پریس ریلیز
سرینگر ؍۳ مئی ۲۰۱۶ء ؁
سینئر کانگریس لیڈر اور سابق مرکزی وزیر پروفیسر سیف الدین سوز نے آج میدیا کے نام مندرجہ ذیل بیان جاری کیا ہے۔
کشمیر سول سوسائٹی (Civil Society) عوامی خدمت کیلئے اہم رول ادا کر سکتی ہے: سوز
’’جرمن سفیر مارٹن نیے(Martin Ney) نے کل شام میری رہائش گاہ پر مجھ سے ایک مختصر مگر جامع ملاقات کی ۔ملاقات کے دوران جو باتیں ہوئی ان سے میرا یہ احساس پھر سے میرے ذہن میں اجاگر کیا کہ کشمیر سول سوسائٹی معاشرے کے مختلف شعبوں میں اپنی خدمت سے ایک اہم کردار ادا کر سکتی ہے۔
خیالات کا تبادلہ کرتے ہوئے میرے ذہن میں یہ خیال بھی آیا کہ ہم آپس میں ایک دوسرے کے ساتھ مل کر مسائل کے ساتھ بہتر طریقے سے نمٹنے کے لئے مدد کر سکتے ہیں ۔میرا خیال ہے کہ عام حالات میں ہمیں ہر ایک چیزکیلئے حکومت کی طرف نہیں دیکھنا چاہئے۔میں مثال کے طور پر صرف دو شعبوں پر سول سوسائٹی کی توجہ مرکوز کرنا چاہتا ہوں۔
مسٹر مارٹن نیے (Martin Ney )اپنے آپ میں ماہر تو نہیں ہیں مگر ان کو یقین ہے کہ باغبانی میں جرمن تجربے سے کشمیر کو فائدہ ہو سکتا ہے۔ مثلاً جرمن سیب بڑے ، رنگین اور رسیلے ہوتے ہیں اور فی ایکر پیداوار بھی وہاں بہت زیادہ ہے۔ اس لحاظ سے ہمارے سیب چھوٹے ، کم رنگ والے اور کم رسیلے ہیں۔ پھر ہمارے یہاں گریڈنگ نہیں ہے جس سے میوہ صنعت کو نقصان ہی ہوتا ہے۔
ہمارا ہارٹیکلچر شعبہ جرمنی سے کافی فائدہ اٹھا سکتا ہے۔ ہمارے یہاں جگہ جگہ جرمنی اپیل کلینک (Apple Clinic) قائم کرنے میں مدد دے سکتی ہے۔ جہاں ہارٹیکلچر صنعت سے وابستہ لوگ میوے کے درخت لگانے ، انکی نشونما، دوا پاشی کے استعمال کی پوری جانکاری حاصل کر سکتے ہیں اور اپنی پیداوار بڑھا سکتے ہیں۔
اس سلسلے میں ،میں یہ کہنا چاہوں گا کہ سول سوسائٹی کو اس امر پر غور کرنا چاہئے کہ اگر ہم پڑھے لکھے ، کم سے کم پانچ لڑکے اور پانچ لڑکیاں جرمنی بھیجیں اور وہ ہارٹیکلچر کی صنعت میں موجودہ زمانے کی پیش رفت کا تجربہ کریں تو وہ ہارٹیکلچر صنعت کو کشمیر میں خاصا بڑھاوا دے سکتے ہیں۔ اس طرح ہم پڑے لکھے مگر بے روزگار نوجوانوں میں اس صنعت سے وابستہ ہونے کی تحریک پیدا کر سکتے ہیں۔ بدقسمتی سے اس وقت یہ حالت ہے کہ ہمارے پڑھے لکھے نوجوان ہارٹیکلچر صنعت کے ساتھ وابستہ نہیں ہونا چاہتے ہیں۔ حالانکہ وہ بے کار بیٹھے ہیں۔ وہ ہر حالت میں یاتو سرکاری نوکری چاہتے ہیں ، جو دستیاب نہیں ہے یا کسی ایسی نوکری کو پانا چاہتے ہیں جس میں اُن کو کرسی ملے اور وہ قلم کا استعمال کریں۔ اگر سول سوسائٹی متوجہ ہوتی ہے تو ہم مستقبل قریب میں نوجوانوں کو ہارٹیکلچر صنعت سے وابستہ کر کے میوے اگانے، باغات میں میوہ چننے ، گریڈنگ اور پیکنگ سے متعلق نوجوانوں کو جانکاری دینے میں مدد کر سکتے ہیں۔ اس طرح میوے کی صنعت کو بھی فائدہ ہوگا اور نوجوانوں کو روزگار بھی فراہم ہوگا۔
اس سلسلے میں ، میں سول سوسائٹی سے مودبانہ درخواست کروں گا کہ وہ اپنا دائرہ بڑھائیں اور صحافیوں کو بھی اپنے ساتھ ملائیں اور میری تجویز پر بھی غور کریں۔
میرا خیال ہے کہ یہ کام ہوسکتا ہے اور ہم کو ایسا کرنا چاہئے۔ یہ خاکسار بھی کچھ تعاون دے سکتا ہے۔ ‘‘
بلال نذرہ انچارج پبلسٹی

آج کی تکنیکی انقلاب کی دنیا میں آپ کو کسی بھی جانکاری کی ضرورت ہو تو سیدھے انٹر نیٹ پر گوگل کے سرچ انجن کا سہارا لیتے ہیں ۔امین کھنڈوانی کے انتقال کے بعد ان کے لئے سمیع قریشی کے ذریعہ لکھے گئے ایک فیچر کے لئے مرحوم کے فوٹو کی ضرورت تھی ۔میں نے گوگل کی مدد لینے کی کوشش کی لیکن بڑی مشکل سے اس نے مجھے صرف تین تصاویر دکھائیں جس میں سے ایک کسی تقریب کی ہے جہاں وہ ربن کاٹ کر اس کا افتتاح کررہے تھے ۔دوسری تصویر شاید ان کے گھر کی تھی جس میں چند لوگ ان کے گرد بیٹھے تھے اور وہ خود کسی گہری سوچ میں گردن جھکائے بیٹھے تھے ۔شاید کسی قومی معاملہ میں کسی نتیجہ پر پہنچنے کی کوشش میں تھے ۔یہ دیکھ کر سمیع قریشی کی تحریر کا وہ جملہ یاد آگیا جس میں سمیع قریشی نے لکھا ہے کہ ممبئی فساد پر پولس نے ان پر بھی اقدام قتل اور فساد پھیلانے کا مقدمہ بنایا تھا اور وہ آخری وقت تک کورٹ کے چکر لگاتے رہے۔بقول سمیع قریشی انہوں نے کہا کہ آپ اس وقت مقتدر ہیں سیاسی دباؤ کا استعمال کرکے خود کو مقدمہ سے الگ کروالیں ۔اس پر انہوں نے کہا کہ ہاں بھائی میں ایسا کرسکتا ہوں لیکن میری قوم کے جو لوگ مقدمات کا سامنا کررہے ہیں ان کا کیا ہوگا ۔میں مقدمہ لڑوں گا اور پولس والوں کو عدالت سے قصور وار ٹھہراؤں گا ،افسوس کہ وہ آزاد ہندوستان کی اس کڑوی سچائی کو دل میں لئے چلے گئے کہ اب یہاں انصاف نہیں ہوتا بلکہ آستھا اور اجتماعی ضمیر کی بنیاد پر فیصلے تھوپے جاتے ہیں۔امین کھنڈوانی کی خاصیت یہ تھی کہ وہ ایماندار تھے ایماندار آدمی بیباک بھی ہوتا ہے ۔اس لئے انہوں نے کبھی اس سے سمجھوتہ نہیں کیا ۔وہ خواہ بابری مسجد کی شہادت کے بعد ممبئی میں پھوٹ پڑنے والے فسادات کے موقعہ پر سنگینوں کے سائے میں مسلمانوں کی دادرسی ہو یا مسلمانوں پرفائرنگ کے لئے پولس کے اٹھے ہاتھ کو نیچے کرکے اسے فائرنگ سے باز رکھنا یا میئر کی کی کرسی کی قربانی دے کر ’’وندے ماترم ‘‘ کی مخالفت کرنا ہو ۔یہ ان ہی کا حصہ تھا اور ان ہی کے ساتھ ختم بھی ہو گیا ۔شاید اسی لئے وہ ایک خاص امیج کے ساتھ ممبئی اور مہاراشٹر کے مسلمانوں کے دلوں میں خوشبو کی طرح بسے رہیں گے۔جس کا تذکرہ کئی لوگوں نے ان کے تعلق سے گفتگو کرتے ہوئے کیا۔
؂ میں فضاؤں میں بکھر جاؤں گا خوشبو بن کر رنگ ہوگا نہ بدن ہوگا نہ چہرا ہوگا
عام طور پر شخصیات پر نہیں لکھا کرتا لیکن امین کھنڈوانی مرحوم کے بارے میں نہیں لکھنا خیانت ہوگی۔میری عادت ہے کہ نہ کسی کے کہنے پر میں کسی کو اچھا اور نہ ہی کسی کے کہنے پر اسے برا مان لیتا ہوں ۔بلکہ اللہ نے عقل و دماغ عطا کیا ہے جو رب کریم کا بہت بڑا احسان ہے ۔اس سے تحقیق کرتا ہوں ۔پھر فیصلہ کرتا ہوں ۔ایسا ہی میں نے امین کھنڈوانی کے بارے میں کیا ۔ایک شخص کے سوا کسی نے ان کے بارے میں کسی شک و شبہ کا اظہار نہیں کیا ۔اس ایک شخص نے جس نے شبہ کا اظہار کیا تھاوہ کیوں کیا تھا اس کا تذکرہ بھی آگے آئے گا ۔ایک شخص جو کہ ایک اردو ہفتہ روزہ کا مالک و مدیر ہے کے بارے میں ممبئی میں دسیوں لوگ کہتے ہوئے سنے جاتے ہیں کہ وہ بلیک میلر ہے ۔وہ لوگوں کے بارے میں الٹی سیدھی باتیں لکھ کر ان سے رقم اینٹھتا ہے ۔یہ سن سن کر میں بور ہو چکا تھا ۔ایک دن اسی طرح بات چلی مجھے بہت غصہ آیا کہ چلو آج اس کی تحقیق کرکے اس کا قصہ ہی پاک کردیتے ہیں ۔اس کے لئے میں نے کم از کم بیس لوگوں سے فون پر دریافت کیا کہ ذرا بتائیں کہ فلاں شخص کیا بلیک میلر ہے ۔اگر ہے تو آپ سے اس نے کتنے پیسے لئے یا کبھی پیسے کا مطالبہ کیا ؟لیکن ایک شخص بھی ایسا نہیں ملا جو یہ کہتا کہ ہاں اس نے مجھ سے رقم مانگے یا میں نے اسے اتنی رقم دی ۔سب افواہ اور سنی سنائی باتوں کو آگے بڑھانے کا کام کررہے تھے ۔اور اس کو بدنام کرنے میں لوگوں کی دلچسپی اس لئے تھی کہ وہ شخص کسی مروت کے بغیر قوم میں جعلی قیادت اور مذہبی ٹھیکے داروں کے خلاف اعلان جہاد کئے ہوئے تھا بلکہ اب بھی ہے ۔اور ایسے لوگوں کو ٹھکانے لگانے کا اس سے بہتر اور کیا حربہ ہو سکتا ہے کہ اسے بدنام کرو تاکہ اس کی باتوں پر کوئی دھیان نہ دے ۔ایک مشہور روزنامہ کے منیجنگ ایڈیٹر سے بھی میں نے ہفتہ روزہ کے مالک و مدیر کے تعلق سے تفتیش کی انہوں نے کھلے لفظوں میں اور صاف صاف بتایا کہ اردو اخباروں کی اگر کسی نے لاج بچائی ہے تو وہ صرف وہی ہے جو کسی ڈر خوف اور لالچ کے بغیر لکھتا ہے ۔
بہر حال ہفتہ روزہ کے مدیر و مالک کی باتیں تو برسبیل تذکرہ آگئی تھیں۔اسی طرح میں نے امین کھنڈوانی کے تعلق سے معلومات حاصل کیں ۔چونکہ میں ممبئی میں نو وارد ہوں ۔اور یہاں آتے ہی جس چیز نے مجھے سب سے زیادہ مایوس کیا وہ ہے یہاں کے مسلمانوں کی زبوں حالی بظاہر تو یہاں کا مسلمان ہندوستان میں سب سے زیادہ معاشی طور پر مضبوط ہے ۔لیکن سیاسی اور معاشرتی طور پر بہت پسماندہ ہے ۔اس کی وجہ مجھے قدم قدم پر جعلی سیاسی اور مذہبی قیادت کی لائن میں نظر آئی ۔ایسے میں امین کھنڈوانی جو ایک عرصہ سے صاحب فراش تھے اور قوم نے اس کو یوں فراموش کردیا جیسے انہیں جیتے جی ہی مردہ سمجھ لیا حالانکہ سمیع قریشی کے مطابق وہ ضعیفی میں بھی اتنے ہی متحرک تھے جتنے جوانی میں ۔کوئی بھی کسی بھی وقت ان سے مل سکتا تھا اور اپنے مسائل کے بارے میں گفتگو کرسکتا تھا ۔وہ بنفس نفیس اس میں دلچسپی لیتے تھے ۔میں زیادہ نہیں لکھوں گا کیوں کہ سمیع قریشی نے اس کا حق ادا کردیا ہے ۔اردو اخباروں نے بھی ان کے انتقال کی خبر کو کوریج دیا اور بہتر انداز میں خراج عقیدت پیش کیا ان میں روزنامہ سہا را اور روز نامہ صحافت میں سب سے بہتر کوریج تھا ۔سہارا نے ذرا تفصیل سے ان کی خدمات اور کارنامے کو کور کیا ۔جبکہ روزنامہ ہندوستان جو غالبا ہندوستان کا سب سے پرانا اخبار ہے اس نے صرف ابو عاصم اعظمی کے بیان کو شائع کرنے تک ہی محدود رکھا ۔روزنامہ انقلاب نے اندرونی صفحات میں جگہ دی لیکن اس نے ایک سابق ایم ایل اے کا مضمون شائع کرکے اس کمی کو پورا کردیا ۔
جیسا کہ شروع میں بیان کیا کہ لوگوں سے امین کھنڈوانی کے بارے میں معلومات لیتے ہوئے ایک مشہور شخصیت نے کہا کہ وہ آدمی تو بھلے تھے لیکن ان کی تعریف فلاں سابق ایم ایل اے نے کی جو ٹھیک نہیں اس لئے وہ مشکوک ہیں ۔لیکن ان سے سوال کرنے پر کہ کیا کسی برے آدمی کا اچھے انسان کی تعریف کردینا اس کو مشکوک بنادیتا ہے ؟انہوں نے اپنی بات واپس لے لی اور کہا کہ نہیں میں تو مذاق کررہا تھا ۔بہرحال اس قحط الرجال میں جبکہ ملت میں مخلصین ڈھونڈے نہیں ملتے امین کھنڈوانی کا انتقال امت کا حقیقی خسارہ ہے ۔یقین جانئے بقیہ سیاسی لیڈر اور بعض سیاسی عالم کے کے انتقال پر لوگوں کا افسوس عام طور پر منافقانہ ہوتا ہے ۔لیکن امین کھنڈوانی جیسے لوگوں کے بارے میں لوگ حقیقی محبت سے مغلوب ہو کر ان کے لئے دعا کرتے ہیں اور انہیں ایسا محسوس ہوتا ہے کہ ان کا اپنا کوئی اس دارفانی سے کوچ کرگیا ۔آخر ایساکیوں نہ ہو کہ ایسے دور میں جبکہ مسلم لیڈر شپ مسلمانوں کے نام پر کروڑ پتی اور ارب پتی بن رہے ہیں اور بے چاری قوم دلتوں سے بد تر زندگی گزارنے پر مجبور کردی گئی۔لیکن اسی دور میں امین کھنڈوانی جیسا صاف ستھرے شبیہ کا شخص بھی آتا ہے جو اپنی سیاست کو قوم و ملک کی خدمت کا ذریعہ بناتا ہے ۔وہ حقیقی معنوں میں کسی پارٹی کا نمائندہ نہ ہو کر پارٹی میں رہ کر قوم کا نمائندہ بنتا ہے ۔مرحوم امین کھنڈوانی کی زندگی میں سبق بھی ہے ان مسلم لیڈروں کے لئے جو اپنے آپ کو قوم کا نمائندہ تو قرار دیتے ہیں لیکن حقیقت میں وہ اپنی پارٹی کے چشم و ابرو پر نظر رکھتے ہیں اور وہی کام کرتے ہیں جو ان کی پارٹی کی پسند ہو یا اس کے مفاد میں ہو ۔جس کی انہیں قیمت بھی ادا کی جاتی ہے ۔اور مسلمانوں کا مفاد تو کہیں دور چھوٹ جاتا ہے۔ابھی حال ہی میں کسی نے سوشل میڈیا پرکسی کا ایک مختصر قول نقل کیا ہے۔جو ہندوستانی سیاست میں مسلمانوں کے حقیقی کردار کی طرف اشارہ کرتا ہے ’’سیاسی بریانی میں مسلمانوں کا کردار کسی گرم مسالے کا ہو تا ہے ،جو پکاتے وقت تو بہت ضروری ہوتا ہے،لیکن کھاتے وقت نکال کر پھینک دیا جاتا ہے ‘‘۔یاد آیا اس پر مبارک کاپڑی نے بھی ایک ڈرامہ لکھا تھا جو بہت مناسب تھا ۔
اوپر میں نے گوگل پر مرحوم امین کھنڈوانی کی تصویر کے بارے میں لکھا تھا ۔ان کی صرف تین تصویر ملی وہ بھی دھندلی ۔لیکن ان کی شخصیت اتنی صاف و شفاف رہی کہ وہ بھلائے نہیں جاسکیں گے۔لیکن ان کے ہی آس پاس ایسے لیڈروں کی تصویر سیاسی ایوانوں میں سلامی داغتے ہوئے سینکڑوں مل جائیں گی ۔جو ہمارے اردو اخبارات کی دین ہیں جنہوں نے ان کے ان کہے بیانات اور نادیدہ مطالبات پر ان کے فرضی بیانات شائع کرکے قوم کے سر پر بٹھا دیا ۔آج کے یہ جعلی قیادت کی تصویریں تو گوگل پر محفوظ ضرور ہو جائیں گی جس کی مدد سے ان کے چیلے چانٹے برسی اور سالگرہ منا کر ان کی یاد کو زندہ رکھنے کی کوشش کریں گے لیکن میرا دعویٰ ہے کہ وہ کسی کے دل میں کسی کی دعائے نیم شب میں کبھی نہیں رہیں گے ۔انہوں نے دنیا کمانے کی حرص میں سیاست کے ایوانوں میں قدم رکھا تھا۔سو دنیا ان کو مل گئی لیکن آخرت میں شاید انہیں کوئی حصہ نہ ملے ۔دوسری طرف امین کھنڈوانی جیسی عبقری شخصیت کو گرچہ اردو صحافت یا عوام میں وہ جگہ نہ ملے پھر بھی جن لوگوں کے دلوں میں وہ رہیں گے وہ ان کے لئے رحمت و مغفرت کی دعا کرتے رہیں ۔یہی انسان کا مرنے کے بعد سب سے بڑا سرمایہ ہوتا ہے کہ لوگ جانے انجانے میں اس کے لئے دعا گو رہیں ۔کوئی ان کو یاد کرے تو اس سے پہلے یہ کہے کہ اللہ ان پر اپنی رحمتیں نازل کرے ۔ مجھے تاریخ اسلام سے ایک واقعہ یاد آرہا ہے ۔یہ دور فاروقی تھا جب ایران فتح ہو اتھا ۔اور اسی کے ساتھ یہ طے ہو گیا تھا کہ صرف عرب ہی نہیں اب دنیا کا مستقبل صرف مسلمان ہی طے کریں گے ۔فتح کی خبر لے ایک قاصد مدینہ دربار خلافت میں خوش خبری سنانے آرہا تھا ۔حضرت عمرؓ اس دوران کافی فکر مند تھے کئی دنوں سے محاذ جنگ سے کوئی خبر نہیں آئی تھی ۔وہ بے چینی کے عالم میں مدینہ سے باہر نکل جاتے اور قاصد کا انتظار کرتے ایک دن ایک قاصد آتا ہو انظر آیا ۔وہ سواری پر ہی رہا اور حضرت عمرؓ اس سے فتح کی خوش خبری سننے کے بعد محاذ جنگ کی ایک ایک تفصیل معلوم کرتے جاتے تھے ۔انہوں نے نام لے لے کر پوچھا ۔قاصد نے کسی کے شہادت کی خبر دی اور کسی کے زخمی ہونے کی اور پھر قاصد نے حضرت عمرؓ سے کہا کہ ان میں بعض ایسے بھی تھے جنہیں نہ آپ جانتے ہیں اور نہ ہم لیکن انہیں وہ بخوبی جانتا ہے جس کے لئے انہوں نے اپنی جان دی ہے ۔قوموں کی تاریخ میں سنہرے ابواب کا اضافہ ایسے ہی لوگوں سے ہوتا ہے جو قوم کی عمارت کے بنیاد کی اینٹ بن کر اس کی مضبوطی کا سبب بنتے ہیں ۔اب دور تک کھنڈوانی صاحب جیسا خادم قوم تنہائی پسند اور نام و نمود سے کوسوں دور کہیں نظر نہیں آتا ۔
آخر میں اس روزنامہ میں چھپے سابق ایم ایل اے کا امین کھنڈوانی پر مضمون کا تذکرہ کرنا ضروری سمجھتا ہوں ۔بلا شبہ انہوں نے کھنڈوانی صاحب کو بہترین خراج عقیدت پیش کیا ہے ۔انہوں نے بھی وہی کچھ بیان کیا ہے جو اپنے مضمون میں سمیع قریشی نے پیش کیا ہے ۔انہوں نے سیاسی لیڈروں اور نوجوانوں کے لئے امین کھنڈوانی کو بہترین مثال کے طور پر پیش کیا ہے ۔وہ لکھتے ہیں کہ ’’ان کی زندگی کے چند اصولوں نے مجھے بے حد متاثر کیا ہے اور میں ان کا گرویدہ بن کر رہ گیا ہوں ۔سب سے اہم بات یہ کہ وہ جس عہد پر فائز رہے انہوں نے ہمیشہ اس عہدے کے وقار کو قائم رکھا ‘‘۔کسی کے کسی شخصیت سے متاثر ہونے کا ثبوت یہ ہوتا ہے کہ وہ ان کے اصولوں کو اپنی زندگی میں اتارے ۔یہ صاحب ان سے متاثر بھی ہیں ان کے گرویدہ بھی لیکن ان کے اصولوں کا ان کی زندگی میں کہیں عمل دخل نظر نہیں آتا ۔بھلا یہ کیسی گرویدگی ہے ؟ لیکن بہر حال مضمون نگار نے حوصلے سے کام لیتے ہوئے کم از کم سچائی بیان کرنے کی تو کوشش کی ہے ۔وہ لکھتے ہیں ’’میں بڑے وثوق اور پوری ذمے داری سے کہہ سکتا ہوں کہ مرحوم امین کھنڈوانی جیسا ایماندار ،مخلص ،دیانتدار،پاک و صاف اور بے داغ شبیہ کا شخص اب موجودہ سیاست میں ملنا نہ صرف مشکل ہے بلکہ ناممکن ہے‘‘۔کتنا سچ لکھا ہے لیکن کاش کہ وہ بھی سچائی کا ادراک کرپاتے اور اپنے آپ کو انہی کے سانچے میں ڈھالنے کی کوشش کرتے صرف تقریر و تحریر سے قوموں کی تقدیر نہیں بدلا کرتی ! اس کے لئے ضرورت ہوتی ہے خلوص و ایثار کے ساتھ سچے جذبہ کی جو ہم میں اکثر لوگوں میں نہیں ہے ۔اللہ سے دعا ہے کہ وہ مرحوم کی مغفرت فرمائے اور قوم کو ا ن سے بہتر ،مخلص اور ایماندار رہنما عطا کرے ،آمین ۔شاید ایسے لوگوں کے بارے میں کسی شاعر نے کہا تھا کہ
؂ ہمارے بعد اندھیرا رہے گا محفل میں بہت چراغ جلاؤگے روشنی کے لئے ۔

نہال صغیر۔

ہماری قوم کی یادداشت بہت کمزور ہو گئی ہے ۔ وہ کسی مسئلے اور کسی بات کو 

ایک دو روز میں ہی بھلا دیتی ہے ۔اب اگر کسی واقعہ کو مہینوں یابرسوں بیت جائے تو اسے کون یاد رکھتا ہے ۔ جنوری 2015 میں اردو اخباروں کو داغ لگانے کا کام جس خاتون ایڈیٹر نے انجام دیا تھا اس کو بھی ہمارے ارباب دانش جن کا تعلق اردو صحافت سے ہے، بھلا دیا ۔یہی سبب ہے کہ وہ خاتون گستاخ رسول ﷺ نے نو تخلیق تنظیم اردو جرنلسٹس ایسو سی ایشن کے 6 ؍ اپریل کے پروگرام میں شرکت کی جرات کی ۔لیکن ایک سوال تو یہ اٹھتا ہی ہے کہ کیا یہ اس کی ذاتی جرات ہے ؟حالات اور واقعات یہ بتا رہے ہیں کہ اس نے کسی کی شہہ پر کیا ہے ۔اس کو شہ کس نے دیا اور کون اس کو پروموٹ کررہا ہے ۔یہ سبھی جانتے ہیں کہ اس کی دریدہ دہنی کرنے کے وقت سے ہی ایک اردو روزنامہ کے مالک و مدیر اس کی حمایت و نصرت میں پیش پیش ہیں ۔اور یقینی طور پر مذکورہ پروگرام میں اس کی شرکت بھی ان کی ہی مرضی سے ہوئی ہوگی ۔کیوں کہ اس کی جس ذلیل حرکت کی وجہ سے کم از کم اردو صحافت سے اس کا بن واس ہو چکا تھا ۔اور اس کے حمایتی اسے دوبارہ اردو صحافت کا حصہ اور ملت کا جز بنانے کی سعی لا حاصل میں جٹے ہوئے ہیں ۔ یہ جرات صرف اس لئے کی جارہی ہے کہ ہم میں بھول جانے کا رجحان کچھ زیادہ ہی ہے ۔بھلا مسلمان نبی ﷺ کی شان میں گستاخی کرنے والے کو بھول بھی سکتا ہے ۔اور کیا اسے بھول بھی جانا چاہئے ۔اس سلسلے میں میرا ایک ہی سوال ہے کہ اگر کوئی غیرت مند ہے اور اس کی حس بھی زندہ ہے تو کیا وہ اپنے ماں باپ کی شان میں گستاخی کرنے والے کو معاف کردے گا اور اسے بھلابھی دے گا۔اس کا جواب یقیناًنفی میں ہوگا۔تو پھر ماں باپ ،جان و مال سے زیادہ عزیز شخصیت جس کی محبت دلوں میں جاگزیں ہوئے بغیر ایمان کا کوئی تصور ہی نہیں اس محبوب ﷺ کی شان میں گستاخی کرنے والے کو ہم کیوں کر بھلا سکتے ہیں ۔یا ہم مسلمانوں میں بھی دوغلے کردار اور دورخے لوگوں کی تعداد زیادہ ہو گئی ہے۔
جب 6 ؍اپریل کے پروگرام میں ملعونہ آئی تو اس کا کسی کو پتہ نہیں تھا ۔یا ہو سکتا ہے کہ چند لوگوں کو پتہ ہو ۔احتجاج کرنے اور صدر تنظیم اردو جرنلسٹس ایسو سی ایشن کے روح رواں کہتے ہیں کہ اس (سکریٹری ) نے بلایا ہوگا ۔ان سے سوال کیا جاتا ہے کہ آخر آپ کی اجازت کے بغیر کسی انتہائی متنازعہ خاتون کو کیسے دعوت دے دی گئی لیکن اس کا ان کے پاس کوئی جواب نہیں ۔لیکن ایک گروپ پر یہ کمینٹ پوسٹ کرنے پر کہ ’’ لگتا ہے کہ صدر تنظیم کی گرفت کمزور ہے ،اس لئے ایسی خاتون کو بلانے کی ذلیل حرکت کی گئی ‘‘۔ اس کمینٹ سے وہ ناراض نظر آئے ۔لیکن معاملہ اتنا سنجیدہ اور مسلمانوں کی غیرت کا امتحان لینے والا تھا کہ اس پر خاموش رہنے کا مطلب یہ تھا کہ اس گستاخ کو مسلمانوں نے بھلا دیا اور اسے کمیونٹی میں شامل کرلیا گیا ہے ۔اس لئے دوسرے اجلاس سے تین دن پہلے سے اسی تنظیم سے متعلق گروپ پر اس تعلق سے احتجاج اور جواب طلبی کی کوشش کی گئی ۔لیکن صرف چند گھنٹے قبل کچھ لوگ بولے اور شاید ایک گھنٹہ قبل ایک نائب ذمہ دار کا مسیج پوسٹ ہوا کہ آپ اطمینان رکھیں ’’اب وہ کبھی بھی اجلاس میں شامل نہیں ہو گی‘‘۔وہ شامل تو نہیں ہوئی لیکن اس اجلا س میں اردو صحافیوں کی حاضری انتہائی کم رہی ۔اس کی مختلف لوگ مختلف وجوہات بیان کرتے ہیں ۔لیکن وہ میری دلچسپی کا مرکز نہیں ہے ۔میری دلچسپی کا مرکز صرف مسلمانوں کی بے حسی ہے ۔
میرے احتجاج اور اس کے جواب میں چند اور لوگوں کی حمایت پر کچھ لوگوں کی رائے تھی کہ اس نے معافی مانگ لی ہے ۔اس لئے معاملہ ختم کر دینا چاہئے ۔ایک عالم کی بھی رائے تھی کہ عورت ناقص العقل ہو تی ہے اسے نظر انداز کردینا چاہئے۔حالانکہ میں نے قرآن و سنت میں عورت کے تعلق سے ایسے الفاظ نہیں دیکھے ۔ہاں کچھ صنفی کمزوری ضرور ہوتی ہے ۔لیکن جہاں تک میرے مطالعہ کا تعلق ہے اسلام نے خواتین کو عزت و وقار عطا کیا ہے ۔اسلام نے ہی سب سے پہلے اس نصف مخلوق کو وہ حقوق دئے جو آج کی جدید ترقی یافتہ دور میں بھی اسے نہیں ملے ۔بہرحال گفتگو کا مرکز یہ ہے کہ اگر اس کو ناقص العقل سمجھ کر معاف یا نظر انداز کردیا جائے تو پھر تسلیمہ اور شیطانی کتاب کے خالق کو کیوں نہ معاف کردیا جائے ۔اگر اسے نظر انداز کردیا جائے تو پھر ان لوگوں پر کیوں واویلا مچایا جاتا ہے ۔اوائل اسلام کے مسلمانوں کا ایمان ایسا تھا کہ ان کی کسی سے دشمنی اور دوستی صرف اللہ کے لئے ہوتی تھی ۔اسی لئے ان سے اللہ راضی ہوا اور اللہ نے انہیں زمین پر حکومت دی جس کی مثال دنیا دیکھنے سے قاصر ہے ۔جبکہ آج ہم اللہ کے لئے کوئی کام کوئی دوستی دشمنی نہیں کرتے بلکہ سب میں ذاتی مفاد مصلحت پنہاں ہوا کرتے ہیں نتیجہ، جو ذلت و رسوائی ہم نے یہودیوں کے دیکھی اور پڑھی ہے آج وہی ہم پر نافذ ہے ۔
میرے احتجاج میں اللہ جانتا ہے کہ میرا کوئی مفاد وابستہ نہیں ہے اور نہ ہی مجھے مذکورہ تنظیم سے کچھ امید ہے یا اس سے کچھ حاصل کرنے کی چاہت ہے ۔احتجاج تو صرف اس لئے جاری ہے اور رہے گا کہ مسلمانوں کو ان کا بھولا ہوا سبق یاد دلایا جاتا رہے ۔اور وہ میں کرتا رہوں گا ۔خواہ کوئی اس میں میرا ساتھی بنے یا نہ بنے ۔کیوں کہ نتائج کی ذمہ داری مجھ پر نہیں ہے ۔مجھ سے تو صرف اتنا سوال ہوگا کہ جب یہ سب کچھ ہو رہا تھا تو تم نے کیا کیا ؟اس لئے مجھ سے جو ہو سکتا ہے وہ میں کررہا ہوں ۔نبی ﷺ کی ایک حدیث یاد آرہی ہے ۔فرمایا ’’تم میں سے جو کوئی برائی ہوتا دیکھے اسے چاہئے کہ وہ طاقت سے روکے اگر وہ ایسا نہیں کرسکے تو اسے چاہئے کہ وہ اس کو زبان سے برا کہے اور اگر ایسا بھی کرنے کے لائق نہیں تو اسے دل میں برا جانے اور یہ ایمان کا سب سے کمترین درجہ ہے ‘‘۔اللہ کا شکر ہے کہ مجھ میں ایمان کا اوسط درجہ موجود ہے اور اس پر عمل کرتے ہوئے اپنی تحریر اور زبان سے کسی بھی برائی کو برائی بولنے کی قوت مجھ میں ہے ۔اللہ قوت دے گا تو برائی کو قوت سے بھی روکوں گا ۔
آخری بات یہ کہ بعض احباب کے کہنے کے مطابق اس نے معافی مانگ لی ہے ،اسے معاف کردیا جائے ۔اول تو کسی گستاخ نبی ﷺکو معاف کرنے والے ہم کون ہوتے ہیں؟دوسرا سوال یہ ہے کہ کیا واقعی اس نے ندامت کا اظہار کیا ہے اور کہ کیا اس کے عمل سے ظاہر ہے کہ یہ گستاخانہ کارٹون کی اشاعت سہواً سر زد ہونے والا فعل تھا جس میں اس کے ارادوں کو کائی دخل نہیں تھا۔میں نے بہت غور کیا ہر زاویہ سے پرکھا لیکن مجھے کہیں بھی ایسا نہیں لگا اسے اپنی کرتوت پر ندامت کا احساس ہے ۔الٹے اس نے اپنی حرکت کی توجیہہ کی نیز اس نے اس کے خلاف احتجاج کرنے والوں کو ذلت آمیز الفاظ سے نوازا ۔اگر کسی کو یقین نہ آئے تو فروری 2015 کے پہلے ہفتہ کے انگریزی اور ہندی اخبارات میں اس کے بیانات پڑھ لے ۔حد تو یہ ہے کہ اس نے ہندوستان ٹائمز کے رپورٹر کو یہ بیان دیا کہ اسے دفتر میں چھیڑا گیا تھا ۔اس پر اس نے رد عمل کے طور پر اس شخص کی سرزنش کروائی اور اخبار سے بے دخل کردیا ۔اسی سبب سے یہ لوگ اس کے خلاف احتجاج کررہے ہیں نیز اس کے خلاف جان بوجھ کر معاملہ کو طول دے رہے ہیں ۔ایک چھوٹے اردو اخبار کے ایڈیٹر و مالک کے احتجاج پر ہی اس کو عارضی طور پر گرفتار کیا تھا اور فورا ضمانت مل گئی ۔اس کے بارے میں اس کا کہنا ہے کہ یہ چھوٹے اخبار والے اس کے خلاف تحریک چلارہے ہیں ۔اسی طرح اس نے بڑی تنظیموں کے بارے میں کہا تھا انہوں نے میرے معذرت کو قبول کرلیا ہے ۔اس پر رضا اکیڈمی نے پریس کے لئے جاری اپنے بیان میں اس کی تردید کی تھی۔اب اس سلسلے میں میرا کہنا تجربات اور مشاہدات کی بنیا د پر یہ ہے کہ اس نے نہ ہی معافی مانگی ہے اور نہ ہی اس کے برتاؤ سے یہ لگتا ہے کہ وہ نادم ہے ۔اس لئے اس کے گناہوں کو نظر انداز کرنے کا سوال ہی نہیں پیدا ہوتا ۔ہمیں نہ کسی سے ذاتی دشمنی ہے اور نہ ہی ہم اس کے قائل ہیں ۔لیکن اس کے بارے میں میرا موقف ہے کہ وہ کمیونٹی کا حصہ بن کر اس میں اپنی زہر ناکی نہ پھیلائے تو بہتر ہے اور اس کے لئے اردو کے ارباب دانش کو تعاون ضرور کرنا چاہئے۔     

     نہال صغیر۔ موبائل:9987309013

آزادی کے بعد گاندھی جی کا خیال تھا کہ کانگریس پارٹی کو تحلیل کردیا جائے اور فیصلہ عوام پر چھوڑ دیا جائے کہ وہ کس طرح سے آزادبھارت کی جمہوریت کی تقدیر لکھتے ہیں مگر کانگریسی رہنما اس پر متفق نہیں تھے۔نتیجتاًکانگریس نے انتخابات میں ایک فریق کی طرح حصہ لیا اور عرصہ دراز تک اقتدار پر قابض رہی ۔اس دوران اس نے بہت سے اتار چڑھاؤ دیکھے شکست وریخت سے دوچار ہوئی عروج و زوال کا ذائقہ بھی چکھا مگر ایمرجنسی کے بعد کے دو سال اور واچپئی کے پانچ سالہ دور حکومت کو چھوڑکر کانگریس ہی مرکزی حکومت پر قابض رہی یہ اور بات ہے کہ کئی ریاستیں اسکے ہاتھ سے نکلتی رہیں ۔کانگریسی رہنماؤں نے اپنے عروج کے زمانے میں اپنے کسی بھی مخالف کو نہیں بخشا۔مخالف جماعتوں کو مٹانے کے لئے مختلف ہتھکنڈے استعمال کئے کبھی مزدور تحریکوں کو کچلنے کے لئے مہاراشٹر میں شیوسینا کے بال ٹھاکرے کی افزائش کی تو کبھی پنجاب میں سنت جزیل سنگھ بھنڈراں والے کی پرورش کی یہ اور بات ہے کہ آگے چل کر یہی لوگ کانگریس کے لئے نقصان دہ ثابت ہوئے ۔مخالف جماعتوں کو اقتدار سے بے دخل کرنے کے لئے کانگریس نے کبھی بخل سے کام نہیں لیا لیکن کانگریس پارٹی خود بھی ایک خاندان کی اجارہ داری بن کر رہ گئی ایک وقت تھا کہ اندرا از انڈیا اور انڈیا از اندرا کے نعرے پورے ملک میں گونج رہے تھے یہی وجہ ہے کہ جب نہرو خاندان کا زوال شروع ہو ا تو کانگریس بھی ہزیمت سے دو چار ہونے لگی اور کانگریس کی نیا کا کوئی کھیون ہار نہیں ملا اور ساری ذمہ داری ناتواں اور ناتجریہ کاندھوں پر آگئی۔کانگریس نے اقتدار میں رہنے کے لئے بیسا کھیوں کا سہارا لیا اور اتحادیوں نے اپنی حمایت کی خوب جم کر قیمت وصول کی ۔کانگریس کا آخری دور اقتدار گھوٹالواں اور کرپشن کا دور ثابت ہو اس درمیان میڈیا نے کانگریس کی جم کر مخالفت کی انا ہزارے کی تحریک نے کانگریس کو بری طرح پامال کیا ۔تبدیلی کی لہرمودی لہر بن کر ابھری اور کانگریس کو خس وخاشاک کی طرح بہا لے گئی ۔ساٹھ سال تک ملک پر حکومت کرنے والی جماعت تین کے ہندسوں کے قریب بھی نہ پہنچ سکی۔مسلمان اور دلت ہمیشہ ہی کانگریس کے ووٹ بینک رہے کچھ تو کانگریس کی سیکولر اور کچھ فرقہ پرست جماعتوں کے خوف نے مسلمانوں کو ہمیشہ کانگریس کے قریب رکھا کانگریس نے اردو،علی گڑھ مسلم یونیورسٹی ،شاہ بانو اور بابری مسجد جیسے مسائل میں الجھا کر مسلمانوں کو کبھی اپنے تعلق سے سوچنے کا موقعہ نہیں دیا ۔ ۲۰۰۲ ؁ کے گجرات فسادات کو چھوڑ کر تقریباً جتنے بھی فرقہ وارانہ فسادات ہوئے وہ کانگریس کے دور میں ہوئے ۔بیشتر فرضی انکاؤنٹر اور مسلم نوجوانوں کی گرفتاریاں بھی کانگریس کی ہی مرہون منت ہیں پھر بھی مسلمانوں کی اکثریت کانگریس سے ہی وابستہ رہی مگر بابری مسجد کے سانحہ نے مسلمانوں کو جھنجھوڑ کر رکھ دیا اور وہ کانگریس سے بددل ہو گئے۔ بابو جگ جیوں رام کے بعد کوئی بھی رہنما دلتوں کو کانگریس سے جوڑے رکھنے میں کامیاب نہ ہوسکا ۔ کانسی رام اور مایا وتی کے عروج نے دلتوں اور پسماندہ طبقوں کو کانگریس سے دور کردیا ۔منہ بھرائی اور ہر ایک کو خوش رکھنے کی پالیسی بھی کانگریس کے لئے سم قاتل ثابت ہوئی ۔نتیجہ علاقائی پارٹیوں کی مقبولیت کی شکل میں ظاہر ہوا اور کانگریس مرکز میں اقتدارمیں رہتے ہوئے چند صوبوں میں سمٹ کر رہ گئی ۔آج حالت یہ ہیکہ کانگریس ایک علاقائی پارٹی سے بھی کمزور نظر آرہی ہے ایک کے بعد ایک ریاستیں اسکے قبضے سے نکل گئی ہیں ۔جو باقی رہ گئی ہیں وہ بی جے پی کی ریشہ دوانیوں اور خود اپنوں کی نافرمانیوں کا شکار ہو کر آخری سانسیں لے رہی ہیں ۔پارٹی میں کوئی رہنما ایسا نہیں ہے جو کانگریس کے ناتواں جسم میں قوت ڈال سکے ۔سونیا جی ابھی بھی غیر ملکی ہی نظرآرہی ہیں راہل گاندھی میں پختگی نہیں آپارہی ہے حالانکہ بی جے پی حکومت اپنے وعدوں کو پورا کرنے میں پوری طرح ناکام ہے اور غلطیوں پر غلطیاں کر رہی ہے مگر کانگریس میں اسکی غلطیوں کا فائدہ اٹھانے کی صلاحت نہیں رہ گئی ہے۔ جے للیتا، ممتا ، کیجری وال اور نتیش کمار کے عروج کی قیمت بھی کانگریس کو ہی چکانی پڑرہی ہے ۔ اسلئے اندیشہ یہی ہے کہ اپنی تمام ترخامیوں کی وجہ سے بھلے ہی بی جے پی اگلے پارلیمانی انتخابات کے بعد اقتدار میں نہ رہے لیکن کانگریس کے لئے بھی کوئی مزدۂ جانفزا نہیں ہے

مسلمانوں کی طرح اردو بھی مصیبت کی ماری زبان بن چکی ہے ۔ جس طرح

 بھوکا انسان کھانا دیکھنے کے بعد صبر کا دامن چھوڑ دیتا ہے ٹھیک اسی طرح اردو زبان کے ادیبوں ،شاعروں اور صحافیوں کا حال ہو گیا ہے ۔اگر وہ ایوارڈ کے لئے منتخب ہوتے ہیں تو سمجھتے ہیں جیسے ہفت اقلیم کی دولت ہاتھ آگئی ہے ۔یہی سبب ہے کہ وہ ایوارڈ وصول کرتے وقت یہ دھیان تک نہیں دیتے کہ اس ایوارڈ کے ساتھ ساتھ ان کی اور ان کی مادری زبان کی کتنی تضحیک کی گئی ہے ۔اس سال مہاراشٹر اردو ادبی ایوارڈ تقسیم کرتے ہوئے بھی ایسا ہی کچھ ہوا ۔روایت سے ہٹ کر شیلڈ پر وزیر برائے اقلیتی امور ایکناتھ کھڑسے اور ان کے محبوب نظر اکیڈمی کے کارگزار صدر عبد الرؤف خان صاحب جنہوں نے ایکناتھ کھڑسے کی محبت میں اپنے نام کے ساتھ بھی کھڑسے لگا رکھاہے ،کی تصویریں نمایاں طور پر چھپی تھیں ۔این سی پی یو ایل کے وائس چیئرمین مظفر حسین کے مطابق یہ انتہائی ذلیل سطحی اور گھٹیا حرکت ہے ۔اس کے خلاف اردو داں حلقہ کو احتجاج کرنا چاہئے تاکہ آئندہ اس طرح کی حرکت کرکے اردو والوں کو ذلیل نہ کیا جائے ۔انہوں نے کہا کہ ایوارڈ جس کو دیا جارہا ہے وہ اہم ہے یا جس کے ذریعے دیا جارہا ہے وہ شخصیت اہم ہے۔یہ ایک بری روایت ہے جس کو رواج دینے کی کوشش کی جارہی ہے ۔ہونا تو یہ چاہئے تھا کہ جس وقت ایوارڈ دیا جارہا تھا اسی وقت ایوارڈیافتگان اس تضحیک پر احتجاج کرتے ہوئے اسے قبول کرنے سے انکار کردیتے ۔اسی سلسلے میں آل انڈیا مسلم او بی سی آرگنائزیشن کے دفتر میں منعقد ایک میٹنگ میں دوران گفتگو ایک اردو اخبار کے صحافی نے مزاحیہ انداز میں کہا کہ بھلا ایوارڈ وہ کیوں واپس کرتے کتنی مشکلوں سے جد وجہد و بھاگ دوڑ اور سفارشوں کے بعد تو ایوارڈ ملتا ہے !

ہمیں زیادہ کچھ نہیں کہتے ہوئے صرف اتنا کہنا ہے کہ پورے مہاراشٹر کا تو نہیں ہاں البتہ ممبئی میں جن لوگوں کو ایوارڈ دیا گیا اس پر ایک سرسری نظر ڈالنے سے بھی یہ احساس جاگ جاتا ہے کہ ان کے علاوہ بھی کئی قابل اور مخلص افراد موجود تھے جن کی خدمات بہت زیادہ ہیں وہ اس ایوارڈ کے زیادہ مستحق تھے ۔لیکن بہر حال جو فرد اپنے آپ میں انجمن ہوتے ہیں وہ اس کی خواہش ہی نہیں رکھتے کہ کوئی انہیں ایوارڈ یا ان کے کاموں کی ستائش کرے ۔وہ تو ستائش اور صلے کی پرواہ کئے بغیر بے تکان اپنی دھن میں اپنا ادبی اور صحافتی سفر طے کررہے ہیں ۔لیکن ہم یہ ضرور چاہیں گے کہ کم از اکم ایسا کوئی بھی قدم نہیں اٹھایا جائے جو اردو کی تحقیر کا ذریعہ بن جائے اور غیر اردو داں طبقہ اپنے ڈرائنگ روم میں بیٹھ کر اس پر تبصرہ کرتے ہوئے کہے کہ اردو والوں میں بس اب اسی معیار کے لوگ رہ گئے ہیں ۔

جیسا کہ اوپر کہا گیا کہ اردو مصیبت کی ماری زبان بن چکی ہے ۔اس کی تعریف سب ہی کرتے ہیں لیکن صرف مسلمانوں کو خوش کرنے کے لئے ۔کیوں کہ مسلمانوں کی ایسی باتیں خوش کرتی ہیں ۔وہ کچھ زیادہ ہی جذباتی ہیں یا حالات نے انہیں جذباتی بنا دیا ہے ۔کوئی اردو کی تعریف میں زمین آسمان کے قلابے ملا دے تالیوں کی گونج سے آپ حیرت زدہ رہ جائیں گے ۔لیکن نہ عملی طور پر کچھ ہونا ہے اور نہ ہوگا ۔اس کے لئے جب تک ہم نہ جاگیں اور جذباتی باتوں سے بچتے ہوئے ہم اپنی زبان جو ہماری ایک تہذیب کی ترجمان بھی ہے اور جس میں ہمارا دینی سرمایہ بھی محفوظ ہے کو خود سے ہی اپنے گھروں اپنے محلوں اور اپنی انجمنوں میں رائج نہ کریں ۔یہاں تو حالات یہ ہے کہ ہم نے خود ہی اپنے گھروں سے اپنے خاندان سے اور آنے والی نسلوں سے اردو کو نکال دیا ہے ۔پوچھنے پر کہتے ہیں کہ بھائی روز گار کا معاملہ ہے کیا کریں ۔ لیکن دنیا کے سارے علوم و فنون حاصل کرنے کے ساتھ ایک اردو بھی پڑھ لیں جہاں اردو نہیں ہے وہاں والدین یا تو اسکول کو مجبور کریں کہ وہ اردو اساتذہ کا تقرر کریں یا پھر اپنے بچوں کو اردو پڑھائیں اور گھر میں عام بول چال میں اردو میں ہی گفتگو کریں ۔لیکن یہاں تو حال یہ ہے کہ اردو کے اساتذہ ،صحافی جو اردو سے ہی اپنی روزی روٹی حاصل کررہے ہیں انہوں نے بھی اپنی نئی نسلوں سے اردو کو دور کردیا ہے ۔اب تام جھام والے انگریزی اسکولوں میں پڑھانا اسٹیٹس کا معاملہ بن گیا ۔ان کے سامنے میونسپل اسکولوں میں پڑھانا شان کے خلاف ہے ۔جبکہ ہم ملک اور دنیا میں کامیاب ترین لوگوں کا مشاہدہ کرتے ہیں تو پاتے ہیں کہ انہوں نے سرکاری اسکولوں سے ہی تعلیم حاصل کی ہے ۔دو تین سال قبل ممبئی کے صابو صدیق کالج میں اردو کتاب میلا کا انعقاد ہوا تھا ۔دس روزہ اس میلے میں جو کتابیں بکی تھیں وہ غالباً ستر اسی لاکھ کی تھیں ۔ جسے ایک ریکارڈ بتایا گیا تھا ۔ٹھیک اس کے اختتام کے ساتھ ہی مہاراشٹر کے کسی شہر میں مراٹھی ساہتیہ میلہ بھی منعقد ہوا تھا اس تین روزہ میلہ میں دو کروڑ سے زیادہ کی کتابیں بکی تھیں ۔غور کیجئے دس روز تک اردو والے جھک مارتے رہے تب ستر اسی لاکھ کی کتابیں بکیں اور مراٹھی والوں نے صرف تین روز میں تین گنا سے زیادہ کی کتابیں بیچیں۔اب ہم یہاں رونے اور سینہ کوبی کرنے کے بجائے اپنا محاسبہ کریں ۔اسی اردو میلہ کی ہمارے پاس دو مثالیں ہیں ۔ایک صاحب اردو میں بہت مضامین اور مراسلے تحریر کیا کرتے ہیں اور اردو کے لئے کیا کیا جانا چاہئے اس پر خوب اپنے زریں مشوروں سے نوازتے ہیں ۔حکومت مہاراشٹر میں ایک اہم افسر ہیں اچھی تنخواہ پاتے ہیں خوشحال زندگی گزارتے ہیں ۔اس وقت بھی ان کے جیب ہزاروں روپئے سے بھرے تھے جو کہ باہر سے نظر آرہے تھے لیکن ہاتھ میں کوئی کتاب نہیں دیکھ کر پوچھا کہ کوئی کتاب نہیں خریدی ۔اب بیچارے کیا جواب دیتے کہنے لگے بیگم لے گئی ہیں ۔اسی طرح ایک دوسرے صاحب ہیں انہوں نے بہت تیر مارا تو انہیں پورے کتاب میلہ سے صرف ایک پچیس روپئے کی کتاب ہی ملی ۔اس کے برعکس کئی ایسے لوگ جن آمدنی انتہائی قلیل لیکن وہ نصیحت کو دوسروں پر لادنے کا حق نہیں سمجھتے بلکہ اس پر عمل کرتے ہیں تاکہ دوسرے بھی نصیحت پکڑیں انہوں نے کتابیں خریدیں اپنی بساط سے اوپر اٹھ کر خریدیں اور دوسروں کو بھی تحفہ کے طور پر پیش کی۔

سچ پوچھئے تو ہندوستان میں اردو اکیڈمیاں اردو کی قتل گاہیں ہیں ۔کیا اردو اکیڈمیوں کے ذریعہ چند صحافیوں ،شاعروں ادیبوں کو ایوارڈ دے دینے یا مشاعرہ کروانے مہنگے شاعروں کو مدعو کرکے بھیڑ اکٹھا کرنے اور اس سے اردو کی ترویج و اشاعت کے نام پر جاری ہونی والی رقومات کی بندر بانٹ سے اردو کی بقا ممکن ہے ؟اول تو اگر اردو کی ترویج و اشاعت میں جن کا اصل میں کام ہے جنہوں نے اس کے لئے محنت کی ہے اس کو بغیر سفارش کے ایوارڈ کے لئے منتخب کیا جانا چاہئے ۔لیکن یہاں سفارشوں اور رشوت پر سارا معاملہ چل رہا ہے ۔جس سے اردو کے اصل خادم محروم ہو جاتے ہیں ۔دوم یہ کہ اگر آج اردو ہندوستان میں جس قدر بھی اپنا وجود منوائے ہوئے ہے وہ محض مدارس اسلامیہ کے رہین منت ہے ۔ جس کو کوئی گرانٹ نہیں ملتا بلکہ ملت کے چندوں پر ہی چلنے والے ان مدارس اسلامیہ نے کبھی اردو کے خادم ہونے کا اور اس کے عوض موٹی کمائی شہرت و ناموری حاصل کرنے کی کوئی سعی کی ۔اس لئے اگر ایوارڈ ملنا ہی چاہئے تو اس میں مدارس اسلامیہ کا حصہ زیادہ ہونا چاہئے ۔اردو کے تئیں مدارس اسلامیہ کی خاموش خدمات سے متاثرایک اسلام بیزار ادیب نے جھلا کر لکھا تھا ’’یہ اردو کے اخبار والے ان ملاؤں کی چاپلوسی اس لئے کررہے ہیں کیوں کہ اب یہی مدارس اردو کی بقا کی ضمانت ہیں ‘‘۔اسی طرح جشن ریختہ میں جاوید اختر نے کہا کہ اردو مولویوں کی نہیں شریفوں کی زبان ہے۔لیکن اللہ ان کی اسلام دشمنی میں ہی ان سے ان کے خبث کی نفی کروادی کہ آج اردو صرف اور صرف مدارس اسلامیہ کی وجہ سے زندہ ہے اور آئندہ بھی یہی جبہ و دستار والوں کے سایہ میں ہی اردو کے زندہ رہنے کی امید ہے۔جادو وہی جو سر چڑھ کر بولے ۔یعنی آپ کا سخت ترین دشمن بھی آپ کی خدمات کا اعتراف کرنے پر مجبور ہو جائے ۔اردو کی ترویج و ترقی کے لئے سب سے زیادہ ضروری بات یہ ہے کہ اردو اسکولوں کو معیاری اردو اساتذہ مہیا کرایا جائے ۔جہاں جہاں اردو اساتذہ کی اسامیاں خالی ہیں انہیں پر کیا جائے ۔ہائی اسکول اور ہائر سیکنڈری کے امتحانوں میں اردو مضامین میں بہتر نمبر لانے والے طالب علموں کو انعامات سے نوازا جائے ۔پہلے مغربی بنگال اردو اکیڈمی دسویں کے امتحان میں اردو مضمون کے ساتھ اول پوزیشن حاصل کرنے والوں انعامات سے نوازتی تھی ۔

یوں تو اردو اکیڈمی کے ذمہ دار کا عہدہ پوری طرح سیاسی داؤ ں پیچ کا شکار رہتا ہے ۔لیکن اس بار کے ذمہ دار کا انتخاب نہیں ہوا ہے بلکہ انہیں اردو داں طبقہ پر مسلط کیا گیا ہے ۔اردو کے ایک مشہور صحافی سے دوران گفتگو انہوں نے کہا کہ میرے خلاف لکھ کر ہی کیا ہوگا ۔اب سے پہلے لوگوں کے بارے میں انہوں نے کہا کہ جب انکا کوئی کچھ نہیں بگاڑ پایا تو اب میرا کیا ہوگا۔ان کی اس بات سے ایک بات تو صاف کردینا ضروری ہے کہ ہم صحافیوں کا کام صرف پوچھنا اور اس سے جو معلومات حاصل ہو اسے عوام تک پہنچانا ہے ۔ہمارا کام نہ تو فیصلہ کرنا اور نہ ہی کسی کاکچھ بگاڑنا یا بنانا ہے ۔یہ خبر جو عوام تک پہنچی ہے کہ بھساول اور جلگاؤں کے سہ روزہ اردو میلہ میں 23 یا 26 لاکھ خرچ ہوئے یہ بھی ایسے ہی سوال کی وجہ سے ممکن ہو پایا ۔ورنہ اردو اکیڈمی کو تو ہوش ہی نہیں کہ اکیڈمی کے اخراجات اور اس کی کارگزاریوں میں اتنی شفافیت ہو کہ عوام اس سے پوری طرح واقف ہوں لیکن یہاں کا معاملہ یہ ہے کہ عوام کو نہ تو اس کے بجٹ کا اور نہ ہی اس کی کارکردگی ،دائرہ کار اور ذمہ داری کے بارے میں معلومات ہوتی ہے ،سب کچھ اندھیرے میں ہے ۔کبھی کسی صحافی نے سوال کردیا تو کچھ معلومات مل گئی ورنہ نہیں۔

اردو جرنلسٹ ایسوسی ایشن کے ایک پروگرام بات چیت میں اشوک چوان نے کہا کہ اردو اکیڈمی کو وزارت اقلیتی امور میں دینے کے لئے آپ کے ہی لوگوں نے دباؤ دیا تھا ۔’معیشت ‘کے مطابق یہ اشارہ ان کا عارف نسیم خان کی طرف تھا ۔حالانکہ عارف نسیم خان کی طرف سے کچھ صحافیوں نے سوشل میڈیا پر ان کا دفاع کرتے ہوئے کہا کہ ان کے دور میں اردو اکیڈمی کا بجٹ ایک کروڑ کیا گیا ۔لیکن ان کے پاس اس بات کا کوئی جواب نہیں ہے کہ آخر اردو اکیڈمی کو وزارت ثقافت سے نکال کر وزارت اقلیتی امور میں ملانے سے اردو والوں کا یا اقلیت یعنی مسلمانوں کا کیا فائدہ ہو گیا ۔الٹا اس سے یہ نقصان ہو ا کہ نام نہاد اقلیتی بجٹ میں سے ایک اور بندر بانٹ والا خرچ نکل آیا ۔اگر اردو اکیڈمی وزارت ثقافت کے زیر نگیں ہو گی تو اس کا بجٹ وزارت ثقافت میں سے جائے گا ۔لیکن اقلیتی امور کے ماتحت آنے سے اقلیتی بجٹ میں ایک اضافی تصرف ہوا۔بے شک ہمیں اپنوں نے ہی برباد کیا ہے ۔ہمارے ہی لوگوں نے نام نہاد مختص کی گئی بجٹ کا تیا پاچا کرکے مسلمانوں کے لئے زیادہ مفید اور بہتر کام نہیں ہونے دیا ۔صرف چند صحافیوں کو خوش کردینے اور فرضی پیڈ نیوز شائع کرنے سے کیا مسلمانوں کا بھلا ہو جائے گا ؟اس لئے اردو داں طبقہ کو پورے زور شور سے ایوارڈ کی شیلڈ پر غیر ضروری تصاویر کی اشاعت اور ایوارڈ کی بندر بانٹ اور اردو اکیڈمی کے بجٹ کو غیر ضروری مصارف میں استعمال کرنے کے خلاف اپنا احتجاج درج کرانا چاہئے اور جو لوگ اس کے ذمہ دار ہیں انہیں عوام کے سامنے لانے کی بھرپور کوشش کی جانی چاہئے ۔

نہال صغیر۔ بلاد آدم ۔ ضلع ویشالی ۔ بہار:843105۔ موبائل :9987309013 ای میل:sagheernehal@gmail.com

سابق مرکزی وزیر اور سینئر کانگریس لیڈر پروفیسر سیف الدین سوز نے آج میڈیا کے نام مندرجہ ذیل بیان جاری کیا ہے۔
سرینگر ؍۲۵ ،اپریل ۲۰۱۶ء ؁
’’چیف جسٹس آف انڈیا شری ٹی ۔ ایس ۔ ٹھاکر ،نے کل وزیر اعظم نریندر مودی کے سامنے بھارت کے کروڑوں لوگوں کی امنگوں کی صحیح ترجمانی کی ۔ انہوں نے درد مندی سے کہا کہ بھارت کے عوام کی طرف سے پورے ملک کی عدالتوں میں لاکھوں مقدمات کے نمٹانے میں جو تاخیر ہوتی ہے اس سے انصاف کے بجائے لوگ ذلت ، نا انصافی اور رشوت خوری کے شکار ہو ئے ہیں۔
اس بات میں بھی کوئی شک نہیں ہے کہ پور ے ملک کی عدالتوں میں ججوں کی معقول تعداد موجود نہ ہونے سے عام لوگ وقت پر انصاف سے محروم ہو جاتے ہیں اور انکی زندگی دوبھر ہو جاتی ہے۔
شری جسٹس ٹی ۔ ایس ٹھاکر نے بجا طور پر اور کھلے عام بھارت کے انتظامیہ کی طرفسے سے عدالتوں کے معاملات کے ساتھ غفلت بھرتنے پر افسوس کا اظہار کیا ۔
اس سے قبل سابقہ چیف جسٹس ایچ ۔ایل ۔ دتو (Dattu) نے 6 دسمبر 2014ء ؁ کو پورے ملک کو خبردار کیا تھا کہ ملک بھر میں تین کروڑ سے زائد مقدمات عدالتوں میں زیر التواء ہیں۔ ان زیر التواء مقدمات کی تعداد ایک عالمی ریکارڈ بن گیا ہے۔
میں جسٹس ٹی ۔ ایس ٹھاکر کو بھارت کے عوام کو انصاف دلانے کیلئے انکی تڑھپ کیلئے مبارکباد دیتا ہوں ۔
ہندوستان کی عدلیہ کی طرف ملک میں ریاستی حکومتوں کی غفلت شعاری کی ایک اور مثال ہمارے سامنے یہ ہے کہ ریاستی حکومتیں عدالتی فیصلوں کو یا تو التواء میں ڈالتے ہیں یا یکسر عمل آوری سے منہہ موڈ دیتے ہیں ۔
میرا خیال ہے کہ ریاست جموں وکشمیر اس امر میں سب سے زیادہ آگے ہے کیونکہ بہت برسوں سے اس ریاست میں حکومتوں نے عدالتی فیصلو ں کی عمل آوری میں ایک تعطل پیدا کیا ہے اور اسطرح لوگ انصاف حاصل کرنے میں ناکا م ہوئے ہیں۔ ‘‘
بلال نذرہ انچارج پبلسٹی
0194-2303456, 08713825055

سابق مرکزی وزیر اور سینئر کانگریس لیڈر پروفیسر سیف الدین سوز نے آج میڈیا کے نام مندرجہ ذیل بیان جاری کیا ہے۔
سرینگر ؍ ۲۳ اپریل ۲۰۱۶ء ؁
’’جہاں تک ریاست جموں وکشمیر میں افسپاء کے نفاذ کا تعلق ہے ، میں نے اپنی ذاتی حیثیت میں کئی برسوں سے اس قانون کو پوری ریاست سے ہٹانے کیلئے جدوجہد کی ہے۔
میں نے یہ مسئلہ بڑی سنجیدگی کے ساتھ اس وقت کے ہوم منسٹر شری پی چدامبرم کے ساتھ اٹھایا تھا جو خود بھی اس قانون کو پوری طرح ریاست جموں وکشمیر سے ہٹانے کے حق میں تھے۔ کیونکہ انکی رائے میں اس قانون کا نفاذ فائدے کے بجائے ہندوستان کو عالمی سطح پر نقصان پہنچا رہا تھا۔ انہوں نے میرے ساتھ اتفاق کرتے ہوئے اس بات پر افسوس کا اظہار کیا تھا کہ حالانکہ انکے سارے ساتھی انکے ساتھ اس امر پر اتفاق کرتے تھے تاہم وہ وزارت دفاع کو اس قانون کی منسوخی کیلئے ہم نوا نہیں بنا سکے تھے!
آج اس قانون پر میری رائے یہی ہے کہ اس قانون کو اس ریاست سے جلد سے جلد ہٹایا جانا چاہئے کیونکہ اس قانون سے کشمیر میں علیحدگی پسندی اور دل آزاری بڑھتی جا رہی ہے۔
میری خواہش ہے کہ دہلی کا با اختیار سیاسی ٹولہ اس حقیقت کو سمجھے کہ اس قانون سے خاص طور کشمیر میں نوجوانوں کی دل آزاری کے سوا کچھ حاصل نہیں ہو رہا ہے۔ اس لحاظ سے اس قانون کو اس ریاست سے جلد سے جلد ہٹانا چاہئے۔ ‘‘

بلال نذرہ انچارج پبلسٹی
0194-2303456, 08713825055