کیا واقعی عدلیہ آزاد ہے اور عوام کو ڈرنے کی ضرورت نہیں

’’ملک میں عدلیہ آزاد ہے اور قانون ابھی اپنا کام کررہا ہے اس لئے کسی بھی شہری کوخواہ وہ کسی بھی مذہب سے تعلق رکھتا ہوخوفزدہ ہونے کی ضرورت نہیں ہے۔ ہم ان کے حقوق کے نگراں ہیں ۔ انہیں تحفظ فراہم کرانا ہماری ذمہ داری ہے ۔ملک میں عمومی طور پرعدم رواداری نہیں ہے ۔صرف چند لوگ ہیں جو نفرت انگیز بیان بازی کررہے ہیں ۔اس میں کہیں نہ کہیں سیاست بھی کارفرما ہے ،لیکن کسی کو بھی ملک کے آئین کے جذبات کے ساتھ کھلواڑ کرنے کی اجازت نہیں دی جاسکتی‘‘۔یہ چند اقوال ہیں جو نئے چیف جسٹس ٹی ایس ٹھاکر ایک پروگرام میں ملک میں رواداری کے مسئلے پر ہورہی بحث پر صحافیوں سے فرما رہے تھے ۔ جسٹس ٹھاکر کی باتوں میں ان کی صاف ستھری شبیہ اورانصاف پسندی و سچائی کی جھلک دکھتی ہے ۔اس کے علاوہ ان کے بیان میں اور کوئی خاص بات نہیں ہے ۔اگر ملک میں امن و قانون کی حکومت ہو تو اسے بتانے اور جتانے کی ضرورت ہی نہیں ہے ،وہ خود ہی نظر آتا ہے لوگوں کی باتوں ،عام آدمی کی نجی محفلوں چائے خانوں کی خوش گپیوں کے درمیان بھی اس کی وضاحت ہوتی ہے کہ عوام عدالتی نظام سے کس قدر مطمئن ہے۔ اس طرح کی باتیں وقتی طور پر خوشگواریت کا احساس تو دلاتی ہیں لیکن پائیداری اسی وقت ممکن ہے جب ملک میں انصاف ہو تا ہوا نظر آئے۔سلمان خان کو بامبے ہائی کورٹ کے ذریعہ بری کئے جانے کے بعد عام آدمی کا کیا تاثر ہے وہ ذیل کی کچھ بالکل عام قسم کے لوگوں کی گفتگو سے ظاہر ہوتا ہے۔اسٹیشن کو جاتے ہوئے تین مزدور ٹائپ کے لوگوں کی آپسی گفتگو کاموضوع سلمان خان پر بامبے ہائی کورٹ کا فیصلہ ہی تھا۔ان کا لب لباب یہ تھا کہ سب پیسوں کی مایا ہے غریب کا یہاں کوئی نہیں ہے ۔سلمان کی گاڑی سے جو ہلاک ہوئے یا جن کے زخمی ہونے کی وجہ سے ان کے خاندان کے روزی روٹی کا مسئلہ پیدا ہوا ہے ان کے لئے کورٹ کا فیصلہ کیا ہے یا حکومت کیا کررہی ہے ؟ایک شخص نے طنزیہ انداز میں کہا کہ بھائی فٹ پاتھوں پر سونے والے انسان تھوڑے ہی ہیں جن کے لئے کوئی کچھ آواز اٹھائے ۔مائکروبلاگنگ سائٹ ٹوئٹر پر ایک ٹوئٹ کچھ اس طرح تھا جو کافی مقبول بھی ہوا’’بس یہی سمجھ آیا ہے کہ آج سلمان کو سزا ہو جاتی تو میرا پیسے پر سے بھروسہ اٹھ جاتا‘‘ایک اور ٹوئٹ تھا’’قانون اندھا ہوتا ہے اس کے ہاتھ لمبے ہوتے ہیں،اندھے پن کی وجہ سے کئی بار وہ لمبے ہاتھ مجرم کی گردن تک پہنچنے کے بجائے اسکی جیبوں میں چلے جاتے ہیں ‘‘۔ اس طرح کے فیصلے مایوسی پیدا کرتے ہیں اور نظام عدلیہ پر عوام کے اعتماد کے اٹھنے کا سبب بن رہے ہیں ۔لیکن سب کچھ غلط نہیں ہو رہا ہے، کچھ نہ کچھ اچھا بھی ہو رہا ہے جیسا کہ ایک فیصلہ یکساں سول کوڈ کے مریضوں کی مایوسی کے تعلق سے ہے ۔ یکساں سول کوڈ کے نفاذ کے لئے سپریم کورٹ نے بی جے پی دہلی کے مقامی لیڈر اشونی کمار اپادھیائے کی درخواست رد کردی ساتھ ہی اس کے وکیل سے کہا بھی کہ اگر اس طرح کی حرکت آیندہ ہوئی تو عدالت سختی کے ساتھ پیش آئے گی۔عدالت کا ایک اور ریمارک بھی اچھا تھا ’’جس کے ساتھ (مسلم خواتین)کے ساتھ ناانصافی ہو رہی ہے وہ خود کیوں نہیں عدالت سے رجوع ہوتیں‘‘ ۔واضح ہو کہ مسلم خواتین سے انہی حضرات کو ہمدردی ہے جن کی نگرانی میں اورجن حمایت سے فسادات ہوتے ہیں اور اس میں یہ بتانے کی قطعی ضرورت نہیں کہ مسلم خواتین کے ساتھ کیا سلوک ہوتا ہے ۔خود بیٹیوں کی سیلفی کی اور گھروں میں بیت الخلاء بنوانے کے تحریک کے علمبردار جب گجرات کے وزیر اعلیٰ تھے تو ان کی نگرانی میں اور سرپرستی میں خواتین کو بے حرمت کیا گیا اور انہیں زندہ آگ کے حوالے کردیا گیا ۔وہ واقعہ تو رہتی دنیا تک کے لئے تاریخ میں محفوظ ہو گیا جب ایک حاملہ خاتون کا پیٹ چاک کرکے بچہ نکال کر تلوار پر اچھالا گیا اور پھر آگ کے حوالے کردیا گیا ۔ایسے لوگ محض مسلم خواتین کی ہمدردی کا ڈھونگ کرکے اسلام اور مسلم معاشرہ کی بدنامی کے لئے ہی ایسے معاملات کو لے کر سڑکوں ،پارلیمنٹ یا کورٹ میں جاتے ہیں ۔شکر ہے کہ عدالت نے نہ صرف اس عرضی کو خارج کردیا بلکہ انہیں پھٹکار بھی لگائی جس سے یقیناعدلیہ کی دھندلاتی شبیہ کو بہتر کرنے میں مدد ملے گی۔کیوں کہ اب ہماری عدالتیں عقائد اور اجتماعی ضمیر کی بنیاد پر فیصلے سنانے لگی ہیں ۔عدلیہ کے تعلق سے شانتی بھوشن کی بات اب تک یاد ہے جب انہوں نے سپریم کورٹ میں کسی معاملہ کی سماعت کے دوران کہا تھا کہ سپریم کورٹ کے اکثر جج بدعنوان ہیں ۔اس پر جج صاحب نے اعتراض کہ آپ ایسا نہ کہیں بلکہ یہ کہیں کہ کچھ جج بدعنوان ہیں لیکن شانتی بھوشن اپنی بات پر قائم رہے۔ابھی حال میں سابق چیف جسٹس کاٹجو نے ایک انٹر ویو میں کہا کہ پچاس فیصد سے زیادہ جج بدعنوان ہیں ۔ اب یہ بات کاٹجو سے زیادہ کون جان سکتا ہے وہ خود اس سسٹم کا حصہ رہے ہیں ۔