ایسے ہی اور بھی مضامین مختلف اخبارات میں نظر سے گزرے۔ان مضامین میں مسلمانوں کے ذہنوں میں موجود بہت سارے مفروضے دیکھنے کو ملتے ہیں۔مثلاً یہ مفروضہ کہ ۷۰سال پہلے ہمارے آئین کے معماروں نے جس سیکولرزم کی بات کی تھی وہ آج ۷۰ سال بعد بھی ہمارے ملک کی فضا میں کہیں موجود ہے ۔جبکہ ہم یہ سمجھتے ہیں ہمارے ملک کے آئین میں موجود سیکولرز م کو عملاً پوری سنجیدگی کے ساتھ ایک دن بھی برتا نہ جا سکا ۔خود ملک کے پہلے وزیر اعظم بھارتی سیکولرزم کے چمپیئن پنڈت جواہر لال نہرو نے پہلی آزمائش آتے ہی سیکولرزم کو طاق پر رکھ دیا تھا ورنہ بابری مسجد کا مسئلہ کھڑا نہ ہوتا ۔پھر یہ ایک مفروضہ ہے کہ کانگریس پارٹی سیکولر پارٹی ہے ۔اور ہمارے بھولے بھالے اسلاف کانگریس کو سیکولرزم کاٹھیکہ دے کراپنے فرائض سے آنکھیں موند لی تھیں۔ہمیں نہیں معلوم کانگریس نے اپنے سیکولر ہونے کا ثبوت کب دیا تھا ۔اگر ہٹلر انتخابات جیت کر جرمنی کا چانسلر بننے کے باوجود ڈکٹیٹر ہو سکتا ہے تو پھر کانگریس میں چند مفاد پرست مسلمانوں کے وجود کے باوجود اسے فرقہ پرست کیوں نہیں سمجھا جا سکتا جبکہ ہندوستان میں مسلمانوں کے ۹۰ فی صدی مسائل کانگریس ہی کی دین ہیں۔

ایک اور مفروضہ ہے اور یہ مفروضہ بڑی گہری جڑیں رکھتا ہے یہ ہے کہ وطن عزیز میں امت مسلمہ نامی کوئی شئے پائی جاتی ہے۔جو کچھ بھی ہے وہ ایک منتشر بھیڑ ہے بلکہ مختلف گروہ کی بھیڑ ہے ۔کوئی اپنے آپ کو سنی کہتا ہے کوئی شیعہ۔ کوئی حنفی کہتا ہے کوئی شافعی۔کوئی اپنے آپ کومقلد کہتا ہے اور کوئی غیر مقلد ۔اس طرح ان کے سینکڑوں گروہ اور اور ہر ایک کے اپنے گروہی مفادات ہیں ۔ہمارے نزدیک اس بھیڑ کو سو سال پہلے امت مسلمہ کے منصب سے معزول کیا جا چکا ہے ۔ایسا لگتا ہے کہ اب اللہ نے ان کی طرف سے نظریں پھیر لی ہیں۔اب نئی امت مسلمہ کہیں اور تیار ہو رہی ہے ۔جب معتدبہ تعداد ہو جائے گی اور وہ غزوہء بدر سے پہلے کے صحابہ کرام کی تمام آزمائشوں میں پورے اتر جائیں گے تو اللہ ان کی مدد کے لئے ’’گردوں سے فرشتے ‘‘اتارے گا اور وہ اسلام کی نشاۃالثانیہ کا کام کریں گے ۔اب ہم سے کچھ نہیں ہونے والا ۔ہم اپنی ضلالت میں جتنا آگے بڑھ چکے ہیں اس سے پیچھے ہٹنے کا سوال ہی پیدا نہیں ہوتا۔

آزادی سے کچھ پہلے مولانا مودودیؒ نے غالباًاپریل ۱۹۴۷میں جماعت اسلامی کے اجتماع میں ان لوگوں کو جوتقسیم وطن میں ہندوستان میں رہ جانے کے خواہشمند تھے ،کچھ ہدایات دی تھیں۔ان میں سے ایک ہدایت جو ارکان جماعت کے توسط سے تمام مسلمانوں کے لئے تھی وہ یہ کہ اب ہندوستان کے مسلمانوں کو اپنے آپ کو سیاسی کشمکش سے الگ کرلینا چاہئے اور من حیث القوم دعوت کا کام انجام دینا چاہئے ۔مگر مولانا کی اس بات پر عام مسلمان تو کیا بڑے بڑے علماو رہنماؤں نے توجہ نہ دی ۔اسلئے کبھی کبھی ہمارے دماغ میں یہ بات آتی ہے کہ علم دین کا ہونا ایک الگ بات ہے اور بصیرت کا ہونا دوسری بات ۔جو بصیرت مولانا مودودیؒ یا علامہ اقبالؒ کو حاصل تھی وہ ہمارے بڑے بڑے علماکرام کے یہاں مفقود تھی۔مولانا مودودیؒ کی مذکورہ بات پر غور و فکر تو کجاالٹا یہ کہہ کر ان کی کھلی اڑا ئی گئی کہ ’’بھارت ‘‘ میں ہمیں دستوری ضمانتیں اور آئینی تحفظات میسر ہونگے ۔اس لالی پاپ پر مولانا نے جواب دیتے ہوئے کہااگر آپ کی قوم طاقتور ہے تو اسے آئینی تحفظات اور دستوری ضمانتوں کی ضرورت نہیں اور اگر آپ کی قوم کمزور ہے تو اس سے اس کا کوئی بھلا ہونے والا نہیں۔یہ قدرت کی بڑی ستم ظریفی ہے کہ آج بھی ان علماء کے بے بصیرت چمچے مولانامودودیؒ کو مطعون کرنے سے نہیں چوکتے۔مگر خود ان علماء کرام کی اولاد کبھی کبھی اپنے مضامین میں خطبات میں مولانا مودودی ؒ کی باتوں کی توثیق کرتی ہیں کہ کرنے کا کام یہی تھا۔

ہم نے ۷۰ سال سیاسی کشمکش میں گزار دیئے اور ہر نیا دن ہمیں زوال کی ایک نئی صبح دکھاتا رہا ۔ہمارے دشمنوں نے ہمیں اپنے زوال کی گہرائی دکھانے کے مختلف مواقع پر مختلف کمیشن بٹھائے ،مگر ہمیں نہیں جاگنا تھا نہیں جاگے ۔پھر آخر میں سچر کمیشن بنا کر اس کی رپورٹ کو خوب خوب شہرت دی گئی اسلئے نہیں کہ ہم جاگ جائیں بلکہ اسلئے کہ ماضی کے حکمرانوں کو ذلیل کرنا تھا اور ہم نے ذلالت کی حد کردی۔ بجائے اس کے کہ ہم خود کوئی حکمت عملی بناتے ۔ہمارا خون گرم ہوتا اپنی بے عملی کی بنا پر جھنجلاتے،کڑھتے ۔ہم نے اپنی تمام امیدیں انھیں سے وابستہ رکھیں جنھوں نے ہمیں اس حال کو پہونچایا تھا ۔

دوسری طرف آر ایس ایس کو دیکھئے۔علامہ اقبال نے کہا تھا ۔مسلم آئین ہوا کافر تو ملے حور و قصور۔خود اللہ تعالیٰ کہتا ہے تم جس چیز کے لئے جد وجہد کروگے وہ تم کو ملے گی۔تم حلال چاہو گے حلال ملے گا حرام چاہوگے حرام ملے گا ۔آر ایس ایس ۱۹۲۵ سے اس بات کے لئے ’’جہاد ‘‘ کر رہی ہے کہ وہ اس ملک پر بلا شرکت غیرے حکمراں ہو جائے ۔نہ صرف مسلمان بلکہ ملک کے تمام غیر ہندوؤں کو غلام بنا کر رکھ دیا جائے اور اس جہاد میں انھوں نے ہر ممکن ذریعہ استعمال کیا اور آج وہ اپنی جدو جہد میں کامیاب ہیں ۔یہ اللہ کی سنت کے مطابق ہے۔اللہ صرف مسلمانوں کا تھوڑی ہے۔وہ تو سب کا خدا ہے ۔ہر شخص کو اس کی جد وجہد کے مطابق پھل عطا کرتا ہے۔مسلمان آیت کریمہ کا ورد کرتے رہتے ہیں ۔ویسا ان کو پھل ملتا ہے ۔آر ایس ایس نے جیسی اور جتنی جدو جہد کی ہے اس کے مطابق پھل مل رہا ہے ۔مسلمان اپنے حالات کے صد فی صد مستحق ہیں ۔اپنی خامیوں کا ،کوتاہیوں کا بدعملیوں کا یہ انجام انھیں ڈرائے گا ہی۔اور یہ بھی ظاہر ہے کہ بڑا ڈر بڑے لوگوں کو لگے گا۔وہ لاکھ انکار کریں حقیقت یہی ہے۔

ہمارے نزدیک کرنے کا کام آج بھی وہی ہے جو ۷۰؍۷۲ سال پہلے مولانا مودودی بتا گئے ہیں اس طرح کبھی نہ کبھی ملت منزل مقصود تک پہونچ ہی جائے گی ورنہ بصورت دیگر ممکن ہے کہ اسپین کی طرح یہاں سے بھی ہمارانام و نشان مٹ جائے۔وہ لوگ جنھیں مولانا مودودیؒ کے نام سے چڑ ہے ان کے لئے عرض ہے کہ یہ مولانا مودودیؒ کا خانہ ساز نظریہ نہیں ہے ۔حضور ﷺ نے فرمایا تھا ۔میری امت کی دوبارہ اصلاح میرے طریقے پر چل کر ہی ہو سکے گی ۔حیرت انگیز بات یہ ہے کہ یہ فکر خود اس جماعت کے ذہن سے نکل چکی ہے جسے خود مولانا نے قائم فرمایاتھا۔دوسری طرف ہمارے تمام علما کرام یہ بات کہتے نہیں تھکتے کہ ہم مکی زندگی میں جی رہے ہیں۔

آخری بات۔قہر درویش بر جان درویش ۔یہ بات ماننا پڑے گی کہ وطن عزیز میں ۳۰؍۴۰ فی صد ایسے لوگ بھی رہتے ہیں(چاہے ہندو کہہ لیں یا غیر مسلم )جنھیں ترقی کے ایجنڈے سے کوئی سروکار نہیں ۔اچھے دنوں کے جھوٹے وعدوں سے انھیں کچھ لینادینا نہیں۔سب کا ساتھ سب کا وکاس اگر ہوائی باتیں ہیں توان کی بلا سے ۔نوٹ بندی کے ڈرامے میں سو سوا سو لوگ مرگئے تو ان کے کانوں پر جوں نہیں رینگی۔مالیہ پیسے لے کر بھاگ گیا یا مدھیہ پردیش بی جے پی کی صفوں میں آئی ایس آئی ایجنٹ گھسے ہوئے تھے ،تو یہ سب دیش بھکتی کے کام تھے۔یہ سوچنا بہرحال انڈین تھنک ٹیکس کا کام ہیکہ ایسے لوگ ملک کے لئے اثاثہ یا بوجھ ہیں جو ملک کے حقیقی مسائل سے آنکھیں موند کر فرقہ پرستی جیسی باتوں کی بنیاد پر اپنے حکمراں منتخب کرتے ہیں ۔

07697376137 

دام ہر موج میں ہے حلقہ صد کام نہنگ 

دیکھیں کیا گذرے ہے قطرے پہ گہر ہونے تک

سوال یہ ہے کہ اس طوفان کوکیسے روکا جاسکتا ہے ؟ یوں تو اس منافرت کے طوفان کو روکنے کی ذمہ داری ہر شریف ہندوستانی کی ہے لیکن چونکہ اس کی زد سب سے زیادہ اقلیت پر پڑتی ہے اس لئے اس طوفان کو روکنے کی اورمذہبی اور تہذیبی پھانسی کے فیصلے کو بدلنے کی سب سے زیادہ ذمہ داری اقلیت کے باشعور اشخاص پر عائد ہوتی ہے ۔ان علماء پرعائد ہوتی ہے، جنہیں اللہ نے کتاب کا علم دیا ہے ۔ہمیں ناامید نہیں ہونا چاہئے لیکن یہ بھی ضروری ہے کہ ہم صحیح لائحہ عمل مرتب کریں اور اس کو عملی جامہ پہنائیں ، ہم روڈ میپ بنائیں اور اس پر سفر شروع کریں ،ہم کام کا خاکہ بنائیں اور اس میں رنگ بھریں،ہم نے ہندوستان میں وہی غلطی کی ہے جو اسپین میں کی تھی، اسپین میں بڑے بڑے مسلمان علماء اور فضلاء اور ادبا پیدا ہوئے تھے لیکن اسپین میں مسلمانوں نے اکثریت کی آبادی کو اسلام سے قریب کرنے کی کی کوشش نہیں کی تھی،ہم نے بھی اس ملک میں لسان قوم اور دین قوم سے واقف ہونے کی کوشش نہیں کی ۔ اور ہم نے لسان قوم کے ذریعہ اسلام کا تعارف نہیں کرایا ۔ قرآن میں ہے وما ارسلنا من رسول الا بلسان قومہ یعنی ہم نے جب بھی رسول بھیجے تو وہ اپنی قوم کی زبان میں بات کرتے تھے ۔ اس آیت سے معلوم ہوتا ہے کہ علماء کے لئے جو اپنے فرض منصبی کے لحاظ سے نائبین رسول ہیں لسان قوم سے واقف ہونا ضروری ہے، اب اس وسیع و عریض ملک میں ہزاروں کی تعداد میں ایسے علماء درکار ہیں جو برادران وطن سے ڈائیلاگ کرنے اور ان سے ہم کلام ہونے کی صلاحیت رکھتے ہوں اور برادران وطن کے مذہب سے اور ان کی تہذیب سے ان کی تاریخ سے ان کی نفسیات سے اس طرح سے واقف ہوں جس طرح سے ابو ریحان البیرونی واقف تھا ۔ دینی مدارس کا ایک جال ہے جو پورے ملک میں پھیلا ہوا ہے ۔ ان دینی مدارس کے فارغیں بلا شبہ مساجد میں اور ہم قوم لوگوں کی محفلوں میں اردوئے معلی میں خطابت کے جو ہر دکھانے کی صلاحیت رکھتے ہیں ، لیکن اگر برادران وطن کے مجمع میں ان کوکھڑا کردیا جائے تو ان کی زبان میں لکنت آجاتی ہے ان کی طاقت لسانی ختم ہو جاتی ہے ، کیونکہ وہ انگریزی میں بات نہیں کرسکتے ،ہندی میں بات نہیں کرسکتے، علاقائی زبانوں میں بات نہیں کرسکتے ،وہ لسان قوم سے محروم ہیں، اور ہندو مذہب کا اور ہندوستانی مذاہب کا مطالعہ ان کا محدود نہیں بلکہ صفر ہے ۔ حالانکہ ایک عالم دین نائب رسول اسی وقت ہو سکتا ہے جب وہ لسان قوم سے واقف ہو ۔ہماری غلطیوں کی وجہ سے اس وقت اب صورت حال اتنی سنگین ہو چکی ہے کہ یہ مسئلہ اب فکری مسئلہ نہیں رہا بلکہ زندگی اور موت کا مسئلہ بن گیا ہے۔ اگر مذہبی اور تہذیبی وجود کے ساتھ یہاں رہنا ہے تو لسان قوم سے واقف ہونا اور دین قوم سے واقف ہونا ضروری ہے ۔ یہ اسی وقت ممکن ہے جب دینی مدارس کے نصاب تعلیم میں انقلابی تبدیلی کی جائے ۔جب ندوۃ العلماء اور دار العلوم دیوبند اور دوسرے مدارس سے ایک طالب علم عالم کی سند لے کر نکلے تو وہ ہندو مذہب سے پوری طور واقف ہو اور ہندی اور انگریزی میں اپنا مافی الضمیرادا کرنے کی پوری صلاحیت رکھتا ہو ۔اور ہندو مذہبی قائدین کو پورے اعتماد کے ساتھ مکالمات کرنے کی دعوت دے سکتاہو ۔مجھے اندیشہ ہے کہ اس تجویز کے جواب میں بعض مدارس کے ذمہ دار یہ کہیں گے کہ ہم نے اپنے یہاں دعوت کا اور مطالعہ مذاہب کا شعبہ قائم کر رکھا ہے ۔اس طرح کا جواب صرف وہ حضرات دے سکتے ہیں جنہیں صورت حال کی سنگینی کا پوار اندازہ نہیں ہے اور انہوں نے شتر مرع کی طرح اپنا منہ ریت میں چھپا رکھا ہے اور یہ سمجھ لیا ہے کہ ہم محفوظ ہیں اورہماری گردن کو کوئی خطرہ نہیں ہے ۔ہمیں علم ہے کہ دینی مدارس میں ۹۹ فی صد طلبہ عالم اور فاضل کا کورس مکمل کرنے کے بعد شعبہ دعوت کے ایک سالہ کورس میں داخلہ نہیں لیتے ہیں اور جو ایک فی صد سے کم داخلہ لیتے ہیں وہ کسی کام کے لائق نہیں ہوتے ہیں اور وہ ’’نے محقق بود نہ دانشمند ‘‘ کے مصداق ہوتے ہیں اس وقت رجوع الی اللہ کے بعد کرنے کا کام یہ ہے کہ(۱) درجہ اول عربی سے ہندی زبان انگریزی زبان اور ہندوستانی مذ۱ہب کو نصاب میں داخل ہونا چاہئے تاکہ ہر عالم دین برادران وطن کو خطاب کرنے کا اہل ہو سکے۔اور ہندوؤں کی مذہبی کتابوں میں کیا ہے اس کا اسے علم ہو ۔افسوس ہے کہ اب بھی اور ان سنگین حالات میں بھی علماء دین اس تجویز پر غور کرنے کیلئے تیار نہیں ہیں اور وہ صاف کہتے ہیں باہر کی دنیا میں کچھ بھی ہوتا رہے ہم نہ بدلے ہیں اور نہ کبھی بدلیں گے اور یکسوئی کے ساتھ اپنا مشغلہ جاری رکھیں گے ۔

(۲)دوسرا کام مسلمانوں کو یہ کرنا ہے کہ اپنی نافعیت اور افادیت ثابت کرنی ہے حدیث میں ہے خیر الناس من ینفع الناس یعنی لوگوں میں سب سے بہتر وہ ہے جوزیادہ نفع بخش ہو اس دنیا میں بقائے انفع اور بقائے اصلح کا قانون نافذ ہے۔ اس لئے اپنی نفع بخشی اور اپنی افادیت کا سکہ برادران وطن کے دلوں پر جما نا ہے ۔اور لوگوں کے دلوں کو جیتنے کی کوشش کرنا ہے ۔ جو دلوں کو فتح کرلے وہی فاتح زمانہ۔

(۳)تیسرا کام مسلمانوں کی نئی نسل کو تعلیم وہنر سے آراستہ کرنا ہے۔ علم وہنر مسلمانوں کی شناخت ہونی چاہئے جو قوم تاریخ میں تمام علوم وفنون میں ہراول دستہ کی حیثیت رکھتی تھی وہ سب سے پسماندہ بن گئی ہے ۔ ہمیں پسماندگی دور کرنے کی پوری کوشش کرنی چاہئے ہمیں ان تینوں میدان میں پیش رفت حاصل کرنے کی کوشش کرنی چاہئے اور اللہ پر بھروسہ رکھنا چاہئے ۔ہم اپنا کھویا ہوا مقام پھر سے حاصل کرسکتے ہیں ۔ اب تینوں کاموں کو ’’ وار فوٹنگ ‘‘ پر ہونا چاہئے اور ہر شخص کو اپنے حصہ کا کام فوراً شروع کردینا چاہئے ۔

ہمیں خود احتسابی سے بھی کام لینا چاہئے بابری مسجد کا مسئلہ ۱۹۹۰ کے آس پاس کوہ آتش فشان بن گیا تھا اور اب بھی ہم کوہ آتش فشاں کے دہانہ پر ہیں ، اس سلسلہ میں مولانا علی میاں اور مولانا عبد الکریم پاریکھ اور یونس سلیم صاحب سابق گورنربہار غیر مسلموں اور برادران وطن کے مذہبی قائدین سے مل کر مسئلہ کے حل تک پہونچ گئے تھے۔ مسلمانوں کی نمائندگی کے لئے مسٹر چندر شیکھر کے کہنے پرمولانا علی میاں کا نام تجویز ہوا تھا ہندو اکثریت کی نمائندگی کے لئے کانچی پورم کے شنکر آچاریہ کا نام تجویز کیا گیا تھا ویے پی سنگھ نے زمین کے سلسلہ میں آرڈیننس پاس کردیا تھا جسے بعد میں واپس لے لیا گیا ، آندھرا پردیش کے گورنر کرشن کانت اور جینی مذہب کے سوشیل منی اور ہندوؤں کے سب سے بڑے گرو شنکر آچاریہ آنند سرسوتی نے حل کو منظور ی دے دی تھی اور حل یہ تھا کہ بابری مسجد اپنی جگہ پر رہے گی ، مورتیاں ہٹائی جائیں گی، اسے نماز کیلئے کھول دیا جائے گا مسجد، کے چاروں طرف تیس فٹ کا تالاب رہے گا اور اس کے بعد ریلنگ ہو گی اور ضرورت پڑنے پر اس پر کرنٹ دوڑایا جائے گا ۔ اس کے بعد جو بابری مسجد وقف کی زمین ہو گی اس پر رام مندر تعمیر کرلیا جائے گا اور مسلمان اس پر کوئی اعتراض نہیں کریں گے ۔ لیکن مسلمانوں نے اس حل پر اعتراض ہی نہیں کیا بلکہ آسمان سر پر اٹھا لیا ۔ مجبوراً مولانا علی میاں اور مولانا پاریکھ کو صلح کے فارمولے سے دستبردار ہوجانا پڑا،شور و غوغا کرنے والوں میں وہ بھی تھے جن کا تعلق بابری مسجد ایکشن کمیٹی سے تھا اور وہ جامد الفکر اور بے شعور علماء بھی تھے جن کا کہنا تھا کہ ہم وقف کی ایک انچ زمین رام مندر کے حوالہ نہیں کرسکتے ہیں اوروہ اصول فقہ کے حوالے دے رہے تھے جیسے کہ ہم بنی امیہ اور بنی عباس کے عہد میں جی رہے ہوں، حالانکہ دعوتی نقطہ نظر سے باہمی احترام واعتماد کی فضا پیدا کرنا ضروری تھا اس کے علاوہ دنیا کے کئی ممالک کے علماء فقہ الاقلیات سے متعلق اپنی رائے میں لچک رکھتے ہیں اور جو ملک دار الاسلام نہ ہو وہاں کے بعض فقہی مسائل میں دفع مضرت کے تحت نرمی اختیار کرنے کے قائل ہیں ۔آج بابری مسجد کا وجود ختم ہوچکا ہے اور آئندہ اس کی تعمیر کا بھی کوئی امکان نہیں ہے ، اور اس کے لئے ہزاروں مسلمانوں کی جانیں ضائع ہوچکی ہیں ۔کوئی بتائے کہ آخر یہ خون دوعالم کس کی گردن پر ہے؟