آیت اللہ علی خامنہ ای کی سخت گیر شخصیت کی موجودگی، صدر محمود احمدی نژاد کی بلند بانگ غوغا آرائی کے ہوتے ہوئے ایرانی انتظامیہ پاسداران انقلاب کور کے وزراء سے بھری پڑی تھی۔اُس وقت ایرانی نظام جوہری ہتھیاروں کے حصول کے لیے کوشاں تھا۔ وہ اسرائیل کو صفحہ ہستی سے مٹانے کی گیدڑ بھبکیاں دے رہا تھا۔دنیا بھر میں دہشت پھیلانے کے لیے دہشت گرد گماشتوں کو استعمال کررہا تھا،مشرقِ وسطیٰ اور پھر دنیا کو فتح کرنا اس کا خواب ٹھہرا تھا اور احمدی نژاد یہ یقین کرتے تھے کہ اس سب سے مغرب اور ایران کے درمیان ٹائی ٹینک جھڑپ کی رہ ہموار ہوگی جو آرمیگاڈان پر منتج ہوگی۔ یہ سب اس بات کا کافی ثبوت ہے کہ آیت اللہ روح اللہ خمینی کا تشکیل کردہ نظام اپنے آغاز ہی سے ایک دہشت گردانہ ذہنیت کا حامل ہے اور اس کو ایک اعتدال پسند صدر کی مختصر وقت کے لیے نموداری کے دوران میں دبایا نہیں جا سکتا ہے۔

ایران میں اصلاحات نام کی کوئی چیز نہیں ہے۔خمینی کے نظریے کے مقابلے میں یہ مردہ ہے لیکن اب اور اس کے بعد بھی جب اس نظام کو سانس لینے کی جگہ درکار ہوتی ہے تو وہ ''تقیّہ'' اختیار کر لیتا ہے۔اگر اس لفظ کا ترجمہ کیا جائے تو وہ ''چیزوں کو چھپانا'' ہے یا اگر مغرب کی اصطلاح میں بات کی جائے تو ایرانی نظام سیدھے سبھاؤ جھوٹ کا سہارا لیتا ہے۔

ہنستے مسکراتے حسن روحانی کے ظہور کے ساتھ دنیا کو یہ شائبہ ہوا تھا کہ اب شعلہ بیان احمدی نژاد کی جگہ ایک اعتدال پسند اصلاح پسند نے لے لی ہے۔ایران اب ''جوہری معاہدے'' کے ذریعے اپنے برے طور طریقوں کو تبدیل کرلے گا اور اپنے جوہری پروگرام کو منجمد کردے گا لیکن اگر ایران میں صدر بننے والے آدمی کا ایک ماؤس بھی ہو تو جہاں تک سیاسی اور سماجی تغیّر کا تعلق ہے تو کچھ بھی تبدیل ہونے کا نہیں۔خواہ اس کی توسیع پسندانہ فوجی پالیسیاں ہوں تو ان میں کوئی تبدیلی رونما ہونے کی نہیں۔ان پالیسیوں کے ذریعے، دہشت گرد گماشتوں کو اسلحے سے لیس کرنے،انھیں مالی رقوم مہیا کرنے اور دنیا بھر میں شیعیت کی انتہاپسند شکل کو پھیلانے کے ذریعے یہ نظام دنیا بھر کو تباہی سے دوچار کررہا ہے۔

ایران میں چونکہ حقیقی رہبر سپریم لیڈر ہی ہوتا ہے۔وہ سخت گیر آیت اللہ علی خامنہ ای کی شکل میں ہوتا ہے۔وہ دھواں دار بیانات کے ذریعے مغرب کے ساتھ محاذ آرا رہتا ہے اور جیسے ہی ایران میں ایک مرتبہ پھر سیاسی منظر تبدیل ہونا شروع ہوا تو حسن روحانی کی مقبولیت ماند پڑنا شروع ہوچکی ہے اور محمود احمدی نژاد 2017ء میں منعقد ہونے والے صدارتی انتخابات میں حصہ لینے کی تیاری کررہے ہیں۔ خامنہ ای کے حقیقی رنگوں کی ایک مرتبہ پھر نمائش شروع ہوجائے گی کیونکہ ایران کی بالادستی کی پالیسی پر ایک مرتبہ پھر عمل درآمد کا آغاز ہوجائے گا۔

جہاں تک ایران کا تعلق ہے تو خمینی نے کوئی بہت جلد اقتدار حاصل نہیں کیا تھا۔انھوں نے گماشتہ قوتوں کے ذریعے دہشت گردی برآمد کر کے بالادستی کی کوشش کی تھی۔ گذشتہ برسوں کے دوران میں نظریے کی اسی شکل پر عمل درآمد کیا گیا ہے۔خامنہ ای اس کے بڑے پرجوش وکیل رہے ہیں۔ایران کے ساتھ جوہری معاہدہ طے پاجانے کے باوجود ،اس ناکام سمجھوتے سے مغرب کو ایک موقع مل گیا ہے کہ وہ مستقبل میں ہونے والی دہشت گردی کا کیسے مقابلہ کرسکتا ہے۔

فوج سمیت ایرانی نظام کے سرکردہ ارکان اس بات کو تسلیم کرتے ہیں کہ خمینی کا نظریہ پتھر کے دور میں وضع کیا گیا ہے، مگر اس کے باوجود ایران کی دہشت گرد مشین بہت جلد ایک مرتبہ پھر چلنا شروع ہوجائے گی اور اس مرتبہ اس کے لیڈر ایک طاقتور فوج ،جوہری ہتھیاروں ،طویل فاصلے تک مار کرنے والے میزائلوں کے مالک ہوں گے لیکن ایران ڈیل کی مہربانی (سے یہ خواب شرمندۂ تعبیر نہیں ہوا)۔

لیکن جہاں تک ایران کی جوہری ہتھیاروں کے حصول کے لیے مہم کا تعلق ہے تو وہ (ایرانی) درحقیقت جنگ کے تھیٹر کے عادی نہیں ہیں کیونکہ ایرانی نظام ڈرانے دھمکانے کی پالیسی پر عمل پیرا ہونے میں کافی مہارت کا حامل ہے اور اس میں بھی کوئی شبُہ نہیں کہ وہ اپنے جوہری ہتھیاروں کو ''بڑی چھڑی'' کے طور پر ہی استعمال کرے گا تاکہ وہ اس طرح پاس پڑوس میں واقع ریاستوں میں خوف وہراس پیدا کرسکے۔وہ عراق ،افغانستان اور پاکستان میں یہی کچھ کررہا ہے تاکہ وہ مغرب کے خلاف ایک اتحاد کی صفوں میں شامل ہوسکے۔

کوئی حقیقی تبدیلی نہیں

جب تک انقلابی ملّاؤں کا ایران پر کنٹرول برقرار رہتا ہے،تو آپ ایران میں کوئی حقیقی سیاسی یا سماجی تبدیلی رونما ہوتی نہیں دیکھیں گے کیونکہ فوجی اخراجات ہی قیادت کی اولین ترجیح رہیں گے۔جہاں تک اصلاح پسند صدور کا تعلق ہے،تو آپ محمد خاتمی سے آگے بڑھتا ہوا کوئی نہیں دیکھیں گے۔وہ اگست 1997ء سے اگست 2005ء تک ایران کے صدر رہے تھے۔

خاتمی نے ایک اصلاح پسند پروگرام پر مبنی انتخابی مہم چلائی تھی۔انھیں یہ امید تھی کہ اس سے ایک جمہوری اور زیادہ روا دار معاشرے کی تشکیل کی راہ ہموار ہوگی،قانون کی حکمرانی ہوگی اور سماجی حقوق میں بہتری آئے گی لیکن سخت گیر ان تمام اصولوں کو پسند نہیں کرتے تھے۔

محمد خاتمی کو اس حقیقت کا ادراک کرنے میں کوئی زیادہ دیر نہیں لگی تھی کہ اصلاح (ریفارم) سخت گیروں کے لیے ایک گندا لفظ ہے۔اگرچہ حکمراں خاتمی ہی تھے لیکن شورائے نگہبان ،عدلیہ ،پولیس،مسلح افواج ،جیلیں ،سرکاری ریڈیو اور ٹیلی ویژن ان کے خلاف کام کررہے تھے کیونکہ ان اداروں پر سخت گیروں کا مضبوط کنٹرول برقرار تھا۔

پھر ان قدامت پسند اداروں کے ساتھ شدید محاذ آرائی کے بعد خاتمی کے سنجیدہ اصلاحات سے متعلق آئیڈیاز بہت جلد پگھل کر رہ گئے تھے۔ اسی طرح ان کے حامی بھی تتر بتر ہوگئے تھے۔

خاتمی کی نظروں کے سامنے سیاسی مخالفین کا سلسلہ وار قتل ہوتا رہا تھا۔یہ سب سراغرسانی کی وزارت کے بھوت عناصر کررہے تھے۔اس وقت ان کے ایک وزیر پر حملہ کیا گیا اور انھیں بری طرح تشدد کا نشانہ بنایا گیا تھا،دوسرے وزراء کا مواخذہ کیا گیا اور بعض کو جیلوں میں ڈال دیا گیا۔

خاتمی نے اپنی صدارت کے اختتام پر جو بل پارلیمان میں پیش کیے تھے،وہ سب شورائے نگہبان نے مسترد کردیے تھے اور انھیں مجبور کیا گیا کہ وہ ان سے دستبردار ہوجائیں۔ اس لیے اگر آپ اصلاح کے چکر میں ایران کی صدارت پر فائز ہوں تو آپ کو بہت جلد پتا چل جائے گا کہ پورا نظام ہی آپ کے خلاف کام کررہا ہے اور خمینی کا بھوت ہمیشہ کے لیے آپ کا تعاقب کررہا ہے۔ان کے فرمودات حکمراں انقلابی ملّاؤں نے حِرزجاں بنائے ہوئے ہیں،اس لیے ایران میں کسی بھی شکل میں سماجی یا سیاسی تبدیلی ناممکن ہے۔

اردو العربیہ ڈاٹ نیٹ کے شکریہ کے ساتھ 

قاسم سید

  
سیاست میں کچھ جملے ایسے ہیں جوہرقسم کے سیاستداں کی زبان پر رہتے ہیں اور ضرورت کے مطابق ان کااستعمال ہوتاہے
مثلاً سیاست میں دوستی اور دشمنی مستقل نہیں ہوتی۔ ’قومی تقاضوں‘ کوذہن میں رکھ کر ان کی تشریح کی جاتی رہی ہے جیسے ’قومی تقاضوں‘ کی مانگ پر ملائم سنگھ نےساکشی مہاراج کو ممبر پارلیمنٹ بنایااور بابری مسجد شہادت کے بعدسپریم کورٹ کے فیصلے کی بےحرمتی میںایک دن جیل کی سزابھگت چکے کلیان سنگھ کی پارٹی سے اتحاد کیااور ان کے بیٹے کو کابینہ میں لیا۔ کانگریس نے نظریاتی حریف لیفٹ سے عوام کی خواہش کےاحترام میں دوستی کی اور مغربی بنگال میںایک ساتھ الیکشن لڑا۔ وی پی سنگھ کی قیادت میں کانگریس کے خلاف بی جے پی اور لیفٹ مل گئے دونوں نے بیک وقت وی پی سنگھ سرکار کی حمایت کی جنتادل نے بی جے پی کو انتخابی اتحادی بنایا۔ قومی مفاد سے مجبور ہوکر ملائم سنگھ اور مایاوتی نے یوپی اے سرکار کو کاندھا لگایا۔ اور اب قومی تقاضوں کےآگے گھٹنے ٹیکتے ہوئے بابری مسجد گرانے کی سازش کرنے والے اور بابری مسجد تحفظ کی خاطر سرکار قربان کرنے کا دعویٰ کرنے والے باہم شیروشکر ہونے کے امکانات تلاش کر رہے ہیں ۔ کانگریس کوزندگی بھر منھ بھر کر گالیاں دینے والے اور گالیاں کھانے والے دوستی اور دشمنی مستقل نہیں ہوتی کاثبوت دینے کی خاطر کڑواہٹ کوبھلاکر ایک دوسرے کے گلے میںباہیں ڈالنے کے لیے بےقرار ہیں یعنی ہندوستانی سیاست کی چمڑی بہت موٹی ہے۔ اصول ،قانون ، روایت ،شرم وحیا،غیرت وخودداری، نظریات جیسے شریفانہ عناصر کہیں اس کے خمیر میں شامل نہیں ہیں۔ اس لیے دلتوں کے سابق مسیحاپاسوان سیکولرزم کی دہائی کے ساتھ واجپئی سرکار چھوڑدیتے ہیں اور ’قومی مفاد‘ میں مودی کادامن تھام لیتے ہیں۔ نتیش کمار سرکار چلانے کے لئے 17سال تک بی جے پی کا ہم پیالہ ہم نوالہ بن جاتے ہیں اور مودی سے ذاتی ٹکرائو کوسیکولرزم کاجامہ پہنا کر اپنے کٹرترین سیاسی حریف لالو کی لالٹین پکڑنے میں ذراسی بھی دیرنہیں کرتے پھراچانک ان پر انکشاف ہوتا ہےکہ بی جے پی توفرقہ پرست ہے اور جب لالو اپنا رنگ دکھاتے ہیں توپھر بی جے پی کے ساتھ گل بہیاں شروع ہوجاتی ہیں یعنی سیاسی ملائی کھانے اور اس ہانڈی پر قبضہ برقرار رکھنے کے لئے کوئی بھی چولاپہننے سے گریزنہیں ۔ ہر قیمت ادا کرنے کےلئےتیاراورنظریاتی ڈھکوسلوں کوالوداع کہنے کے لئے بے شرمی کی سرحد سے گزرنے کا حوصلہ ۔ایک اورلفظ ہے جس نے ہندوستانی سیاست کو بے توقیر اور مسخر ابنایا وہ ہے سیکولرزم سیاستداں، درزیوں کی طرح ہر ناپ کالباس رکھتے ہیں اور کسی کوبھی پہنادیاجاتا ہے لالو کے برادر نسبتی سادھویادو نے ایک بار کہاتھا کہ ہندوستان میں سیکولرزم نام کی کوئی چڑیا نہیں ہے ۔ یہ دراصل سیاسی ضرورتوں کےنقد لین دین کے کام آتا ہے کل جو شخص فرقہ پرست تھا ضرورت ہوئی تو اس میںسیکولر ہونے کا ہر جوہر ڈھونڈلیاجاتاہے اس لفظ کا جتنامذاق اڑایا گیا ہے اور استحصال کیاہے اس نے اپنی شناخت کھودی ہے یہ صرف آئین کی کتاب میں محفوظ ہے لیکن عملی سیاست میںاس کی کوئی لکشمن ریکھانہیں اسی لیے کانگریس اور بی جے پی نظریاتی حریف ہونے کے باوجود اپنے لیڈروں کو ادھرسے ادھر بھیجتی رہتی ہیں تاکہ پارٹی مفادات کے تحفظ کو یقینی بنایاجاسکے ۔سنجے نروپم کانگریس کے ممبر پارلیمنٹ ہوتے ہیں اور جگدمبیکاپال بی جے پی کے ٹکٹ سے الیکشن لڑکر لوک سبھا پہنچتے ہیں ایسی سیکڑوں مثالیں ہیں ورنہ نرسمہارائواس بات کو یقینی کیسے بناتے کہ گیارہ بجے سے پانچ بجے تک بابری مسجد کی اینٹیں نکالی جاتی رہیں اور انتظامیہ ہاتھ پر ہاتھ دھرے بیٹھی رہے۔ ملائی کھانے والوں میںاس بات پر غیر تحریر شدہ مفاہمت ہے کہ مظلوم طبقات اور اقلیتوں کو پیروں کی جوتی بناکر رکھا جائے۔ انہیں اقتدار میںشراکت دارانہ بنایا جائے البتہ وقتاً فوقتاً خیرات ومراعات کے ٹکڑے ضرور ڈالے جاتے ہیں تاکہ بے اطمینانی کی چنگاری انقلاب کی آگ میں تبدیل نہ ہوجائے لیکن ان کی گردنوں میں وفاداری پر استوار غلامی کا خود ضرورڈال کر رکھاجائے۔ جس طرح انتخابی پارٹیوں میں پاسوان، اٹھاولے، ادت راج ،پونیا میراکمار اورپرجاپتی وغیرہ جیسی علامتوںکو جگہ دے کر یہ ثابت کیاجاتا ہے کہ مظلوم طبقات کے نگہبان ہیں اسی طرح نمائشی مسلم چہروں کو آگے رکھ کر اس بات کامظاہرہ ہوتاہے کہ آپ کا پورا خیال رکھاجارہا ہے ان کانام لکھنے کی ضرورت نہیں ہے کیونکہ علامتی چہرے پیادوں کی طرح بدلتے رہتے ہیں۔ ہندوستان کی ہرپارٹی کی قیادت اعلیٰ طبقات کے ہاتھ میں ہے اور علاقائی جماعتوں کی زمام کارذات پات کی سیاست کے فنکاروں نے سنبھال رکھی ہے۔ مظلوم طبقات کو ان کی حیثیت یاد دلانے کےلئے مظفرنگر، دادری اور اوناجیسے واقعات کااعادہ کیاجاتاہے۔پناہ گزیںکیمپوںمیں رہنے پر مجبور کر کےاحساس دلایاجاتا ہے کہ اگر سراٹھایاتو اس سے بھی براانجام ہوگا۔ نچلی سطح پر بھی ایسی قیادت فریم کی جاتی ہے جو ان کےباڑے میںہنکاکرلے جاتی ہے اور گلہ نگہبانی کا مقدس فریضہ انجام دینے والے اس کا محنتانہ وصول کرتے ہیں۔
اس بے درد، خود غرض ،بے اصول، بے رحم سیاست کاسب سے زیادہ اثر مسلمانوں پر پڑا سچرکمیٹی کی رپورٹ اس کی شاہد ہے اورآگے بھی یہ سلسلہ چلتا رہے گا اگر اپنی دنیا آپ پیدا کرنے اور اپنی ضرورتوں کے مطابق سیاسی حکمت عملی نہیں بناتے ، فی الحال دور دور تک ایسے آثارنظر نہیں آتے کہ مسلمانوں یا ان کی بزرگ قابل احترام قیادت کو بے وزنی ،بے وقعتی اور رسیاسی طورپر صفر ہوجانے کااحساس ہو اور وہ اس کے لیے جرأت مندانہ قدم اٹھانے کے بارے میں سوچتے ہوں وہ صرف جائے پناہ ڈھونڈتے ہیں وحشی ہرن کی طرح ادھر سے ادھرقلانچیں بھرتے ہیں مگر جاں بخشی پھر بھی نہیںہوتی۔ ہندوستانی سیاست نے ہمیں ناانصافی کے اتنے الیکٹرک شاک دیے ہیںکہ اب کچھ کرگزرنے اوراقتدار میںباعزت شراکت کے تصور سے بھی خوف کھاتے ہیں اور معاملہ صرف جاں بخشی تک آگیا ہے۔ یعنی جو جاں بخشی کاوعدہ کرے اسی کے ساتھ ہولیے جس نے نظرالتفات ڈالی جان ودل ہاربیٹھے جس نے مسکراکردیکھا اس کی انگلی پکڑلی جس نے سبز خواب دکھائے اس کادامن تھام لیا۔ اب پانچ ریاستوں میںانتخابات کا اعلان ہوگیا ہے ان میںاترپردیش سب سےاہم ہے کیونکہ یہاں مسلمانوں کی قابل ذکرآبادی ہے۔ مگر اس کی اکثریت اس الیکشن کی تاریخی اہمیت سے واقف نہیں ۔ البتہ خیرخواہان ملت نےفیلڈنگ سجانی شروع کردی ہے اور انہیں سماجوادی پارٹی میں باپ بیٹے کی لڑائی کابڑادکھ ہے ۔ ان کا بس چلے تو دونوں کو ایک جگہ بٹھاکرصلح کرادیں ایسا لگتا ہے کہ اگر ان میںاتحاد نہیں ہوا تو ملک وملت کاعظیم نقصان ہوگا۔ مسلمانوں کی لٹیا ڈوب جائے گی۔ ایک لیڈر اس حد تک آگے بڑھ گئے کہ دھرنے پر بیٹھنے کاارادہ ظاہر کرتے ہوئےکہاجب تک دونوں کاملن نہیںہوگا وہ اٹھیں گے نہیں، یہ جذبہ قابل قدرہے اور اس وقت اور قابل قدر ہوتا جب مسلم مذہبی جماعتوںکے دھڑوں کو ایک کرنے کے لیے یہ عزم ظاہر کیاجاتا یہ جھگڑا اصولوں کا نہیں یا اقتدار کی بندر بانٹ کاہے۔سماجوادی پارٹی بھی کیا کانگریس کلچر کی اسیرنہیں ہوگئی اور مسلمانوں کے تعلق سے صرف زبانی جمع خرچ سے کام چلاتی ہے۔ کئی مسلم تنظیموں نے مظفرنگر فساد کے موقع پر بھی اس کاساتھ نہیںچھوڑا تھا مگراب وہ بھی کھل کر حمایت سے گریزکررہی ہیں۔ لیکن یہ مقام عبرت ہےکہ یادو کم وبیش آٹھ فیصد اور سب کچھ ان کے پاس اورمسلمان 20فیصد ہے پھر بھی وہ حاشیہ پر ہے ۔ سماجوادی پارٹی کی سیاست نے یادو طبقہ کواترپردیش کے طاقتور ترین سیاسی گروہ میں تبدیل کردیاہے اور یہ کوئی بری بات نہیں مگر یہ مسلمانوں کی قیمت پر ہوا ہمارے لیے دووعدے زندگی وموت کا سوال تھے۔ دہشت گردی کے الزام میں فرضی طریقہ سے گرفتار کئےگئے نوجوانوں کی باعزت رہائی کےاقدامات کے دوسرے تعلیم وملازمت میں پسماندگی کی بنیادپر مسلمانوں کو ریزرویشن ،آج سماجوادی پارٹی دعویٰ کرتی ہے کہ اس نے یہ تمام وعدے پورے کردیے کیاحامیان سماجوادی پارٹی میںاتنی جرأت ہے کہ وہ ان دونوں سوالوں کا جواب لیں۔ یقین جانیے اب بھی یہی پیغام آئے گا کہ بی جے پی کو ہرانے کے لئے سیکولر فورسز کو ووٹ دیجئے ہمارے اندر یہ طاقت نہیں کہ بی جے پی کو ہراسکیں ایسا ہوتا تو وہ مرکزمیں نہیں ہوتی ان سے یہ سوال کیوں نہیں کیاجاتاکہ اگر آپ واقعی بی جے پی کو ہراناچاہتے ہیں تو باپ بیٹے ایک کیوں نہیں ہوجاتے ۔ سماجوادی پارٹی ، بی ایس پی اور کانگریس ایک پلیٹ فارم پر کیوںنہیں آجاتیں۔ یہ متحدہ امیدوار کیوں نہیں اتارتیں ۔ اس کامطلب یہ ہے کہ بی جے پی کو ہرانے کا نعرہ صرف ایک ڈھکوسلہ ہے اور کیاآپ میںاتنا دم ہے کہ ان تینوں کو ایک جگہ آنے کی وارننگ دیں۔ توبی جے پی کے لیے کارپٹ تو یہی پارٹیاں بچھاتی ہیں جو سیکولرزم کی مالاہاتھ میں لیے رہتی ہیں ۔ہم ان کے منافقانہ جال میں پھنس کر گوانتاناموبے کی تصویر بن جاتے ہیں۔ کبھی اپنے بارے میں بھی سوچیئے اور دل ٹٹول کر دیکھئےکہ اترپردیش کی اتنی بڑی آبادی کاایک نمائندہ بھی لوک سبھاکیوں نہیں پہنچ سکا۔ ہم دینے والے کیسے بن سکتے ہیں۔ خود کو ہروقت مظلوم سمجھنے اور سمجھانے کی روش کوچھوڑ کر پراعتماد بنناہوگا اورپھر جہاں پیررگڑدیں گے چشمہ وہیں سے پھوٹے گا ۔

qasimsyed2008@gmail.com

نہال صغیر

ہر چیز کے دو پہلو ہوتے ہیں اسی طرح ان سہولیات کے بھی ہیں ۔سوشل میڈیا نے جہاں عام انسانوں کو با اختیار بنا کر معلومات کا حق اس کے ہاتھوں میں تھما دیا ہے وہیں کم ظرف لوگوں کیلئے یہ دوسروں کو نقصان پہنچانے کا بھی آلہ بن گیا ہے ۔پچھلے ہفتے ہی بی جے پی سے جڑی رہنے والی سادھوی کھوسلہ نے اس پر الزام عائد کیا کہ بی جے پی سوشل میڈیا کے ذریعہ نفرت پھیلانے کا کام کرتی ہے ۔انہوں نے عامر خان کی مثال دیتے ہوئے بتایا کہ بی جے پی نے عامر خان کے خلاف ان کے عدم برداشت والے ماحول پر دیئے گئے بیان کے ردعمل میں مہم چلائی ۔ سادھوی کے مطابق ان کا ضمیر انہیں ملامت کرنے لگا اور انہوں نے بی جے پی سوشل میڈیا ونگ سے خود کو علیحدہ کرلیا ۔ایسی سیکڑوں مثالیں مل جائیں گی جب نفرت پھیلا کر کسی شخص یا گروہ کے خلاف دیگر افراد کو اکسا یا گیا جس کے نتائج انتہائی بھیانک بر آمد ہوئے ۔ زیادہ وقت نہیں گزرا جب مظفر نگر ،فساد کی آگ میں صرف سوشل میڈیا پر جھوٹی خبریں اور اشتعال انگیز ویڈیو کے سبب جلا ۔ جبکہ اسی تنظیم کے افراد یا ان کی ذیلی تنظیموں کے لوگ کسی کو اتنی بھی سہولت نہیں دینا چاہتے کہ وہ ان کی کسی بات پر بہتر ڈھنگ سے تنقید ہی کرسکے ۔ بال ٹھاکرے کی موت کے بعد ممبئی کا مہاراشٹر بند کے سلسلے میں پال گھر کی دو لڑکیوں کا واقعہ تو ابھی تک ذہن میں محفوظ ہی ہے ۔ان دو لڑکیوں میں ایک مسلمان اور دوسری اس کی سہیلی تھی ۔ اپنے فیس بک اکاؤنٹ پر شاہین نام کی لڑکی نے بند کی مخالفت کی تھی ۔شاہین کی پوسٹ کو اس ایک سہیلی نے لائیک کیا ان دونوں لڑکیوں کوآناًفاناً گرفتار کرلیا گیا ۔اس کے بعد ایسی کئی گرفتاریاں ہو چکی ہیں۔چدمبرم کے بیٹے کے خلاف تنقید کرنے پر ایک پینتالیس سالہ شخص کو گرفتار کیا گیا ۔ اسیم تریویدی کو ہندوستان کے موجودہ حالت پر کارٹون بنانے پر ملک کے خلاف غداری کا مقدمہ چلایا گیا ۔یہ سب کچھ صرف اس لئے کیا جارہا ہے تاکہ سوشل میڈیا کا عام استعمال بند ہو ۔نیز اس پر بھی قدغن لگا کر بیباکانہ اپنی رائے کا اظہار کرنے کا یہ راستہ بھی مسدود کردیاجائے تاکہ کوئی باشعور شخص اس کو استعمال کرکے معاشرے کو موجودہ خرابی کی جانب توجہ دلانے میں کامیاب نہ ہو پائے جو کسی بھی عظیم انقلاب کا سبب نہ بن سکتا ہے ۔ یہ با ت واضح ہو جانی چاہئے کہ سوشل میڈیا کا استعمال گروہی حیثیت سے آر ایس ایس اور اس کی ذیلی تنظیمیں خوب کرتی ہیں ۔ انہوں نے تنخواہ دار ہزاروں کارکنان اس کام کے لئے مقرر کر رکھے ہیں ۔جب سوشل میڈیا یا انٹر نیٹ کا دور نہیں تھا تب آر ایس ایس کا پتر لیکھک سنگھ ہوا کرتا تھا جو اب بھی برقرار ہے ۔یہ الگ بات ہے کہ اب اس کی فعالیت پہلے سے کم ہے ۔ کیوں کہ اب اطلاعاتی انقلاب نے پرنٹ میڈیا کی حیثیت کو ثانوی بنا دیا ہے ۔ مسلمانوں اور ان کی تنظیموں کی جانب سے کوئی خاص پیش رفت نہیں ہے۔ہم صر ف ہائے توبہ اللہ سے دعا کرکے کسی کی ہلاکت اور بربادی کی دعا مانگنے کیلئے ہی رہ گئے ہیں ۔
موجودہ اطلاعاتی تکنیکی انقلاب نے افراد کو با اختیار بنایا ہے ۔عام انسانوں کو بااختیار بنانے کا سہرا یقیناًسماجی رابطے کی سائٹوں کو جاتا ہے ۔یہ سماجی رابطے کی سائٹیں فیس بک ،ٹوئٹر،واٹس ایپ اور انسٹا گرام وغیرہ ہیں ۔ ہم آئے دن کسی نہ کسی معاملے میں میڈیا کے تعصب کا رونا روتے ہیں ۔یہ رونا حقیقی بھی ہے کہ میڈیا مسلمانوں یا پسماندہ اقوام کے تئیں تعصب برتتا ہے ۔تعصب کے سلسلے میں صرف یہ کہنا کہ صرف مسلمان ہی اس کا نشانہ ہیں ،ٹھیک نہیں ہے ۔ چونکہ میڈیا صرف کچھ خاص فرقہ کے ہاتھوں میں ہی نہیں بلکہ وہ سرمایہ داروں کے ہاتھوں میں بھی ہے اس لئے وہ صرف اپنے مفاد کی خبریں نشر کرتے یا جھوٹی خبروں پر مبنی افواہ پھیلاتے ہیں ۔ ایسے دور میں سماجی رابطے کی سائٹ ایسی ہی ہے جیسے صحارا کے ریگستان میں کوئی نخلستان ہو ۔ آپ کی باتیں جو مین اسٹریم میڈیا میں جگہ نہیں پاسکتی تھیں اسے بڑی آسانی سے فیس بک،ٹوئٹر یا انسٹا گرام کے ذریعے دنیا کے کروڑوں لوگوں تک پہنچاسکتے ہیں۔اس کی ایک مثال پچھلے سال میڈیا میں گفتگو کا سبب بننے والی مغربی اتر پردیش کے کچھ علاقوں میں ہندوشدت پسندوں کی تنظیموں کی جانب سے اسلحہ کی ٹریننگ کیمپ کی خبر ہے ۔ یہ خبراور اس کی ویڈیو کم از کم دو ماہ سے گردش کر رہے تھے ۔ دو ماہ بعد کہیں جاکر مین اسٹریم میڈیا کی آنکھیں کھلیں اور انہوں نے اس جانب توجہ دلا کر حکومت و انتظامیہ کو جھنجھوڑ نے کا کام کیا ۔ لیکن ایسا نہیں ہے کہ یہاں بھی پوری طرح آزاد ی ہے ۔ یہاں بھی کئی بہانوں سے آپ کو پریشان کرنے کی کوشش کی جاتی ہے ۔ اگر آپ کی پوسٹ پر مسلسل شکایت ہوئی تو یہاں بھی آپ کی پوسٹ سینسر ہوسکتی ہے ۔اس میں ایسے مواد جو مذکورہ سائٹوں کے ذمہ داروں کو پسند نہیں انہیں بلاک کیا جاتا ہے ۔لیکن جب تک وہ اس کی جانچ کرکے بلاک کریں گے تب تک آ پ کی بات لاکھوں افراد تک پہنچ جاتی ہے ۔اس کی وجہ یہ ہے کہ سماجی رابطے کی سائٹس بڑی سرعت سے کام کرتی ہے اور کسی پوسٹ کے آتے ہی اس کو پسند اور منسلک کرنے کا سلسلہ شروع ہو جاتا ہے ۔ سینسر کرنے اور اسے بلاک کرنے کا اثر ابھی واٹس ایپ پر نہیں ہے یا اگر ہوا بھی تو فیس بک ٹوئٹر یا انسٹا گرام کے مقابلے بڑی سست روی سے ہو گا ۔اتنی دیر میں تو آ پ کی باتیں بے شمار افراد تک پہنچ جائیں گی۔یہ یقیناًاکسیویں صدی کا حیرت انگیز انقلاب ہے ۔جس نے عام انسانوں کو اطلاعات کی نشر و اشاعت میں با اختیار بنایا ہے ۔
ایسے وقت میں جب میڈیا کے ذریعہ مسلمانوں کی شبیہ مسخ کرنے کی مہم چل رہی ہے سماجی رابطے کی یہ سائٹیں ہمارے لئے انعام سے کم نہیں ہیں ۔ لیکن ہمارا معاملہ یہ ہے کہ ہم کو صرف رونا ہی آتا ہے ۔ جو مواقع قدرتی طور پر ہمیں حاصل ہیں اس کا استعمال بھی ہم مثبت طور پر نہیں کر پارہے ہیں ۔جیسا کہ اوپر بتایا گیا کہ آر ایس ایس یا دیگر تنظیمیں اپنے مفاد کے لئے با ضابطہ اس کا استعمال کررہی ہیں ۔ لیکن ہماری تنظیمیں اس سلسلے میں ان کے مقابلے ایک فیصد بھی استعمال نہیں کر رہے ہیں ۔جماعت اسلامی ہند نے اس کے شعبے ضرور بنا رکھے ہیں لیکن جس بجٹ کی ضرورت ہے اور جتنے افراد اس کے لئے چاہئے وہ اسے بھی میسر نہیں ۔جماعت اسلامی ہند کے پاس شاید نہ تو بجٹ ہے اور نا ہی افرادی قوت اس کے پاس ہے ۔ویسے قوم میں جو لوگ موجود ہیں یا جو اس کام کے لئے دستیاب ہیں ان سے بھی ہماری تنظیمیں فائدہ نہیں اٹھا پارہی ہیں ۔ہمارا اور ہماری تنظیموں کا رویہ ایسا ہو گیا ہے کہ وہ کسی تنظیم کے ساتھ زیادہ دن مل کر کام نہیں کرسکتے ۔تنظیم ان کے ساتھ کسی غلام کی طرح سلوک کرتی ہے جس سے بددل ہو کر ایسے افراد نکل جاتے ہیں یا تنظیمی نخوت کی وجہ سے وہ نکال دیئے جاتے ہیں یہ لوگ قوم کے لئے تنظیم کے ساتھ مل کر زیادہ سود مند ہو سکتے تھے یا وہ سود مند ہیں ۔ تنظیموں کو چاہئے کہ وہ کارپوریٹ اسٹائل اپنانے کے بجائے نبی ﷺ کے اخلاق حسنہ کی روشنی میں اپنے کارکنوں کے ساتھ سلوک کریں تاکہ وہ بددل ہونے کے بجائے اپنی قابلیت کو قوم کی فلاح و بہبود اور دین کی تبلیغ و ترویج میں لگائیں۔جمعیتہ العلماء ملک کی سب سے پرانی اور مضبوط تنظیم ہے ۔ اس کے پاس افرادی قوت بھی وافر مقدار میں ہے ۔ وہ چاہیں تو سوشل میڈیا کا ونگ بنا کر اس میں اپنے افراد کی تربیت کروا کر آر ایس ایس سے زیادہ اثر انداز ہو سکتے ہیں ۔لیکن یہ سب کچھ کام کرنے سے ہوگا صرف بد دعا ئیں کرنے اور بیٹھ کر ابابیل کا انتظار کرنے سے کچھ نہیں ہوگا۔مسلمانوں کی دیگر تنظیمیں تو بس آسمان سے کسی فرشتے کے اترنے کے ہی منتظر ہیں کہ ان کی لڑائی فرشتے ہی لڑیں گے وہ کچھ نہیں کریں گے ۔ضرورت اس بات کی ہے کہ مسلمانوں کا باشعور طبقہ اور ان کی تنظیمیں اس جانب ضرورت کے حساب سے متوجہ ہوں ۔ جس تیزی کے ساتھ دشمن ہماری یا اسلام کی شبیہ کو دھندلانے میں مصروف ہے اس سے بھی زیادہ تیزی سے ہمیں متحرک ہونے کی ضرورت ہے ۔لیکن یہاں معاملہ اس کے بالکل برعکس ہے ۔ہم لمبی تان کر سو رہے ہیں اور دشمن ہمارے گرد واہموں کا مضبوط احاطہ تیار کرتا جارہا ہے ۔ جسے مخالف قوتیں ہی نہیں ہم بھی حقیقی سمجھنے لگے ہیں ۔ یہاں تھوڑی سی راحت کی بات یہ ہے کہ ہمارا تعلیم یافتہ اور باشعور نوجوانوں کا طبقہ جو ملت کی پریشانیوں سے واقف ہے ،جس کی حمیت اور غیرت مری نہیں ہے، وہ کسی تنظیم کی مدد کے انتظار میں ہاتھ پر ہاتھ دھرے بیٹھنے کے بجائے اپنی بساط بھر سوشل میڈیا پر ان دشمنوں سے نبرد آزما نظر آتا ہے ۔ ہماری تنظیموں کو ایسے نوجوانوں کی مدد کرنی بھی چاہئے اور ان سے اس جانب قدم بڑھانے کے لئے مدد لینی بھی چاہئے ۔ 

جھوٹ کے پرنہیں ہوتے اور سازشیں بے نقاب ہو کررہتی ہیں۔ مسلمانوں کو بدنام کرنے کی غرض سے مسلم نوجوانوں کے داعش سے تعلقات کا الزام بھی ایسا ہی جھوٹ ہے ۔ ناندیڑ رینج کے انسپکٹر جنرل آف پولس چرنجیو پرساد نے ایک ایماندار اور انصاف پسند پولس افسر ہونے کا ثبوت دیتے ہوئے لاپتہ مسلم نوجوانوں کے داعش میں شامل ہونے کی تمام خبروں کو مسترد کردیا۔ ظلم سہتے اور الزامات کے زخموں سے چور مراٹھواڑہ اور مہاراشٹر بھر کے مسلمانوں کیلئے آئی جی پرساد کی وضاحت کسی اکسیر سے کم نہیں ہے ۔ آئی جی پرسادنے کہا کہ لاپتہ مسلم نوجوانوں کے داعش میں شامل ہونے کے معاملات کی تفتیش کے بعد یہ بات سامنے آئی کہ یہ سارے الزامات جھوٹےتھے۔ اس کے ساتھ ہی ان سارے قصے کہانیوں کی بھی موت ہوگئی جو داعش کے مہاراشٹر میں پیر جمانے کے تعلق سے بیان ہوتے تھے۔  دراصل مسلم قوم کے اندر اور مسلم قوم کے باہر دونوں جگہ کچھ طاقتیں  مسلمانوں کو دہشت گرد ثابت کرنے پر ہمہ وقت تُلی رہتی ہیں، اس کیلئے جھوٹی اور من گھڑت کہانیوں کا سہارا لیا جاتا ہے ۔ اس میں میڈیا سب سے اہم کردار نبھاتا ہے۔ پولس اور اے ٹی ایس کے غیر رسمی ترجمان کی حیثیت سے میڈیا کے افراد جھوٹ کو پھیلانے میں کوئی کسر باقی نہیں چھوڑتے ۔ یہ طبقہ ایجنسیوں کی کہانی پر آنکھ موند کے نہ صرف یقین کرتا ہے بلکہ اس میں مرچ مسالہ لگا کر ان کہانیوں کو سچی واردات بنا کر پیش کرنے کا کام انجام دیتا ہے ۔پہلے یہ کام انڈین مجاہدین اور سیمی کے نام پر ہوتا تھا لیکن داعش کے بین الاقوامی منظر نامہ میں ابھرنے کے بعد سے ’داعش‘ مسلم مخالف میڈیا کا سب سے چہیتا موضوع بن گیا۔ حالات اتنے خراب ہو گئےکہ کوئی مسلم نوجوان اگر لاپتہ ہو جاتا تو اس پر سیدھا داعش میں شامل ہوجانے کی کہانیاں بننی شروع ہوجاتی ہیں، غیر ممالک میں روزگار کیلئے گئے مسلم نوجوان کا جیسے ہی اپنے اہل خانہ کے ساتھ رابطہ ٹوٹتا ہے ویسے ہی میڈیا اس گمشدہ نوجوان کے داعش میں شامل ہوجانے کی کہانیاں شروع کردیتا ہے۔ میڈیا کی کہانیوں پر ایجنسیاں بھی حرکت آجاتیں اور میڈیا اور ایجنسیاں ایک دوسرے کی مدد کرتے ہوئے ایسی ایسی کہانیاں تراش لیتے کہ سیدھے سادے عوام کو ان کہانیوں پر بھروسہ کرنے کے سوا کوئی چارہ نہیں رہتا ۔ یہ ساری خبریں اور ان خبروں پر ہونے والی بحثیں دھیرے دھیرے اور غیر شعوری طور پر ہمارے ذہنوں کے اردگرد تانے بانے بنالیتی ہیں جو خود بخود ایک فکر میں بدل جاتی ہے ۔  مسلمان بےچارہ پہلے سے ہی سہما ہوا رہتا ہے او ر دہشت گردی کے الزامات لگ جانے کے بعد تو اس کے پورے خاندان پر مانو قیامت ٹوٹ پڑتی ہے ۔ عدالتوں کا چکر کاٹتے کاٹتے دہائیاں بیت جاتی ہیں۔ دہائیوں بعد عدالتیں انہیں با عزت رہا کردیتی ہیں لیکن تب تک عمر نکل جاتی ہے ۔ ہمیں شکر گزار ہونا چاہئے آئی جی پرساد کا کہ انہوں نے ایک انصاف پسند پولس اہلکار کے طور پر اپنی ذمہ داریاں نبھائیں۔

ملک میں ایک گروہ آزادی کے بعد سے ہی مسلمانوں کو یہاں سے نکالنے کے لئے منافرت اور فرقہ واریت کا زہر پھیلا کر فضا کو خراب کرنے میں مصروف رہا ہے ۔بیگم انیس قدوائی اپنی کتاب ’آزادی کی چھاؤں میں ‘ لکھا ہے کہ آزادی کے سال سے گاندھی جی کے قتل تک سنگھی گروہ ٹرک میں مائیک لگا کر کھلے عام دہلی کی سڑکوں پر کہتا تھا کہ مسلمانوں کو یہاں سے نکال دو لیکن کوئی کانگریسی انہیں روکنے کی کوشش نہیں کرتا تھا بلکہ انکی تحریروں سے یہ بھی پتہ لگتا ہے کہ کانگریسی خود ہی اس ساری تباہی بربادی اور قتل عام میں مصروف تھے ۔اس دور میں آر ایس ایس کے ایک پروگرام میں راجندر پرساد اور سردار پٹیل بھی شامل ہوئے تھے ۔یہ دونوں کانگریس کے صف اول کے قائدین میں سے تھے۔تمہید کی ضرورت اس لئے پڑی کہ ملک میں مسلمانوں کے خلاف تعصب کا پس منظر بھی سامنے آجائے ۔یہ بار بار لکھا جاچکا ہے کہ کس طرح سے مسلمانوں کو برباد کیا گیا اور اب کس طرح انہیں تنگ کیا جارہا ہے ۔اب حال یہ ہوگیا ہے کہ فرضی بم دھماکے اور دہشت گردانہ حملے کئے جاتے ہیں اور اس میں مسلم نوجوانوں کو ماخوذ کیا جاتا ہے ۔اس سے دشمنوں کے دو مقاصد ہو سکتے ہیں۔اول مسلم نوجوانوں کی حوصلہ شکنی کرکے ان کی ترقی اور نئے زمانے سے قدم سے قدم ملا کر چلنے کے عزم کو مجروح کیا جاسکے ۔دوسرے پوری قوم کو مجرم ضمیری میں مبتلا کردیا جائے ۔دشمن، قوم کو مجرم ضمیری میں مبتلا کرنے میں کامیاب تو ہو گیا ہے لیکن وہ نوجوانوں کے حوصلے توڑنے میں کامیاب نہیں ہو سکا ہے ۔قوم کو مجرم ضمیری میں مبتلا کردیا گیا اور یہ مبتلا کیا ہے قوم کے ٹھیکیداروں نے جوکسی حادثہ یا واقعہ پر ایک عدد مذمتی بیان دینا اپنی سب سے بڑی ذمہ داری سمجھتے ہیں۔اس کے بعد ان کی کوئی ذمہ داری نہیں رہتی۔قوم کی کیا حالت ہے ۔اس کا مستقبل کس طرح محفوظ ہو ۔اس کی انہیں کوئی فکر نہیں ۔انہیں تو صرف اس کی فکر ہے کہ کسی طرح قوم کے بہانے اپنے مستقبل کو محفوظ کیا جاسکے۔وہ قوم کی لاشوں پر اپنا مستقبل محفوظ کرنے میں کامیاب ہو چکے ہیں۔
کسی دہشت گردی یا ظلم کی مذمت کرنا برا نہیں ہے۔لیکن اس واقعہ جس کا تعلق دہشت گردی یا ظلم سے ہو سکتا ہے ۔اس کے پس منظر کو جاننا بھی ضروری ہے ۔لیکن یہ جاننے کی یہ ضرورت محسوس نہیں کرتے ۔بس ادھر کوئی واقعہ ہوا نہیں انٹیلی جنس یا پولس محکمہ سے کوئی نام جاری ہوا کہ ان کی مذمت کا پٹارا کھل جاتا ہے ۔مذکورہ دہشت گردانہ کارروائی اور دیگر واقعات جس میں سے اکثرفرضی ہوتے ہیں اس کا سہارا لے کر فرقہ پرست سنگھی اور نام نہاد ترقی پسندوں کا گروہ مسلمانوں کو لعن و طعن کرتا ہے ۔ہمیں کوئی کہتا ہے کہ پاکستان بھیج دیا جائے گا ۔کوئی خلیج بنگال اور بحر عرب میں پھینک دینے کی بات کرتا ہے ۔لیکن یہ ہمارے قائدین اور علمائے کرام (جنہیں کبھی کتابت کی غلطی سے علمائے کرائم لکھ دیا گیاتھا)کارویہ ان کے سامنے معذرت خواہانہ ہی ہوا کرتا ہے کہ نہیں صاحب ہم تو بہت امن پسند لوگ ہیں ۔ہم تو دہشت گردی کی مذمت کرتے ہیں۔اسلام دہشت گردی نہیں سکھاتا ہے ۔اسلام کے معنی ہی امن و سلامتی کے ہیں ۔ آخر یہ معذرت خواہی کب تک ہم کرتے رہیں گے ؟ہمیں کیوں پاکستان نوازی کا طعنہ دیا جاتا ہے ؟ آخر یہ لوگ جو ملک کی فضا کو پراگندہ کرنے میں دن رات ایک کئے ہوئے ہیں ان کو کس نے حق دے دیا کہ وہ ہمیں پاکستان بھیجنے کی بات کریں اور یہ علما اور قائدین ان کے سامنے دو زانو ہو کر معذرت پیش کرتے رہیں ۔اب وقت آگیا ہے کہ جو لوگ ہمیں پاکستان بھیجنے کی بات کرتے ہیں اور جو اس پر معذرت پیش کرتے ہیں ان دونوں گروہوں کو ہی کالا پانی کیوں نہ بھیج دیا جائے ؟
یہ ملک ہمارا ہے اور مولانا آزاد نے کہا تھا کہ اس کی تقدید کے ہر فیصلے ہمارے بغیر ادھورے رہیں گے ۔آج ہم دیکھ رہے ہیں کہ ملک میں مسلمانوں کو حاشیہ پر رکھ کر دنیا کی ترقی میں بھی ملک کوحاشیہ پر پہنچادیا گیا۔کیوں کہ اس ملک کو ترقی کی بلندی پر پہنچانے والے مسلمان سلاطین ہی تھے ۔انہوں نے ہی ہندوستان کو سونے کی چڑیا بنایا تھا ۔آزادی کے ہولناک دنوں کی کہانی بیان کرتی ہوئی بیگم انیس قدوائی اپنی کتاب ’آزادی کی چھاؤں میں ‘ مسلمانوں کی فن کاری اور کاریگری پر لکھتی ہیں کہ ’’دہلی کے بیوپاری پریشان تھے ۔زردوزی والے،کامدانی ساز بھی رخصت ہورہے تھے ۔بیوپاریوں نے گورنمنٹ تک معاملہ پہنچایا کہ اگر یہ سب چلے گئے تو دلی کی مشہور صنعت اور کاروبار ختم ہو جائے گا ‘‘ اس کے بعد وہ اپنا تاثر بیان کرتے ہوئے لکھتی ہیں کہ ’’یوں دیکھنے میں تو عام طور سے مسلمان بدھو سے نظر آتے ہیں مگر اسی زمانے میں( تقسیم کے ہنگامے میں ) ان کے جو ہر کھلے ‘‘۔ ہم اس ملک کے حقیقی معمار ہیں ۔ہم نے ہی اس کو سونے کی چڑیا بنایا تھا ۔اس لئے معذرت خواہی ختم کریں ۔اور اقدامی حالت میں آئیں ۔اگر آپ کو خوف آتا ہے تو کس نے کہا ہے کہ آپ ہماری قیادت کا دم بھریں ۔آپ خاموش رہیں ۔دنیا کو پتہ ہے کہ ہم اور ہمارا مذہب دونوں دہشت اور ظلم کے خلاف ہیں ۔اس کے لئے ہمیں کسی قسم کی صفائی پیش کرنے کی ضرورت نہیں ہے ۔

مجلس اتحاد المسلمین ممبئی صدر شاکر پٹنی کی سرپرستی میں مجلس کے ارکان 

و کارکنان کی کاوشوں سے ناگپاڑہ اجلاس کامیابی سے ہمکنار 

ممبئی: ممبئی مجلس اتحاد المسلمین کے صدر شاکر پٹنی کی سرپرستی اور مجلس

 کے پر جوش کارکنان اور ارکان کی کوششوں سے اسدالدین اویسی کا ناگپاڑہ کا اجلاس کامیابی کے ساتھ ہمکنار ہوا ۔ شاکر پٹنی نے اجلاس کی کامیابی کیلئے مجلس کے سبھی کارکنان اور ارکان کا شکریہ ادا کیا ۔انہوں نے کہا کہ اسد صاحب کے ممبئی دورہ اور اجلاس کی کامیابی میں مجلس کے کارکنان کی سخت محنت اور ان کی کاوش شامل ہے ۔ممبئی کے مسلمانوں اور پسماندہ طبقات کو اسد الدین اویسی کی آمد کا برسوں سے انتظار تھا ۔اس کا ثبوت انہوں نے ہزاروں کی تعداد میں اجلاس میں ان کی تقریر سننے کیلئے حاضر ہو کر دیا ۔ناگپاڑہ سے مدنپورہ کی جانب حد نگاہ تک جہاں نظر جاتی انسانی سر ہی نظر آتا تھا ۔جنوبی ممبئی کے ناگپاڑہ میں تقریر کرتے ہوئے انہوں نے موجودہ حکومت کی پالیسی اور اس کے مضمرات پر سخت تنقید کی ۔وہیں انہوں نے کانگریس ،راشٹر وادی اور سماج وادی کو بھی اپنی تنقید کا نشانہ بنایا ۔ممبئی میں آئندہ منعقد ہونے والے الیکشن کے تعلق سے انہوں نے عوام سے اپیل کی کہ آپ ہمیں کارپوریشن میں 25 کارپوریٹر دیدیں ہم مسلم محلوں کی خستہ حالی کو دور کردیں گے ۔ انہوں نے شیواجی کے مجسمہ میں خطیر رقم خرچ کرنے پر سخت تنقید کرتے ہوئے کہا کہ شیواجی کے نام پر سیاست کرنے والو یہ جان لو کہ شیواجی غریب عوام کا پیسہ اس طرح برباد کرنے کی اجازت ہر گز نہیں دیتے ۔ آج حالت یہ ہے کہ ممبئی میں بارش کے موسم میں گھروں میں پانی گھس جاتا ہے ۔گٹر کا پانی سڑکوں پر بہتا ہے ۔پتہ نہیں 37000 ہزار کروڑ روپئے کی خطیر رقم کس موڑھی میں بہہ جاتی ہے کہ عوام کو بنیادی سہولیات مہیا نہیں کرائی گئی ۔اویسی نے کہا کہ اگر آپ کے اتحاد اور بیداری کے سبب مجلس کے کارپوریٹر کارپوریشن میں آجاتے ہیں تو آپ کے علاقوں میں ترقی یقینی ہے ۔انہوں نے شیواجی کی مذہبی رواداری کا بھی حوالہ دیتے ہوئے کہا کہ شیواجی مسلمانوں پر بھروسہ کرتے تھے اور ان کے نام پر سیاست کرنے والے لوگ اور پارٹی مسلمانوں کے خلاف نفرت پھیلانے کا کام کرتے ہیں ۔

میں یہاں اس لئے نہیں آیا ہوں کہ میں اپنی لیڈر شپ کو مضبوط کروں ۔میں اس لئے ممبئی آیا ہوں کہ ممبئی کے ہر علاقے میں آ پ کا اپنا لیڈر ہو ۔اس لئے متحد ہو کر اپنی لیڈر شپ اور اپنی پارٹی کو مضبوط کرو۔نوجوانوں تمہیں اپنی آواز اپنی پارٹی کو لے کر آگے بڑھنا ہے ۔اسدالدین اویسی نے کہا کہ 37000ہزار کروڑ کے بجٹ میں مسلمانوں کی آبادی کے حساب سے ہم لڑ کر اپنا حصہ لیں گے ۔اب تک جو مسلم محلوں کے ساتھ تفریق برتی گئی ہے اسے مجلس کے کارپوریٹر ختم کریں گے ۔ہم 

پسماندہ محلوں کی صورت بدلیں گے ۔

انہوں نے مجلس پر فرقہ پرستی اور سیکولر ووٹوں کی تقسیم کے الزام کو مسترد کرتے ہوئے کہا کہ مہاراشٹر میں 2009 اور 2014 کے پارلیمانی الیکشن میں کوئی مسلم ایم پی کامیاب نہیں ہوا ۔کیا وہاں اس وقت مجلس تھی۔حالیہ پارلیمانی الیکشن میں یوپی سے بھی کوئی مسلمان منتخب نہیں ہو سکا ۔اس وقت بھی مجلس نے یوپی الیکشن میں حصہ نہیں لیا تھا ۔انہوں نے مسلمانوں سے بے خوف ہو کر رہنے اور اپنا دستوری حق لینے کے لئے زور ڈالتے ہوئے کہا کہ یہ کب تک ہمیں ڈراتے رہیں گے ۔ہم اب نہیں ڈریں گے ۔اگر شیو سینا اور بی جے پی جیت جاتی ہے تو اس میں ہمارا کیا قصور ۔ مجلس اتحادلمسلمین کو ممبئی کارپوریشن میں پہنچائیں۔ ہم آپ کے علاقوں میں ترقی کرکے دکھائیں گے ۔مسلم علاقوں میں نہ راستے درست ہیں نہ ڈرینیج سسٹم ٹھیک ہے ۔پانی کی سپلائی بھی اچھی طرح نہیں ہوتی ۔

انہوں نے سیکولر پارٹیوں اور سکولرزم کے نمائندوں کو آڑے ہاتھوں لیتے ہوئے کہا کہ یہ نہ سیکولر ہیں اور نہ ہی حق و انصاف کا ساتھ دینے والے ۔انہوں نے مثال پیش کرتے ہوئے کہا کہ وارث پٹھان کو جب بھارت ماتا کا نعرہ نہیں لگانے کی وجہ سے اسمبلی کے رواں اس پورے سیشن میں شمولیت پر پابندی عائد کردی گئی تو کانگریس اور دیگر نام نہاد سیکولر پارٹیاں شیو سینا اور بی جے پی کے ہی خیمے میں تھے ۔

اسدالدین اویسی نے نریندر مودی کی کل کی تقریر میں حاملہ خواتین کیلئے چھ ہزار روپئے دینے کے اعلان کو مضحکہ خیز قرار دیا کیوں کہ یہ تو فوڈ سیکورٹی ایکٹ میں یہ نکات موجود ہے لیکن وزیر اعظم نے اسے دینے سے انکار کیا اب اسی قانون کو اپنے کھاتے میں ڈالنے کیلئے وہ یہ اعلان کررہے ہیں ۔انہوں نے وزیر اعظم کے دیگر اعلانات اور نوٹ بندی کو بھی شدید تنقید کا نشانہ بنایا ۔وزیر اعظم نے کہا تھا چھ ملین گھر بنا کر دیں گے ۔لیکن ابھی تک صرف چھ ہزار ہی گھر بن پائے ہیں ۔وزیر اعظم کے نوٹ بندی کے فیصلہ کو تنقید کا نشانہ بناتے ہوئے انہوں نے کہا کہ 220 ملین افراد بے روزگار ہو گئے جبکہ وہ اس وعدہ کے ساتھ آئے تھے کہ سالانہ دو کروڑ روزگار پیدا کریں گے۔انہوں نے اس فیصلہ کو صرف وزیر اعظم کی اپنی شہرت کی ہوس قرار دیتے ہوئے کہا کہ انہوں نے ہندوستان کے کروڑوں غریب عوام کو تباہ کردیا ہے۔ان کے چھوٹے موٹے کاروبار کو ان کی نوٹ بندی نے شدید نقصان پہنچایا ہے۔