جلال الدین اسلم، نئی دہلی

ممتاز میر ،برہانپور
اب نبیرہء اعلیٰ حضرت حضرت مولاناتوقیر رضا خان صاحب کے دیوبند کے سفر کو ایک ہفتہ ہو چکا ہے اور یہ کہنا بجا ہوگاکہ ان کے اس قدم کا ملت کے ۹۹ فی صد نے تہہ دل سے استقبال کیا ہے ۔ابھی تک اس تعلق سے مضامین آرہے ہیں۔ہمارے مطالعے میں اب تک جو مضامین آئے ہیں صد فی صد میں ان کے اس قدم کو سراہا گیا ہے ۔اسے ہندوستانی ملت کا نیا آغاز قرار دیا جا رہا ہے۔دعائیں مانگی جا رہی ہیں کہ خدا اس کوشش کو نظر بد سے بچائے۔کیونکہ امت مسلمہ کے اب تمام ہی لوگ یہ بات اچھی طرح جانتے ہیں کہ ہمارے دشمن ہم سے زیادہ طاقتورباخبر اور ہوشیار و چالاک ہیں۔انھوں نے اپنے لاکھوں ایجنٹوں کو ہمارے درمیان داخل کر رکھا ہے۔پھر ملت میں بھی کمزور اور تھڑ دلے افراد کی کمی نہیں ۔وہ پہاڑ جیسی قوت ارادی کے ساتھ اٹھائے گئے مولانا توقیر رضا کے اس قدم کو ٹھنڈے پیٹوں برداشت نہیں کریں گے۔سازشیں شروع ہو چکی ہونگی۔اللہ ہمیں بھی نہلے پہ دہلے کے لئے تیار کرے۔آمین
ہم نے ۸؍۱۰ سال پہلے بمبئی میں اپنے قیام کے دوران اعلیٰ حضرت امام احمد رضا خان صاحب پر ایک مضمون اور ایک مراسلہ لکھا تھاکہ اعلیٰ حضرت جتنے وسیع العلم تھے ۔ علم کی جن جن شاخوں پرانھیں دسترس حاصل تھی ۔دنیا میں کوئی ان کا ہمسر نہ تھا۔ہم نے ان کے متبعین سے یہ شکایت بھی کی تھی کہ جس طرح مولانا مودودی کے شاگردوں اور ان کے متبعین نے ان کی فکر کو مولانا کے کام کو آگے بڑھایا ہے ایسا امام احمد رضا خان صاحب کے ساتھ نہ ہو سکا۔اگر یہ کہا جائے تو شاید بے جا نہ ہو کہ ان کی فکرکوعام کرنے کی بجائے چھپایا گیا ۔فتاویٰ رضویہ جلد اول یا شاید دوم میں مولانا مودودی کے سیکریٹر ی ملک غلام علی کا پورے صفحے کا ایک تصدیق نامہ دیا گیا ہے جس میں ملک صاحب نے کہا ہے کہ امام محترم کے ۹۰ فی صد فتاویٰ وہی ہیں جو ہمارے عقائد سے مطابقت رکھتے ہیں جنھیں ہم قبول کرتے ہیں اور جو دس فی صد اختلاف ہے وہ کوئی غیر معمولی بات نہیں ۔ایسے اختلافات صحابہء کرامؓ کے درمیان بھی موجود تھے۔
ہم نے فتاویٰء رضویہ جلد چہارم تک کا مطالعہ کر رکھا ہے ۔اس میں ایک سائل نے حضورﷺ کے نام پر انگوٹھے چومنے کے تعلق سے سوال کیا تھا۔امام محترم نے اپنے فتوے میں کہا ہے کہ جو چومے وہ بھی سنی جو نہ چومے وہ بھی سنی کیونکہ اس تعلق سے جو احادیث ملتی ہیں وہ درجہ استناد کو نہیں پہونچتی ۔افسوسناک بات یہ کہ اس مسئلے پر بمبئی میں مساجد میں قتل ہو چکے ہیں۔کیا یہ ظلم بالکل ویسا ظلم نہیں ہے جیسا دادری میں محمد اخلاق کے ساتھ ہوا ۔وہ جن کے پاس ایمان نہیں ہے ان سے شکایت کیسی؟ہم نے بھی تو ایمان والوں کو اتنا ہی عدم روادار بنا دیا ہے۔
بمبئی میں ایک ڈاکٹر صاحب ہیں ۔کٹر بریلوی۔ہمارے برادر خورد کے دوست۔ہم نے مذکورہ فتوے کا ان سے ذکر کیا۔انھیں یقین نہ آیاہم نے جلد چہارم انھیں لے جا کر دی۔انھوں نے اسے پڑھنے میں ۳؍۴ ماہ لگا دئے۔مگر پڑھ کر کہنے لگے ۔بھائی اب میں اگر اپنے لوگوں میں بات کروں گا تو کہیں گے کہ کیا ڈاکٹر صاحب آپ بھی بدل گئے۔ایسے ہی ایک جگہ اعلیٰ حضرت لکھتے ہیں کہ بازار کی مساجد میں دوسری جماعت بنائی جا سکتی ہے۔شرط یہ ہے کہ پہلے امام کے مصلے پر نہ ہواس معاملے میں دیوبندی حضرات بھی جہالت ہی کا مظاہرہ کرتے ہیں بس بریلوی حضرات کی طرح بات پولس اورکورٹ کچہری تک نہیں پہونچاتے ۔ہمارا جتنا مطالعہ ہے اس کے مطابق ہم یہ سمجھتے ہیں کہ ۹۰ فی صد مسائل میں بریلوی اوردیوبندی مسائل میں ہم آہنگی ہے مگر اعلیٰ حضرت کے بعد آنے والوں نے اپنے متبعین میں بالکل ویسی ہی عدم برداشت اور عدم رواداری بھردی ہے جیسی کہ آج وطن عزیز میں دیکھنے کو مل رہی ہے۔اگر وہ غلط ہے تو اپنے ضمیر سے خدا کو حاضر و ناظر جان کر پوچھئے کہ آپ نے اپنے متبعین کے دماغوں میں دوسرے مسالک کے تعلق سے جو بھر رکھا ہے وہ کیا صحیح ہے؟
ایک اور مسئلہ جس کا بریلویوں اور دیوبندیوں کے مناقشے میں اہم کردار رہا ہے وہ مولانا اشرف علی تھانوی کا نماز کے دوران حضور ﷺکا خیال آجانے پر فتویٰ ہے ۔پہلے پہل جب ہم نے اس فتوے کو پڑھا تھا ہم کو بھی مولانا پر بہت غصہ آیا تھا مگر جب اس کی تشریح سامنے آئی تو انگشت بدنداں رہ گئے۔کیوں کہ ہمارا خود نماز کے دوران وہی رویہ تھا جس کی طرف مولانا اشرف علی تھانوی نے اشارہ کیا ہے ۔اس فتوے اور اس کی تفصیلات پڑھنے کے بعد ہم نماز میں حضور ﷺکا خیال پالنے کی بجائے نکالنے لگے۔ہر انسان کی نماز میں بہتیری خامیاں ہوتی ہیں درست رویہ یہ ہے کہ ہر لحظہ اسے بہتر بنانے کی کوشش کی جائے۔خیر ہمیں کہنا صرف یہ ہے کہ اب پہلی کوشش یہ ہونی چاہئے کہ فریقین اپنے ماننے والوں کے دماغوں سے عدم برداشت اور عدم رواداری کو کھرچ کھرچ کر نکالیں۔اور یہ کوئی آسان کام نہیں ہے ۔جتنا عرصہ ذہنیت بننے میں لگا ہے اس سے زیادہ عرصہ اسے درست ہونے میں لگے گااس دوران ہمارے دشمنوں کی کوششیں اور سازشیں بھی جاری رہیں گی۔مگر ہمیں اپنی ملت کو بنیان مرصوص بنانا ہے ۔ہر لمحہ دل میں یہ خیال جا گزیں رہے کہ بہترین منصوبہ ساز اللہ ہے۔حضرت مولانا توقیر رضا خان صاحب نے جو پہل کی ہے جو تاریخ بنائی ہے دیوبندیوں کا کام ہے کہ اس کا جواب اس سے بڑھ کر دیا جائے۔سوچ بچار میں وقت ضائع کر کے دشمن کو وار کرنے کا موقع فراہم نہ کیا جائے۔
ہم کئی بار لکھ چکے ہیں کہ اب مسلمانوں میں منافقوں کی تعداد بہت بڑھ چکی ہے۔سارے دانشور مسلم ہوں یا غیر مسلم اس بات پر متفق ہیں کہ مسلمانوں کو اس وقت تک نقصان پہونچانا ممکن نہیں جب تک سیندھ اندر سے نہ لگائی جائے اسی لئے ہمارے دشمنوں نے جی بھر کے ہم میں منافق پیدا کردئے ہیں۔خلافت عثمانیہ کا خاتمہ صرف دو منافقوں کے بل پر ممکن ہوا تھا۔ہم اس سے پہلے بھی لکھ چکے ہیں کہ بریلوی اور کسی حد تک اہلحدیث بھائیوں کے نزدیک سب سے بڑا سنی یا سلفی وہ ہے جو اپنے سوا تمام فرقوں کو کافر کہے۔تبلیغیوں کے نزدیک سب سے بڑا مسلمان وہ جو چلے لگائے۔جماعت اسلامی کے بارے میں کیا کہیں وہ تو Chosen people of God ہیں ان کے یہاں منافق گھس ہی نہیں سکتا!حالانکہ کے اب جماعت اپنی تاسیس کے مقابلے میں بہت زیادہ زوال یافتہ ہو چکی ہے۔ناقدین کو جماعت سے باہر کا راستہ دکھلایا جا رہا ہے ۔آج کل ماضی کو بھلانے کی باتیں بھی خوب ہو رہی ہیں ماضی دو قسم کے ہوتے ہیں ۔ایک وہ جو بھلا دیا جانا چاہئے اور دوسرا وہ جس سے سبق حاصل کرکے غور وفکر کرکے مستقبل کی راہیں طے کی جانی چاہئے ۔
ہماری حتمی درخواست اکابرین ملت سے صرف اتنی ہے کہ پہاڑجیسی قوت ارادی کے ساتھ مولانا توقیر رضا صاحب نے جو قدم اٹھایا ہے اپنے اور بیگانوں کی جو مخالفت مول لی ہے اسے رائگاں نہ جانے دیجئے ۔دشمن تاک میں ہے آپ کی مومنانہ فراست اسے ناکام کر سکتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔07697376137 

ممتاز میر ۔ برہانپور

۵معلوم نہیں انسانوں کو یہ و ہم کیوں ہو جا تا ہے کہ ان کے بغیر اس دنیا کا کاروبار بطریق احسن چل ہی نہیں سکتا ۔اس دنیا مین ازل سے ابدتک کا سب سے اچھا حکمراں حضرت عمر فاروقؓ تھے جس کادور حکومت مسلمان ہی نہیں غیر مسلم بھی دیکھنے کے متمنی ہیں۔لیکن ہم اچھی طرح جانتے ہیں کہ انھوں نے بھی کاروبار حکومت اپنے ساتھیوں کے مشورے سے ہی چلایاصرف ایک واقعہ تاریخ میں عراق کی زمینوں کا ایسا ملتا ہے جس میں وہ ایک طرف اور تمام صحابہء کرامؓدوسری طرف تھے دونوں ہی قرآن کی آیات سے اپنی بات ثابت کرتے تھے۔یہ بحث تین دن تک چلی۔بالآخر صحابہء کرامؓ نے حضرت عمر کی دلیل کو تسلیم کر لیا۔مگر ترکی کے صدر جناب رجب طیب اردگان دلیل نہیں حکم دیتے ہیں اسی کا نتیجہ ہے کہ ان کے قریب ترین ساتھی جناب احمد داؤد اوغلو جنھیں ترکی کی خارجہ پالیسی کا معمار سمجھا جاتا ہے پچھلے دنوں ترکی کی وزارت عظمیٰ سے مستعفی ہو چکے ہیں۔جناب احمد داؤد اوغلو رجب طیب اردگان اور اور عبداللہ گل کے ساتھ AKP کی بنیاد رکھنے والوں میں سے ہیں۔جناب عبداللہ گل ترکی کے سابق صدر تھے۔اس کے علاوہ انھوں نے اس وقت ترکی کی وزارت عظمیٰ اور پارٹی کا بوجھ اپنے کاندھوں پر اٹھایا جب رجب طیب اردگان جیل میں تھے۔رجب طیب اردگان جب جیل سے باہر آئے تو عبداللہ گل نے ان کے لئے ترکی کا تخت خالی کیا۔اردگان وزیر اعظم بنے اور گل کو صدر بنایا گیا ۔مگر پھر گل کی خیر خواہانہ تنقید اردگان کی پیشانی پر بل ڈالنے لگی۔ان کی معیاد صدارت ختم ہوتے ہی انھیںnowhere کر دیا گیا۔آج پھر معمولی اختلافات اور خیر خواہانہ تنقید کی بنا پر اوغلو کو nowhere کیاجا رہا ہے۔ہم اس سے پہلے بھی کئی بار لکھ چکے ہیں کہ Power Corrupts. Absolute Power curropts absolutly جناب رجب طیب اردگان Absolute Power کی تلاش میں ہیں اور اسی لئے صدارتی طرز حکومت کا ڈول ڈالا جارہا ہے۔حیرت ہے کہ ان جیسا غیر معمولی دانشور کیا ہٹلر کے انجام سے بے خبر ہے۔سراب کے پیچھے اس دوڑ میں ان کا جو بھی انجام ہو ہمیں اس سے دلچسپی نہیں۔ہم ترکی کے انجام سے ڈرتے ہیں۔ہمارے لئے ترکی فی الوقت ’’ترکش مارا خدنگ آخریں‘‘ہے۔کل تک اسی جگہ ایران تھا۔مگر وہ تو دن بدن طاقتور ہو رہا ہے اور امت مسلمہ دن بدن کمزور۔عالم اسلام میں موجود ہم جیسے لوگ ہر ابھرنے والے سورج کو بڑی امید سے دیکھتے ہیں اور جب وہ سورج غروب ہوتا ہے تو اپنے آپ کو یتیم محسوس کرتے ہیں۔ہم گذشتہ ایک دہائی سے رجب طیب اردگان کے بڑے مداح ہیں۔مگر گذشتہ تین چار سالوں کے دوران ان کے خلاف کئی مضامین لکھ چکے ہیں ۔ہم نہیں چاہتے کہ ان کا سورج بھی غروب ہو جائے۔صحابہء کرام نے تو حضرت ابو بکر صدیقؓ و حضرت عمرؓ کو تلوار سے سیدھا رکھنے کا عندیہ دیا تھا ۔آج کے زمانے کے مطابق ہم اپنے ممدوح کو قلم سے سیدھا رکھنے کی کوشش کرتے ہیں۔
ہم اکثر و بیشتر ترکی کے اخبارات پڑھتے ہیں۔ذیل میں ہم وہ باتیں درج کر رہے ہیں جو رجب طیب اردگان اور احمد داؤد اوغلو میں اختلافات کا سبب بنیں۔
(۱)وزیر اعظم احمد داؤد اوغلو چاہتے تھے کہ دسمبر ۲۰۱۳ میں جن وزراء پر کرپشن کے الزامات آئے تھے وہ سپریم کورٹ میں جا کر اپنی بریت ثابت کریں۔مگر اردگان کے نزدیک اس کی کوئی ضرورت نہیں۔کیا اس سے یہ شبہ نہیں ہوتا کہ دال میں کچھ کالا ہے؟(۲)نیشنل انٹیلی جنس آرگنائزیشنMITکے سربراہ حاکن فدان نے جون ۲۰۱۵ میں احمد داؤد اوغلو کی اجازت سے انتخاب لڑنے کے لئے اپنے عہدے سے استعفیٰ دے دیا تھا ۔یہ بات اردگان کو پسند نہ آئی اور انھیں جبراً اپنے عہدے پر واپس جانے کے لئے مجبور کردیا گیا ۔ہمارے نزدیک بھی یہی مناسب تھا ۔حاکن اپنی فیلڈ میں حد درجہ پیشہ ور ہیں۔(۳)گزشتہ انتخابات جون ۱۵ اور نومبر ۱۵ میں فہرست امیدواران بھی تنازعے کا سبب بنی اور بالآخر سب کواردگان کی پسند کے سامنے سر جھکانا پڑا۔(۴)بنالی یلدرم،جو کہ اردگان کے قریب ہیں ان کی وجہ سے بھی انتخابات میں فہرست امیدواران کا تنازعہ کھڑا ہوا تھا کیونکہ اردگان اوغلو کی جگہ یلدرم کو اہمیت دے رہے تھے۔(۵)داؤد اوغلو جون ۱۵ کے الیکشن کے بعد coalition گورنمنٹ بنانا چاہ رہے تھے مگر اردگان نئے انتخابات کے حق میں تھے اب اوغلو کے استعفے کے بعد سیاسی مبصرین اور تجزیہ کار ایک بار پھرنئے انتخابات کی پیش گوئیاں کر رہے ہیں ۔ایک سال وقفے میں تین انتخابات ترکی جیسے ملک کی معیشت کے لئے کیا اچھی بات ہے؟(۶)بنالی یلدرم اور بیرات البیرک[اردگان کا داماد]ان دونوں کو اردگان کی خواہش کے خلاف نئی کابینہ میں گھسایا گیا ۔(۷)سابق ڈپٹی پرائم منسٹر بلند ارنک کی اوغلو سے قربت اوغلو اور اردگان کے مشیران کے درمیان رسہ کشی کی وجہ بن گئی۔(۸)یہ بھی خیال کیا جا رہا تھا کہ داؤد اوغلو صدارتی طرز حکومت کی مناسب طریقے پر اشاعت نہیں کر رہے ہیں ۔مبصرین نے ان کے تعلق سے یہ تک کہا کہ اگر انھوں نے صدارتی طرز حکومت کی حمایت کی تو وہ خود کی نفی کر رہے ہونگے۔(۹)داؤد اوغلو نیا دستور جلد سے جلدتیار کر لینا چاہتے تھے مگر اردگان کی مداخلت پر اس عمل کو دھیما کرنا پڑا(۱۰)اردگان نے اوغلو کی اس تحریک پر سخت رد عمل کا اظہار کیا کہ سیاستدانوں جائداد اور انتخابی اخراجات کو شفافTransparent ہونا چاہئے(۱۱)داؤد اوغلو نے طویل عرصے تکHDPممبران پارلیمنٹ سے تحفظImmunity ہٹانے کے لئے کوئی اقدام نہ کیا جبکہ اردگان اس مسئلے پر بیانات پر بیانات دے رہے تھے۔(۱۲) غیر قانونی کردستان ورکرس پارٹیPKK کے تعلق سے اوغلو کا موقف تھا کہ اگر پارٹی مئی ۲۰۱۳کے اپنے موقف پر واپس آجاتی ہے تو پھر اس سے ہر مسئلے پر مذاکرات ممکن ہے مگر اردگان کے نزدیک کردش مسئلے کا حل صرف فوج ہی ہے۔(۱۳)بنیادی طور پر اوغلو ان زیر حراست معلمین کے خلاف کیس چلانے کے خلاف تھے جنھوں نے ملک کے جنوب مشرق میں فوجی کاروائیوں کے خلاف ایک پٹیشن پر دستخط کئے تھے جبکہ اردگان ان کے خلاف سخت بیانات دے رہے تھے۔(۱۴) انتخابات کے بعداوغلو نے ایک سرکیولر جاری کیا تھا جسمیں ایسے نازک معاملات کو ٹھنڈے بستے میں ڈالا گیا تھا جس میں معاشی افسران اور گورنرس ملوث ہوں مگر یہ حکم بھی اردگان کی مداخلت پر واپس لینا پڑا۔(۱۵)کم حریت اخبار کے دو صحافی دنڈر اور گل کی رہائی بھی اوغلو اور اردگان کے درمیان وجہ اختلاف بنی(۱۶)احمد داؤد اوغلو کی امریکی صدر اوبامہ اور نائب صدر جو بائڈن سے ہونے والی ملاقات بھی اسلئے ملتوی کر دی گئی کہ اس کی وجہ سے ترکی کے صدارتی محل کو کچھ پریشانی تھی۔(۱۷)ترکی کی حکمراں پارٹی کے انتظامی بورڈ نے ۲۹۔اپریل کوداؤد اوغلو کا ضلعی اور ریاستی سربراہ مقرر کرنے کا اختیار ختم کردیا تھا اور یہ رجب طیب اردگان کے ایماء پر ہوا تھا ۔اور شاید یہی بات اوغلو کی وزارت عظمیٰ کے لئے آخری کیل ثابت ہوئی۔
اب ان تمام وجوہات کو دیکھ جائیے کیا یہ ایسی ہیں جن پر افہام و تفہیم نا ممکن تھی۔کیا ان کے لئے احمد داؤد اوغلو کو استعفیٰ دینا چاہئے تھا۔مگر رجب طیب اردگان کی بلا شرکت غیرے اقتدار کا مزہ لوٹنے کی خواہش absolute Powerحاصل کرنے کے غلبے نے پہلے عبداللہ گل اور اب احمد داؤد اوغلو کو ان سے دور کروایا۔انہی لوگوں کے ساتھ مل کر انھوں نے AKP کی بنیاد رکھی تھی ۔ایسا لگتا ہے کہ ان کے نزدیک AKPاب ناقابل تسخیر بن چکی ہے۔اب انھیں ان ساتھیوں کی ضرورت نہیں جو سیدھا راستہ دکھائیں ۔اب انھیں ان کی شہنشاہیت کے گن گان کرنے والے چمچوں کی ضرورت ہے۔
اس میں کوئی شک نہیں کہ اردگان کی انٹیلیجنس لیول ،قوت فیصلہ ،عالمی حالات کا فہم بہادری و بیباکی نہایت غیر معمولی ہے۔مگر ہم تو یہ جانتے ہیں کہ ازل سے ابد تک کا کامل ترین انسانﷺبھی اپنے ساتھیوں سے مشورے کرتے تھے اور کبھی کبھی اپنی ذاتی رائے کے خلاف ان کے مشورے قبول بھی کرتے تھے ۔
07697376137 

جلال الدین اسلم، نئی دہلی

عمر فراہی

روسی مصنف حمزہ رسول کی کتاب " میرا داغستان" کے حوالے سے کسی نے بہت خوبصورت تبصرہ پیش کیا ہے کہ ایک بار حمزہ رسول ایک گاؤں سے گذر رہے تھے تو دیکھا کہ پہاڑی علاقوں میں رہنے والی دو قبائیلی عورتیں آپس میں جھگڑااور تکرار کر رہی ہیں - اسی تکرار کے دوران ایک عورت نے دوسری عورت کو بد دعا دیا کہ جا "اللہ تیرے بچوں کو اس انسان سے محروم کر دے جو انہیں ان کی زبان سکھانے والا ہے‘‘

اس کے بعد دوسری عورت کا بھی غصہ کافور ہو گیا اور پھر اس نے بھی وہی بد دعا دوسرے طریقے سے لوٹایا اور کہا کہ 

’’اللہ کرے تیرے یہاں ایک آدمی بھی ایسا نہ بچے جو تیرے بچوں کو ان کی زبان سکھا سکے‘‘ 

اپنی زبان اور تہذیب سے محبت اور اہمیت  کی یہ وہ علامت ہے جس کی جھلک غیرت مند اور خوددار قوموں کے آپسی جھگڑے اور تکرار میں بھی دکھائی دیتی ہے -ہو سکتا ہے اس واقعے کو ہم  پہاڑی اور قبائلی علاقوں کی قدیم زمانہ  تہذیب کہہ کر نظر انداز کر دیں مگر حقیقت یہ ہے کہ دوسری قوموں کی زبان اور تہذیب اختیار کر کے ایک قوم اصل قوم کی غلام یا اس کا مکمل حصہ  تو بن سکتی ہے لیکن اپنی ظاہری شناخت کے ساتھ اس ترقی یافتہ قوم  کا درجہ کبھی نہیں حاصل کر سکتی- لیکن خطہ ہند و پاک  میں بسنے والی مسلمان قوم تقریباً ایک صدی سے اسی مفروضے میں قید ہے کہ اس کی ترقی اور کامیابی مغربی تہذیب  اور ان کی زبان اختیار کرنے میں ہے-اس طرح اس خطے کے مسلمانوں کو یہ بھی احساس نہیں رہا کہ اس نے مغرب کی جس غیر فطری ترقی اور کامیابی کی دوڑ میں ان کی زبان و تہذیب کو اختیار کیا ہے اس کا اثر ان کی اپنی اولادوں کی سوچ اور فکر پر بھی ہوا ہے -نئی نسل یہ سوال اٹھا رہی ہے کہ جب اسے سب کچھ مغرب سے عطا ہو رہا ہے تو ہمیں مصر شام اور فلسطین کی تاریخ سے کیا مطلب اور اس بات کا تذکرہ کرنے سے کیا حاصل کہ اس خطے میں کبھی اس کی اپنی سیاسی, معاشی اور معاشرتی شناخت رہی ہے -مگر جنھیں یاد ہے  وہ اپنے اسلاف  کے اس ملی و قومی تہذیبی اثاثے کو اس امید کے ساتھ ایک بوجھ کی طرح ڈھو رہے ہیں کہ شاید اس راستے سے کوئی قافلہ گذرے اور کنویں میں دم توڑتے ہوےُ یوسف کو بادشاہ کے محل تک  پہنچا دے - مغرب کے لئے پھر بھی ان کی اپنی تہذیب اس لئے  بھی وقتی طورپر سودمند ہو سکتی ہے کیونکہ ان کی اپنی سوچ اور زبان میں یکسانیت اور ہم آہنگی پائی جاتی ہے جبکہ خود مغرب کی اپنی مادہ پرستانہ تہذیب بھی دم توڑ رہی ہے -شاید وہ اپنا راستہ تلاش بھی کر لیں جیسا کہ تمام دہشت گردی کے منفی پروپگنڈے کے باوجود  مغرب میں اسلام تیزی کے ساتھ مقبول ہورہا ہے - مگر جس فکر اور سوچ کے ساتھ ہم نے ان کی زبان اور لباس کو اختیار کیا ہے اس میں ایک نقص ہے اور اسی نقص کی وجہ سے ہم ذہنی اور مادی طورپر ان کی غلامی کے اہل تو ہو سکتے ہیں ان کی قیادت کبھی نہیں کرسکتے-اگر ہم روئے  زمین پر کچھ ممالک کی ترقی اور کامیابی کا موازنہ کریں تو یہ دیکھتے ہیں کہ ہندوستان جیسا ملک جو کبھی عروج کی طرف گیا بھی تو وہ مسلمانوں کا دور تھا اور  مسلم حکمراں اپنی اسلامی تاریخ کے پابند رہے ہیں-جن قوموں کی اپنی تاریخ ہوتی ہے اور جو اپنی اس تاریخ کو یاد رکھتی ہیں ان کا اپنا نصب العین ہوتا ہےاور پھر یہی نصب العین ہی قوموں کے عروج کا سبب بنتا ہے -مگر اپنی زبان اور تہذیب کو بھلا دینے والے اپنی تاریخ اور نصب العین سے بھی محروم ہو جاتے ہیں-اب آذادی کے بعد ایک بار پھر ہندوستانی قومیں اپنے عروج سے زوال کی طرف مائل ہیں تو اس کی وجہ اس کے سوا اور کیا ہو سکتی ہے کہ مسلم اور انگریزی دور حکومت  کے بعد ہندوستان کے لوگوں کی کوئی خالص قومی اور تہذیبی شناخت نہیں رہی جو انہیں ان کے نصب العین کی طرف مائل کرے -شاید یہی وجہ ہے کہ اب یہاں ہر شخص اپنے ذاتی مفاد کو عزیز رکھتے ہوئے مغرب کے مادی فتنے کا غلام بن چکا ہے-آر ایس ایس نے آذادی کے بعد رام مندر کے نام پر ہندوؤں کو اپنی قدیم تاریخ یاد دلا کر ایک نصب العین دینے کی کوشس تو ضرور کی ہے لیکن جب اس خطے میں ایک اللہ کی عبادت کرنے والا مسلمان مغرب کے  مادی فتنے کی زد سے نہیں بچ سکا تو سیکڑوں خداؤں کی پوجا کرنے والوں کو تو حق ہے کہ وہ مغرب  کی ترقی کو لکشمی کا جدید اوتار تسلیم کرلیں - اس کے بر عکس امریکہ جو تقریباً پندرہویں صدی میں چند ملاحوں کی کھوج کی وجہ سے وجود میں آیا اور صرف تین سو سالوں میں تاریخ کے بلند مقام پر پہنچا تو اس کی ترقی بھی یورپ کی ان  مہاجر قوموں کی وجہ سے ہو سکی جو ایک قدیم تاریخ اور تہذیب کی پابند رہی ہیں اور انہوں نے برسہا برس سے پسماندہ مقامی سیاہ فام قوموں کی تقدیر بدل دی-اسی طرح اسراںُیل 1947 میں قائم ہوتا ہے جسے قاںُم کرنے میں برطانیہ نے اہم کردار اداکیا ہے -یہ بات بھی ساری دنیا کو پتہ ہے کہ یہودی دنیا کی ایک ذہین قوم ہے-انہیں یہ بھی پتہ تھا کہ دنیا ایک عالمی گاؤں میں تبدیل ہو رہی ہے اور اس گاؤں میں مغربی زبان و تہذیب کو ہی فوقیت حاصل ہونا ہے- وہ چاہتے تو عالمی طاقت برطانیہ اور امریکہ کو خوش کرنے کیلئے اسی طرح انگریزی کو  اسراںُیلی ریاست کی زبان قرار دے سکتے تھے جیسا کہ برطانیہ سے آزادی حاصل کرنے کے بعد پاکستان میں ہوا- اور ہندوستان میں ہندی  قومی زبان کا درجہ حاصل کرکے بھی انگریزی کی غلام ہی رہی  مگر اقبال کی جو بات جاوید اقبال نہیں سمجھ سکے کہ 

خودی نہ بیچ فقیری میں نام پیدا کر

میراطریق امیری نہیں فقیری ہے 

یہودیوں نے اپنی قومی اور تہذیبی خودداری کو برقرار رکھتے ہوئے  ایک نصب العین کے تحت اپنی دو ہزار سالہ قدیم زبان عبرانی کو ہی رائج کیا اور یورپ کے سر سبز شاداب علاقوں سے ہجرت کرکے فلسطین کے ریگستانوں سے محبت ظاہر کی تو اس لئے کہ ان کے عقیدے اور کتابوں کی پیشن گوئی  کے مطابق یہ ان کے نبی اور پرکھوں کی سر زمین ہے اور پھر آرماگیڈون کے ذریعے  دنیا پر غالب ہونے کا ان کا جو عزم اور عقیدہ ہے یہ اسی وقت پورا ہو سکتا ہے جب یہودی دوبارہ دنیا کے ہر خطے سے ہجرت کرکے فلسطین میں آباد ہوں -بات صرف امریکہ اور اسراںُیل کی نہیں بلکہ یہ ایک عالمی حقیقت ہے کہ دنیا کی ہر وہ قوم اور ملک جس کا کہ دوسری قوموں پر غلبہ رہا ہے جیسے کہ روم فارس یونان اور عرب کے بعد ایک بار پھر روس فرانس برطانیہ اور چین وغیرہ نے اپنے عروج کا مرحلہ طے کیا تو اس میں ان قوموں کی اپنی زبان اور تاریخ کا اہم کردار رہا ہے - حمزہ رسول کے اس اقتباس سے زبان کے ساتھ ایک سبق اور بھی ملتا ہے کہ قوموں کی ترقی میں نسلوں کی تربیت بھی بہت اہم ہوتی ہے اور اس تربیت میں بچے کی ماں اور اس کی سوچ کا جو کردار ہوتا ہے اس کا  اثر بھی پوری قوم پر پڑتا ہے -اقبال جو کہ شروع کے حالات میں مغرب سے بہت زیادہ مرعوب تھے جب انہوں نے مغرب کو بہت قریب سے دیکھا تو انہیں یہ احساس ہوا کہ  مغربی ماؤں نے اپنی جس زبان اور تہذیب کی وجہ سے مغرب کو عروج کا راستہ دکھایا تھا بعد کی نسلوں نے اپنی انہیں بیٹیوں کو جو کل اپنے بچے کی ماں بن سکتی تھیں انہیں بازار کی زینت بنانا شروع کر دیا ہے  اور پھر انہوں نے برجستہ کہا کہ 

تمہاری تہذیب خود اپنے خنجر سے خودکشی کرے گی 

جو شاخ نازک پہ آشیانہ بنے گا ناپائدار  ہوگا -

9/11 کے بعد اب یہ بات مغربی مفکرین نے بھی لکھنا اور سمجھنا شروع کر دیا ہے کہ Why the west is loosing war against terror

یعنی" مغرب دہشت گردی کے خلاف جنگ کیوں ہار رہا ہے"  دوسرے لفظوں میں مغربی ماؤں کی اپنی کوکھ کا غیر محفوظ رہنا بھی ان کے مستقبل کے خاندانی ورثہ کو  تباہ کیے بغیر نہیں رہ سکتا - خاندان کی تباہی قوموں کی تباہی ہے قوموں کی تباہی تہذیبوں کی تباہی ہے -تہذیبیں تباہ ہوتی ہیں تو اس قوم کی تاریخ کبھی محفوظ نہیں رہتیں اور پھر ایسی قوموں کی جدوجہد کا نصب العین اس کے سوا اور کچھ نہیں رہ جاتا کہ وہ مادی ضروریات کی تکمیل کے لئے  زمین پر فساد برپا کرے -مغرب اس وقت اسی مادی اور تہذیبی بحران سے گذر رہا ہے اور مغربی ماؤں کے پاس اپنے بچوں کو بتانے کے لئے اس کا کوئی ٹھوس جواب نہیں ہے کہ عرب دنیا ان کی دشمن کیوں ہے اور ہم کیوں ان کی بستیوں کو تباہ کر رہے ہیں جبکہ عربوں کی نئی نسل کو سمجھانے کیلئے ان کی ماؤں کے پاس افغانستان سے لیکر ایران عراق لیبیا سومالیہ اور فلسطین جیسی سیکڑوں ظلم کی داستانیں ہیں - سچ تو یہ ہے کہ جب کسی قوم کی بیٹیاں بیدار ہوتی ہیں اور ان کی عصمتیں محفوظ ہوتی ہیں تو ایسی ماؤں کی کوکھ سے صلاح الدین ایوبی جیسے جانباز پیدا ہوتے ہیں -کہتے ہیں کہ صلاح الدین ایوبی کے والد نجم الدین ایوبی نے جب اپنی شادی میں تاخیر کی تو ان کے استاد نے کہا کہ اگر تم چاہو تو میں امیر سلطنت کی دختر سے تمہارے نکاح کی بات کروں -نجم الدین نے کہا وہ میرے لائق نہیں ہے -میں ایک ایسی لڑکی سے نکاح کرنا چاہتا ہوں جس کی کوکھ سے ایک سپہ سالار پیدا ہو اور وہ بیت المقدس کو آذاد کرائے  -اسی دوران استاد کے گھر کی چوکھٹ پر کسی نے دستک دی وہ ایک نوجوان دوشیزہ تھی-اس نے کچھ کہا تو استاد نے جواب دیا کہ میں نے تمہارے لئے ایک رشتہ بھیجا تھا تم نے اسے کیوں ٹھکرا دیا- لڑکی نے کہا وہ میرے لائق نہیں تھا- مجھے تو ایک ایسا نوجوان چاہیے جس کی اولاد کو میں تربیت دوں اور بڑا ہوکر وہ بیت المقدس کو آذاد کرائے  - نجم الدین نے دروازے کی آڑ سے یہ بات سن لی -جب وہ لڑکی رخصت ہوگئی تو نجم الدین نے استاد سے کہا مجھے یہ لڑکی پسند ہے استاد نے کہا یہ بہت ہی غریب ہے نجم الدین نے کہا لیکن اس لڑکی میں میری بیوی ہونے کی ساری صفات موجود ہے- 2012 میں مصر اور شام کی بیٹیوں نے اپنے ہاتھوں میں  ہتھکڑیاں پہن کر دنیا کو بتا دیا ہے کہ ان کا نصب العین کیا ہے - حمزہ رسول نے اپنی اسی کتاب میں ایک واقعہ بیان کیا ہے کہ پیرس کے سفر میں وہ ایک مصور نام کے اپنے ایک ہم وطن سے ملا جس کے بارے میں اس کے خاندان کو یقین تھا کہ وہ مر چکا ہے-واپسی پر جب اس نے مصور کے عزیزوں کو تلاش کیا اور مصور کی ماں سے ملا تو اسے  حیرت ہوئی کہ اس کا بیٹا زندہ ہے، مصور کے عزیز افسردہ چہروں کے ساتھ گاؤں کے ایک مکان میں اس کے اردگرد جمع اپنے اس سپوت کی کہانی سننے کے لئے جمع ہوئے  جس نے ہمیشہ کے لئے اپنا وطن چھوڑ دیا تھا ۔ مصور کے رشتہ داروں نے اس کے وطن عزیز چھوڑنے کا قصور تو معاف کر دیا تھا لیکن انہیں یہ جان کر مسرت ہوئی کہ ان کا کھویا ہوا بیٹا ابھی زندہ ہے۔ اچانک اس کی ماں نے حمزہ رسول سے سوال کیا کہ  ’’اس نے تم سے بات چیت تو اپنی زبان میں کی ہو گی نا‘‘  حمزہ رسول نے کہا نہیں۔ ہم نے ترجمان کے ذریعے بات چیت کی۔ میں روسی بول رہا تھا اور آپ کا بیٹا فرانسیسی زبان میں- ماں نے یہ سنتے ہی اسی طرح اپنے چہرے پر نقاب ڈال لیا جیسے کہ پہاڑی علاقوں میں مائیں اپنے بیٹے کی موت کی خبر سن کر اپنے چہروں کو ڈھک لیتی ہیں ۔ ایک طویل خاموشی کے بعد ماں نے کہا ’’ رسول تم سے غلطی ہوئی ہے میرے بیٹے کو مرے ہوئے ایک مدت بیت گئی جس سے تم ملے میرا بیٹا نہ رہا ہو گا کیونکہ میرا بیٹا اس زبان کو کبھی بھلا نہیں سکتا جو میں نے اسے سکھائی تھی"۔ذرا سوچئے  کہ ایک ماں کیلئے اپنے بیٹے کے  زندہ رہنے کی خبر خوشخبری کا باعث نہ بنی مگر جب اس نے یہ سنا کہ اس کے بیٹے نے اپنی مادری زبان کو ترک کر دیا ہے یہ خبر اس کے لئے حادثے کا سبب بن گئُی -سوال یہ ہے کہ اگر یہی واقعہ  ہندوپاک کے خطے میں مسلمان ماؤں کے ساتھ  پیش آجائے  تو کیا اس کا بھی ردعمل ایسا ہی ہوتا -شاید وہ خوش ہوکر اپنے رب کی بارگاہ میں دعا کرتی کہ اللہ تو بڑا مہربان اور کریم ہے کہ  تو نے میری دعا قبول کر لی اور میرا بیٹا امریکن انگلش بولنے لگا ہے-یہ حقیقت ہے اور یہی ہماری ماؤں اور بیٹیوں کی ترجیحات اور کامیابی کا تصور بن چکا ہے  جنھیں یہ بھی نہیں پتہ کہ وہ کیا ہیں ,ان کا نصب العین کیا ہے اور انہیں اپنی اولادوں کو کیا بنانا ہے. ...!!!

جلال الدین اسلم، نئی دہلی

ایڈوکیٹ نازیہ الہیٰ خان*

دنیا کے سب سے بڑے جمہوری ملک ہندستان میں مذہبی رواداری اورعدم برداشت کے حوالے سے امریکی ادارہ کی رپورٹ نے پوری دنیا کے سامنے ہمارا ننگ اجاگر کردیا ہے لیکن ہماری حکومت اسے تسلیم کرنے کو تیار نہیں ۔

 امریکی کانگریس کے بااختیار امریکی کمیشن برائے بین الاقوامی مذہبی آزادی  کی ہندستان میں عدم برداشت میں اضافہ کی رپورٹ کو حکومت ہند نے مسترد کردیاہے حکومت کا کہنا ہے کہ ملک میں اس قسم کی کوئی صورتحال نہیں ہے اور اقلیتی طبقہ کے لوگ ہندستان میں محفوظ ہیں۔ہماری وزارت خارجہ کا کہنا ہے کہ امریکی کمیشن فار انٹرنیشنل ریلیجیس فریڈم ایک بار پھر ہندستان ‘ اس کے آئین اور معاشرے کو سمجھنے میں ناکام ثابت ہوا ہے۔ ہندستان کا آئین تمام شہریوں کو ان کے بنیادی حقوق کی ضمانت دیتا ہے، جس میں مذہبی آزادی کا حق بھی شامل ہے۔

امریکی کمیشن کی رپورٹ میں کہاگیا ہے کہ 2015 میں اقلیتی فرقوں کو خوف، ظلم و ستم اور تشدد کا شکار ہونا پڑا۔ ان ظلم و ستم کے پیچھے ہندو قوم پرست تنظیموں کا ہاتھ تھا پولیس کے تعصب اور عدالتی خامیوں کی وجہ سے اقلیتی برادری ہندستان میں میں خود کو غیر محفوظ محسوس کرنے لگی ہے ۔ 

یہ اتنی بڑی صداقت ہے کہ اس سے ذی ہوش انکار نہیں کرسکتا مگر ہماری وزارت خارجہ کا ترجمان اسے امریکہ کی ہندستانی سماج ‘ معاشرت اورآئین سے ناواقفیت قرار دے رہاہے ۔

2014میں بھارتیہ جنتا پارٹی کے برسر اقتدار آنے کے بعد سے ملک میں وقتاً فوقتاًایسے کئی واقعات پیش آئے جن میں عدم رواداری اور تشدد کا پہلو صاف جھلکتا ہے۔ 2015میں یہ موضوع اس لیے بھی زبان زد عام ہوگیا کہ اسی کی وجہ سے ملک کے کئی ادیبوں اور فلمی شخصیات نے اپنے انعامات اور اعزازات واپس کردیئے اور اس کے خلاف احتجاج کا سلسلہ شروع ہوگیا ۔ میڈیا اپنی تمام تر ’مودی دوستی‘ کے باجود ان واقعات کی رپورٹنگ سے خود کو نہیں روک سکا اور عالمی سطح پر ہماری جگ ہنسائی کا سامان کرگیا ۔ امریکی کانگریس کی یہ رپورٹ 2015میں ہوئے ان ہی واقعات کے منظر ‘ پس منظر اور پیش منظر کے حوالے سے ہمیں آئینہ دیکھارہی ہے کجایہ کہ ہم اس آئینہ میں دیکھ کر اپنی صورت گری کریں‘ جمہوریت کی قبا پر عدم برداشت ‘ اور مسلم دشمنی کے واقعات کا داغ دیکھیں ‘اپنے دامن تار تار کو رفو کریں ‘ہماری حکومت رپورٹ کو ہی جھٹلارہی ہے ۔ 

حقیقت تو یہ ہے کہ بی جے پی حکومت نے 2014کے بعد سے ایک ایسا ماحول پیدا کردیا ہے جس میں خوف و ہراس ‘ تناﺅ ‘ تشدد اور بدامنی کا بول بالا ہے اور ان ہی واقعات پر مبنی ہے امریکی کانگریس کے بااختیار امریکی کمیشن برائے بین الاقوامی مذہبی آزادی (یو ایس سی آئی آر ایف) کی سالانہ رپورٹ ۔ 

امریکی رپورٹ میں ہر واقعہ کا احاطہ کیاگیا ہے ‘دادری سے لے کر سنجے لیلا بھنسالی کی فلم باجی راﺅ مستانی کے خلاف ہونے والے احتجاج اور کنٹر ادیب ایم ایل گلبرگی کے قتل سے لے کر ایم بی اے گریجویٹ ذیشان علی خان کو مسلمان ہونے کی وجہ سے ملازمت کا نہ ملنا ‘شیواجی کو ہندوو ¿ں کے قائد کے طور پرنہ پیش کرنے والے مہاراشٹر کے کمیونسٹ لیڈر‘ سماجی کارکن اور مصنف گووند پانسرے کا قتل ‘ہم کن کن واقعات کو جھٹلائیں گے ۔ 

کیا ہماری حکومت یہ بھی جھٹلاسکتی ہے کہ 200 افراد کے ہجوم نے ایک مسلمان خاندان کو 28 ستمبر 2015رات کو نوئیڈا کے دادری میں واقعہ بسارا گاو ںمیں حملے کا نشانہ بنایااور52 سالہ محمد اخلاق سیفی کا قتل کیا اور ان کے 22 سالہ بیٹے دانش کو بری طرح زخمی کردیا۔ اس حملے کے لیے ہجوم کو اکسانے کا کام مقامی بھارتیہ جنتا پارٹی کے رکن کے بیٹے نے کیا تھا۔ اس مسلم خاندان پر گاو کشی کا جھوٹا الزام عائد کیا گیا تھا۔ کیا ہم اس سے بھی انکار کرسکتے ہیں کہ حیدرآباد یونیورسٹی ‘ جواہرلعل نہرویونیورسٹی کے طلبا کے ساتھ ہم نے کیا سلوک کیا ۔

کیا ہماری وزارت خارجہ اس واقعہ سے بھی انکاری ہے کہ نومبر 2015میں قومی راجدھانی نئی دہلی میں تقسیم انعامات کے ایک جلسہ میں عامر خان نے ’بڑھتی عدم رواداری‘ کا تذکرہ کیا اور کہا کہ انہوں نے اس کا احساس پچھلے چھ سے آٹھ مہینے میں یہ زیادہ محسوس کیا۔ اس کے جواب میں کچھ عناصر نے عامر خان کے خلاف تھپڑ مارنے کی مہم شروع اور حقیقی دنیا میں اس کی عدم تکمیل دیکھتے ہوئے ایک ویب سائٹ کی تخلیق کی گئی جہاں لوگ اپنی نفرت کے اظہار یا تفریح کےلئے عامر خان کو آن لائن تھپڑ مارسکتے ہیں۔

کیا مودی حکومت بالی ووڈ کے مشہور اداکار شاہ رخ خان کی جانب سے ملک میں بڑھتی عدم رواداری پر تشویش کا اظہار کرنے کے بعدا ن کے خلاف بننے والی مسموم فضا اور ہونے والے تشدد کے واقعات کو بھی جھٹلاسکتی ہے ۔

جس ملک میں شراب، تمباکو پر پابندی عائد کرنی ضروری ہے وہاں مذہبی رواداری کو پیروں تلے روند کر بیف پر پابندی کو ہی اپنی کارکردگی کا طرہ امتیاز سمجھا گیا ہو‘ مختلف ریاستوں میں اس کے خلاف قانون بنائے گئے ہو‘ جہاں گائے نہ بیچ پانے والے غریب کسان کو روٹی کیلئے اپنی بیٹی بیچنی پڑرہی ہو وہاں ایسے ہی ہولناک واقعات جنم لیں گے جس سے عالمی برادری میں ہمارا سر شرم سے جھک جائے گا۔ اب بھی وقت ہے کہ حکومت آئین میں دی گئی شخصی مذہبی آزادی اور حقوق کی ضمانت ہندستان کے ہرشہری کو مہیا کرائیں ۔

سن تو سہی جہاں میں ہے تیرا فسانہ کیا 

کہتی ہے تجھ کو خلق خدا غائبانہ کیا 

*ایڈوکیٹ کلکتہ ہائی کورٹ اور سپریم کورٹ آف انڈیا

چیئرپرسن 

فورم فارآرٹی آئی ایکٹ اینڈ انٹی کرپشن 

0موبائل:-9831187939

ای میل :forumforrti@gmail.com

جلال الدین اسلم، نئی دہلی

پریس ریلیز
سرینگر ؍۳ مئی ۲۰۱۶ء ؁
سینئر کانگریس لیڈر اور سابق مرکزی وزیر پروفیسر سیف الدین سوز نے آج میدیا کے نام مندرجہ ذیل بیان جاری کیا ہے۔
کشمیر سول سوسائٹی (Civil Society) عوامی خدمت کیلئے اہم رول ادا کر سکتی ہے: سوز
’’جرمن سفیر مارٹن نیے(Martin Ney) نے کل شام میری رہائش گاہ پر مجھ سے ایک مختصر مگر جامع ملاقات کی ۔ملاقات کے دوران جو باتیں ہوئی ان سے میرا یہ احساس پھر سے میرے ذہن میں اجاگر کیا کہ کشمیر سول سوسائٹی معاشرے کے مختلف شعبوں میں اپنی خدمت سے ایک اہم کردار ادا کر سکتی ہے۔
خیالات کا تبادلہ کرتے ہوئے میرے ذہن میں یہ خیال بھی آیا کہ ہم آپس میں ایک دوسرے کے ساتھ مل کر مسائل کے ساتھ بہتر طریقے سے نمٹنے کے لئے مدد کر سکتے ہیں ۔میرا خیال ہے کہ عام حالات میں ہمیں ہر ایک چیزکیلئے حکومت کی طرف نہیں دیکھنا چاہئے۔میں مثال کے طور پر صرف دو شعبوں پر سول سوسائٹی کی توجہ مرکوز کرنا چاہتا ہوں۔
مسٹر مارٹن نیے (Martin Ney )اپنے آپ میں ماہر تو نہیں ہیں مگر ان کو یقین ہے کہ باغبانی میں جرمن تجربے سے کشمیر کو فائدہ ہو سکتا ہے۔ مثلاً جرمن سیب بڑے ، رنگین اور رسیلے ہوتے ہیں اور فی ایکر پیداوار بھی وہاں بہت زیادہ ہے۔ اس لحاظ سے ہمارے سیب چھوٹے ، کم رنگ والے اور کم رسیلے ہیں۔ پھر ہمارے یہاں گریڈنگ نہیں ہے جس سے میوہ صنعت کو نقصان ہی ہوتا ہے۔
ہمارا ہارٹیکلچر شعبہ جرمنی سے کافی فائدہ اٹھا سکتا ہے۔ ہمارے یہاں جگہ جگہ جرمنی اپیل کلینک (Apple Clinic) قائم کرنے میں مدد دے سکتی ہے۔ جہاں ہارٹیکلچر صنعت سے وابستہ لوگ میوے کے درخت لگانے ، انکی نشونما، دوا پاشی کے استعمال کی پوری جانکاری حاصل کر سکتے ہیں اور اپنی پیداوار بڑھا سکتے ہیں۔
اس سلسلے میں ،میں یہ کہنا چاہوں گا کہ سول سوسائٹی کو اس امر پر غور کرنا چاہئے کہ اگر ہم پڑھے لکھے ، کم سے کم پانچ لڑکے اور پانچ لڑکیاں جرمنی بھیجیں اور وہ ہارٹیکلچر کی صنعت میں موجودہ زمانے کی پیش رفت کا تجربہ کریں تو وہ ہارٹیکلچر صنعت کو کشمیر میں خاصا بڑھاوا دے سکتے ہیں۔ اس طرح ہم پڑے لکھے مگر بے روزگار نوجوانوں میں اس صنعت سے وابستہ ہونے کی تحریک پیدا کر سکتے ہیں۔ بدقسمتی سے اس وقت یہ حالت ہے کہ ہمارے پڑھے لکھے نوجوان ہارٹیکلچر صنعت کے ساتھ وابستہ نہیں ہونا چاہتے ہیں۔ حالانکہ وہ بے کار بیٹھے ہیں۔ وہ ہر حالت میں یاتو سرکاری نوکری چاہتے ہیں ، جو دستیاب نہیں ہے یا کسی ایسی نوکری کو پانا چاہتے ہیں جس میں اُن کو کرسی ملے اور وہ قلم کا استعمال کریں۔ اگر سول سوسائٹی متوجہ ہوتی ہے تو ہم مستقبل قریب میں نوجوانوں کو ہارٹیکلچر صنعت سے وابستہ کر کے میوے اگانے، باغات میں میوہ چننے ، گریڈنگ اور پیکنگ سے متعلق نوجوانوں کو جانکاری دینے میں مدد کر سکتے ہیں۔ اس طرح میوے کی صنعت کو بھی فائدہ ہوگا اور نوجوانوں کو روزگار بھی فراہم ہوگا۔
اس سلسلے میں ، میں سول سوسائٹی سے مودبانہ درخواست کروں گا کہ وہ اپنا دائرہ بڑھائیں اور صحافیوں کو بھی اپنے ساتھ ملائیں اور میری تجویز پر بھی غور کریں۔
میرا خیال ہے کہ یہ کام ہوسکتا ہے اور ہم کو ایسا کرنا چاہئے۔ یہ خاکسار بھی کچھ تعاون دے سکتا ہے۔ ‘‘
بلال نذرہ انچارج پبلسٹی

آج کی تکنیکی انقلاب کی دنیا میں آپ کو کسی بھی جانکاری کی ضرورت ہو تو سیدھے انٹر نیٹ پر گوگل کے سرچ انجن کا سہارا لیتے ہیں ۔امین کھنڈوانی کے انتقال کے بعد ان کے لئے سمیع قریشی کے ذریعہ لکھے گئے ایک فیچر کے لئے مرحوم کے فوٹو کی ضرورت تھی ۔میں نے گوگل کی مدد لینے کی کوشش کی لیکن بڑی مشکل سے اس نے مجھے صرف تین تصاویر دکھائیں جس میں سے ایک کسی تقریب کی ہے جہاں وہ ربن کاٹ کر اس کا افتتاح کررہے تھے ۔دوسری تصویر شاید ان کے گھر کی تھی جس میں چند لوگ ان کے گرد بیٹھے تھے اور وہ خود کسی گہری سوچ میں گردن جھکائے بیٹھے تھے ۔شاید کسی قومی معاملہ میں کسی نتیجہ پر پہنچنے کی کوشش میں تھے ۔یہ دیکھ کر سمیع قریشی کی تحریر کا وہ جملہ یاد آگیا جس میں سمیع قریشی نے لکھا ہے کہ ممبئی فساد پر پولس نے ان پر بھی اقدام قتل اور فساد پھیلانے کا مقدمہ بنایا تھا اور وہ آخری وقت تک کورٹ کے چکر لگاتے رہے۔بقول سمیع قریشی انہوں نے کہا کہ آپ اس وقت مقتدر ہیں سیاسی دباؤ کا استعمال کرکے خود کو مقدمہ سے الگ کروالیں ۔اس پر انہوں نے کہا کہ ہاں بھائی میں ایسا کرسکتا ہوں لیکن میری قوم کے جو لوگ مقدمات کا سامنا کررہے ہیں ان کا کیا ہوگا ۔میں مقدمہ لڑوں گا اور پولس والوں کو عدالت سے قصور وار ٹھہراؤں گا ،افسوس کہ وہ آزاد ہندوستان کی اس کڑوی سچائی کو دل میں لئے چلے گئے کہ اب یہاں انصاف نہیں ہوتا بلکہ آستھا اور اجتماعی ضمیر کی بنیاد پر فیصلے تھوپے جاتے ہیں۔امین کھنڈوانی کی خاصیت یہ تھی کہ وہ ایماندار تھے ایماندار آدمی بیباک بھی ہوتا ہے ۔اس لئے انہوں نے کبھی اس سے سمجھوتہ نہیں کیا ۔وہ خواہ بابری مسجد کی شہادت کے بعد ممبئی میں پھوٹ پڑنے والے فسادات کے موقعہ پر سنگینوں کے سائے میں مسلمانوں کی دادرسی ہو یا مسلمانوں پرفائرنگ کے لئے پولس کے اٹھے ہاتھ کو نیچے کرکے اسے فائرنگ سے باز رکھنا یا میئر کی کی کرسی کی قربانی دے کر ’’وندے ماترم ‘‘ کی مخالفت کرنا ہو ۔یہ ان ہی کا حصہ تھا اور ان ہی کے ساتھ ختم بھی ہو گیا ۔شاید اسی لئے وہ ایک خاص امیج کے ساتھ ممبئی اور مہاراشٹر کے مسلمانوں کے دلوں میں خوشبو کی طرح بسے رہیں گے۔جس کا تذکرہ کئی لوگوں نے ان کے تعلق سے گفتگو کرتے ہوئے کیا۔
؂ میں فضاؤں میں بکھر جاؤں گا خوشبو بن کر رنگ ہوگا نہ بدن ہوگا نہ چہرا ہوگا
عام طور پر شخصیات پر نہیں لکھا کرتا لیکن امین کھنڈوانی مرحوم کے بارے میں نہیں لکھنا خیانت ہوگی۔میری عادت ہے کہ نہ کسی کے کہنے پر میں کسی کو اچھا اور نہ ہی کسی کے کہنے پر اسے برا مان لیتا ہوں ۔بلکہ اللہ نے عقل و دماغ عطا کیا ہے جو رب کریم کا بہت بڑا احسان ہے ۔اس سے تحقیق کرتا ہوں ۔پھر فیصلہ کرتا ہوں ۔ایسا ہی میں نے امین کھنڈوانی کے بارے میں کیا ۔ایک شخص کے سوا کسی نے ان کے بارے میں کسی شک و شبہ کا اظہار نہیں کیا ۔اس ایک شخص نے جس نے شبہ کا اظہار کیا تھاوہ کیوں کیا تھا اس کا تذکرہ بھی آگے آئے گا ۔ایک شخص جو کہ ایک اردو ہفتہ روزہ کا مالک و مدیر ہے کے بارے میں ممبئی میں دسیوں لوگ کہتے ہوئے سنے جاتے ہیں کہ وہ بلیک میلر ہے ۔وہ لوگوں کے بارے میں الٹی سیدھی باتیں لکھ کر ان سے رقم اینٹھتا ہے ۔یہ سن سن کر میں بور ہو چکا تھا ۔ایک دن اسی طرح بات چلی مجھے بہت غصہ آیا کہ چلو آج اس کی تحقیق کرکے اس کا قصہ ہی پاک کردیتے ہیں ۔اس کے لئے میں نے کم از کم بیس لوگوں سے فون پر دریافت کیا کہ ذرا بتائیں کہ فلاں شخص کیا بلیک میلر ہے ۔اگر ہے تو آپ سے اس نے کتنے پیسے لئے یا کبھی پیسے کا مطالبہ کیا ؟لیکن ایک شخص بھی ایسا نہیں ملا جو یہ کہتا کہ ہاں اس نے مجھ سے رقم مانگے یا میں نے اسے اتنی رقم دی ۔سب افواہ اور سنی سنائی باتوں کو آگے بڑھانے کا کام کررہے تھے ۔اور اس کو بدنام کرنے میں لوگوں کی دلچسپی اس لئے تھی کہ وہ شخص کسی مروت کے بغیر قوم میں جعلی قیادت اور مذہبی ٹھیکے داروں کے خلاف اعلان جہاد کئے ہوئے تھا بلکہ اب بھی ہے ۔اور ایسے لوگوں کو ٹھکانے لگانے کا اس سے بہتر اور کیا حربہ ہو سکتا ہے کہ اسے بدنام کرو تاکہ اس کی باتوں پر کوئی دھیان نہ دے ۔ایک مشہور روزنامہ کے منیجنگ ایڈیٹر سے بھی میں نے ہفتہ روزہ کے مالک و مدیر کے تعلق سے تفتیش کی انہوں نے کھلے لفظوں میں اور صاف صاف بتایا کہ اردو اخباروں کی اگر کسی نے لاج بچائی ہے تو وہ صرف وہی ہے جو کسی ڈر خوف اور لالچ کے بغیر لکھتا ہے ۔
بہر حال ہفتہ روزہ کے مدیر و مالک کی باتیں تو برسبیل تذکرہ آگئی تھیں۔اسی طرح میں نے امین کھنڈوانی کے تعلق سے معلومات حاصل کیں ۔چونکہ میں ممبئی میں نو وارد ہوں ۔اور یہاں آتے ہی جس چیز نے مجھے سب سے زیادہ مایوس کیا وہ ہے یہاں کے مسلمانوں کی زبوں حالی بظاہر تو یہاں کا مسلمان ہندوستان میں سب سے زیادہ معاشی طور پر مضبوط ہے ۔لیکن سیاسی اور معاشرتی طور پر بہت پسماندہ ہے ۔اس کی وجہ مجھے قدم قدم پر جعلی سیاسی اور مذہبی قیادت کی لائن میں نظر آئی ۔ایسے میں امین کھنڈوانی جو ایک عرصہ سے صاحب فراش تھے اور قوم نے اس کو یوں فراموش کردیا جیسے انہیں جیتے جی ہی مردہ سمجھ لیا حالانکہ سمیع قریشی کے مطابق وہ ضعیفی میں بھی اتنے ہی متحرک تھے جتنے جوانی میں ۔کوئی بھی کسی بھی وقت ان سے مل سکتا تھا اور اپنے مسائل کے بارے میں گفتگو کرسکتا تھا ۔وہ بنفس نفیس اس میں دلچسپی لیتے تھے ۔میں زیادہ نہیں لکھوں گا کیوں کہ سمیع قریشی نے اس کا حق ادا کردیا ہے ۔اردو اخباروں نے بھی ان کے انتقال کی خبر کو کوریج دیا اور بہتر انداز میں خراج عقیدت پیش کیا ان میں روزنامہ سہا را اور روز نامہ صحافت میں سب سے بہتر کوریج تھا ۔سہارا نے ذرا تفصیل سے ان کی خدمات اور کارنامے کو کور کیا ۔جبکہ روزنامہ ہندوستان جو غالبا ہندوستان کا سب سے پرانا اخبار ہے اس نے صرف ابو عاصم اعظمی کے بیان کو شائع کرنے تک ہی محدود رکھا ۔روزنامہ انقلاب نے اندرونی صفحات میں جگہ دی لیکن اس نے ایک سابق ایم ایل اے کا مضمون شائع کرکے اس کمی کو پورا کردیا ۔
جیسا کہ شروع میں بیان کیا کہ لوگوں سے امین کھنڈوانی کے بارے میں معلومات لیتے ہوئے ایک مشہور شخصیت نے کہا کہ وہ آدمی تو بھلے تھے لیکن ان کی تعریف فلاں سابق ایم ایل اے نے کی جو ٹھیک نہیں اس لئے وہ مشکوک ہیں ۔لیکن ان سے سوال کرنے پر کہ کیا کسی برے آدمی کا اچھے انسان کی تعریف کردینا اس کو مشکوک بنادیتا ہے ؟انہوں نے اپنی بات واپس لے لی اور کہا کہ نہیں میں تو مذاق کررہا تھا ۔بہرحال اس قحط الرجال میں جبکہ ملت میں مخلصین ڈھونڈے نہیں ملتے امین کھنڈوانی کا انتقال امت کا حقیقی خسارہ ہے ۔یقین جانئے بقیہ سیاسی لیڈر اور بعض سیاسی عالم کے کے انتقال پر لوگوں کا افسوس عام طور پر منافقانہ ہوتا ہے ۔لیکن امین کھنڈوانی جیسے لوگوں کے بارے میں لوگ حقیقی محبت سے مغلوب ہو کر ان کے لئے دعا کرتے ہیں اور انہیں ایسا محسوس ہوتا ہے کہ ان کا اپنا کوئی اس دارفانی سے کوچ کرگیا ۔آخر ایساکیوں نہ ہو کہ ایسے دور میں جبکہ مسلم لیڈر شپ مسلمانوں کے نام پر کروڑ پتی اور ارب پتی بن رہے ہیں اور بے چاری قوم دلتوں سے بد تر زندگی گزارنے پر مجبور کردی گئی۔لیکن اسی دور میں امین کھنڈوانی جیسا صاف ستھرے شبیہ کا شخص بھی آتا ہے جو اپنی سیاست کو قوم و ملک کی خدمت کا ذریعہ بناتا ہے ۔وہ حقیقی معنوں میں کسی پارٹی کا نمائندہ نہ ہو کر پارٹی میں رہ کر قوم کا نمائندہ بنتا ہے ۔مرحوم امین کھنڈوانی کی زندگی میں سبق بھی ہے ان مسلم لیڈروں کے لئے جو اپنے آپ کو قوم کا نمائندہ تو قرار دیتے ہیں لیکن حقیقت میں وہ اپنی پارٹی کے چشم و ابرو پر نظر رکھتے ہیں اور وہی کام کرتے ہیں جو ان کی پارٹی کی پسند ہو یا اس کے مفاد میں ہو ۔جس کی انہیں قیمت بھی ادا کی جاتی ہے ۔اور مسلمانوں کا مفاد تو کہیں دور چھوٹ جاتا ہے۔ابھی حال ہی میں کسی نے سوشل میڈیا پرکسی کا ایک مختصر قول نقل کیا ہے۔جو ہندوستانی سیاست میں مسلمانوں کے حقیقی کردار کی طرف اشارہ کرتا ہے ’’سیاسی بریانی میں مسلمانوں کا کردار کسی گرم مسالے کا ہو تا ہے ،جو پکاتے وقت تو بہت ضروری ہوتا ہے،لیکن کھاتے وقت نکال کر پھینک دیا جاتا ہے ‘‘۔یاد آیا اس پر مبارک کاپڑی نے بھی ایک ڈرامہ لکھا تھا جو بہت مناسب تھا ۔
اوپر میں نے گوگل پر مرحوم امین کھنڈوانی کی تصویر کے بارے میں لکھا تھا ۔ان کی صرف تین تصویر ملی وہ بھی دھندلی ۔لیکن ان کی شخصیت اتنی صاف و شفاف رہی کہ وہ بھلائے نہیں جاسکیں گے۔لیکن ان کے ہی آس پاس ایسے لیڈروں کی تصویر سیاسی ایوانوں میں سلامی داغتے ہوئے سینکڑوں مل جائیں گی ۔جو ہمارے اردو اخبارات کی دین ہیں جنہوں نے ان کے ان کہے بیانات اور نادیدہ مطالبات پر ان کے فرضی بیانات شائع کرکے قوم کے سر پر بٹھا دیا ۔آج کے یہ جعلی قیادت کی تصویریں تو گوگل پر محفوظ ضرور ہو جائیں گی جس کی مدد سے ان کے چیلے چانٹے برسی اور سالگرہ منا کر ان کی یاد کو زندہ رکھنے کی کوشش کریں گے لیکن میرا دعویٰ ہے کہ وہ کسی کے دل میں کسی کی دعائے نیم شب میں کبھی نہیں رہیں گے ۔انہوں نے دنیا کمانے کی حرص میں سیاست کے ایوانوں میں قدم رکھا تھا۔سو دنیا ان کو مل گئی لیکن آخرت میں شاید انہیں کوئی حصہ نہ ملے ۔دوسری طرف امین کھنڈوانی جیسی عبقری شخصیت کو گرچہ اردو صحافت یا عوام میں وہ جگہ نہ ملے پھر بھی جن لوگوں کے دلوں میں وہ رہیں گے وہ ان کے لئے رحمت و مغفرت کی دعا کرتے رہیں ۔یہی انسان کا مرنے کے بعد سب سے بڑا سرمایہ ہوتا ہے کہ لوگ جانے انجانے میں اس کے لئے دعا گو رہیں ۔کوئی ان کو یاد کرے تو اس سے پہلے یہ کہے کہ اللہ ان پر اپنی رحمتیں نازل کرے ۔ مجھے تاریخ اسلام سے ایک واقعہ یاد آرہا ہے ۔یہ دور فاروقی تھا جب ایران فتح ہو اتھا ۔اور اسی کے ساتھ یہ طے ہو گیا تھا کہ صرف عرب ہی نہیں اب دنیا کا مستقبل صرف مسلمان ہی طے کریں گے ۔فتح کی خبر لے ایک قاصد مدینہ دربار خلافت میں خوش خبری سنانے آرہا تھا ۔حضرت عمرؓ اس دوران کافی فکر مند تھے کئی دنوں سے محاذ جنگ سے کوئی خبر نہیں آئی تھی ۔وہ بے چینی کے عالم میں مدینہ سے باہر نکل جاتے اور قاصد کا انتظار کرتے ایک دن ایک قاصد آتا ہو انظر آیا ۔وہ سواری پر ہی رہا اور حضرت عمرؓ اس سے فتح کی خوش خبری سننے کے بعد محاذ جنگ کی ایک ایک تفصیل معلوم کرتے جاتے تھے ۔انہوں نے نام لے لے کر پوچھا ۔قاصد نے کسی کے شہادت کی خبر دی اور کسی کے زخمی ہونے کی اور پھر قاصد نے حضرت عمرؓ سے کہا کہ ان میں بعض ایسے بھی تھے جنہیں نہ آپ جانتے ہیں اور نہ ہم لیکن انہیں وہ بخوبی جانتا ہے جس کے لئے انہوں نے اپنی جان دی ہے ۔قوموں کی تاریخ میں سنہرے ابواب کا اضافہ ایسے ہی لوگوں سے ہوتا ہے جو قوم کی عمارت کے بنیاد کی اینٹ بن کر اس کی مضبوطی کا سبب بنتے ہیں ۔اب دور تک کھنڈوانی صاحب جیسا خادم قوم تنہائی پسند اور نام و نمود سے کوسوں دور کہیں نظر نہیں آتا ۔
آخر میں اس روزنامہ میں چھپے سابق ایم ایل اے کا امین کھنڈوانی پر مضمون کا تذکرہ کرنا ضروری سمجھتا ہوں ۔بلا شبہ انہوں نے کھنڈوانی صاحب کو بہترین خراج عقیدت پیش کیا ہے ۔انہوں نے بھی وہی کچھ بیان کیا ہے جو اپنے مضمون میں سمیع قریشی نے پیش کیا ہے ۔انہوں نے سیاسی لیڈروں اور نوجوانوں کے لئے امین کھنڈوانی کو بہترین مثال کے طور پر پیش کیا ہے ۔وہ لکھتے ہیں کہ ’’ان کی زندگی کے چند اصولوں نے مجھے بے حد متاثر کیا ہے اور میں ان کا گرویدہ بن کر رہ گیا ہوں ۔سب سے اہم بات یہ کہ وہ جس عہد پر فائز رہے انہوں نے ہمیشہ اس عہدے کے وقار کو قائم رکھا ‘‘۔کسی کے کسی شخصیت سے متاثر ہونے کا ثبوت یہ ہوتا ہے کہ وہ ان کے اصولوں کو اپنی زندگی میں اتارے ۔یہ صاحب ان سے متاثر بھی ہیں ان کے گرویدہ بھی لیکن ان کے اصولوں کا ان کی زندگی میں کہیں عمل دخل نظر نہیں آتا ۔بھلا یہ کیسی گرویدگی ہے ؟ لیکن بہر حال مضمون نگار نے حوصلے سے کام لیتے ہوئے کم از کم سچائی بیان کرنے کی تو کوشش کی ہے ۔وہ لکھتے ہیں ’’میں بڑے وثوق اور پوری ذمے داری سے کہہ سکتا ہوں کہ مرحوم امین کھنڈوانی جیسا ایماندار ،مخلص ،دیانتدار،پاک و صاف اور بے داغ شبیہ کا شخص اب موجودہ سیاست میں ملنا نہ صرف مشکل ہے بلکہ ناممکن ہے‘‘۔کتنا سچ لکھا ہے لیکن کاش کہ وہ بھی سچائی کا ادراک کرپاتے اور اپنے آپ کو انہی کے سانچے میں ڈھالنے کی کوشش کرتے صرف تقریر و تحریر سے قوموں کی تقدیر نہیں بدلا کرتی ! اس کے لئے ضرورت ہوتی ہے خلوص و ایثار کے ساتھ سچے جذبہ کی جو ہم میں اکثر لوگوں میں نہیں ہے ۔اللہ سے دعا ہے کہ وہ مرحوم کی مغفرت فرمائے اور قوم کو ا ن سے بہتر ،مخلص اور ایماندار رہنما عطا کرے ،آمین ۔شاید ایسے لوگوں کے بارے میں کسی شاعر نے کہا تھا کہ
؂ ہمارے بعد اندھیرا رہے گا محفل میں بہت چراغ جلاؤگے روشنی کے لئے ۔

نہال صغیر۔