نہال صغیر

کرشن چندر کا ایک ناول ہے گدھے کی سرگزشت ۔اس میں انہوں نے ایک گدھے کی آپ بیتی بیان کی ہے کہ کس طرح وہ دھوبی کے گدھے سے ایک ادیب کا مداح بن گیا اور پھر اسے بھی ادب کی کچھ جانکاری ہو گئی ۔پھر تقسیم ہند کا روح فرسا زمانہ آیا اور اس میں کیسے مذکورہ ادیب کی لائبریری پر شرپسندوں نے قبضہ کرلیا اورالماریوں میں کتابوں کی جگہ دوسری چیزیں بھر دی گئیں ۔گدھا بے چارا ان باتوں سے بہت رنجیدہ ہوا اور وہ دہلی کو روانہ ہوا اور وہاں انڈیا گیٹ پر ہریالی دیکھ گھاس چرنے لگا جہاں وہ کسی کانسٹبل کے ہتھے چڑھ گیا اور اس نے اسے پاکستانی جاسوس قرار دے کر اپنے افسر کے سامنے پیش کردیا ۔ یہ تو اس گدھے کی کہانی جو کہ کسی ادیب کے رابطے میں اتنا مہذب ہوگیا کہ اس نے ادب اور ادب نوازوں کی قدر کو جانا اور اس پر دل سے فریفتہ ہوگیا ۔آج کل ملک میں انتخابی ماحول ہے اور یہاں انسان کے گدھا بننے کی کہانی دو روز سے میڈیا میں آرہی ہے ۔ہمارے وزیر اعظم خیر سے اپنی پیٹھ تھپتھپانے میں پوری دنیاکیا پوری دنیا کی تاریخ میں اپنا ثانی نہیں رکھتے ۔یقین نہیں آئے تو تاریخ کے اوراق پلٹنا شروع کردیں آپ تھک جائیں گے لیکن آپ کی تلاش کو منزل نہیں ملے گی۔اب ہمارے یہ وزیر اعظم جن کے کارناموں میں گجرات میں مسلمانوں کا قتل عام رات کی سیاہی کی طرح تاریخ کے صفحات میں رقم ہے ۔ہر دن کوئی نہ کوئی نیا شگوفہ چھوڑتے رہتے ہیں ۔ایک دن انہوں نے کرنسی کی منسوخی پر سخت تنقید سے گھبرا کر کہہ دیا کہ وہ تو فقیر ہیں تھیلا اٹھا کر چلے جائیں گے ۔انہیں یہ یاد ہی نہیں رہا کہ انہوں نے ایک سوٹ ایسا بھی پہنا تھا جو کہ دس لکھیہ کا تھا ۔ہر چہار جانب سے کہا جانے لگا کہ اللہ کرے ہندوستان کا ہر انسان وزیر اعظم جیسا فقیر بن جائے ۔وزیر اعظم تو فقیر سے لاکھوں کا سوٹ پہننے والے فرد بن گئے لیکن اپنے اول جلول اقدامات سے ملک کو معاشی نا پائیداری کی اس کھائی میں پھینک دیا ہے جہاں سے نکلنا فی الحال ممکن نظر نہیں آتا۔فقر و فاقہ میں مست عوام میں پہلے ساٹھ فیصد سے اوپر غربت کی سطح سے نیچے زندگی گزارنے والے افراد تھے کوئی عجیب نہیں جب2021 کی مردم شماری میں سطح غربت سے نیچے کی آبادی 75 فیصد ہو جائے ۔وزیر اعظم کی یادداشت اچھی نہیں ہے ۔اسی لئے وہ ایسی بات بول گئے اور انہیں صرف ایک سال قبل پہنے اپنے دس لکھیہ سوٹ کی بات یاد نہیں رہی ۔ویسے جناب ابھی تک ایک کروڑ سے کچھ ہی کم کا سوٹ زیب تن کرچکے ہیں ۔انہوں نے گاندھی بھی بننے کی کوشش کی، چونکہ ان کی یاد داشت کمزور ہے اس لئے انہیں آزادی ہند کی تاریخ کا وہ واقعہ یاد نہیں رہا کہ گاندھی جی جب وطن لوٹے تو سوٹ بوٹ میں تھے لیکن انہوں نے ایک خاتون کو دیکھا جس کو ٹھیک تن ڈھانکنے کیلئے کپڑا بھی میسر نہیں تھا اور وہاں سے انہوں نے پوری زندگی ایک کپڑے میں گزارنی شروع کی ۔ایسا لگتا ہے کہ بی جے پی کو اپنی حقیقی ہار کا یقین ہو چلا ہے اس لئے عام لیڈروں کو تو چھوڑیئے خود وزیر اعظم نے اپنے عہدے کے وقار کو بالائے طاق رکھتے ہوئے اول فول بولنا شروع کردیا ہے ۔اسی سلسلے کی ایک کڑی قبرستان اور شمشان بھی ہے ۔اس پر بھی ان کا مذاق بن گیا ٹوئٹر پر یہ ٹرینڈ کرنے لگا کہ ’’تم مجھے ووٹ دو میں تمہیں شمشان دوں گا ‘‘۔خبر یہ بھی آئی ہے کہ وزیر اعظم کے ایک چہیتے نے اپنی بدزبانی میں یہ تک کہہ ڈالا کہ اگر یوپی میں ہم ہارے تو قبرستان بنا ڈالیں گے ۔چلئے انہوں نے ہارنے پر کہا لیکن وزیر اعظم تو ہندوؤں کو جیتنے پر شمشان دینے کی بات کہہ رہے تھے ۔ویسے ہم مسلمانوں کیلئے تو ہمارا ملک آزادی کے بعد سے قبرستان بنا ہوا ہے ۔کانگریس نے اپنے پینسٹھ سالہ دور حکومت میں مسلمانوں سے دو جگہوں کو تو آباد کیا ہے قبرستان یا قید خانہ ۔پھر ہم بھلا اس طرح کی دھمکیوں سے کیوں خوفزدہ ہونے لگیں۔یہ اور بات ہے دھمکی بی جے پی والے دیتے ہیں اوراس پر عمل کانگریس کرتی ہے ۔سچر کی رپورٹ دیکھ لیجئے کانگریس نے بی جے پی کے سامنے دستاویزی ثبوت پیش کردیا کہ تم تو صرف مسلمانوں کو حاشیہ پر پہنچانے کی بات کرتے ہو اور ہم تو اس پر عمل کرتے ہیں ۔یقیناًکانگریسیوں نے اپنی اس کارکردگی پر فخر سے سینہ 56 انچ کا کرلیا ہوگا ۔ممبئی کانگریس کے صدر اور سابق شیو سینک نے ایک ٹی وی شو میں کہا تھا کہ ہم پر رام مندر میں رخنہ ڈالنے کا الزام غلط ہے تالا ہم نے کھلوایا ۔شلا نیاس ہم نے کروایا ۔
کرنسی کی منسوخی نے عوام کو وہ زخم لگایا کہ وہ کراہ رہے ہیں ۔لیکن مودی بھکت انہیں یقین دلانے میں اب بھی مصروف عمل ہیں کہ دیش کی ترقی اور اس کی سلامتی کیلئے یہ تو کرنا ہی پڑے گا سو جنہوں نے دیش بھکتی کی گھونٹی کچھ زیادہ ہی پی رکھی ہے وہ اب بھی مودی حکومت کو اچھے دنوں کی چاہ میں ووٹ دے رہے ہیں ۔یہ الگ بات ہے کہ اب جعلی نوٹ پاکستان یا جموں کشمیر یا کسی مسلمان کے گھر سے نہیں بلکہ بینک کے اے ٹی ایم سے نکل رہا ہے ۔آیا نا اچھا دن بھلا اس سے بھی زیادہ کوئی حکومت اچھے دن لاسکتی ہے کیا کہ مدھیہ پردیش سے بی جے پی بجرنگ دل اور وشو ہندو پریشد کے لوگ پاکستانی خفیہ ایجنسی کی خدمات انجام دیتے ہوئے پکڑے گئے ۔بے چارے وزیر اعظم کریں تو کیا کریں بولیں تو کیا بولیں اس خوار ہوتی پوزیشن میں انہیں گدھا یاد آگیا کہ شاید اس سے ہی کچھ سہارا مل جائے اور عزت بچ جائے کیونکہ وہ بیچارا کتنا کام کرتا ہے ۔وہ بھی اتنا ہی کام کریں گے ۔اب وزیر اعظم نے کہہ دیا کہ وہ گدھے کی طرح کام کرتے ہیں ۔ انہیں گدھے کے کام کرنے کی صلاحیت اور جفا کشی سے سبق ملتا ہے ۔بہر حال یہ کوئی بری بات بھی نہیں ہے کہ کوئی کسی سے سبق لے کر اپنی زندگی کو جفا کشی کا عادی بنائے اور عوام کو راحت پہنچانے میں ہمہ وقت مصروف رکھے ۔گدھے کے بارے میں آنجناب فرمارہے تھے کہ وہ بہت ہی محنتی اور مالک کا وفادار جانور ہے ۔ایسا لگتا ہے کہ ہندوستانی عوام کو اس کی جانکاری نہیں تھی اس لئے وہ عوام کو سمجھا رہے تھے کہ دیکھو میں کتنا کام کرتا ہوں اور مثال میں گدھا کو پیش کردیا ۔وزیر اعظم کی اس بات سے یہ سمجھ میں لیکن آیا کہ وہ گدھا کس کو بنا رہے ہیں۔ویسے کاٹجو نے بھی ہندوستانی عوام کے بارے میں تھا کہ اسی یا نوے فیصد کے بارے میں یہ بتایا تھا کہ وہ احمق ہیں۔لیکن ایک بات تو طے ہے کہ وزیر اعظم ہندو کے مسیحا بن کر اسی فیصد عوام کو الو بنانے میں مصروف ہیں حالانکہ انہیں صرف بیس اکیس فیصد لوگوں نے ہی ووٹ دیا تھا ۔وزیر اعظم کی اس بات سے بیچارے گدھوں کے دلوں پر کیا بیتی ہوگی وہ ہمیں معلوم نہیں ہو سکتا کیونکہ اب ہمارے درمیان کوئی کرشن چندر تو ہے نہیں کہ وہ گدھے کی سرگزشت لکھ کر اس کی ترجمانی کے فرائض انجام دیتا ۔جبکہ وزیر اعظم کیلئے ملک کے خزانوں سے اربوں روپئے بہا کر میڈیا کے ذریعے ترجمانی کا کام کیا جارہا ہے ۔جو کہ حکومت کے ہر نقص کو عوام کے سامنے سود مند بنا کر پیش کررہا ہے ۔شاید دنیا نے تاریخ کے کسی موڑ پر اتنا چاپلوس اور بے ایمان میڈیا نہ کبھی دیکھا ہو گا اور آگے نہ کبھی اسے دیکھنا نصیب ہوگا ۔امریکہ میں بھی نہیں ۔امریکہ کا میڈیا بھی کم از کم عوام کی بیداری اور ان کے تعلیم یافتہ ہونے کا کچھ تو لحاظ رکھتا ہی ہے اور ٹرمپ کی ناقص اور مجنونانہ پالیسی کیخلاف سخت انداز اپناتا ہے ۔کبھی کبھی مجھے خیال گزرتا ہے کہ شاید امریکہ اسی لئے امریکہ ہے اور دنیا کا سوپر پاور کیوں کہ وہاں واقعی آزادی اظہار رائے ہے۔اسی آزادی نے امریکہ کو عظیم بنایا ہے ۔بہر حال بات کہاں سے کہاں پہنچ گئی میں کہنا چاہ رہا تھا کہ وزیر اعظم جب سب کچھ کہہ چکے ۔ سارے جھگڑے دیکھ چکے ۔یہ سمجھ آیا کہ عوام اس پر دھیان بھی نہیں دے رہے ہیں ۔رام مندر تو ایک فلاپ شو ثابت ہوا ہے ۔اب کہیں کہیں گاہے بگاہے اندھیری رات کے سناٹے میں جس طرح کسی کتے کے پِلے کی آواز سنائی دیتی اسی طرح کہیں کوئی زندگی کا ثبوت دینے کیلئے رام مندر کا راگ چھیڑ دیتا ہے ۔جس سے مسلمانوں سے زیادہ خود ہندوؤں کا منھ کڑوا کسیلا ہوجاتا ہے ۔یہ کتے کے پلے والی بات بھی عجیب ہے دو ہزار انسانوں کے قتل پر وزیر اعظم کو صرف اتنا دکھ ہوا تھا جتنا کہ آپ کی کار کے نیچے کوئی کتے کا پلا آجائے ۔دیکھئے یہ گدھے کی طرح کام کرنے والی بات کب تک مودی جی کا ساتھ دیتی ہے ۔یا گدھے کے توسط سے وہ عوام کو جو سمجھانا چاہ رہے ہیں ۔عوام وہ کب تک سمجھ سکتے ہیں کہ انہیں گدھا بنایا جارہا ہے ۔حالانکہ بقول نریندر مودی ’گدھا وفادار اور محنتی جانور ہے‘۔ ہندوستانی عوام بھی اپنے حکمرانوں کے وفادار ہیں۔اس کا ثبوت کرنسی منسوخی کے سبب آنے والی معاشی سنامی سمیت مہنگائی اور وعدوں کے وفا نہیں ہونے والے سلسلہ کے باوجود ان کا صبر و استقامت ہے ۔کیا دنیا میں اس کی کوئی مثال ملے گی ؟وینزوئلا نے بھی اپنے یہاں کرنسی بند کی عوام سڑکوں پر نکل آئے صرف دو دن بعد حکومت کو یہ فیصلہ واپس لینا پڑا لیکن ہمارے ملک کے عوام کو دیکھ لیجئے اتنی معاشی تباہی اور کسانوں کی خودکشی کے باوجود مہاراشٹر میں عوام نے بی جے پی کو ٹوکری بھر بھر کر ووٹ دیا ۔اجتماعی نوبل انعام کا کوئی شعبہ ہوتا تو وہ صرف ہندوستانی عوام کو ان کی بے مثال صبر کی وجہ سے دیا جاتا اور ہر سال ہندوستان کے علاوہ کوئی دوسرا ملک اس کا حقدار نہیں بنتا۔

دہشت گردی !یہ ایک ایسی اصطلاح ہے جس کا نام لیتے ہی یا اس سے جڑے واقعات کے نظر میں آتے ہی ایک خاص قوم کا نام اور اس میں ایک خاص طبقہ یا فرقہ کی شکل ذہن میں آجاتی ہے ۔اس سے پیچھا چھڑانا مشکل ہو گیا ہے ۔اکیسویں صدی میں ترقی یافتہ ملکوں اور نام نہاد ترقی یافتہ تہذیبوں نے دنیا کو کچھ دیا ہو یا نہیں لیکن انہیں ایک فرضی نام ضرور دے دیا جسے میڈیا کے ذریعے اتنا دہشتناک بناکر عوام کے دماغ میں پیوست کردیا گیا ہے کہ ہر کوئی وحشت زدہ ہے کہ جانے کب کیا ہوجائے ۔جمعرات کو پاکستان کے سیہون میں واقع درگاہ لعل شہباز قلندر پر خودکش حملہ میں سو کے قریب افراد ہلاک ہو گئے ۔اس پر ایک اردو اخبار کی خبر کے مطابق رضا اکیڈمی سمیت جمعیتہ العلماء مہارشٹر ،جمعیت اہل حدیث اور حریت کانفرنس نے مذمت کی ہے ۔اس شرمناک اور بزدلانہ حرکت پر ایک اردو اخبار نے اپنے اداریہ کے آخر میں لکھا ’’پاکستان میں کوئی نہیں کہہ سکتا کہ اگلا دھماکہ اب نہیں ہوگا ‘‘۔اس آخری سطر سے قبل بھی ایسا کچھ لکھا گیا ہے گویا یہ سب کچھ پاکستان کے اپنے کارناموں کا پھل ہے جسے وہ بھگت رہا ہے۔جبکہ ہم کہیں کے بارے میں بھی کچھ بھی نہیں کہہ سکتے کہ کب کیا ہو جائے لیکن ہمیں میڈیا کے ذریعہ ایسے واہموں میں مبتلا کردیا گیا ہے کہ وہ ہمارے ذہن و دل میں ثبت ہو گیا ہے۔ہم انہی واہموں میں جی رہے ہیں ۔اس میں وطن پرستی کا جنون بھی شامل ہے ہمیں یہ ثابت تو کرنا ہی ہے نا کہ ہم بھی وطن پرست ہیں ۔اصل میں ہم اس طرح کے واقعات کو ایک خاص عینک اور نکتہ نظر سے دیکھنے اور اسی کے مطابق عوام کو بتانے اور سمجھانے میں مصروف رکھتے ہیں ۔کوئی اس کے کسی دوسرے پہلو پر نظر نہیں ڈالتا کہ یہ کون کررہا ہے ؟کیوں کررہا ہے ؟اس کا مقصد کیا ہے ؟اس کا ہدف کیا ہے ؟ کہیں کوئی دھماکہ یا خود کش حملہ ہوا نہیں کہ ایک عدد ای میل یا فون کسی اخبار یا کسی ایجنسی کے پاس آجاتا ہے کہ انہوں نے یہ دھماکے کئے ہیں اور یہ مان لیا جاتا ہے کہ جس نے یہ ذمہ داری قبول کی ہے اسی نے یہ گھناؤنا کارنامہ انجام دیا ہے ۔آج کل داعش نام سے ایک تیار شدہ تنظیم سب کے سامنے ہے جتنا کچھ جہاں بھی ہو بس یہ کام اس کے علاوہ کسی اور نے کیا ہی نہیں ہو ۔ہمیں قطعاً یہ نہیں سوچنا ہے کہ جس نے فون یا ای ایل پر دھمکی دی ہے یا حملے کی ذمہ داری قبول کی ہے اس کی حیثیت کیا ہے ۔وہ وجود میں بھی ہے یا عدیم الوجود محض ایک سایہ ہے ہم سب ایکفرضی ہیولے کے پیچھے بھاگ رہے ہیں ۔مسئلہ یہہے کہ اعترافی بیان ای میل یا فون کے ذریعہ موصول ہونا اور اس پر بیان داغ دینا یا کو ئی اسٹرائیک کردینا بہت آسان نسخہ ہے ۔اس کے برعکس اگر ملکوں کے حکمراں اور ان کے کار پرداز اس کی تہہ تک جانے اور اس کی حقیقت معلوم کرنے کی کوشش کریں گے تو یہ مشقت طلب مرحلہ ہے ۔ کون جائے ایئر کنڈیشن کوٹھیوں اور آرام دہ کاروں سے نکل کر عوام کے درمیان یا جنگلوں میں بھٹک کر اصل مجرمین کو پکڑے اور یہ بھی کہ ایسے مجرمین حکومتی اہل کاروں میں ہی ہوں جو محض دو حکومتوں یا دو ملکوں کے تعلقات کو بگاڑنے کے درپے ہوں ۔اس کا ایک پہلو یہ بھی ہے کہ صوفی درگاہوں پر حملہ کرکے ایک خاص گروہ اور ایک خاص مسلک کے خلاف رائے عامہ ہموار کرکے معاشرے میں فساد پھیلانے کی کوشش کی جاتی ہے ۔اس کوشش کے پیچھے کون ہے اور اس کا مقصد کیا ہے ؟اس جانب جتنی جلد توجہ دی جائے اتنا ہی بہتر ہوگا ۔یہ انسانیت ،ملک اور پوری دنیا کی سلامتی کیلئے اچھا ہو گا کہ اصل مجرمین کو پکڑا جائے ۔ انہیں عوام کے سامنے لایا جائے اور اسلام کے نظام تعزیر کے مطابق سر عام سزا دی جائے ۔لیکن یہ ضروری ہے کہ محض انتقام اور مسلکی عناد کے سبب کسی کو سازش کے تحت نہ پھنسایا جائے ۔کیوں کہ ایسا کرنے سے امن کبھی قائم نہیں ہو سکتا بلکہ اس کے بطن سے انتقام جنم لے گا اور انتقام در انتقام دنیا کو خون خرابہ کے علاوہ اور کچھ نہیں دے سکتا ۔

دھماکے مسلم دنیا کا نصیب بن چکے ہیں ۔ہر روز کہیں نہ کہیں دھماکہ ہوتا ہی ہے اور اس میں بے گناہ اور معصوم شہری بے موت مرتے ہیں ۔کہیں بازار میں دھماکہ ،کہیں بسوں اور ٹرینوں میں دھماکہ اور کہیں مساجد و مقابر و درگاہوں میں دھماکہ ہوتا ہے جس میں آج تک ہزاروں افراد لقمہ اجل بن چکے ہیں ۔دھماکے درگاہوں میں ہوں یا مساجد و منادر میں بہر حال اس میں بے گناہ انسان ہی مرتا ہے ۔مرنے والا معصوم ہی ہوتا ہے ۔اس سے تفریق نہیں کرنی چاہئے کہ ہم کسی خاص جگہ دھماکہ ہو جب ہی مذمت کریں گے ورنہ خاموش تماشائی بنے رہیں گے ۔یہ مذمت بھی عجیب بلا ہے ۔میں بچپن سے یعنی اسی کی دہائی سے اخبارات میں لفظ مذمت پڑھ رہا ہوں ۔لیکن میری سمجھ میں نہیں آیا کہ اس مذمت سے بھلا مظلوم کو کیا مل جائے گااور ظالم کے ہاتھ کیوں کر کاٹے جاسکتے ہیں ۔بس جسے دیکھو ایک سطری مذمتی بیان داغ کر فارغ البال ہوجاتا ہے ۔روزانہ ہونے والے دھماکوں میں بے گناہ مرتے ہیں لیکن بہت خاص خاص دھماکوں پر ہی کوئی ردعمل پڑھنے یا سننے کو ملتا ہے ۔یہ تفریق کیوں ؟ہمیں چاہئے کہ ہم سارے انسانی جانوں کی حرمت کا یکساں خیال کریں ۔جیسا کہ قرآن کہتا کہ کسی انسان کو بغیر حق کے قتل کرنا ساری انسانیت کا قتل ہے لیکن ہم کسی خاص موقعہ پر ہی بیدار ہوتے ہیں ۔ایک بات اور یہ کہ اب یہ مذمت کا سلسلہ بند کیجئے اور عملی اقدامات کی جانب قدم بڑھائیں ۔بہت ہو چکا مذمت کا سلسلہ ۔اس مذمت سے قاتلوں جنونیوں اور انسانیت کے دشمنوں کا کچھ نہیں بگڑنے والا ۔اس لئے کچھ ایسا کریں کہ ان ظالموں کی گردن ناپی جاسکے ۔ لیکن یہ اس وقت ممکن ہو سکے گا جب ہم مذہب ،مسلک ، رنگ و نسل اور اونچ نیچ کے خود قائم کئے ہوئے فرضی طبقاتی نظام سے باہر نکل کر محض انسانیت کے درد کو محسوس کرتے ہوئے آگے آئیں اور کسی کے بہکاوے ،کسی کے کہنے ،کسی کی سازش سے کسی کو مجرم نہ گردانتے ہوئے اصل مجرم کو پکڑا جائے ۔خواہ وہ کوئی بھی کسی ملک کا سربراہ ہو ،کوئی سیاست داں ہو یا دنیا کی سوپر پاور ملک کا صدر یا گلی محلوں کا کوئی عام سے مجرم ۔امن و امان اور قتل و غارت گری تو صرف انصاف اور اس کے مکمل نفاذ سے ہی قائم ہو گا ۔اس کے بغیر محض مذمتی بیان ،احتجاج سے کچھ نہیں ہونے والا ۔آخری بات یہ کہ حق و انصاف کی لڑائی مسلمانوں کو ہی لڑنی ہے ۔مسلمانوں کو ہی اللہ نے حق و انصاف کا علمبردار بنے رہنے کا حکم دیا ہے۔

اکبر الدین اویسی نے آج ناگپاڑہ میں مجمع سے خطاب کرتے ہوئے کہا کہ ہم آپ کیلئے ایوان میں آواز بلند کریں گے اگر آپ ہم پر اعتماد کرتے ہوئے ہمارے نمائندوں کو منتخب کرتے ہیں

ممبئی :ممبئی بلدیاتی انتخاب کی تشہیری مہم اپنے اختتام پر ہے ۔آج اکبر الدین اویسی نے انتخابی تشہیری مہم کی آخری تقریر کرتے ہوئے ناگپاڑہ جنکشن میں پر ہجوم اجلاس میں کہا کہ ہمارے منصوبے اس وقت کامیاب ہو سکتے ہیں جب ووٹ کے ذریعے آپ ہمیں موقعہ دیں ۔انہوں نے عوام کو بیدار کرتے ہوئے کہا کہ آزادی کے بعد سے متعدد انتخابات آئے متعددحکومتیں بنیں ۔کئی لیڈر آئے اور گئے ۔ملک نے کافی ترقی بھی کی لیکن نہیں بدلی تو ہم مسلمانوں کی قسمت ۔مسلمان پہلے کی بنست اور زیادہ مفلوک الحالی کا شکار ہوا ۔یہاں ہم آپ کے سامنے آئے ہیں کہ دستوری اور جمہوری طور پر قوم کے لئے آواز اٹھائیں اور آپ کی زندگی میں تبدیلی لائیں۔اس میں ہماری ذاتی کوئی غرض نہیں ۔مجلس کی اپنی تاریخ ہے ۔انہوں نے آج ایک بار مسلمانوں کو سیاسی طور پر خود انحصار ہونے کی تلقین کرتے ہوئے کہا کہ مجلس آپ کو متحد اور مرکز سیاسی پر جمع کرنے کیلئے آئی ہے آپ اس کی قوت بنیں ۔ہمارے سامنے صرف سیاست نہیں ہے بلکہ سیاست کے لئے ذریعہ قوم کی خدمت کرنا ہے۔انہوں نے مجلس اتحاد المسلمین کے بارے میں بتاتے ہوئے کہا ہم نے پہلے معیشت اور تعلیم کے میدان میں کام کیا ۔مجلس صرف جذباتی نعرہ بلند کرنے والی جماعت نہیں ہیں ہم کام کرتے ہیں ۔عملی اقدام اٹھاتے ہیں ۔انہوں نے مسلمانوں کی سیاسی بے وزنی پر آج ایک بار بار پھر رائے کرتے ہوئے کہا کہ ہماری آواز سیاست کے اس شور میں کہیں نہیں ہے مجلس اسی آواز کو برپا کرنے آئی ہے ۔ہماری کوششوں کے پیچھے نا انصافی کی طویل داستان ہے۔زندگی کے ہر شعبہ میں ہمیں محروم رکھا گیا خواہ وہ تعلیم ہو معیشت ہو یا سیاست ہو ۔ہم نے آزادی کے بعد سب کا ساتھ دیا لیکن ہماری پسماندگی دور کرنے کیلئے کوئی آگے نہیں آیا ۔ناانصافیوں اور محرومیوں کے بعد ہمیں کچھ ملا تو کمیٹیاں اور کمیشنوں کا لامتناہی سلسلہ جس کی سفارشات کو کبھی نافذ نہیں کیا گیا ۔ستر برس کو جانے دیجئے میں پندرہ سال کے این سی پی کانگریس کی حکومت کا حساب مانگنے آیا ہوں ۔فرقہ پرستوں کا خوف دکھا کر یہ ہمارا ووٹ لیتے رہے لیکن انہوں نے ہمارے ساتھ انصاف نہیں کیا ہمارا حق ہمیں نہیں دیا ۔جب تک آپ کے پاس کوئی متبادل نہیں تھا اس وقت تک آپ بھی انہیں ووٹ دیتے رہے لیکن اب آپ کے سامنے مجلس کی صورت میں ایک بہترین سیاسی متبادل موجود ہے ۔اکبر الدین اویسی نے آج بھی سیکولر سیاسی جماعتوں پر تنقید کرتے ہوئے کہا کہ جب ہم مسلمانوں کی سیاسی بے وزنی ختم کرنے اور سیاسی خود انحصاری کی بات کرتے ہیں تو یہ بات انہیں بری لگ رہی ہے لیکن ان کا دور گزر چکا ہے ۔انہوں این سی پی کانریس کی حکومت پر اوقافی جائداد کے خرد برد کا الزام عائد کرتے ہوئے کہا ستر اوقافی جائدادوں پر ریاستی حکومت قابض ہے ۔کئی روز سے وہ اپنے انتخابی اجلاس میں رائے گڑھ میں کانگریس اور شیو سینا اتحاد پر کہا کہ اگر اکبر الدین اویسی کی تصویر اودھ ٹھاکرے سے ہاتھ ملاتے ہوئے آجاتی تو آج ہر جانب ہنگامہ برپا ہوتا ۔کہا جاتا ہم فرقہ پرستوں سے مل گئے ہیں ۔اکبر الدین نے کرشنا کمیشن کا نفاذ نہیں کرنے کیلئے بھی کانگریس اور راشٹر وادی کانگریس پر تنقیدکیا ۔انہوں نے ایک بار پھر بابری مسجد کی شہادت اور اس کے بعد کے حالات پر عوام سے کہا کہ میں آپ کو بابری مسجد کی شہادت اور اس کے بعد کے فسادات کی یاد دلانا چاہتا ہوں ۔انہوں نے کہا اپنے حقوق کی بازیابی کیلئے زبانی جمع خرچ سے کچھ نہیں ہوگا بلکہ عملی جد و جہد سے مسائل حل ہوں گے ۔خود کو بدلیں گے اپنی سوچ بدلیں گے تب ہی قوم کی تقدیر بدلے گی ۔آپ آج اگر مرکز سیاسی پر جمع نہیں ہوں گے تو ہمارا وقار قائم نہیں رہے گا۔انہوں نے اتحاد کی تلقین کرتے ہوئے انتشار ختم کرو ،یہ دیوبندی ،بریلوی کے جھگڑے بند کرو دشمن جب آ پ کو نقصان پہنچانے پر کمربستہ ہوتا ہے تو وہ صرف یہ دیکھتا ہے کہ آپ مسلمان ہیں ۔اس لئے براہ کرم میرے بھائیو اب بھی ان جھگڑوں کو ختم کردو۔انہوں مسلمانوں سے کہا کہ ہم اگر کچھ اور جذباتی تقریریں کریں گے تو آپ نعروں سے ہمارا حوصلہ بڑھائیں گے اس سے آگے بڑھ کر آپ سڑکوں پر نکل آئیں گے اور وہاں پولس کی بے چین گولیاں ہمارا استقبال کریں گی ۔اس لئے میں ایک بار پھر آپ سے اپیل کرتا ہوں کہ ایوان میں اپنے وہ نمائندے بھیجیں جو آپ کیلئے آواز بلند کریں حکومت سے لڑ کر آ پ کو آ پ کا حق دلائیں ۔اگر دس بیس بیباک نمائندے ایوان میں پہنچ گئے تو آ پ کے حقوق پر کوئی اس طرح ڈاکہ نہیں ڈلے گا جیسا کہ آزادی کے بعد اب تک آپ کی حالت رہی ہے۔انہوں نے پر جوش انداز میں کہا تمہاری عزت ہمارا وقار ہے ۔ہم تمہاری عزت و وقار کیلئے جد و جہد کررہے ہیں ۔اسی لئے میں تمہارے سامنے آیا ہوں کیوں تمہاری عزت ،وقار اور حقوق کا معاملہ ہے ۔ہماری پہچان آپ کا اعتماد ،آپ کی عزت آپ کا وقار ہے ۔انہوں نے کہاکہ ارپورٹ کے مطابق دیویندرفڑ نویس اور بی جے پی کے اجلاس میں خالی کرسیاں سامعین کو ترستی ہیں لیکن اس کے برعکس ہمیں سننے کیلئے آپ کی آمد اس بات کا ثبوت ہے کہ آپ ہم پر اعتماد کرتے ہیں ۔یہ آپ کا پر جوش انداز اس بات کو بتانے کیلئے کافی ہے کہ اب ممبئی اور مہاراشٹر میں گیروے جھنڈے کے ساتھ ہرا جھنڈا بھی لہرائے گا ۔ بیف بین پر ایک بار پھر تنقید کرتے ہوئے کہا اندرون ملک بیف بین اس لئے ہوا کیوں کہ اس کاروبار میں ہمارے غریب مسلمان اور دلت ہیں لیکن گوشت کا ایکسپورٹ اس لئے جاری ہے کیوں کہ اس میں بڑے بڑے جین مارواڑی ملوث ہیں اور انہی کے چندے سے بی جے پی کا پارٹی کا کاروبار چل رہا ہے ۔

اجلاس سے بائیکلہ حلقہ سے مجلس کے ایم ایل اے وارث پٹھان نے ناگپاڑہ جنکشن پر عوام سے خطاب میں کہا کہ میں آپ کا نیا نیا ایم ایل آیا ہوں ۔اس دوران میں نے آپ کے کئی کام کئے ۔ہم نے اسمبلی میں آپ کی آواز بلند کی ۔ہم نے وقف کی جائداد کی بازیابی کیلئے آواز بلند کی ۔پرانی اور مخدوش عمارتوں کا کام کروایا باقی کا کام بھی اس بارش سے قبل ہوگا ۔پھر بھی ہم سے کچھ کوتاہیاں ہوئی ہوں گی لیکن اس کے لئے مجلس ذمہ دار نہیں ہے ۔آپ مجلس کو مضبوط کریں ۔اس سے آپ کی آواز میں قوت پیدا ہو گی ۔وارث پٹھان نے کہا کہ آپ اس بار بلدیاتی انتخاب میں مجلس کے حق میں ووٹ دیں اور دشمن کی سازش کو ناکام کریں ۔انہوں نے سماج وادی کو اپنی سخت تنقید کا نشانہ بناتے ہوئے کہا کہ انہوں نے اب تک کیا کام کیا ہے ۔اسمبلی میں بھارت ماتا کے معاملہ سماج وادی سمیت کانگریس کے مسلم لیڈر دشمن کی صفوں میں نظر آئے ۔

اکبر الدین اویسی نے کرلا میں مجمع عام میں کہا کہ گلی نکڑوں پر شور مچانیکے بجائے ایوان میں اپنے مخلص نمائندوں کو بھیجیں جو آپ کی مضبوط و معتبر آواز بنیں

ممبئی :ممبئی بلدیاتی انتخاب کی تشہیری سرگرمیاں اپنے آخری مرحلہ میں ہیں ۔اس سلسلے میں آج مجلس اتحاد المسلمین نے جنوبی ممبئی میں ریلی نکال کر اپنی طاقت اور شاندار اجتماعیت کا مظاہرہ کیا وہیں اکبر الدین اویسی نے نماز جمعہ مسجد و درگاہ شیخ مصری وڈالا میں ادا کی جہاں انہوں نے مختلف سماجی و ملی شخصیتوں سے ملاقات کی ۔شام کو کرلا کے ایل بی ایس مارگ میں ہری مسجد کے قریب عوامی اجتماع کو خطاب کیا ۔وہ یہاں وارڈ نمبر 168 کی خاتون امیدوار نورجہاں عبد المجید کلیانیاکیلئے عوام سے ووٹ کرنیا کیلئے اپیل کرتے ہوئے مسلمانوں کو منظم ،متحد اور ایک مرکز سیاسی پر جمع ہونے کی تلقین کی ۔آج کا کرلا کا یہ اجتماع مجلس کے ایک پرجوش اور پر عزم کارکن عامر اسمعٰیل پائیک کی وجہ سے ممکن ہو سکا ۔اس نوجوان نے کافی محنت و مشقت کے ساتھ اس اجلاس کی کامیابی کیلئے کاوش اور جد و جہد کی ۔

کرلا میں اکبر الدین اویسی نے اپنے انتخابی جلسہ سے خطاب کرتے ہوئے کہا کہ گلیوں نکڑوں اور چوراہوں کی آواز وں کی کوئی اہمیت نہیں ہوتی ۔آواز ایوان میں جو گونجتی ہے اس کی اہمیت ہے۔انہوں نے کہا کہ ہم خواہ کتنا ہی کم تعداد میں ہوں اس سے کوئی فرق نہیں پڑتا کیوں کہ ہم اپنے ذاتی فائدے کیلئے کچھ نہیں کررہے ہیں ۔انہوں نے معرکہ بدر و حنین و کربلا کی مثال پیش کرتے ہوئے کہا کہ تعداد میں کم ہونے کے باوجود ہم نے حق کیلئے لڑائی لڑی اور جیتی ہے ۔انہوں نے صلاح الدین ایوبی کے دور کی صلیبی جنگوں کی مثال پیش کرتے ہوئے کہا کہ پوری عیسائی دنیا مسلمانوں کے خلاف متحد ہو کر آئی لیکن صلاح الدین ایوبی کی قیادت میں مسلمانوں نے متحدہ عیسائی دنیا شکست فاش دی ۔ وہ کہنا چاہ رہے تھے کہ یہ مت فکر کیجئے کہ ہماری تعداد کیا ہے بس ہمیں متحد ہونے کی ضرورت ہے ۔

انہوں نے جم غفیر سے مخاطب کرتے ہوئے کہا کہ آپ کی آواز بلند کرنے کے لئے ،آپ کے حقوق کی بازیابی کیلئے ضروری ہے کہ آپ ہم پر اعتماد کریں ہمارے ساتھ کھڑے ہوں اس لئے ہم آپ کے پاس آئے ہیں کہ آپ کے ووٹ اور آپ کے اعتماد کو حاصل کریں تاکہ ہم ایوان میں آ پکی آواز بلند کریں ۔ایوان کی آواز پر ہی دنیا توجہ دیتی ہے ۔اسی پر کارروائی ہوتی ہے ۔اکبر الدین نے آج پھر بعض سیکولر اور کانگریس پرست مسلمانوں کی جانب سے لگائے جانے والے الزامات کو خارج کرتے ہوئے کہا کہ ہم پر الزام لگایا جاتا ہے کہ ہم ایجنٹ ہیں ۔ہم کسی کے ایجنٹ نہیں ہیں ۔ہم آپ کیلئے آئے ہیں ۔ہمیں کسی کا ڈر نہیں ۔ہم حق پرست ہیں ۔انصاف کی لڑائی لڑ رہے ہیں ۔ہمارے ساتھ جو نا انصافی ہوئی ہے ہم اس کو حاصل کرنے کیلئے آئے ہیں ۔دنیا ہم پر چڑھتی آرہی ہے اور ہم ہیں کہ اختلافات میں پڑے ہوئے ہیں ۔انہوں نے یاد دلایا کہ جب ہر جانب سناٹا تھا جب یعقوب میمن کی پھانسی پر ہم نے آواز اٹھائی ۔میرے بھائیو میرے پاس اللہ کا دیا سب کچھ ہے کسی چیز کی کمی نہیں ہے ۔لیکن آپ کی محبت قوم کی عظمت کیلئے ،آپ کی شان کی بلندی کیلئے ،آپ کے وقار کیلئے ہم اپنے آرام و سکون کو تج کر گھوم رہے ہیں ۔مشقت برداشت کررہے ہیں کہ میری قوم کو آرام ملے اس کو اس کے حقوق واپس ملیں ۔ہماری ساری تگ و دو صرف اس لئے ہے کہ ہماری قوم کا وقار بلند ہو ۔ہم سیاسی طور پر مضبوط ہوں گے تو ہماری آواز بلند ہو گی ۔آخر میں انہوں نے ایک بار پھر مسلمانوں سے اپیل کی کہ منظم رہئے ،متحد رہئے اور ایک مرکز سیاسی پر جمع ہوجائیے۔

نہال صغیر

ممبئی بلدیاتی انتخابی میں بس دو دن ہی بچے ہیں ۔منگل 21 ؍فروری کو ووٹنگ کا عمل ہوگا اور 23 ؍فروری کو اس کے نتائج کا اعلان کردیا جائے گا ۔اس بار حیدر آباد سے مجلس اتحاد المسلمین ’’اپنی جماعت ،اپنا اتحاد ، اپنی کامیابی ‘‘ کے نعرے کے ساتھ انتخابی میدان میں قسمت آزمائی کررہی ہے ۔اس نے ممبئی بلدیہ کے لئے 59 امیدوار کھڑے کئے ہیں ۔مجلس اتحاد المسلمین کے حیدر آباد سے باہر قدم نکالتے ہی اس پر یہ الزام عائد کیا جانے لگا کہ یہ پارٹی مسلم ووٹوں کو تقسیم کروانے کیلئے آئی ہے ۔2014 کے لوک سبھا انتخاب میں تو اس پر یہ بھی الزام عائد کیا گیا کہ اس نے بی جے پی سے درپردہ سمجھوتہ کررکھا ہے یا وہ وہ بی جے پی کی ایجنٹ ہے ۔یہ الزام اب بھی برقرار ہے ۔الزام ان پارٹیوں اور افراد کی جانب سے لگایا جا رہا ہے جو آزادی ہند کے بعد سے ہی مسلم ووٹوں کے ٹھیکیدار بن کر مسلمانوں کو آر ایس ایس اور دیگر فرقہ پرستوں کا خوف دکھا کر ووٹ لیتے رہے ۔لیکن انہوں مسلمانوں کی ترقی کیلئے کو ئی کار ہائے نمایاں انجام نہیں دیئے ۔حتی ٰ کہ فسادات ،بم دھماکے میں مسلم اعلیٰ تعلیم یافتہ نوجوانوں کی فرضی گرفتاری سے مسلمانوں کا یہ حال کیا کہ آزادی کے وقت جس قوم کی معاشی حالت قابل قدرتھی آج پسماندگی کے عمیق کھائی میں ہے اور سرکاری نوکریوں میں 35 فیصد سے گھٹ کر 3 فیصد کے قریب آ گیا ہے ۔مسلم محلے گندگی ،مفلسی اور یاسیت کا منھ بولتا نمونہ ہیں ۔ایسا نہیں ہے کہ مسلمانوں نے ان حالات سے نکلنے اور قوم کی حالت سدھارنے نیز سیاسی بے چارگی دور کرنے کیلئے کچھ نہیں کیا ۔انہوں نے کوششیں کیں اس نے کچھ پھل بھی دیئے لیکن مسلمانوں کو جس اجتماعی مجرم ضمیری میں مبتلا کردیا گیا تھا اس کی وجہ سے وہ درخت زیادہ دنوں تک تو کیا ایک موسم سے زیادہ پھل نہیں دے سکا اور سوکھ گیا ۔ایسے دگر گوں حالات میں مسلمانوں کی جانب سے ایک بار پھر ایک نئی آواز جو نئی بھی نہیں ہے بلند ہوئی ہے ۔یہ آواز ہے مجلس اتحاد المسلمین کی آواز جس نے قوم کے حالات دیکھ کر سکون و اطمینان کو تج کر حید رآباد سے باہر قدم نکا لا ۔اس کے بڑھتے قدم سے گھبرا کر مسلمانوں کے درمیان نام نہاد سیکولر پارٹیوں کے مسلم نما دلال حرکت میں آگئے اور انہوں نے طرح طرح سے مسلمانوں کو گمراہ کرنے اور ان میں شکوک کے بیج بونے شروع کردیئے ۔وہی پرانا ڈر اگر تم نے مجلس کو ووٹ دیا تو آر ایس ایس کا منصوبہ کامیاب ہو جائے گا ۔ایک صحافی جو کہ سوشل میڈیا پر کافی متحرک ہیں علی سہراب ان کا نام ہے انہوں نے ایسے ہی لوگوں پر اپنے ایک ٹوئٹ میں تنقید کیا ’’دلت ،دلت کو ووٹ دے تو آر ایس ایس نہیں جیتتا ،یادو یادو کو ووٹ دے تو آر ایس ایس نہیں جیتتا ،مسلم مسلم کو ووٹ نہ دیں ورنہ آر ایس ایس جیت جائے گی ، غضب کی منطق ہے‘‘۔

مجلس کے خلاف طرح کے پرپگنڈے کئے جارہے ہیں ۔اس میں سے ایک یہ بھی ہے کہ وہ جو کچھ بول رہے ہیں وہ جھوٹ ہے ۔لیکن میں نے ایک ویڈیو دیکھی جس میں وزیر اعلیٰ تلنگانہ اسمبلی میں اکبر الدین کے سوالوں اور مطالبات کا جواب دے رہے ہیں ۔اس سے یہ صاف ہو جاتا ہے کہ مجلس اپنی کم مائیگی کے باوجود مسلمانوں کے مسائل کو اٹھاتی بھی ہے اور اسے اتنی قوت سے اٹھاتی ہے کہ حکومت اس کو قبول کرنے میں ہچکچاتی بھی نہیں ہے ۔مسلمانوں کا اصل مسئلہ یہ ہے کہ آزادی کے بعد کی سیاسی غلامی سے پیدا شدہ حالت نے انہیں یہ سوچنے کے قابل ہی نہی رکھا ہے کہ وہ بھی سیاسی قوت بن سکتے ہیں اور مرکز میں وہ اس قابل بن سکتے ہیں کہ حکومت ان کے اشاروں پر بنے اور گرے گی ۔لیکن یہ صورتحال اس وقت بنے گی جب مسلمان کسی ایک سیاسی جھنڈے کے نیچے جمع ہوں اور بیس پچیس سال تک اس کے ساتھ رہیں ۔ یہ ساتھ ذاتی مفاد کیلئے نہ ہو کرفقط قوم کیلئے ہو تو انشاء اللہ اچھے نتائج بر آمد ہوں گے ۔اس کے لئے ضروری ہے کہ آزادی کے بعد کی تاریخ پر نظر ڈالی جائے ۔کانگریس اور اس کے کارنامے مسلمانوں کو بار بار بتائی جائیں ۔مسلمانوں کو یہ بھی بتایا جائے کہ کس طرح مسلم چہروں والے سیاسی دلالوں نے کانگریس کی حمایت میں مسلمانوں کا برا حال کیا ۔ان دلال نما مسلم لیڈروں کو بنگلہ اور کار تو مل گیا لیکن مسلمان مفلوک الحالی انتہائی گہرائی میں گرتا چلا گیا ۔اب اگر مجلس مسلمانوں کو آواز دے رہی ہے انہیں سیاسی طور پر متحد کرنا چاہتی ہے تو مسلمانوں کو ان کی آواز پر لبیک کہنا ہی چاہئے اور یہ دکھا دینا چاہئے کہ وہ اب جاگ گئے ہیں اور اپنے حقوق کیلئے سیاسی قوت بننے کی جانب قدم بڑھا رہے ہیں ۔یہاں ایک بات قابل غور ہے کہ ہو سکتا ہے کہ مجلس کا کہیں کوئی امیدوار انکے معیار پر کھرا نہیں اترے لیکن انہیں امیدوار کو نہیں مجلس کو ووٹ دینا چاہئے تاکہ ہم مستقل میں سیاسی قوت بن کر ابھر سکیں اور ہماری بیچارگی کا دور ختم ہو ۔ ہم اگر اسی طرح ذرا ذرا سی باتوں اور مختلف پہلو سے اپنے نمائندوں میں خامیاں ہی ڈھونڈتے رہیں گے تو یقین جانئے آپ کی سیاسی غلامی کا دور کبھی ختم نہیں ہوگا ۔دائیں بائیں مت دیکھئے سیدھا اس شخص کو دیکھئے جو اپنے سکون و آرام کو قربان کرکے آپ کی سیاسی بے وزنی ختم کرنے کیلئے فکر مند ہے ۔