یہ ایک سوال ہے جو ہندوستان کا مسلمان خود اٹھاتا رہا ہے اور اپنے ہی لوگوں میں  جواب پیش کر کے خوش بھی ہو جاتا ہے مگر ملک کی کسی ایجنسی یا سیاسی تنظیم نے  مسلمانوں کی طرف سے کسی اسمبلی یا پارلیمنٹ میں زوردار بحث کرنے کی ضرورت بھی محسوس نہیں کی یعنی اگر کسی مسلم  تنظیم پر پابندی لگی تو وہ بھی جائز تھی اور   جو مسلم نوجوان کسی دہشت گردانہ کاروائی میں ملزم ٹھہرائے گئے تو انہیں بھی  سب نے یک طرفہ اور متفقہ طور پر دہشت گرد مان لیا-وہ لوگ جو تاریخ سے ناواقف ہیں یا صرف پچھلے دس بیس سالوں سے یہ دیکھ رہے ہیں کہ کس طرح بابری مسجد کو شہید کیا گیا اور مسلم نوجوان خاص طور سے سیمی کے لڑکے سڑکوں پر اترنے پر مجبور ہوئے اور اشتعال انگیز نعرے اور پمفلٹ کے ذریعے ملک کی فضا کو خراب کرنے کی کوشس کی انہیں قصوروار قرار دیتے ہیں انہیں شاید یہ نہیں پتہ کہ ہمارے ملک میں بابری مسجد کو صرف ایک بار شہید کیا گیا تھا مگر مسلمان تو آذادی کے بعد سے مسلسل شہید ہوتا رہا ہے اور اس وقت جب میرٹھ اور ملیانہ میں ہاشم پورہ  کے علاقے سے پی اے سی نے مسلمانوں کو جس میں بوڑھے اور جوان سبھی تھے ٹرک میں بھر کر لے جا کر قتل کر دیا تو اس وقت سیمی کا کوئی وجود بھی نہیں تھا یا اگر تھا بھی تو یہ لوگ صرف دعوت و تبلیغ یا فسادات متاثرین کیلئے راحت کا سامان مہیا کروانے میں مصروف رہے ہیں جو بعد میں لاشوں کو اٹھاتے اٹھاتے خود بھی بھٹک گئے  تو انہیں اس رخ پر آنے کیلئے کس نے مجبور کیا -ٹائمس آف انڈیا کی خاتون صحافی  جیوتی پنوانی نے جنہوں نے ممبئ فساد کو بہت ہی قریب سے دیکھا ہے اور اس فساد کے بعد ملک میں ہونے والے بم دھماکوں اور مسلم نوجوانوں کی گرفتاری کو بھی دیکھا ایک بار اپنے ایک مضمون میں لکھا تھا کہ جس طرح ممبئ فساد میں مسلمانوں کا قتل عام کیا گیا اور ان کی عورتوں کو بھی بے آبرو کیا گیا شکر ہے کہ مسلم نوجوانوں کا ردعمل اتنا شدید نہیں رہا ورنہ اس ظلم اور پولس کی خاموشی کے بعد تو مسلمانوں کا بچہ بچہ حنیف الدین بن جانا چاہیے تھا(حنیف الدین آسٹریلیا میں ڈاکٹر تھا جسے دہشت گردانہ کاروائی میں گرفتار کر کے بعد میں رہا کردیا گیا تھا )

غرض کہ مسلمانوں کی گرفتاری یا انہیں دہشت گرد اور غدار ثابت کرنے کی یہ سازش نئ نہیں ہے -  مولانا ابولکلام آذاد نے اپنی  کتاب انڈیا ونس فریڈم میں ایک جگہ لکھا ہے کہ ملک کے بٹوارے کے بعد جب ہندوستان ہر طرف سے جل رہا تھا اور یہ آگ دلی تک پہنچ گئی تو مسلمانوں نے گاندھی جی سے شکایت کی اور خود جواہر لال نہرو نے کہا کہ جس طرح مسلمانوں کو کتوں اور بلیوں کی طرح مارا جارہا ہے یہ صورتحال ناقابل برداشت ہے اور ہمیں شرم آرہی ہے کہ ہم انہیں بچا نہیں پا رہے ہیں-سردار پٹیل نے گاندھی جی سے کہا کہ جواہر لال کی شکایت ان کے لیںے یکسر ناقابل فہم ہے -ہو سکتا ہے چند اکا دکا واقعات ہوئے ہوں لیکن حکومت مسلمانوں کی جان مال کو بچانے کیلئے کوشس کر رہی ہے- مگر جب بار بار مسلمانوں کے قتل عام کی شکایت زور پکڑنے لگی اور سردار پٹیل کیلئے جواب دینا مشکل ہو گیا تو انہوں نےمسلمانوں کے قتل عام کا  جواز بھی ڈھونڈھ لیا اور یہ نظریہ پیش کیا کہ مسلمانوں کے علاقوں سے مہلک اسلحے برآمد کیے گئے تھے یعنی اگر ہندوؤں اور سکھوں نے جارحیت میں پہل نہ کی ہوتی تو مسلمانوں نے انہیں تباہ و برباد کر دیا ہوتا- مولانا لکھتے ہیں کہ اس طرح ایک روز جب ہم لوگ معمول کے مطابق گورنمنٹ ہاؤس میں میٹنگ کیلئے اکٹھا ہوئےتو سردار پٹیل نے  کہا کہ پہلے ہم سب کیبنٹ ہاؤس کے اینٹی چیمبر میں چلیں اور وہ ہتھیار دیکھ لیں جو مسلمانوں کے قبضے سے برآمد کیے گئے ہیں- ہم وہاں پہنچے تو کیا دیکھتے ہیں کہ میز پر کچھ باورچی خانوں میں استعمال ہونے والی چھری یا جیب میں قلم اور پنسل تراشنے والے چاکو پڑے ہیں جن میں کچھ زنگ آلود لوہے کی سلاخیں جو پرانے مکانات کے جنگلوں سے نکالی گںُی تھیں اور کچھ ڈھلے ہوئے پانی کے پائپ تھے -لارڈ ماؤنٹ بیٹن نے ان میں سے ایک دو سامان اٹھا کر طنزیہ مسکراہٹ بکھیرتے ہوئے کہا کہ اگر ان  اسلحوں کی مدد سے دلی پر قبضہ کیا جاسکتا ہے تو یہ بہت ہی حیرت کی بات ہے -مگر لارڈ ماؤنٹ بیٹن کو شاید یہ نہیں پتہ تھا کہ آنے والے دنوں میں مسلمانوں کی گرفتاری کیلئے کوئی وجہ بھی نہیں ہوگی اور انہیں صرف ان کی اسلامی بیداری اور سوچ  کی وجہ سے بھی گرفتار اور قتل کیا جائے گا اور ثبوت کے طورپر کچھ مذہبی کتابیں پیش کر دی جاںُیں گی- اس کے بعد ایک دور ایسا بھی آئے گا جب دنیا کا سارا کاروبار آن لاںُن ہوگا مگر مسلمانوں کے لئے آن لائن ہونا بھی فساد کا سبب ہو گا اور   مسلمانوں کی آن لائن گرفتاریاں بھی شروع ہو جائیں گی! جو ہو رہا ہے-کیا یہ ہندوستانی مسلمانوں کی بدقسمتی نہیں ہے کہ اب مسلمان والدین اپنے بچوں کو انٹرنیٹ کی سائٹ گوگل اور یو ٹیوب پر بھی جانے سے اس لئے منع کرتے ہیں کہ کہیں غلطی سے ان کا لاڈلا  آئی ایس آئی ایس کی ساںُٹ نہ کلک کر دے - اور بے شک ملک عزیز میں مسلمانوں پر دباؤ برقرار رکھنے کیلئے آذادی کے بعد سے ہی سب سے پہلے اس کے تعلق کو  پاکستان کی خفیہ ایجنسی آئی ایس آئی سے جوڑا گیا اور پھر القاعدہ اور طالبان سے -جب امریکہ نے افغانستان سے ان کے خاتمے کا اعلان کیا تو ملک میں ہر طرف دھماکے ہونا شروع ہوگئے اور پھر  2010 تک سیمی کے نام پر مسلم نوجوانوں کو مختلف دھماکوں کے الزام میں گرفتار کیا جاتا رہا ہے -2014 میں اسلامک اسٹیٹ آف عراق اور شام کی شہرت کے بعد اب مسلم نوجوانوں کی گرفتاری کا ایک اور جواز سامنے آچکا ہے دیکھنا ہے کہ جب تک دہشت گردی کے نام کی کوئی اور فلم ہٹ نہیں ہوجاتی isis نام کی یہ فلم کب تک چلائی جاتی ہے اور مسلم نوجوانوں کو کب تک اس کا ویلن بنا کر پیش کیا جاتا ہے -افسوس آذادی کے بعد ہندوؤں میں بھی گاندھی اور پنڈت جواہر لال جیسے غیرت مند لیڈر اور مسلمانوں میں بھی کوئی ابولکلام آذاد جیسی دبنگ قیادت موجود تھی جن کے سامنے کم سے کم سردار پٹیل نے نام نہاد اسلحوں کو دکھا کر ثبوت پیش کرنے کی زحمت کی- مگر اب ہندوؤں اور مسلمانوں میں بھی ایسی کوئی غیرت مند قیادت نہیں رہی جو موجودہ سرکار اور ان کی انٹلیجنس سے سوال کرے کہ وہ جن مسلم نوجوانوں کو گرفتار کر رہے ہیں ان کی گرفتاری کا حقیقی جواز کیا ہے -کیا اس طرح سے بے تکی گرفتاریاں اور بلا جواز دہشت گردی کی مذمت پر مذمت کر کے دہشت گردی کے خلاف جنگ جیتی جا سکتی ہے؟

یونان و مصر روما سب مٹ گئے جہاں سے 

اب تک مگر ہے باقی نام و نشاں ہمارا 

مستقبل کی صورتحال جو بھی ہو مگر ایران اور حز ب اللہ نے ایک ظالم ،جابر اور مکار حکمراں کی حمایت کرکے نہ صرف شام کے موجودہ بحران کو پیچیدہ بنادیا ہے بلکہ اس نے مرحوم آیت اللہ خمینی کی اس  روایت کو بھی نقصان پہنچائی ہے جو انہوں نے 1979 میں ایک پر امن انقلاب کے بعد قائم کی تھی- بدقسمتی سے اس روایت کے اصل قاتل ایران کے سابق صدر احمدی نژاد ہیں جنہیں عالم اسلام میں نہ صرف  عزت و احترام کی نگاہ سے دیکھا گیا تھا بلکہ آیت اللہ خمینی کی اسلامی روایت کا علمبردار بھی سمجھا گیا تھا  ۔افسوس کی بات تو یہ ہے ایران کے اس اسلام پسند رہنما احمدی نثراد نے ہی شامی حکمراں کے ساتھ شامی عوام کے قتل عام میں خود کو ایک فریق کے طورپر شامل کرکے تنگ نظری کا ثبوت دیا اور اب یہ مسئلہ پوری ایرانی قوم کی انا کا سوال بن چکا ہے اور پورا ایران اس شک و شبہات میں مبتلاء ہے کہ کہیں یہ تحریک لبنان اور عراق تک طول پکڑ کر اس علاقے میں موجود شیعہ آبادی اوران کی حکومت کیلئے خطرہ نہ بن جائے ۔ یہ خدشہ بھی درست ہو سکتا ہے مگر اس کا حل بھی خالص قرآن وسنت کے احکامات پر یقین و عمل سے ہی نکالا جاسکتا ہے نہ کہ کسی ظالم کی مدد و حمایت سے جبکہ اس کا اپنا مستقبل بھی تاریک ہو ۔

ایران اور حزب اللہ کے اس ناقص فیصلے سے عالم اسلام دوخانوں میں تقسیم ہوچکا ہے  اور جو فائدہ عرب بہار سے عالم اسلام کو ہونا چاہئے تھا وہ ایک سیاسی کشمکش کا شکار ہو چکا ہے ،جس کا بہر حال فائدہ اسرائیل کو ہی ہو رہا ہے ۔ یعنی ایران اور عراق کے درمیان خلیج کی پہلی جنگ میں جو غلطی سعودی عرب اور کویت نے امریکہ کی امداد لیکر کی تھی ایران کی موجودہ قیادت اور اس کے حمایتی شام کے اندرروس کی مداخلت کے ساتھ وہی غلطی دوبارہ دوہرا چکے ہیں مگر ایران یہ بھول رہا ہے کہ خلیج کی یہ جنگ ایک خالص علاقائی اور سیاسی کشمکش تھی اور ایران کے اس انقلاب سے عراقی حکمراں اور سعودی حکومت دونوں کو خطرہ لاحق ہو چکا تھا ۔ جبکہ عالم اسلام کی جہاندیدہ شخصیات عمائدین کی جماعت منجملہ امت مسلمہ کو اس فساد سے دلی رنج پہنچا تھا ۔ خود بعد میں سعودی حکومت نے صدام حسین کی حکومت کے خاتمہ کیلئے شیعہ اور سنی کا مسئلہ کھڑا نہیں کیا اور مرحوم آیت اللہ خمینی نے بھی عراق ایران کی اس جنگ کو شیعہ اور سنی کے رنگ میں نہیں رنگنے دیا ۔ بعد کے حالات میں جب احمدی نژاد صدارت کے منصب پر فائز ہوئے تو انہیں بھی عالم اسلام میں شہرت اور عزت ملی اور امت مسلمہ نے اپنا قائد تسلیم کیا کیوں کہ وہ ایران کے دیگر صدور کے برعکس مرحوم آیت اللہ خمینی  کے زیادہ قریب رہے ہیں اور نظریاتی طور پر ان کی شخصیت شیعہ سنی اتحاد کی علامت کے طور پر مشتہر رہی ہے۔ ایک سروے کے مطابق خود سعودی عوام کی اکثریت نے احمدی نژاد کو عالم اسلام کی قیادت کا اہل قرار دیا تھا۔ خلیج کی اس پہلی جنگ کے دوران ہمارے سامنے سے ایک اچھی خبر یہ بھی گزرچکی ہے کہ سعودی عرب کے اس وقت کے حکمراں اور پاکستان کے فوجی صدر ضیاء الحق کے درمیان یہ خفیہ معاہدہ ہوا تھا کہ پاکستانی حکومت کسی بھی ناگہانی جنگی صورتحال میں سعودی حکومت کی مدد کریگی جسکے عوض سعودی عرب کی حکومت پاکستان کو ایٹمی اسلحہ کی تیاری میں مالی امداد فراہم کریگی ۔اس معاہدہ کے تحت خلیج کی اس جنگ کے دوران سعودی حکومت نے ضیاء الحق سے کہا تھا کہ وہ ایران سے قریب سعودی سرحد پر کچھ پاکستانی فوجوں کو تعینات کرے تاکہ عراقی فوجوں کی مدد کی جاسکے ۔ ضیاء الحق نے یہ کہتے ہوئے فوج بھیجنے سے انکار کردیا تھا کہ ہمارا معاہدہ کسی غیر مسلم ملک کی طرف سے ممکنہ حملے کی صورت میں طئے پایا ہے جبکہ ایران ایک مسلم ملک ہے اور یہ عربوں کا آپسی معاملہ ہے نہ کہ عالم اسلام کا ۔ یہ واقعہ کہاں تک سچ ہے یا کہاں تک جھوٹ مگر ایران ایک شیعہ ملک ہے سعودی عرب سنی ملک ہے اس کے باوجود اہل دانش اور تحریکی علماء کی یہ سوچ بالکل نہیں رہی ہے کہ دونوں میں کوئی تفریق کی جائے اور ہمارے درمیان مشرکین و ملحدین کو مداخلت کا موقع مل جائے جیسا کہ ماضی میں ہوا ہے اور ہم آج پھر وہی حالات پیدا کررہے ہیں - اسی طرح کچھ سال پہلے جب  ایران کے جوہری پلانٹ کو لےکر امریکہ اور اسرائیل نے  بحران پیدا کیا تو عالم اسلام پوری طرح ایران کے ساتھ رہا ہے اس درمیان یہ بحث بھی چھڑی کہ اگر اسرائیل ایران پر حملہ کرتا ہے تو اس کے جنگی جہازوں کو ایران تک سفر کرنے میں ایک ہزار میل کا سفر طے کرنا ہوگا اور پھر اس درمیان اگر ایران نے خود اسرائیل کو نشانہ بنادیا تو صورتحال بہت سنگین ہو سکتی ہے ایسی صورت میں کیا سعودی عرب اس دوری کو کم کرنے کیلئے اسرائیل کو اپنی فضائی حدود کے  استعمال کرنے کی اجازت دیگا ۔ اس خبر کے بعد نہ صرف سعودی حکومت نے اس کی تردید کی بلکہ ترکی اور پاکستان نے بھی جو کہ امریکہ کے دوست رہے ہیں ایران پر کسی بھی ممکنہ حملے کی صورت میں امریکی جنگی جہازوں کو پڑاؤ دینے سے انکار کیا ۔اس کے برعکس ایران اور حز ب اللہ نے جو رخ اختیار کیا ہے یہ ایک ایسی سیاسی غلطی ہے جس کا خمیازہ پورے عالم اسلام کو بھگتنا پڑسکتا ہے۔ اس طرح ایران نادانستہ  طور پر اسرائیلی منصوبے کو بھی تقویت پہنچارہا ہے اور یہ فیصلہ خود اس کے اپنے حق میں بھی نہیں ہے۔ بلکہ یوں کہا جائے کہ جو غلطی سعودی حکمراں نے مصر میں کی ہے وہی غلطی ایران بھی دوہرا کر ایران اور سعودی حکومت مل کر اسرائیل کو تحفظ فراہم کررہے ہیں -

مزید بدقسمتی یہ ہے کہ اب جہاں اہل دانش اور نام نہاد دانشور کارپوریٹ میڈیا میں تبدیل ہو چکے ہیں کارپوریٹ کلچر نے نہ صرف  عام انسانوں, صنعت و تجارت اور سماج کے مزاج کو بدل دیا ہے وہیں سیاست بھی اب انسانوں کی فلاح وبہبود کا ادارہ نہ ہو کر عیاشی اور بد عنوانی کا اڈہ بن چکی ہے اورجدید میڈیا جو کہ ان کی بدعنوانی پر نظر رکھنے کیلئے وجود میں آیا تھا یاانہیں ایک اچھی اور صاف ستھری حکومت کیلئے رہنمائی کر سکتا تھا خود بھی ان کی بدعنوانی میں شریک ہو کر سیاستدانوں کا آلہ کار بن چکا ہے - سابق چیف جسٹس کاٹجو نے بہت سخت لہجہ استعمال کرتے ہوئے کہا ہے کہ ان لوگوں کو تو کھڑا کرکے گولی مار دینا چاہیے - اچھا ہے کہ کاٹجو مسلمان نہیں ہیں ورنہ ان سے بھی یہ سوال کر دیا جاتا کہ کہیں آپ داعش اور طالبان کی حمایت تو نہیں کر رہے ہیں - شکر ہے کہ جدید سیاسی تہذیب میں کاٹجو کی ذہنیت کو تحریک نہیں ملتی مگر جب ان کے خلاف بغاوت کی چنگاری اٹھتی نظر آتی ہے تو کہیں نہ کہیں کوئی دھماکہ کروا دیا جاتا ہے اور پھر حکومتی سرمائے پر پل رہے  میڈیائی دانشور دہشت گردی کا شور مچانے لگتے ہیں- اس طرح حق و باطل کی معرکہ آرائی میں امن اور تشدد کے صرف دو ہی مجاہد نظر آتے ہیں وہ ہیں دہشت گرد اور دانشور -اب شاید ہمیں یہ وضاحت کرنے کی ضرورت نہیں کہ مظلوموں کے محمود اور محمد کہاں ہیں - حدیث ہے کہ دجال اپنے ایک ہاتھ میں جنت اور دوسرے ہاتھ میں جہنم کی تصویر پیش کرے گا - پس جس نے جہنم کو ترجیح دی اس نے جنت پا لیا اور دجال کی جنت کا طلب گار جہنم رسید ہو جائیگا - دجالی میڈیا جھوٹ کو سچ اور سچ کو جھوٹ بنا کر یہی دو چہرہ پیش کر رہا - ان کے ساتھ کون لوگ کھڑے ہیں اور ان کی پست پناہی کون کر رہا ہے اور ان کا کردار کیا ہے یہ لوگ بھی باآسانی پہچانے جا سکتے ہیں- مگر سوال پھر وہی دنیاوی نفع اور نقصان کو برداشت کرنے کا ہے- یہی مادیت ہے اور مادیت ہی دجال کا اصل فتنہ ہے -

ہو سکتا ہے کہ مریم کی اس کہانی کو بھی کسی دہشت گرد ناول نگار نے کسی خاص مقصد کیلئے ایک افسانوی رنگ دے دیا ہو لیکن یہ بھی سچ ہے کہ ہر کہانی اپنےافسانوی انداز میں آنے کیلئے حقیقت کی محتاج ہوتی ہے - مصر کی ایک خاتون دانشورزینب الغزالی کی شخصیت اور قیدوبند کے دوران جبروتشدد کی حقیقت سے پورا عالم اسلام واقف ہے -ان کا بھی قصور صرف اتنا تھا کہ انہوں نے کچھ یتیم بچوں کی کفالت کا ذمہ اٹھا رکھا تھا جن میں کچھ ایسے بچے اور خاندان بھی تھے جن کے باپ اور بھائی جمال ناصر کی جیلوں میں قید تھے یا انہیں قتل کر دیا گیا تھا- یہی وجہ تھی کہ زینب الغزالی جمال ناصر کی سوشلسٹ طرز حکومت کی شدت سے مخالفت کیا کرتی تھیں- جمال ناصر نے جس طرح انہیں نو سال تک سلاخوں کے پیچھے ڈال کر جبروتشدد کے دور سے گزرا انہوں نے خود اپنی کتاب زنداں  کے شب و روز میں رونگٹے کھڑے کر دینے والی  داستان کو بیان کیا ہے جو اپنے آپ میں ظلم اور حیوانیت کی تاریخ میں ایک دستاویز ہے- انہوں نے لکھا ہے کہ جمال ناصر کے سپاہی نہ صرف انہیں الٹا لٹکا کر پیٹا کرتے بلکہ کبھی ایک کمرے میں بند کرکے ان کے اوپر خونخوار کتوں کو بھی چھوڑ دیا جاتا تھا اور پھر وہ کتوں کے حملوں سے نہ صرف لہو لہان ہو جاتیں بلکہ یہ کتے ان کے کپڑوں کو نوچ کرانہیں برہنہ بھی کر دیتے تھے - اس طرح کے واقعات جدید جمہوری تہذیب اور عالمی ادارے اقوام متحدہ کے اپنے وجود پر سوالیہ نشان کھڑا کر دیتے ہیں-خلافت عثمانیہ کے زوال کے بعد پہلی بار مسلم ملکوں میں بھی دینداراور با عصمت خاتون کو جیلوں کے اندر قید کر کے تشدد سے گذارنے کی روایت شروع ہوئی اور مسلم دنیا کے دیگر حکمراں بھی خاموش رہے-

بات اکیسویں صدی کی جدید تہذیب, موجودہ لبرل طرز سیاست اور حقوق نسواں کی علمبردار تنظیموں کے اس مہذب دور کی کی جائے تو ہمیں 2013 میں نہ صرف مصر کا فوجی انقلاب منھ چڑاتا ہے جہاں فوجی حکومت نے نہ صرف اس انقلاب کے خلاف احتجاج کرنے والی بھیڑ کو گولیوں سے بھون دیا بلکہ احتجاج میں شامل خواتین کو بھی پابند سلاسل کر کے دس دس سال قید کی سزا سنا دی گئی مگر اس ظلم کے خلاف حقوق نسواں کی علمبردار کسی تنظیم نے کوئی احتجاج اور مظاہرہ نہیں کیا تو اس لئے کہ ان کے نزدیک  ایک صالح اسلامی نظام کی نمائندگی کرنے والی مسلمانوں کی بیویاں اور بیٹیاں بھی دہشت گرد ہیں- سچ تو یہ ہے کہ حاجرہ ,آسیہ اور مریم ہر دور میں ریگستانوں کی گرمی زنجیروں کا زخم اور بیڑیوں کے بوجھ کو برداشت کرنے کیلئے تیار رہی ہیں - 6 جولائی 2009 ء کا یہ واقعہ کسی بھی دردمند دل کو دہلا دینے کیلئے کافی ہے جب سبز لباس اور سفید اسکارف میں ملبوس ایک نحیف اور کمزور عورت جس کے ہاتھ اور پیر آہنی زنجیروں سے جکڑے ہوئے تھے جیل اہلکاروں کے ساتھ آہستہ آہستہ  کمرہ عدالت میں داخل ہو تی ہے اور اس کے ہاتھوں سے  ٹپکنے والا خون یہ کہہ رہا تھا کہ جیسے ابھی ابھی اسے  تشدد سے گذرنا پڑا ہے -اس کی یہ حالت دیکھ کر کمرہ عدالت میں بیٹھے ہوئے لوگ بھی تڑپ اٹھے- اسے جج کے سامنے ایک خطرناک دہشت گرد کے طورپر پیش کیا جاتا ہے - وہ جج کے سامنے بیان دیتی ہے کہ  میں ایک مسلمان عورت ہوں مجھے مرد فوجی زبردستی برہنہ کرکے تشدد کا نشانہ بناتے ہیں - میرے سامنے قرآن کے اوراق پھاڑ کر پھینکے جاتے ہیں اور مجھ سے کہا جاتا ہے کہ میں اس پر چلوں - میں نے کئی بار جیل اہلکار سے کہا کہ مجھے میرے بھائی اور میرے وکیل سے ملنے دیا جائے مگر مجھے ملنے نہیں دیا جاتا - میرا کسی دہشت گرد تنظیم سے کوئی تعلق نہیں ہے- میں دنیا میں امن چاہتی ہوں میں امریکہ سمیت دنیا کے کسی ملک سے نفرت نہیں کرتی ہوں البتہ مجھے امریکہ کے عدالتی نظام پر اعتماد نہیں ہے -   

امریکہ کی عدالت میں پیش کی جانے والی اس عورت کا نام عافیہ صدیقی ہے اور انہیں امریکی عدالت نے چھیاسی سال کی سزا سنائی ہے- پاکستان کے ایک معزز گھرانے سے  تعلق رکھنے والی عافیہ صدیقی نے بچوں کی ذہنی نشوونما کے موضوع پر پی ایچ ڈی کی ڈگری حاصل کی ہے جنھیں  2003 میں گرفتاری کے بعد سے ابھی تک ان کے بچوں سے بھی ملنے نہیں دیا گیا ہے -امریکہ میں عافیہ صدیقی کی رہائی کیلئے کئ بار احتجاج اور دستخطی مہم چلائی گئی مگر امریکی حکومت نے یہ کہہ کر انکار کر دیا کہ اگر پاکستانی حکومت اپیل کرے تو راستہ نکالا جاسکتا ہے - پاکستانی حکومت کی اپنی کیا مجبوری ہے یہ تو اللہ ہی بہتر جانے لیکن جس طرح دیگر مسلم ممالک کے حکمراں بھی اس معاملے میں بے غیرتی کا شکار ہیں یہ کہا جاسکتا ہے کہ مسلم حکمراں اخلاقی زوال کے ایک ایسی نچلی سطح سے گذر رہے ہیں جہاں دور دور تک کوئی معتصم با اللہ بھی نظر نہیں آتا - تعجب تو اس بات پر ہوتا ہے کہ ایک زمانے سے طالبان جسے دنیا دہشت گرد کہتی ہے اور جن کے بارے میں مشہور تھا کہ یہ لوگ عورتوں پر ظلم کرتے ہیں جب انہوں نے اپنے علاقے میں جاسوسی کی نیت سے آئی ہوئی برطانیہ کی خاتون صحافی ایون ریڈلی کو گرفتار کیا تو خود ایون ریڈلی نے بیان کیا ہے کہ انہوں نے یقین کر لیا تھا کہ اب نہ صرف ان کی عزت و آبرو کو نیلام کر دیا جائے گا بلکہ ان کا زندہ بچ رہنا بھی کسی معجزے سے کم نہیں ہوگا-اور بیشک جس طرح شام میں مریم , مصر میں زینب الغزالی, امریکہ میں عافیہ صدیقی اور ایران میں ریحانہ جبار کو لبرل اور سیکولر قانون کی مہذب  تلوار سے پر تشدد سزائیں دی گئیں اورآج کل عراق اور شام کی طرف ہجرت کرنے والی نوجوان لڑکیوں کو دنیا کے ہر ممالک کی جیلوں میں قید کیا جا رہا ہے چاہتے تو طالبان بھی ایون ریڈلی کو ان کے خلاف جاسوسی کا الزام لگا کر قتل کر دیتے مگر انہوں نے اس خاتون کے ساتھ جس اخلاقی سلوک کا مظاہرہ کیا نہ صرف اس خاتون نے یہ اعتراف کیا کہ انہیں دنیا پرحکومت کرنے کا حق ہے کلمہ حق پر ایمان لا کر اسلام میں بھی داخل ہو گئیں - شاید ہم ایک سال پہلے کے اس واقعے کو بھی بھول چکے ہیں جب عرب حریت پسندوں نے ہندوستان کی تقریباً چالیس نرسوں کو نہ صرف ایک تہ خانے میں  رکھ کر ان کی جان بچائی بعد میں بحفاظت ایرپورٹ تک پہنچایا تاکہ وہ اپنے وطن جاسکیں اور ڈری سہمی نرسوں کو اطمینان دلایا کہ آپ فکر نہ کریں آپ ہماری بہن جیسی ہیں -اسلام اور مسلمانوں سے بغض رکھنے والے تو بہرحال ان کی اس اسلامی غیرت اور حمیت کے مظاہرے کو بھول چکے ہیں - تعجب ہے کہ حال ہی میں مولانا سجاد نعمانی نے حدیث اور انٹرنیٹ کے حوالے سے عرب حریت پسندوں کواس دور کے خوارج کا  فتنہ قرار دیا ہے اور یہ بھی کہا کہ یہ زانی اور قاتل ہیں - سوال یہ ہے کہ جس حدیث کی روشنی میں انہوں نے  پچیس سے پینتیس سال کے ان نوجوانوں کو خوارج, دہشت گرد اور زانی کے لقب سے نوازا ہے اسی حدیث میں کہیں ان نوجوان لڑکیوں کا بھی ذکر ہے جو سیکڑوں کی تعداد میں عراق اور شام کی طرف ہجرت کر چکی ہیں-اگر عرب کے ان نوجوانوں کو اپنا دفاع کرنے کی بنیاد پر زانی اور دہشت گرد کہا جاسکتا ہے تو کیا ان کی بہنوں اور بیٹیوں کو جواس جنگ کی بھٹی میں ان کی معاون اور مددگار ہیں ، کو طوائف اور آوارہ کہنا مناسب ہوگا ؟