ممتاز میر  

  انتخابات کے طویل عمل سے گذر کر ۸ نو مبرکو بہار کے نتائج آگئے۔حسب توقع مودی اینڈ کمپنی کی یہ دوسری کراری ہار ثابت ہوئی ہے۔سب سے بڑی اور سب سے زبردست شکست مودی اینڈکمپنی کی دلی میں ہوئی تھی جو کئی معنوں بالکل الگ تھی۔بہار میں سارے کے سارے کھلاڑی پرانے،آزمودہ کار اور ماہر تھے۔مگر دلی میں ایک نوآموز نے انھیں خاک چٹا دی تھی۔انھیں اسی وقت اپنے منہ پر پڑنے والے طمانچے کا احساس ہو جانا چاہئے تھا مگر سنگھ کی تربیت میں انسان کو بے شرم بنانے کا عنصرسب سے قوی ہے۔اس لئے سنگھی ہر طرف سے پڑنے والے طمانچوں کے باوجود بے مزہ نہیں ہوتے اور وہی حرکتیں دہراتے رہتے ہیں جن کی بنا پر عوام،اور خواص بھی ان کو طمانچے مارتے ہیں۔امید تو یہی ہے کہ آنے والے انتخابات میں بھی وہ بس اوپر اوپر سے لیپا پوتی کرکے ووٹ حاصل کرنے کی کوشش کریں گے۔  حالیہ انتخابات میں بھی سنگھ اور اس کے پرچارکوں نے خود اپنی حماقتوں سے لالو اور نتیش کو کئی ایسے نکات تھالی میں سجا کر پیش کئے جس کو دونوں نے بخوبی کیش کیا۔مثلاً انتخابی مہم کے بالکل ابتداء میں مودی جی نے بہاریوں کے ڈی این اے کی بات کرکے بہاری عوام کو بھڑکا دیا۔پھر بہار میں جنگل راج کی بات کی گئی جبکہ ہر وہ شخص جس کے سر میں آنکھیں ہیں،بلکہ آنکھیں نہ ہونے والا شخص بھی دیکھ رہا ہے کہ جنگل

راج کی کیفیت تو راجدھانی کے آس پاس ہے۔اور اس جنگل راج کو برقرار رکھنے میں خود سنگھیوں کا ہاتھ ہے۔راجدھانی دہلی میں ایک دن میں ۴/۴ گینگ ریپ ہوتے ہیں اور مرکز پھر بھی پولس کو دہلی حکومت کو سونپنے کے بجائے اپنے ماتحت رکھنا چاہتا ہے۔موہن بھاگوت کا رزرویشن پر بیان بھی لالو اور نتیش کی مدد کے لئے ہی تھا۔لوگ اب یہ سمجھنے لگے ہیں کہ این ڈی اے کا سب سے بڑا دوست شاید پاکستان ہی ہے۔جب جب بھی این ڈی اے مصیبت میں ہوتا ہے پاکستان کچھ نہ کچھ ایسا کرتا ہے جس سے این ڈی اے مصیبت سے باہر نکل آتا ہے۔

گروداس پور اٹیک کے بعد اب کوئی نہ بی جے پی کی کرپٹ مہارانیوں کا ذکر کرتا ہے نہ ویاپم گھوٹالے کا اس ہار سے سب سے زیادہ خوشی بہاری بابو شترو گھن سنہا کو ہوئی ہے اور ہونی بھی چاہئے۔امیت مودی جوڑی نے انھیں نوویئر کرنے کی کوشش کی تھی۔یہ بڑی عجیب انسانی نفسیات ہے کہ انسان اسی درخت کی جڑیں کاٹنے کی کوشش کرتا ہے جس پر اس کا آشیانہ ہوتا ہے۔یہ شاہی دور میں بھی ہوتا تھا یہی جمہوری دور میں بھی ہو رہا ہے۔مسٹر مودی ہر شخص کو حاشیہ پر پہونچا رہے ہیں جنھوں نے انھیں یہاں تک پہونچانے میں دامے درمے مدد کی اور جس سے انھیں رتی برابر بھی خطرہ ہو سکتا ہے۔۔خیر 

  اب آئیے حالیہ انتخابات کے نتائج کو دیکھتے ہیں۔مہا گٹھ بندھن یا عظیم اتحاد میں آر جے ڈی یا لالو پرساد کو ۰۸ سیٹیں ملی ہیں۔جے ڈی یو یا نتیش کمار کو ۱۷اور کانگریس کو ۷۲ سیٹیں ملی ہیں۔کانگریس کو جو نشستیں ملی ہیں وہ بھی عظیم اتحاد میں شمولیت کی بنا پر ملی ہیں۔راہل گاندھی کی محنت یا شخصیت کا اس میں کوئی کمال نہیں۔ہونا تو یہی چاہئے کہ اب کانگریس راہل گاندھی کو درمیان سے ہٹا کر الیکشن لڑے۔کانگریسیوں کو اس بات کا مکمل ادراک ہونا چاہئے کہ وہ اب ہر جگہ ایک جونیئر پارٹی بن چکی ہے اور اس میں سب سے بڑا ہاتھ ان کی منافقت یا نرم ہندتو کی پالیسی کا ہے۔ دوسری طرفاین ڈی اے کی پارٹی پوزیشن بھی دیکھ لیں۔بی جے پی کو ۳۵نشستیں حاصل ہوئی ہیں ایل جے پی کو صرف ۳آر ایل ایس پی کو بھی صرف دو نشستیں اور جتن رام مانجھی کو صرف ایک۔یعنی اپنی پارٹی میں خود ہی جیتے ہیں بس۔دیگر میں سی پی آئی ایم کی ۳ نشستیں ہیں اور آزاد ۴جبکہ ۰۱۰۲ کے الیکشن میں انہی پارٹیوں کی پوزیشن کچھ یوں تھی۔بی جے پی۔۱۹۔جے ڈی یو ۵۱۱۔کانگریس ۴۔آر جے ڈی  ۲۲۔سی پی آئی ایک۔ایل جے پی ۳۔یہ دونوں نتائج یہ ظاہر کرتے ہیں کہ بی جے پی اسی وقت جیت سکتی ہے جب ووٹوں کی تقسیم عمل میں آئے اس کے علاوہ یہ بات بھی وطن عزیز کا ہر فرد جانتا ہے کہ بی جے پی نے آج تک اپنے دم پر لڑ کر کبھی کامیابی حاصل نہیں کی وہ ہمیشہ حمایتیوں کے ساتھ ہی میدان میں آئی ہے۔

  بہار میں جب انتخابی مہم جاری تھی تب ہی تجزیہ کاروں نے یہ کہنا شروع کر دیا تھا اس الیکشن میں این ڈی اے کی دال نہیں گلے گی۔آخری”چرن“ تو یہ بالکل واضح ہو گیا تھا کہ این ڈی اے الیکشن ہار گیا ہے۔مگر اب ہمارا میڈیا بھی اسی مٹی کا بن گیا ہے جس کا سنگھ پریوار بناہوا ہے۔سنگھ کی لغت میں شرم و حیا نام کا کوئی لفظ نہیں ہے۔تمام واضح علامات کے باوجود کچھ ایگزٹ پول این ڈی اے کو جیتتے ہوئے دکھا رہے تھے۔اس سے بھی آگے بڑھ کر نتائج کے دن صبح ۹ سے ساڑھے ۹ کے درمیان جب ووٹوں کی گنتی میں این ڈی اے لیڈ کر رہا تھا تو چینلوں کے تقریباً تمام اینکر کہہ رہے تھے کہ نتیش کی یہ ہار لالو کے ساتھ کی وجہ سے ہے۔کیا اتنا قبل از وقت اس طرح کا ریمارک دینا ٹی وی چینلوں کے اتنے ذمے دار صحافیوں کو زیب دیتا ہے۔پیڈ یا ایمبیڈصحافت کوئی نئی چیز نہیں۔کم و بیش ہر ملک میں یہ بیماری نظر آئے گی۔مگر کچھ انا،خودداری اور انفرادیت بھی تو کوئی چیز ہوتی ہے۔دنیا کے ایک بڑے جمہوری،طاقتور اور قابل احترام ملک کے میڈیا کی یہ روش کس نظر سے دیکھی جائے گی؟ نیپال سے ہمارے تعلقات بگاڑنے میں میڈیا کا بھی کچھ حصہ ہے مگر میڈیا کو اپنے مفاد کے لئے استعمال کرنے والے حکمراں میڈیا میں یہ شعور نہیں پیدا کرسکتے۔میڈیا میں موجود کالی بھیڑوں کو سدھارنے کا کام میڈیا کی سفید(گوری)بھیڑوں کو ہی کرنا ہوگا۔وکالت کا کاروبار سب جانتے ہیں کہ جھوٹ پر ہی چلتا ہے۔حکومت بھی کلائنٹ بھی اور منصف بھی۔مگر نام کے لئے ہی سہی ایک پروفیشنل ایتھکس طلباء کو پڑھائی جاتی ہے جس میں بدقسمتی سے یہ بھی لکھا ہے کہ وکیل اپنی ذاتی رائے کو طاق پر رکھ ہر کلائنٹ(کم وبیش) کا کیس لے اس کا مطلب کم سے کم ہم یہ سمجھتے ہیں کہ جس کو وہ قاتل سمجھتا ہے اس کا کیس بھی لڑے۔مگر صحافت کے پیشہ ورانہ اخلاقیات میں تو ایسے پیچ نہیں ہے۔پھر اس میدان میں تو ہمارے اسلاف نے بڑی روشن مثالیں قائم کی ہیں۔عوام صحافیوں سے یہ امید رکھتے ہیں کہ وہ چیزوں کو بالکل ویسی ہی دکھائیں گے جیسی کہ وہ ہیں۔عوام کی ذہم سازی مثبت بنیادوں پر ہوگی منفی نہیں۔اب اگر لالو پرساد اس طرح کے صحافیوں کو ٹارگٹ کرتے ہیں تو کیا وہ غلط ہوگا؟اس الیکشن میں تو لالو پرساد سب سے بڑے کھلاڑی بن کر ابھرے ہیں۔اور سب سے زیادہ نشستیں جیتنے کے باوجود شیو سینا بی جے پی کی طرح وزارت اعلیٰ پر کوئی لڑائی نہیں ہے۔لالو سے پہلے ان کی دختر میسا نے کہا کہ وزیر اعلیٰ نتیش کمار ہی ہوں گے۔سوال یہ پیدا ہوتا ہے کہ نتیش کمار کے دس سالہ ترقیاتی دور کے باوجود لالو یا آرجے ڈی سب سے بڑی پارٹی بن کر کیوں ابھری؟

  یہ مانا جاتا ہے کہ لالو پرساد یادو نے اپنے دور حکومت میں بہار کی ترقی کے لئے کوئی کام نہیں کیا۔مگر اس سے بڑی حقیقت یہ ہے کہ لالو نے اپنے دور میں فرقہ پرستوں کو پوری طرح اپنے پیروں تلے دبا رکھا تھا۔ان کے دور حکومت میں فرقہ وارانہ منافرت کا کوئی واقعہ نہیں ہوا تھالالو پرساد فرقہ پرستوں کے جتنے بڑے دشمن ہیں نتیش کماراپنے دور میں اتنے ہی بڑے دوست ثابت ہوئے۔ بی جے پی کی محبت میں انھوں نے بھی وہی ظلم کئے جو بی جے پی یا کانگریس کے لئے مخصوص ہیں اس لئے جیسے ہی ون بائے ون فائٹ کا موقع آیا مسلمانوں نے اپنا سارا وزن لالو کے پلڑے میں ڈال دیا۔اب اگر نتیش کو مسلمانوں کے ووٹ لینا ہے تو ان کے پاس اپنے گذشتہ گناہوں کی تلافی کرنے کا موقع ہے۔یاد رہے کہ اب سنگھی کیڈر بہار میں جنگل راج قائم کرنے کی پوری کوشش کریگا۔ان سے کن آہنی ہاتھوں سے نپٹا جاتا ہے وہ یہ سبق لالو سے لے سکتے ہیں۔ 

  کہتے ہیں کہ جب جہاز ڈوبتا ہے تو سب سے پہلے چوہے نکل کر بھاگتے ہیں۔لوک سبھا انتخابات کے کامیاب سفر کے بعد این ڈی اے کا جہاز اب بھنور میں پھنس چکا ہے۔اور مختلف انتخابات کے نتائج بتاتے ہیں کہ ڈوبنے کی شروعات ہو چکی ہے۔چوہوں کا بھاگنا شروع ہوا ہی چاہتا ہے۔دوسرے جہاز کے کپتانوں کو چاہئے کہ الرٹ رہیں۔یہ بھگوڑی مخلوق اب انھیں نشانہ بنائے گی۔وہ لوگ جو سیکولرزم کے چاہنے والے ہیں انھیں چاہئے کہ ان سے دور رہیں ورنہ۔۔یہ تو پبلک ہے یہ سب جانتی ہے۔

  آخر میں بزرگ صحافی حفیظ نعمانی  کے ایک مضمون سے چند سطریں نقل کرتے ہیں۔اس لئے کہ ہم ان کے خیالات سے مکمل اتفاق رکھتے ہیں ”ایک بات تمام سیاسی پاٹیوں سے عرض کرنا ہے کہ بے وجہ جو یو پی بہار اور بڑے صوبوں میں پانچ یا سات یا چار راؤنڈ میں الیکشن کرایاجاتا ہے یہ اس وقت تو ٹھیک تھا جب کہیں مار پیٹ ہو جاتی تھی کہیں بیلٹ باکس لوٹ کر لے جاتے تھے۔ کہیں دبنگ کمزوروں کو ووٹ نہیں ڈالنے دیتے تھے اور اپنے ساتھیوں براتیوں سے فرضی ووٹنگ کرا لیتے تھے۔لیکن اب جبکہ بہار کے پانچوں راؤنڈ میں ایک بھی سنگین واردات نہیں ہوئی تو دو مہینے الکشن کا ماحول طاری کرائے رکھنا اور بڑے لیڈروں کا قیمتی وقت برباد کرنا ہرگز مناسب نہیں۔بہار میں زیادہ سے زیادہ دو راؤنڈ میں (الیکشن) ہونا چاہئے۔“سوال یہ ہے کہ جن اندیشوں کی بنا پر اتنے لمبے الیکشن چلائے جاتے ہیں وہ کس کے پیدا کردہ ہیں۔اس تعلق سے حکومت کی کوئی ذمے داری ہے یا نہیں؟ملک میں امن و شانتی بنائے رکھنا کس کی ذمے داری ہے؟اس سال ترکی میں دو بار الیکشن ہوئے ہیں۔ایک بار اس وقت جبپی کے کے حکومت سے معاہد تھی اور دوسری بار اس وقت جب وہ دہشت گردانہ سرگرمیاں شروع کر چکی تھی۔دونوں بار ووٹنگ سے لے کر رزلٹ تک کا عمل ترکی میں ۴۲ گھنٹوں میں مکمل ہو گیا تھا۔ہمار ے یہاں ووٹنگ سے لے کر رزلٹ تک کا طویل عمل شایدمینوپولیشن کے لئے ہے۔عوام بے چاری صرف اتنا سوچتی ہے کہ ہم نیو کلیئر پاور ہیں۔اقوام متحدہ میں مستقل نشست کے دعویدار ہیں اور ڈھنگ سے الیکشن بھی نہیں کرا سکتے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔07697376137

عمرفرا ہی    umarfarrahi@gmail.com

بہار الیکشن جس پر بلا مبالغہ یہ کہا جاسکتا ہے کہ پوری دنیا کی نظر تھی کیونکہ یہ الیکشن ملک کے رخ کو طے کرنے والا تھا کہ یہ ملک روادار ملک کی حیثیت سے بنا رہے گا یا پھر غیر روادار ہندوتوا کے رنگ میں رنگ جائے گا ۔بہار کے بیدار عوام نے دنیا کے لوگوں کو یہ پیغام دے دیا کہ یہ ملک قاتلوں کی ہمنوائی نہیں کرسکتانیز تشدد پھیلا کر اپنا مفاد حاصل کرنے والوں کے لئے یہاں کوئی جگہ نہیں ہے ۔لیکن یہ صرف تصویر کا ایک رخ ہے ۔تصویر کا دوسرا رخ یہ ہے کہ اب بھی اس ملک میں ایک بڑی تعداد ایسی ہے جس نے نہ صرف قاتلوں کی ہمنوائی کی بلکہ اس پر اپنا اعتمادکا اظہار بھی کیا ہے ۔ساڑھے چوبیس فیصد ووٹروں نے بی جے پی میں اپنے اعتماد کا اظہار کیا ہے ۔یہ کوئی چھوٹی تعداد نہیں ہے۔ اپر کاسٹ یا سورن ہندوؤں کی آبادی تقریباً 15فیصد ہے ۔یعنی بی جے پی نے سورن ہندوؤں کے علاوہ دوسرے پسماندہ طبقات کا بھی ساڑھے نو فیصد ووٹ حاصل کیا ہے ،جو صدیوں سے انہی قوتوں کے زیر سایہ تذلیل جھیل رہا ہے اور انسانوں کی بستی میں بحیثیت انسان جگہ پانے کے لئے کوشاں ہے۔نتیش اور لالو سمیت کانگریس کی جیت میں مسلم اور پسماندہ ذتوں کاووٹ یکجا ہوا ہے ۔مسلم ووٹ تو تقریباً اٹھانوے فیصد یکطرفہ طور پر عظیم اتحاد کو گیا ہے۔اور وہی ان کی فیصلہ کن جیت کا سبب بھی بنا ہے ۔کانگریس کوجسے آزادی کے بعد سے سورن ہندوؤں کا بھی ووٹ ملتا رہا ہے ۔اب اس کا یہ ووٹ بینک بی جے پی کو ٹرانسفر ہو چکا ہے ۔اس کا ثبوت اسد الدین اویسی کی پارٹی مجلس اتحا دالمسلمین نے اپنے جن چھ امیدواروں کو میدان میں اتارا تھا اس میں سے تین کوچہ دھامن،کشن گنج اور آرمور کے امیدواروں کو ہرا کر کا نگریس نے ہی جیت حاصل کی ہے ۔دو پر جنتا دل یونائیٹیڈ اور ایک پر سی پی آئی ایم ایل کا مسلم امیدوار کامیاب ہوا۔یعنی جن لوگوں نے میڈیا کے گمراہ کن پروپگنڈہ سے متاثر ہو کر مجلس کے لئے محض ووٹ کاٹنے والی پارٹی اور بی جے پی کا دلال جیسے سطحی الفاظ کا استعمال کرنا شروع کیا تھا ان کی باتیں پوری طرح غلط ثابت ہوئیں ۔نہ انہوں نے ووٹ کاٹے اور نہ ہی بی جے پی کی دلالی کا کوئی ثبوت دیا بلکہ چھ کے چھ سیٹ پر نام نہاد سیکولر پارٹی کے امیدوار ہی جیتے اور بی جے پی کو کوئی فائدہ نہیں ہوا ۔ بعض افراد نے جو کہ مسلمان ہیں اور میڈیا سے جڑے بھی ہیں انہوں نے بھی عام طور پر مروجہ مزاح میں مجلس کے سربراہوں کو گھسیٹ لیا کہ مجلس حلقہ انتخاب سے بی جے پی کی ہار کی وجہ سے بی جے پی نے رقم کا مطالبہ شروع کردیا ہے جو کہ اس کے لئے مجلس کو دی تھی ۔ اس طرح کے سطحی الفاظ کا استعمال بلا دلیل کسی مسلمان کو زیب نہیں دیتا لیکن اس ووقت ہم اخلاقی زوال کے شدیدی بحران کا شکار ہیں ۔پھر بھی مجلس نے اسی ہزار سے زیادہ ووٹ حاصل کئے ۔یعنی کم از کم یہ تین امیدوار تو اسد الدین اویسی کو مل ہی سکتے تھے ۔لیکن مسلمانوں کو اتنا خوفزدہ کیا گیا تھا کہ انہوں نے کوئی رسک لینا گوارہ نہیں کیا ۔ بہر حال بی جے پی مخالف پارٹیوں کی شاندار جیت پرمبارکباد تو دیا ہی جاسکتا ہے ۔ مبارکباد اس لئے بھی کہ مجلس فیکٹر کی وجہ سے بھی مسلم امیدواروں اور جیتنے والوں کی تعداد بڑھی ہے ۔اس بار مسلم ایم ایل اے کی تعداد 24 ہے جبکہ 2010 میں یہ تعداد 19 تھی۔

عظیم اتحاد کی اس جیت پر سب سے پہلے اروند کیجریوال نے ٹوئٹ کرکے مبارکباد دیتے ہوئے کہا کہ یہ ایک تاریخی جیت ہے ۔لیکن اس طرح کی جیت کو تاریخی قرار نہیں دیا جاسکتا کیوں کہ بی جے پی نے ایک چوتھائی ووٹ حاصل کیا ہے ۔اس جیت کو تاریخی جیت کا درجہ تب حاصل ہوتا جب دہلی کی طرح بی جے پی کا صفایا ہو جاتااوروہ نشان عبرت بن جاتی ۔ حالانکہ دہلی میں بھی 2013 کے الیکشن کے بعد 2015 کے الیکشن میں بی جے پی کے ووٹ فیصد میں صرف ایک فیصد کی کمی آئی تھی ۔ہاں کانگریس کا ووٹ 15 فیصد کم ہو کر عام آدمی پارٹی کو گیا ۔بی جے پی کو اس بار گرچہ سیٹوں کا نقصان ہوا ہے لیکن اسے ووٹوں کے تناسب میں فائدہ پہنچا ہے ۔ 2010 میں بی جے پی کا نتیش کے ساتھ اشتراک تھا تب اسے صرف 16.49 فیصد ووٹ ہی مل پایا تھا ۔اس بار نتیش کمار سے علیحدگی کے باوجود اسے ساڑھے چوبیس فیصد ووٹ کا مل جانا فائدہ نہیں تو اور کیا ہے ۔جو کہ اس کے لئے امید افزا ہے ۔دوسری طرف نتیش کو موجودہ الیکشن میں 16.7 فیصد ووٹ ملے ہیں جبکہ 2010 میں انہیں بی جے پی کے اشتراک میں 22.58 فیصد ووٹ ملا تھا۔لالو پرشاد کو اس بار 18.4 فیصد ووٹ ملا ہے جبکہ 2010 میں انہیں18.84 فیصد ووٹ ملا تھا ۔کانگریس کو اس الیکشن میں 6.7 فیصد ووٹ مل پایا ہے جبکہ 2010 میں کانگریس کو 8.37 فیصدووٹ ملا تھا۔عظیم اتحاد کو اس مرتبہ ووٹوں کے تناسب میں کمی کے باوجود سیٹوں میں اضافہ صرف اس لئے ممکن ہو پایا کیوں کہ وہ متحد تھے ۔دوسری اہم بات یہ کہ اس مرتبہ کہیں سے کوئی فتویٰ جاری نہیں ہواجس سے مسلم ووٹ زیادہ منتشر نہیں ہوا ۔حالانکہ یہ کہنا صحیح نہیں ہے کہ مسلم ووٹ بالکل بھی منتشر نہیں ہوا ہے ہاں اتنا ضرورہوا ہے کہ مسلم ووٹروں کی اکثریت نے نام نہاد سیکولر پارٹیوں کے لئے اتحاد کا مظاہرہ کیا ہے ۔

بی جے پی کے اتحادی ہم (مانجھی )کا وجود تو تازہ تازہ تھا لیکن لوک جن شکتی پارٹی کو اس بار 4.8 فیصد ووٹ ملا اور اس نے تین سیٹ حاصل کی جبکہ 2010 میں 6.74 فیصد ووٹ کے ساتھ تین سیٹ ملی تھی ووٹوں کے تناسب کا نقصان تو اسے بھی ہوا لیکن سیٹ کی پوزیشن برقرار رہی ۔مانجھی جو نتیش کمار سے بغاوت کرکے بی جے پی خیمہ میں چلے گئے تھے انہیں 2.2 فیصد ووٹ اور صرف ایک سیٹ پر سمٹ جانا پڑا ۔یہ نقصان نہیں کہا جاسکتا کیوں کہ نقصانا اسے ہی ہوتا ہے جس کے پاس کھونے کے لئے کچھ ہو مانجھی کے لئے جو کچھ تھا وہ بس پانا تھا کھونے کے لئے کچھ نہیں تھا۔کل ملا کر اتحاد میں رہنے والوں کو ووٹوں کا نقصان اٹھانا پڑا لیکن بی جے پی نے اپنے ووٹ بینک کے تناسب میں اضافہ کیا ہے ۔اس لئے یہاں یہ کہا جاسکتا ہے کہ گائے اور ریزرویشن پر مودی کے بیان کہ وہ پسماندہ طبقات کے ریزرویشن کے تحفظ کے لئے اپنی جان کو بھی قربان کردیں گے فائدہ پہنچایا ہے ۔اگر ایسا نہیں ہوتا تو ساڑھے نو فیصد پسماندہ طبقات کا ووٹ انہیں نہیں ملتا ۔یہ ایک خطرناک رجحان ہے ۔عام طور پر جیت ملنے کے بعد لوگ اس طرف توجہ نہیں دیتے وہ بس جیت کے نشہ میں رہتے ہیں ۔اتحاد آج ہے کل نہیں بھی ہو سکتا ہے لیکن پسماندہ طبقات کو بی جے پی میں جانے سے روکنا وقت کی ضرورت ہے ۔ہندوستان میں ہونے والے ہزاروں فسادات بھی اس بات کے گواہ ہیں کہ برہمن لابی نے مسلمانوں کی بربادی کے لئے ہمیشہ پسماندہ طبقات کا استعمال کیا ہے ۔ بی جے پی یا مودی کی اس ہزیمت سے ایسا نہیں ہے کہ وہ نچلا بیٹھ جائیں گے ۔وہ نئی کہانی نئے ستم اور اس کے نئے طریقے ایجاد کریں گے ۔بی جے پی کو چونکہ اس بار دانشور طبقہ کے سخت احتجاج نے اندرون ملک ہزیمت اور بیرون ملک رسوا کیاہے ۔اس لئے اس کی کوشش ہو گی کہ دابھولکر ،پنسارے اور کلبرگی کے قتل کے بعد گائے کے بہانے مسلمانوں پر ہونے والے حملوں کے بعد ان کے سخت احتجاج نے پوری دنیا کو متوجہ کیا ۔اور موجودہ ہار میں اس کا بھی کچھ نہ کچھ ہاتھ ضرور ہے ۔اس کے اثرات کو وہ زائل کرنے کی حتی الامکان کوشش کریں گے ۔اس کے لئے آر ایس ایس اور اس کی سیاسی ونگ بی جے پی اور ان کے ہمنوا کچھ نہ کچھ کھچڑی ضرور پکائیں گے اور وہ کھچڑی کیا ہو گی اس کے بارے میں غور کرنے اور ایسے ہر آنے والے طوفان کا مقابلہ کرنے کے لئے پہلے سے تیار رہنے کی ضرورت ہے ۔

نہال صغیر 

بلاد آدم ۔ضلع ویشالی ۔بہار 

موبائل :9987309013

ای میل:sagheernehal@gmail.com

ہندوستانی مسلمان ایک ایسی ملت کا نام ہے جس کا ماضی عنوان ترقی وکمال ہے ، جس کاحال بے حال ہے اور جس کا مستقبل نہیں معلوم کہ نام عروج ہے یا نشان زوال ہے ۔آئیندہ کے بارے میں یقین معدوم ، امید موہوم اور تقدیر غیر معلوم ہے ۔ ماضی درخشان تھا جو گذر گیا‘ مستقبل پردہ غیب میں ہے جو کچھ ہمارے بس میں ہے وہ حال ہے اور حال میں صحیح سمت میں صحیح طریقہ سے سعی عمل کرنے پر روشن مستقبل کاانحصار ہے‘ صحیح سمت میں اور صحیح اندازمیں کوشش کس طرح کی جائے اس کا انحصار چند چیزوں پر ہے‘ ایک یہ کہ اپنے حالات سے متعلق مکمل شعور اور آگہی اور دوسرے اپنے مذہب کی روح سے مکمل واقفیت اور پھر صحیح منصوبہ بندی اور پھر عزم عمل۔

جہاں تک حالات کا تعلق ہے تو اصل مسئلہ یہ ہے کہ ہندوؤں کی بعض احیائی تحریکوں نے مسلمانوں کو معاشی سیاسی اور تعلیمی اعتبار سے پسماندہ رکھنے کا تہیہ کر رکھا ہے ۔ مسلمانوں کا وجود بھی انہیں برداشت نہیں‘ مذہب اورتہذیب کو برداشت کرنے کا سوال تو بعد میں آتاہے‘ مسلم مکت بھارت ان کا نعرہ ہے بابری سے دادری تک افسوسناک واقعات کا جانگسل سلسلہ ہے، گجرات کے فسادات حکومت کی نگرانی میں کرائے گئے تھے اور آج وہ حکومت مرکز میں بھی حکمراں ہے جس کی تشکیل کا بنیادی عنصر مسلمان دشمنی ہے ۔ اس ملک میں مسلمانوں کے مسائل کا تعلق بڑی حد تک اسی رویہ سے ہے جواحیائی تحریکوں نے اختیار کر رکھا ہے‘ چنانچہ مسلمانوں کی تہذیب ‘ ثقافت نعلیمی اداروں ‘ زبان اور پرسنل لا کو خطرہ اسی طرح کی تحریکوں سے ہے اور یہ عناصر مسلمانوں کی تعلیمی اور اقتصادی ترقی میں رکاوٹیں کھڑی کرتے ہیں۔ 

یہاں یہ بات ملحوظ رکھنی چاہئے کہ جب ہم ہندووں کی احیائی تحریکوں کانام لیتے ہیں تو اس سے ہماری مراد پوری ہندو قوم نہیں ہوتی ہے‘ ہندو قوم کی اکثریت احیائی ذہنیت نہیں رکھتی اور تمام ہندو مسلمانوں سے نفرت نہیں کرتے‘ بہت سے غیر مسلم ادیبوں نے دادر ی کے مسلم کش حادثہ پر احتجاج کرتے ہوئے ساہتیہ اکیڈمی کا اوارڈ اور پدم شری اوارڈ واپس کردیا ، یہ اہم واقعہ مرغ بادنما کی حیبثیت رکھتا ہے جس سے یہ معلوم ہوتا ہے کہ انصاف اور شرافت اس ملک میں زندہ ہے ، فرقہ پرستوں کو ادھر کچھ عرصہ سے فربہی ملی ہے لیکن یہ موٹاپا جسم کا ورم ہےٍ جو صحت مندی کی علامت نہیں، فرقہ پرستی کے غبارہ کی ہوا کچھ عرصہ میں نکل جائے گی، زیادہ تر ہندواور اس ملک اقلیتیں اس حقیقت سے آگاہ ہیں کہ ہندوستان کی سرزمین مختلف نسلوں اورتہذیبوں اور مذہبوں کے قافلہ کی منزل رہی ہے‘ سیکڑوں سال سے ہندوستان کا وجود اس تکثیریت کے سانچہ میں ڈھل چکاہے اور اس سانچہ کو نہ توڑا جاسکتاہے اور نہ بدلا جاسکتاہے‘ صدیوں سے ہندوستان کی تقدیرمیں یہی رنگا رنگی اور یہی بوقلمونی ہے‘ ہندووں کی ایک اقلیت نے، اس حقیقت کو نہیں سمجھا جس طرح سے مسلمانوں کی ایک اقلیت نے اس صورت حال سے خود کو ہم آہنگ نہیں کیا‘ حال کے اس مجمل اور مختصر تجزیہ کے بعد اب سوال یہ پیدا ہوتاہے مذہب اسلام کی روح ان حالات میں کیا رہنمائی کرتی ہے اور اس تہذیبی اور مذہبی بو قلمونی میں ہندوستانی مسلمانوں کو کیا پیغام دیتی ہے‘ میرا خیال یہ ہے کہ مولانا آزاد کی بصیرت نے ان حالات میں اسلام کی روح کو سمجھتے ہوئے اور ہندوستان کے مخصوص مزاج کو مدنظر رکھتے ہوئے سب سے بہتر رہنمائی کی ہے اور یہ رہنمائی مولانا آزادکی ایک تقریر میں زیادہ صاف نظر آتی ہے‘ مولانا آزاد کہتے ہیں:

’’میں مسلمانن ہوں اور فخر کے ساتھ محسوس کرتاہوں کہ مسلمان ہوں ‘ اسلام کی تیرہ سو برس کی شاندار روایتیں میرے ورثہ میں آئی ہیں‘ میں تیار نہیں کہ اس کا چھوٹے سے چھوٹا حصہ بھی ضائع ہونے دوں۔ اسلام کی تعلیم،اسلام کی تاریخ، اسلام کے علوم وفنون ‘ اسلام کی تہذیب میری دولت کا سرمایہ ہے اور میرا فرض ہیکہ اس کی حفاظت کروں‘ بحیثیت مسلمان ہونے کے میں مذہبی اور کلچرل دائرے میں ایک خاص ہستی رکھتا ہوں‘ اور میں برداشت نہیں کرسکتا کہ اس میں کوئی مداخلت کرے‘ لیکن ان تمام احساسات کے ساتھ میں ایک اور احساس بھی رکھتاہوں‘ اسلام کی روح مجھے اس سے نہیں روکتی‘ وہ اس راہ میں میری رہنمائی کرتی ہے‘ میں فخر کے ساتھ محسوس کرتاہوں کہ میں ہندوستانی ہوں‘ میں ہندوستان کی ایک اور ناقابل تقسیم متحدہ قومیت کا ایک عنصر ہوں جس کے بغیر اس کی عظمت کا ہیکل ادھورا رہ جاتا ہے ‘ میں اس کی تکوین کاایک ناگزیر عامل ہوں‘ میں اس دعوی سے کبھی دست بردار نہیں ہوسکتا‘‘۔

(خطبات آزاد مرتبہ شورش کا شمیری)

کیا ہندوستانی مسلمانوں کے لئے یہ صحیح ترین رہنمائی نہیں ہے جو اسلام کی روح سے واقفیت کے ساتھ حالات کے شعور اور تجزیہ پر مبنی ہے‘ کیا آج کے حالات میں ایک محب وطن مسلمان کا بعینہ یہی موقف نہیں ہونا چاہئے جس کا مولانا آزاد نے اپنے خطبہ میں ذکر کیا ہے ؟

اگر مولانا آزاد کی تقریر کا یہ اقتباس اہم ہے تو اس کی اہمیت کا احساس کتنے لوگوں نے کیاہے‘ یہ اقتباس اس قابل ہے کہ خوبصورت طریقہ سے اسے لکھوایا جائے‘ چھپوایا جائے ، تقسیم کیا جائے ، آسمان سے برسایا جائےٍ اور گھروں میں اور ڈرائنگ روم میں دیوراروں پر فریم کرواکے اسے آویزاں کیا جائے تاکہ صحیح راستہ کا تصور ذہن اور دماغ میں واضح رہے اور پورے طور پر راسخ ہوجائے‘ مولانا آزاد نے واضح الفاظ میں کہا ہے کہ اسلام کے چھوٹے سے چھوٹے جز سے وہ دست بردار ہونے کے لئے تیار نہیں ۔ مسلمانوں کے لئے کسی ملک کی طرف ہجرت نہ کرنے اور ہندوستان میں قیام کرنے کے فیصلہ کی یہ نظریاتی اسا س ہے۔ یعنی مسلمانوں نے اس ملک میں رہنے کا فیصلہ اس یقین دہانی پر کیا ہے کہ کوئی ان سے ان کا عقیدہ نہ چھینے گا اور کوئی ان پر اپنی مشرکانہ تہذیب مسلط نہ کرے گا ہندوستان کے دستور نے اس کی یقین دہانی کی ہے۔مسلمانوں نے طے کیا ہے کہ وہ گھٹنے ٹیک دیں گے اور ہر حال میں دستور کی حفاظت کریں گے اور ہندوستان کی غالب اکثریت بھی یہی چاہتی ہے اور فرقہ واریت اور جارحیت سے نفرت کرتی ہے۔دستور کو بچانے کی جدوجہد میں اقلیتیں بھی مسلمانوں کے شانہ بشانہ شریک ہوں گی اور اکثریتی طبقہ کے لوگ بھی بڑی تعداد میں شریک ہوں گے ۔ مسلمانوں کے لئے یہ بات واضح ہونی چاہئے کہ غیر مسلم اکثریت کے ساتھ ان کی زندگی نوشتہ تقدیر بن چکی ہے‘ وہ چاہیں یا نہ چاہیں ان کو اس ملک میں اسی حال میں رہنا ہے‘ دوسرے مذاہب کے ماننے والوں کی طرح وہ اس ملک کی آبادی کا ناقابل انکار حصہ ہیں‘ یہی قدرت کا فیصلہ ہے‘ اور اسلامی علوم کے ایک معمولی طالب علم کی حیثیت سے میں یقین کے ساتھ کہتاہوں کہ قدرت کا یہ فیصلہ عظیم امکانات کا حامل ہے‘ بشرطیکہ مسلمان اپنے اندر وہ صفت پیدا کرلیں ان کامذہب جس سے متصف ہونے کی انہیں دعوت دیتا ہے‘ مسلمانوں کو حیرانی اور برگشتگی کے عالم سے بلاتاخیر باہر آجانا چاہئے ‘ اور ایک محب وطن مسلمان کی حیثیت سے اپنی ذمہ داریوں کو پورا کرنا چاہئے‘ مسلمانوں کے خلاف متعصبانہ اور جارحانہ رویہ معلوم‘ بلکہ واقعات سے ثابت، اور روز روشن کی طرح عیاں ،لیکن مجھے یہ بات کہنے میں کوئی تامل نہیں کہ مسلمان اپنے مسلمان ہونے کی ذمہ داریوں کو اس ملک میں ادا نہیں کر رہے ہیں‘ کیا مسلمانوں نے رکاوٹوں کے باوجود تعلیمی اور معاشی پسماندگی کو دور کرنے کی پوری کوشش کی ہے؟کیا مسلمانوں نے اس ملک کے دوسرے مظلوم اور محروم طبقہ کے ساتھ خیر خواہی خیرسگالی خدمت ، اور توحید اور مساوات کے عقیدہ کے تعارف کے لئے روابط قائم کئے ہیں ؟کیا ہم نے مساوات کا عملی نمونہ ان کے سامنے پیش کیا ہے ، کیا ہمارے اعمال وکردار میں وہ خوبصورتی پیدا ہوگئی ہے اسلام نے جس کا ہم سے مطالبہ کیاہے ؟کیاہمارے اندر وہ اخلاقی خصوصیات موجود ہیں جن کا تجربہ کرکے برادران وطن یہ محسوس کریں کہ مسلمان ایک شریف انسان اوربہتر پڑوسی اور اچھا شہری ہوتاہے‘ اس کا پڑوسی ہونامحلہ کے لوگوں کے لئے اطمینان کی بات ہوتی ہے‘ اس کو اپنے کارخانہ میں اور اپنی کمپنی میں ملازم رکھنا کا رخانہ اورکمپنی کی ترقی کی ضمانت ہوتی ہے‘ کیونکہ وہ دوسروں سے زیادہ فہیم‘ مخلص ‘ محنتی‘ کارگذار اور امانت دار ہوتاہے‘ کیا ہم مسلمانوں نے خدمت ایثار اور قربانی اوراخلاقی بلندی کا کوئی نقش قائم کیاہے؟ ‘ ہم مسلمانوں کا حال بحیثیت مجموعی اقبال کے اس شعر کے مرادف ہے:

جس کو آتا نہیں دنیا میں کوئی فن تم ہو

نہیں جس قوم کو پروائے نشیمن تم ہو

کاش کہ ایسا ہوتاکہ برادران وطن کے سامنے مسلمانوں کی بہت اچھی تصویر ہوتی‘ وہ سمجھتے کہ مسلمان بے ایمانی اور کام چوری نہیں کرسکتاہے‘ انصاف اور سچائی کا راستہ اسے پسند ہے‘ انسانی اخلاقی اور ورحانی اقدار کے اعتبار سے وہ دوسروں سے بلند ارو زیادہ ممتازہے‘ وہ مسجد میں عبادت بھی کرتاہے اور ایمان داری کے ساتھ کام کرنے کو بھی عبادت کا درجہ دیتاہے‘ وہ کمزوروں کا مددگار اور غریبوں کا غم خوار ہوتاہے۔خدمت خلق اس کی پہچھان ہے، وہ شریف بااخلاق اور تعلیم یافتہ ہوتا ہے ۔وہ مذہبی تنگ نظری سے دور ہوتا ہے اور تمام انسانوں کو خدا کا کنبہ سمجھتا ہے، لیکن اسی کے ساتھ اسے اپنی مذہبی شناخت پر اصرار بھی ہے، اوراس سے بھی زیادہ یہ کہ وہ اپنے مذہب کو اپنے ہم وطنوں کے لئے سوغات نجات سمجھتا ہے ۔ اور حکومت میں ان لوگوں کو بر سراقتدار لانے کی کوشش کرتا ہے جو منصف مزاج ہوں اور مذہبی تنگ نظری سے دور ہوں اور ہندوستان کے دستور کی روح سے متفق ہوں۔مسلمانوں کو اس ملک میں اپنی یہ تصویر بنانی ہوگی اور مولانا آزاد کے مبنی بر اعتدال اور مبنی بر روح اسلام پیام کو ہر گھر ،ہر دیوار ود رہر فردوبشر اور تمام بحر وبر تک پھیلانا ہوگا ۔آئے ہم عہد کریں کہ ہمیں اس کام کو کرنا ہے ۔

مولانا آزاد کا جو اقتباس اوپر نقل کیا گیاہے وہ مسلمانوں کے لئے اس ملک میں صحیح ترین راستہ ہے جو اسلام کے گہرے مطالعہ پر مبنی ہے‘ اوراسی کے ساتھ گرد وپیش کے حالات کے گہرے تجزیہ پر اس کی اساس ہے‘ مولانا آزاد کے اس پیغام کو ملک اور ملت میں عام کرنے کی ضرورت ہے ۔ ہندوستان کا دستور بہت اچھادستور ہے۔ اسی دستور کی روح ہے جس کی بدولت بہت دیر سے سہی آزاد ہندوستان میں مولانا آزاد کے نام سے اردو کی ایک یونیورسیٹی قائم ہوسکی ہے ۔ ہمیں یقین ہے کہ اس ملک میں دیر سویر باہمی رواداری کی فضا عام ہوگی‘ تلخیوں اور کدورتوں کا خاتمہ ہوگا ، مولانا آزاد اور جواہر لال نہروکے طرز فکر کا بول بالا ہوگا، یہ دو علامتی نام ہیں جو سیکولرزم کے تانے بانے کی حیثیت رکھتے ہیں ، یہ تار حریر دورنگ ہیں جس سے خوبصورت قبائے وطن تیار ہوتی ہے اور اس خوبی اور خوبصورتی کے بغیر ہندوستان کی ہمہ جہت ترقی ممکن ہی نہیں ہے اور نہ امن وآشتی کا ماحول بن سکتا ہے‘ فیض احمد فیض کی طرح ہمیں بھی انتظار ہے

ہم کہ ٹھہرے اجنبی اتنی مدارتوں کے بعد

پھر بنیں گے آشنا کتنی ملاقاتوں کے بعد

کب نظر میں آئے گی بے داغ سبزے کی بہار

خون کے دھبے دھلیں گے کتنی برساتوں کے بعد

profmohsinusmani@gmail.com

09000018291

جلال الدین اسلم، نئی دہلی

عبدالعزیز

  9831439068 azizabdul03@gmail.com
مفتی محمد سعید اس وقت نریندر مودی کی فرقہ پرست پارٹی بی جے پی کی حمایت کے بل بوتے پر جموں و کشمیر کے وزیر اعلیٰ ہیں۔ مفتی صاحب نے اپنے ایک بیان میں کہا ہے کہ نریندر مودی فرقہ پرست نہیں ہیں۔ ان کا اس وقت کوئی بدل نہیں ہے۔ مفتی محمد سعید کو سیکولر پارٹیوں کی طرف سے بھی حمایت کی پیشکش کی گئی تھی۔ نیشنل کانفرنس اور کانگریس نے غیر مشروط حمایت کی پیش کش کی تھی مگر مفتی کو مودی کی پارٹی کی فرقہ پرستی ہی راس آئی۔ مودی سے ہی مفتی نے حکمرانی کیلئے سمجھوتہ کرلیا۔ مفتی صاحب اپنی مجبوری اور لاچاری کی وجہ سے آنکھ بند کرنے ہی میں عافیت محسوس کرتے ہیں۔ ہندی زبان و ادب کے ممتاز اور مشہور شاعر اشوک واجپئی نے قلمکاروں اور دانشوروں کے اجتماع کو خطاب کرتے ہوئے گزشتہ روز کہا کہ ’’صدر جمہوریہ ہند، گورنر ریزرو بینک، مشہور صنعت کار نرائن مورتی ’’گھڑی ہوئی سیاست‘‘ (Manufactured Politics) میں شامل ہوگئے۔ ہم میں سے کچھ لوگوں نے ایوارڈ واپس کر دیا ہے۔ اب یہ تعداد چالیس کو پہنچ چکی ہے۔ اسے مسٹر جیٹلی گھڑی ہوئی سیاست سے تعبیر فرما رہے ہیں۔ مسٹر جیٹلی! نفرت، تشدد، قتل اور جہالت کی سیاست کو آپ نے اپنے سیاسی کارخانے میں مینو فیکچر کیا ہے‘‘۔
یہ بیان 2نومبر کے اخباروں میں شائع ہوا ہے۔ مفتی صاحب! آپ اسے ملاحظہ فرما لیجئے اور آپ کے اسمبلی میں کشمیر کے ایک ایم ایل اے انجینئر رشید کے چہرہ پر دہلی میں سیاہی پوتی گئی۔ اگر یہی سیاہی آپ کے چہرہ یا آپ کی پیاری بیٹی کے چہرہ پر پوتی گئی ہوتی تو شاید فرقہ پرست مودی کی فرقہ پرست پارٹی کے فرقہ پرست ایم ایل اے جس نے ایسی گھناؤنی حرکت کی اسے آپ ہر گز غیر فرقہ پرست نہیں کہتے اور ان کے گرو نریندر مودی کو فرقہ پرست کہتے۔
مفتی محمد سعید اور محبوبہ مفتی کو انہی کی پارٹی کے ایک ایم پی نے گائے کے گوشت کے واقعہ کے فوراً بعد مفتی صاحب سے بی جے پی کے ساتھ اتحاد پر نظر ثانی کیلئے کہا اور اتحاد کو ختم کرنے کا مشورہ دیا مگر مفتی صاحب نشۂ اقتدار میں ہیں وہ کیسے اس پر توجہ فرماتے۔ باپ سے زیادہ سمجھ دار تو بیٹی نظر آتی ہے جس نے کہا ہے کہ بی جے پی اور آر ایس ایس کے رویہ کے خلاف مسلمان نہیں ہندو دانشور اور رائٹرس اٹھ کھڑے ہوئے ہیں۔ مفتی کشمیر کا حال تو اتنا برا ہے کہ اپنی بیٹی کی آواز کو بھی سننے سے قاصر ہیں۔ ابھی تک فرقہ پرستوں نے ان پر پریشر بنائے رکھا ہے اور ایک وقت آئے گا کہ ان کو ہر کام کیلئے استعمال کریں گے۔ اسی کی ایک کڑی ہے کہ یہ مودی فرقہ پرست نہیں ہیں۔
مفتی صاحب! بہار کے الیکشن میں آپ کے دوست اور بھائی نریندر مودی نے اعلان کیا ہے کہ اگر دلتوں کے کوٹے سے مسلمانوں کو ریزرویشن دیا گیا تو وہ جان دے دیں گے مگر ایسا ہونے نہیں دیں گے۔ مودی کی اس آواز میں مفتی صاحب آپ کو مسلمانوں سے بھائی چارہ اور محبت کا سُر سنائی دے رہا ہے۔ آپ کی ڈکشنری میں نفرت کو محبت اور عدم رواداری اور تشدد کو روا داری اور دلبری کہتے ہیں کیا؟ کیا نریندر مودی سری نگر آکر ایسی بات کہیں جب ہی مفتی محمد سعید کے کان کھڑے ہوں گے۔ پٹنہ کی آواز سری نگر تک نہیں پہنچ رہی ہے۔ کشمیری مسلمانوں کی رائے کیا یہی تھی کہ ’’ہم تمہیں کامیاب کریں گے اور تم فرقہ پرستوں سے ہاتھ ملاؤگے اور فرقہ پرستوں کو ہم پر مسلط کروگے‘‘؟ کشمیری عوام خاص طور سے مسلمانوں کی مینڈیٹ یہ کھلی توہین نہیں ہے۔ ایک نہ ایک دن مفتی سعید اور محبوبہ مفتی دونوں کو اس کا خمیازہ بھگتنا پڑے گا۔ کوے کی صحبت شاہین کو کوا ہی بناتی ہے، کوا شاہین نہیں بن پاتا ؂
ہوئی نہ زاغ میں پیدا بلند پروازی
خراب کر گئی شاہیں بچے کو صحبتِ زاغ

عبدالعزیز

موبائل: 9831439068    azizabdul03@gmail.com
    ’’یاد کرو، جب ہم نے موسیٰ کو چالیس شبانہ روز کی قرار داد پر بلایا، تو اس کے پیچھے تم بچھڑے (گائے) کو اپنا معبود بنا بیٹھے۔ اس وقت تم نے بڑی زیادتی کی تھی مگر اس پر بھی ہم نے تمہیں معاف کر دیا کہ شاید اب تم شکر گزار بنو‘‘ (سورہ بقرہ: آیت52)۔
     سورہ بقرہ قرآن مجید کی دوسری سورہ ہے اور سب سے بڑی سورہ ہے جو ڈھائی پارے پر مشتمل ہے۔ اس سورہ کا نام بقرہ ہے اس لئے کہ ایک آیت 52 میں بقرہ یعنی گائے کا ذکر آیا ہے۔ ’لغات القرآن‘ میں ’بقر ‘ کے معنی بیل، گائے ہے۔ یہ اسم جنس ہے، مذکر اور مونث دونوں کیلئے استعمال ہوتا ہے۔
    آیت 52 میں ’’اس وعدے کی طرف اشارہ ہے جو مصر سے نکلنے اور دریا پار کرچکنے کے بعد حضرت موسیٰ علیہ السلام سے اللہ تعالیٰ نے اپنے احکام و ہدایات دینے کیلئے فرمایا اور اس مقصد کیلئے ان کو کوہِ طور پر پر بلایا۔ یہ چالیس دن کی مدت اس قلبی و روحانی تیاری کیلئے تھی جو کتاب الٰہی کے بارِ عظیم کے متحمل ہونے کیلئے ضروری تھی۔ ابتدا میں یہ وعدہ تیس دنوں کا تھا لیکن حضرت موسیٰ علیہ السلام مقررہ وقت سے پہلے پہنچ گئے۔ ان کی اس جلدی کے سبب اللہ تعالیٰ کی حکمتِ تربیت مقتضی ہوئی کہ یہ مدت 30 دنوں سے بڑھاکر چالیس دن کر دی جائے۔ مذکورہ آیت میں یہ پوری مدت جمع کر دی گئی ہے۔ ’’اور ہم نے موسیٰ سے تیس راتوں کا وعدہ کیا اور اس کو پورا کیا دس راتیں بڑھاکر۔ اس طرح اس کے رب کی مقررہ مدت چالیس راتوں میں پوری ہوئی‘‘۔  ثُمَّ اتَّخَذْتُمُ الْعِجْلَ مِنْ بَعْدِہٖ وَ اَنْتُمْ ظٰلِمُوْنَ ْ یعنی موسیٰ کے پہاڑ پر چلے جانے کے بعد تم دھات کا ایک بچھڑا بناکر اس کی پرستش میں لگ گئے۔ کتاب خروج باب 32 میں اس واقعہ کی تفصیلات موجود ہیں لیکن یہود نے اپنی عادت کے مطابق اس میں حضرت ہارون علیہ السلام کو بھی ملوث کر دیا ہے جس کی قرآن نے دوسرے مقام پر تردید فرمائی ہے۔
    ’’وَ اَنْتُمْ ظٰلِمُوْنَ‘‘یعنی اس گئو سالہ پرستی کا ارتکاب کرکے تم نے خود اپنی جانوں پر بہت بڑا ظلم کیا ہے، چنانچہ دو ہی آیتوں کے بعد قرآن نے خود اس کی وضاحت کر دی ہے ’’اے میری قوم کے لوگو؛ تم نے بچھڑے (گائے) کو معبود بناکر اپنی جانوں پر ظلم کیا‘‘۔ ظلم کی اصل حقیقت حق تلفی کرنا ہے۔ شرک کا ارتکاب کرکے انسان اپنے نفس کی سخت تحقیر کرتا ہے کیونکہ وہ خدا کا خلیفہ اور تمام مخلوقات سے اشرف ہونے کے باوجود اپنے ہی جیسی یا اپنے سے بھی کسی گھٹیا مخلوق کو اپنا خدا بنا بیٹھتا ہے۔ اپنے نفس کی اس سے بڑی حق تلفی اور کیا ہوسکتی ہے؟‘‘
    گئو سالہ پرستی کا واقعہ: صاحب ’روح القرآن ’گئو پرستی‘ یا ’گوسالہ پرستی‘ کے واقعہ کے متعلق رقم طراز ہیں: بنی اسرائیل جب فرعونیوں کی غلامی سے نجات پاکر بحر قلزم عبور کرکے جزیرہ نمائے سینا میں پہنچ گئے۔ کچھ عرصہ گزرنے کے بعد انھوں نے خود موسیٰ علیہ السلام سے مطالبہ کیا کہ اب ہمیں زندگی گزارنے کیلئے کوئی رہنما اصول دیئے جائیں، جس کی روشنی میں ہم ایسی زندگی گزاریں جس سے ہمارے اللہ راضی ہو۔ حضرت موسیٰ علیہ السلام نے اللہ سے دعا کی تو پروردگار نے احکام و ہدایات دینے کیلئے انھیں کوہِ طور پر طلب فرمایا، لیکن یہ ہدایت فرمائی کہ کوہ طور پر آکر تیس شب و روز، روزے اور اعتکاف کی حالت میں رہو تاکہ تم میں وہ قلبی اور روحانی استعداد پیدا ہوجائے جو کتابِ الٰہی کے بارِ عظیم کو اٹھانے کیلئے ضروری ہے۔ کتب الٰہیہ کے نزول کی تاریخ پڑھنے سے معلوم ہوتا ہے کہ اللہ نے ہر نبی کو کتاب اتارنے سے پہلے ایک خاص مدت تک ایک ایسے ماحول میں رہنے کا حکم دیا جس میں اس کے گرد وپیش فضائے ملکوتی اور انوارِ الٰہی کے سوا کچھ نہ تھا۔ مسلسل روزہ رکھنے اور اللہ سے لو لگائے رہنے سے دل و دماغ میں ایک ایسی پاکیزگی پیدا ہوجاتی ہے جس سے انسانی کثافتیں کم اور ملکوتی صفات غالب آجاتی ہیں۔ جس کے نتیجے میں کلام الٰہی کا تحمل اور انوارِ الٰہی کی برداشت نسبتاً آسان ہوجاتی ہے۔ یہی وجہ ہے کہ عیسیٰ علیہ السلام کو بھی ایسی ہی کیفیت میں ایک خاص عرصے تک رکھا گیا اور تب انھوں نے وہ پہاڑی وعظ کہا جو کتاب الٰہی کا پیش خیمہ ہے۔ ہمارے رسولِ پاک صلی اللہ علیہ وسلم چالیسویں سال میں پہنچ کر ایسے خلوت پسند بنا دیئے گئے کہ آپ نے آبادی چھوڑ کر غارِ حرا کو اپنا مسکن بنایا۔ آپ وہاں مسلسل روزے اور اعتکاف کی حالت میں تھے کہ آپ پر انوارِ الٰہی کی تجلی پڑی اور کلامِ الٰہی نے آپ کے قلب مبارک کو اپنا مورد بنایا۔
    معلوم ہوتا ہے کہ اللہ تعالیٰ نے اپنی کسی خاص حکمت کے تحت جب حضرت موسیٰ علیہ السلام کو مزید دس دن کوہ طور پر ٹھہرنے کا حکم دیا تو آپ چونکہ بنی اسرائیل کو تیس شب و روز کا کہہ کر گئے تھے اس دس روزہ تاخیر کے باعث مفسدین کو اپنا کام کرنے کا موقع مل گیا ان میں سامری نام کا ایک شعبدہ باز منافق تھا جو بنی اسرائیل میں جانا پہچانا جاتا تھا اس نے اس موقع سے فائدہ اٹھاتے ہوئے بنی اسرائیل کے زیورات جو مصر سے نکلتے ہوئے شاید اس کے پاس جمع کرا دیئے گئے تھے، سے ایک بچھڑا بنایا اور وہ چونکہ پیشہ کے اعتبار سے ایک سنار تھا اور سونے سے مختلف شکلیں تیار کرنے کا ماہر تھا۔ اس نے اپنے فن کا ذہانت سے استعمال کرتے ہوئے بچھڑے کو اس شکل میں ڈھالا کہ اس کے اندر ہوا گزرنے سے بولنے کی آواز آتی تھی جس طرح ہارن ہوا ہی کے گزرنے سے بجتا ہے، اسی طرح کی اس نے کوئی تکنیک استعمال کی تھی، لیکن سادہ لوح عوام کو ان کی قدیمی گو سالہ پرستی کی عادت کے باعث بہکانے میں کامیاب ہوگیا کہ اصل میں یہی گو سالہ تمہارا خدا ہے اور یہی مصر سے تمہیں نجات دے کر لایا ہے۔ موسیٰ نے نہ جانے کہاں بھول گئے انھیں واپس آنا ہوتا تو آگئے ہوتے، چنانچہ گو سالہ پرستی کے اسیر لوگ جو اب تک اپنے آپ کو اس سے نجات نہ دے سکے تھے، اس فریب میں آگئے اور انھوں نے اس بچھڑے کے سامنے سر جھکا دیا۔ اس پر چڑھاوے چڑھائے اور اس کی پوجا کرنا شروع کر دی۔ موسیٰ علیہ السلام کو کوہ طور پر ہی اللہ تعالیٰ نے اس حادثے کی اطلاع دی، آپ نہایت پریشان ہوئے کہ میں اللہ تعالیٰ سے کتاب ہدایت لینے کیلئے آیا ہوں لیکن میری قوم کا حال یہ ہے کہ میری چالیس شب و روز کی غیر حاضری میں جب کہ حضرت ہارون علیہ السلام جیسے پیغمبران میں موجود تھے، شرک جیسی عظیم گمراہی میں مبتلا ہوگئے۔ تورات میں بھی باب 32 اور آیات 1 تا 7 میں اس واقعہ کو ذکر کیا گیا ہے۔ قرآن کریم میں اس واقعہ کو ذکر کرنے کے بعد پروردگار فرماتا ہے: وَ اَنْتُمْ ظٰلِمُوْنَ ’’اے بنی اسرائیل! تم موسیٰ علیہ السلام کی غیر حاضری میں گوسالہ پرستی کا ارتکاب کرکے ظلم کر رہے تھے‘‘۔ ’’ظلم‘‘ حق تلفی کو کہتے ہیں اور ایسی حرکت کا نام بھی ظلم ہے جو سراسر خلافِ عقل اور خلافِ فطرت ہو۔ ان دونوں حیثیتوں سے اگر ہم غور کریں تو ظلم کی حقیقت واضح ہوجاتی ہے۔ انسان کی ذات و صفات کا خالق صرف اللہ ہے۔ اسی نے اسے بے شمار نعمتوں سے نوازا ہے۔ اس کے عمل تخلیق اور احسانات کو دیکھتے ہوئے سوچا بھی نہیں جاسکتا کہ اس کے سوا کسی اور کی بندگی کی جاسکتی ہے یا کسی اور کے سامنے سر جھکایا جاسکتا ہے۔ اسی طرح انسانی فطرت جو ہمیشہ ٹھیک راستے پر چلتی ہے اس کا بھی تقاضا یہ ہے کہ مخلوق خالق کے سوا اور کسی کے سامنے نہ جھکے اور احسان سے گراں بار شخص اپنے محسن کے سوا کسی اور کی بندگی کیلئے تیار نہ ہو، لیکن بنی اسرائیل نے گوسالہ پرستی کا ارتکاب کرکے اگر ایک طرف عقل اور فطرت کے تقاضوں کو پامال کیا تو دوسری طرف انھوں نے خود اپنے نفس کی سخت تحقیر کی۔ انسان کو اللہ نے اشرف المخلوقات اور اپنا خلیفہ بنایا ہے۔ کیا خلیفۃ اللہ کیلئے یہ بات مناسب ہے کہ وہ ان چیزوں اور ان مخلوقات کے سامنے جھکے جو اس کی خدمت کیلئے پیدا کی گئی ہیں؟ جب وہ اپنے سے فروتر مخلوق کے سامنے جھکتا ہے تو وہ حقیقت میں اپنے نفس اور اپنی حیثیت کی حق تلفی کرتا ہے۔
    بنی اسرائیل کا یہ جرم اس قدر مکروہ اور اپنے نتائج بد میں اس قدر خطرناک تھا کہ اس پر اگر اللہ کا غضب بھڑکتا تو کوئی تعجب کی بات نہ ہوتی، لیکن اللہ تعالیٰ بنی اسرائیل پر اپنے احسان کے طور پر اس کا ذکر کرتے ہوئے فرماتے ہیں کہ تم نے تو ہر طرح سے اپنی تباہی کا سامان کیا، لیکن اللہ تعالیٰ کا کرم دیکھو کہ اس نے اتنا بڑا جرم بھی معاف کر دیا او ریہ معافی صرف اس لئے تھی تاکہ اللہ کا شکر ادا کرو۔ اس کی نعمتوں کی قدر پہچانو، اپنی حیثیت کو سمجھو اس کے احکام کے مطابق زندگی گزارنے میں کوتاہی نہ کرو‘‘۔
    گائے کے متعلق ہندوؤں کے خیالات: ہندو بھائیوں میں جو لوگ گائے کی پوجا اور پرستش کے قائل نہیں ہیں وہ تو گائے کو محض ایک جانور سمجھتے ہیں۔ گئو پرستوں کی طرح نہ اسے گائے ماتا کہتے ہیں اور نہ معبود سمجھتے ہیں مگر جو لوگ ہندوؤں میں پرانے خیال کے ہیں وہ گائے کے بارے میں طرح طرح کے خیال رکھتے رہیں۔ پہلے کے ہندوؤں کا خیال تھا پانی کے اوپر ایک بڑی مچھلی ہے۔ اور اس کی پشت پر ایک گائے کھڑی ہے اور گائے کی ایک سینک پر زمین قائم ہے۔ وہ گائے تھک جاتی ہے تو ایک سینک سے دوسرے سینک پر لے لیتی ہے اور یہی حرکت بھونچال (زلزلہ) کا باعث ہوتی ہے مگر ایسے خیالات کی غلطی ثابت ہوگئی۔ شاید اب ہندوؤں میں جو گاؤپرست ہیں وہ بھی سائنس کے اس دور میں یا گائے کے بارے میں اس طرح کی رجعت پسندی کی جرأت نہ کرسکیں مگر ابھی گائے کے متعلق جو بہتوں کے خیالات تھے کہ وہ ماں اور معبود ہے۔ اسے مرکز کی برسر اقتدار پارٹی اور حکمراں پارٹی نے سیاسی رنگ دے دیا ہے جس کی وجہ سے گائے کی سیاست یا گوشت خوری کی سیاست زوروں پر ہے۔ ایسے لوگ جو گئو پرست ہیں وہ گائے کے کو کھانے والوں کو قتل کر دینا جائز سمجھتے ہیں اور اپنی مذہبی کتابوں کے حوالے سے اس طرح کی فاسد اور لغوقسم کے بیانات دیتے ہیں۔ یہاں تک کہ ہریانہ کے ایک وزیر نے بھی اسی طرح کی بات کی تھی۔ وزیر اعلیٰ ہریانہ نے بھی ایک بیان میں کہہ دیا کہ مسلمانوں کو ہندستان میں رہنا ہے تو گائے کا گوشت چھوڑنا ہوگا۔ ایسا معلوم ہوتا ہے کہ ہندستان ان کے باپ دادا کی بنائی ہوئی زمین ہے، حالانکہ ’’بادشاہوں کی نہیں اللہ کی ہے یہ زمین‘‘۔