا جائے گا ،نرسوں کو مجبوراً باہر آنا پڑا ۔داعش کے فوجیوں نے اپنی حفاظت میں ان تمام نرسوں کوایرپورٹ پر کھڑے ہندوستانی جہاز تک پہنچایا اور اس دوران راستے میں یقین بھی دلایا کہ آپ فکر نہ کریں آپ لوگ ہماری بہن جیسی ہیں آپ کو کچھ نہیں ہوگا ۔ نرسوں کو اس بات پرمکمل یقین اس وقت ہوا جب وہ جہاز میں سوار ہوگئیں اور جہاز نے ان کے ملک کیلئے پرواز شروع کردی ۔یہ باتیں نرسوں نے خود ہندوستان پہنچ کر میڈیا کے سامنے بیان کیں۔
بہادر قوموں کی تاریخ بھی رہی ہے کہ نہ تو انہوں نے کسی قوم کی عورتوں کی عزت و آبرو پر حملہ کیا ہے اور نہ ہی اپنی عورتوں کی غیرت پر آنچ آنے دیا ہے۔ مگر جب وہ اپنی اس غیرت اور حمیت سے محروم ہوئیں توایسی قومیں صفحہءِ ہستی سے مٹا دی گئی ہیں ۔اسپین میں طارق بن زیاد کو اگر غلبہ حاصل ہوا اور مقامی عیسائی حکمراں اقتدار سے محروم ہوئے تو اس لئے کہ انہوں نے اپنے ہی ملک کی خوبصورت لڑکیوں کو جبراً اپنے حرم کی زینت بنانا شروع کردیا تھا ۔ہندوستان میں محمد بن قاسم اور محمود غزنوی کی آمد سے پہلے تک غریب اور پسماندہ قسم کے ہندو خاندان کی عورتوں کیلئے لازم تھا کہ وہ مندروں میں داسی کا کردار ادا کرتے ہوئے رقص وسرود کی محفلیں سجائیں ۔ بہت سے غریب خاندان اپنی بہنوں اور بیٹیوں کے ساتھ ہورہے اس ظلم کو دیکھنے کے بعد بھی مہنتوں اور پجاریوں کے سامنے زبان نہیں کھول سکتے تھے کیونکہ یہی لوگ حکمراں طبقات کے ناظم اور امور مالیات کے اصل نگراں تھے یہی وجہ تھی کہ جب مسلم فوجیں ہندوستان کے علاقوں میں داخل ہوئیں تو یہاں کی آبادی نے کوئی مزاحمت نہیں کی -بعد میں مغلیہ سلطنت کے زوال کی وجہ بھی یہی تھی کہ بادشاہ شریف ماؤں کی بجائے لونڈیوں سے جنے جانے لگے ۔
یہ واقعہ میری نظر سے تو نہیں گذرا لیکن پڑھائی کےدوران اپنے استاد سے سنا تھا کہ جب نادر شاہ درانی نے دلی پر حملہ کیا تو دلی کے شہزادے اپنی بیگمات کو محل میں تنہا چھوڑ کر بھاگ گئے ۔ نادر شاہ جب دلی کے محل میں داخل ہوا تو اس نے محل میں موجود شہزادیوں کو اپنے اہل کاروں سےگنگھرو بھیجوائے اور حکم دیا کہ ان سے کہوکہ وہ فلاں کمرے میں آئیں اور رقص کریں ۔ نادر شاہ درانی یہ حکم دیکر خود کمرے میں نیم برہنہ ہوکرگہری نیند میں ہونے کا بہانہ کرکے سو گیا اور ایک تلوار کمرے کے دروازے پر میز پر رکھ دی ۔ڈری سہمی شہزادیاں گھنگھرو پہن کر کمرے میں داخل ہوئیں اور رقص کرنے لگیں۔کچھ وقفے کے بعد نادر شاہ درانی اٹھ کر بیٹھ گیا اور شہزادیوں سے مخاطب ہو کر کہا کہ کیا تم وقت کے شاہوں کی بیویاں اور شہزادیاں ہو۔اگر تمہارے اندر ذرہ برابر بھی غیرت اور شرم ہوتی تو تم رقص کرنے سے انکار کردیتیں اور پھر جب تم نے یہ دیکھا کہ وہ شخص جس نے تمہیں رقص کرنے کا حکم دیا ہے گہری نیند سو رہا ہے اور ممکن ہے کہ اس کے بعد تمہاری عزت و آبرو سے بھی کھلواڑ کرتا کیا تم میں سے کسی میں اتنی غیرت نہیں تھی کہ وہ سامنے رکھی ہوئی تلوار اٹھاتی اور مجھے قتل کردیتی۔میرا مقصد تم سے رقص کروانا نہیں تھا بلکہ یہی دیکھنا تھا کہ آخر دلی کے شہنشاہوں کی شکست کی وجہ کیا تھی ۔ اس نے ایک تاریخی جملہ ادا کیا کہ جب کسی قوم کی مائیں اور بیٹیاں بے غیرت ہوجائیں تو اس قوم سےبہادر نہیں بزدل پیدا ہوتے ہیں ۔وہ شہزادے جو اپنی جان بچا کر محل سے بھاگے ہیں اگر وہ بہادر ماؤں کی اولادیں ہوتیں تو سب سے پہلے تو وہ شکست ہی نہ کھاتے اور اگر ایسا ممکن بھی ہوتا تو یہ لوگ فرار ہوتے وقت اپنی بیویوں بہنوں اور بیٹیوں کو بھی ساتھ لے جاتے یا پھر تمہاری حفاظت کرتے ہوئے اپنی جان دے دیتے ۔
یہ بات بھی سچ ہے کہ جو قوم اپنی ماؤں بہنوں بیویوں اور بیٹیوں کی حفاظت نہ کر سکے یا ان پر ظلم کی مرتکب ہو تو وہ کسی ریاست پر حکومت کرنے کا بھی حق کھو دیتی ہے۔یقیناً قدرت نے ایسی قوموں سے اقتدار بھی چھین لیا ہے۔لیکن تاریخ میں جب حضرت سمیہ حضرت عائشہ صدیقہ اور زینب جیسی ماؤں نے اپنی غیرت اور بہادری کا مظاہرہ کیا ہے تو اس قوم سے صرف اور صرف بادشاہ پیدا ہوئے ہیں اور پھر دنیا نے دیکھا کہ کس طرح وہی مشرکین جو اپنی بیٹیوں کا قتل کردیتے تھے جب اسلام میں داخل ہوئےتو عرب سے افریقہ یوروپ اور روس تک دوسری قوموں پر غالب آتے چلے گئے- اسلامی تاریخ کے عروج میں حضرت ہاجرہ ، مریم ،آسیہ اور حضرت خدیجتہ الکبریٰ اور فاطمہ کے کردار کو کون بھول سکتا ہے، جنھوں نے ایک ماں بیٹی اور بیوی کے کردار میں اسمٰعیل عیسیٰ، موسٰی کلیم اور وقت کے رسول صلی اللہ علیہ وسلم کے بعد علی اور حسین جیسے کردار کی پرورش اور خدمت کی ۔آج امریکہ ،مصر شام اور عراق کی جیلوں میں نو عمر مسلم دوشیزائوں کی چیخیں کسی بھی عرب مسلم حکمراں کو سنائی نہیں دیتیں ۔ تاریخ کہتی ہے کہ سیتا کو اغوا کرنے والے اورراون اوردروپدی کی بے عزتی کرنے والے یدھشٹر کی عظیم سلطنت کا نام ونشان مٹ گیا تو پھرایک ایسے وقت میں جب کہ مصر کی عائشہ زینب سمیہ اور ہاجراؤں  نےاپنے ہاتھوں سےمہندی چھڑا کر ہتکڑیاں پہن ہی لی ہیں تو کیا عرب کے فرعون ان کی اولادوں کے عتاب سے بچ سکیں گے۔شاید عرب کے حکمراں قذافی زین العابدین اور حسنی مبارک اور عبداللہ صالح سے کوئی سبق لینے کیلئے تیار نہیں ہیں ۔تاریخ کے اسی بھولے ہوئے سبق کو یاد دلاتے ہوئے اقبال نے کہا تھا
                 ؎  کھول کرآنکھیں مری آئینہ ءِ گفتار میں۔۔آنے والے دور کی دھندھلی سی اک تصویر دیکھ

عالمی سیاست کا مفاد پرستانہ رویہ اور عالم عرب کی تباہی !


عمر فراہی ۔ ای میل
کچھ دو مہینے پہلے جب طیب اردگان نے ہمارے ملک کا دورہ کیا تو سرکاری سطح پر ایک طاقت ور مسلم ملک کے سربراہ کا جو استقبال ہونا چاہیے تھا وہ نہیں ہوا۔لیکن اردگان سےایک ہی مہینے پہلے ایک غریب اور کمزور مسلم ملک بنگلہ دیش کی وزیراعظم حسینہ کا ہمارے وزیراعظم مودی جی خود ان کا استقبال کرنے ایر پورٹ گئے اورمیڈیا نے بھی خوب پذیرائی کی۔ ہماری حکومت نے ایک چھوٹے سے مسلم ملک کی سربراہ کو اتنی اہمیت کیوں دی اور طیب اردگان میڈیا کی توجہ کا سبب بھی نہیں بن سکے تو ،اس کی وجہ ملکوں کےاپنےاپنے نظریاتی مفاد اور ترجیحات کا بھی عمل دخل ہے ۔تبصرہ نگاروں کا اس تعلق سے خیال ہے کہ حسینہ واجد نے شروع سے اپنی شبیہ ایک اسلام دشمن حکمراں جیسی بنا رکھی ہے ،جس نے بنگلہ دیش میں جماعت اسلامی کے کئی معروف رہنماؤں کو پھانسی کی سزا دیکر اپنی اسلام دشمن ذہنیت کو آشکار بھی کردیا تھا۔ اس لئے ہمارے ملک کے میڈیا اور سرکار کی طرف سےجو کہ اسلام فوبیا میں مبتلا ہے شیخ حسینہ واجد کا پرجوش استقبال کرنا فطری بات تھی۔اس کےعلاوہ پاکستان جو کہ اپنے وجود کے بعد سے ہی ہماری سرحدوں پر شر انگیزی کرتا رہا ہےاور اس کی اسی شرارت کی وجہ سےاندراگاندھی نے حسینہ واجد کے والد مجیب کے ساتھ مل کر پاکستان کو جوسزا دی تھی دونوں ملکوں کے ایک دوسرے پر احسانات بھی ہیں۔حالانکہ اب کون کس کے احسانات کو نبھاتا ہے جبکہ اسی جنگ میں اگر روس نے اندراگاندھی کا ساتھ نہ دیا ہوتا تو بھارت کیلئے یہ جنگ مہنگی پڑ سکتی تھی۔ مگر سوویت روس کے زوال کے بعد ہم نے اپنی وفاداری کا رخ امریکا اور اسرائیل کی طرف موڑ دیا۔چونکہ طیب اردگان کی اپنی شہرت اور شبیہ نہ صرف ایک اسلام پسند رہنما کی طرح ہے بلکہ وہ جب سے اقتدار میں آئے ہیں ان کی مقبولیت اور ترکی کی ترقی سے اسرائیل بھی خوفزدہ ہے۔ممکن ہے مودی جی جو حال ہی میں اسرائیل کے دورے سے واپس آئے ہیں طیب اردگان کا پرجوش استقبال کرکے اسرائیل کو ناراض بھی نہ کرنا چاہتے رہے ہوں ۔دوسری بات یہ بھی ہے کہ چین اور پاکستان بھارت کے سب سے بڑے حریف ہیں،سرحدی تنازعے کی وجہ سے ان ممالک سےجنگ کے خطرات بھی منڈلاتے رہتے ہیں۔ایسے میں جنگی حکمت عملی کے حصول کیلئے اسرائیل بھارت کا اہم معاون ہوسکتا ہے۔جیسا کہ اس وقت بھارت کا بیالیس فیصد ہتھیار اسرائیل سے ہی خریدا جارہا رہا ہے۔اسرائیل چونکہ پاکستان کے ایٹمی اسلحے سے بھی خوفزدہ ہے اس لئے یہ بات یقینی ہے کہ وہ بھارت پاکستان کی جنگ میں اپنے مفاد کے تئیں بھارت کی ہر ممکن مدد کریگا ۔جیسا کہ ایک بار اسرائیل اندراگاندھی سے پاکستان کے ایٹمی ری ایکٹروں کو تباہ کرنے کیلئے ہماری زمین کو استعمال کرنے کی اجازت بھی مانگ چکا ہے اور کہا جاتا ہے کہ اندراگاندھی تیار بھی ہوچکی تھیں لیکن امریکی انٹلیجنس سی آئی اے نے بروقت اس سازش سے پاکستان کو آگاہ کردیا ۔پاکستان نے فوری طور پر دھمکی دے ڈالی کہ اگر بھارت نے اسرائیل کو ایسا کرنے دیا تو یہ سوچ لے کہ اس کا اپنا ایٹمی پلانٹ بھی تباہ کردیا جائے گا۔ ایسے میں ترکی سے ہندوستان کیا فائدہ اٹھا سکتا ہےیہ بات واضح نہیں ہے۔اس کے بعد ٹرمپ کے سعودی عربیہ کے دورے پرسوشل میڈیا میں مسلمانوں کے درمیان امریکی صدر ڈونالڈ ٹرمپ اور شاہ سلمان بھی خوب چرچہ میں رہے اور اس تعلق سے ہندوستان اور پاکستان دونوں ممالک کے اردو اخبارات نے اس دورے کے مثبت اور منفی پہلو پر کھل کر اپنی رائے کا اظہار کیاجس کا اثر آج بھی سعودی عربیہ اور قطر کے کشیدہ تعلقات میں دیکھا جاسکتا ہے۔ خاص طور سے پاکستانیوں کو یہ بات بہت ہی ناگوار گذری کہ سعودی حکمراں شاہ سلمان نے نواز شریف کو بہت اہمیت نہیں دی یا انہیں نظرانداز کیا،جبکہ سعودی عربیہ کے دفاعی معاملات میں پاکستانی فوج کا بہت اہم کردار رہاہے اور ابھی سعودی حکومت نے جو کچھ مسلم ممالک کا فوجی اتحاد تشکیل دیا ہے اس کے سربراہ بھی پاکستانی فوج کے سابق چیف راحیل شریف ہیں لیکن ان پاکستانیوں کو یہ بات بھی پتہ ہونی چاہیےکہ پاکستان کے ایٹمی پلانٹ اور سرد جنگ کے دوران سعودی عربیہ نے اربوں روپئے کا سرمایہ بھی بہایا ہے۔کہنا یہ چاہیے کہ جب روس نے افغانستان پر حملہ کیا تو پاکستان کے ساتھ سعودی عربیہ نے سب سے پہلے لبیک کہا تھا۔امریکہ جو کہ روس کی طاقت سے مرعوب تھا اور اپنے ہاتھ جلانے سے خوفزدہ تھا جب اس نے دیکھا کہ افغان مجاہدین پاکستانی فوج کی تربیت اور سعودی عربیہ کی دولت سے روس کو تھکا رہے ہیں اور روس کو آسانی کے ساتھ شکست دی جاسکتی ہے تو وہ خود ہی افغان مجاہدین کی مدد کیلئے کود پڑا ۔پاکستان سعودی عربیہ کے یہ احسانات بھول بھی جاتا ہے تو بھی سعودی عربیہ کے حکمراں کیسے بھول سکتے ہیں کہ جب مشرف نے نواز کے خلاف بغاوت کی تھی تو یہ سعودی حکمراں ہی تھے جنھوں نے نواز شریف کو اسی طرح پناہ دی تھی جیسے کہ کبھی مغل بادشاہ ہمایوں کو ایران نے پناہ دی تھی ۔نواز شریف دوبارہ اقتدار میں ضرور ہیں لیکن سعودی شہزادوں کی نظر میں تو ان کے نمک خوار ہی ہیں۔سچ تو یہ ہے کہ سیاست کا کوئی مذہب اور مسلک نہیں ہوتا ،خاص طور سے اکیسویں صدی کی سیاست دجال سے پہلے ظہور ہونے والے مکرو فریب جھوٹ اور بے ایمانی کے ماحول میں داخل ہوچکی ہے ۔کچھ تبصرہ نگاروں کا خیال ہے کہ امریکہ سعودی عربیہ کو لوٹ رہا ہے۔مگر یہ بھی تو سچ ہے کہ جب تک امریکی کولمبس عرب کے صحرا میں داخل نہیں ہوئے تھے جاہل عربوں کے پاس لٹنے کیلئے تھا ہی کیا؟دراصل اللہ نے اپنے گھر کی حفاظت کیلئے امریکیوں کو عرب کا راستہ دکھایا۔ شاہ عبدالعزیز بن سعود کے زمانے میں امریکی کمپنی آرامکو نے سعودی امیر سے رابطہ کرکے پٹرول کی دریافت کا منصوبہ بتایا ۔سعودی امیر کو یہ بات سمجھ میں آئی اور پھر کئی بار ناکام ہونے کے بعد بھی اس کمپنی نے گرم پانیوں کا ذخیرہ ڈھونڈھ لیا اور پھر کھجور دودھ اور گوشت پر منحصر عربوں کی معیشت تیل کے کنوؤں سے مالا مال ہونے لگی۔یہ وہ مفاد کا رشتہ ہے جس کی وجہ سے امریکہ کسی بھی مشکل کے وقت میں سعودی حکومت کے ساتھ ہوتا ہے اور پھر یوں کہہ لیجئے کہ سلطنت عثمانیہ کے زوال کے بعد ایران کی صفوی حکومت جو ایک زمانے سے اپنی کسرویت اور استعماری عزائم کے نشے میں مکے اور مدینے کی سرزمین پر بری نظر رکھے ہوئے تھی سعودی اور امریکی تعلقات کی وجہ سے خانہء کعبہ بھی ایرانی عزائم سے محفوظ رہا ۔
یہ بات ہضم کرنے جیسی نہیں ہے کہ سعودی عرب اور اسرائیل میں بھی تعلقات بحال ہوسکتے ہیں لیکن جس طرح سعودی عرب مصر اور متحدہ عرب امارات کے حکمرانوں نے اپنے دشمنوں کی تعداد میں اضافہ کرلیا ہے اورایران کے بعد ترکی اور قطر کی حمایت یافتہ تنظیموں کا نیٹ ورک وسیع ہوا ہے اسرائیل سمیت تمام عرب ممالک کیلئے یہ ایک بری خبر ہے کہ ان ممالک کو ایران سے زیادہ خطرہ ترکی سے ہے جہاں تقریباً تیس لاکھ کے قریب شامی مہاجرین پناہ گزین ہیں ۔بظاہر یہ پناہ گزین ہیں لیکن جس طرح ایران نے افغان پناہ گزینوں کو فوجی تربیت دیکر شام اور یمن میں استعمال کیا ہے ترکی بھی اپنے پناہ گزینوں کو فوجی تربیت دیکر شاہان عرب کی نیند حرام کرسکتا ہے ۔ عرب حکمرانوں کو یہ احساس ہو بھی چکا ہے طیب اردگان جنہوں نے کہ سعودی اور اسرائیلی معاونت سےمصر کی فوجی بغاوت کے دوران اخوان کی اخلاقی حمایت کی تھی بہت ہی خاموشی کے ساتھ مشرق وسطیٰ میں ایک اسلامی انقلاب کی منصوبہ بندی میں مصروف ہیں۔شاید اسی لیئے قطر سے کئے گئے مطالبات میں ایک مطالبہ یہ بھی ہے کہ وہ اپنے ملک میں ترکی کے فوجی اڈے کو بند کردے۔یہ بھی کہا جارہا ہے کہ اب امریکہ اور اسرائیل کے درمیان تعلقات میں بہت گرم جوشی نہیں رہی۔امریکہ اور یوروپی ممالک جو خود بھی معاشی طور پر کمزور ہوکر ماضی کے برطانیہ کی طرح سمٹ جانا چاہتے ہیں صرف اس تاک میں ہیں کہ جنگ کا ماحول گرم رہے اور انہیں اپنے ہتھیاروں کا سودا کرنے کا موقع ملے چاہے اس کے خریدار عرب ممالک ہوں یا اسرائیل یا وہ لوگ جو مشرق وسطیٰ میں اپنے حکمرانوں سے آزادی حاصل کرنے کیلئے مسلح جدو جہد میں مصروف ہیں ۔ اس کا مطلب عرب کی تباہی میں جسے حدیث کی کتابوں میں ویل العرب کہا جاتا ہے ایران اسرائیل ترکی اورمصر جیسے چار بڑے فوجی ممالک کے فوجی اور ان کی حمایت یافتہ ملیٹنٹ تنظیمیں متصادم ہو سکتی ہیں ۔اگر ہم حدیث پر یقین کرتے ہیں تو آنے والا دور عرب ممالک اور امن عالم کی تباہی کا دور ہے۔ایسا لگتا ہے کہ مشرق وسطیٰ کے اس بحران میں ایران سے لیکر اسرائیل سب تباہ ہوجائیں گے اور ایک ایسے نخلستان کی تصویر ابھر کر آئے گی جہاں دور دور تک بستی اور انسانوں کا تصور محال ہوجائےگا۔ایسے میں خراسان سے اٹھنے والی فوج اور مہدی کا جائزہ لیں تو بات آسانی کے ساتھ سمجھ میں آجاتی ہے کہ افغانستان سے فلسطین تک کے سفر کیلئے کسی مہدی اور خراسان کی فوج کو سفر کیلئے پاسپورٹ کی بھی ضرورت نہیں ہوگی - واللہ علم
Subscribe to: Posts (Atom)