Towards A National Strategy To Counter Israeli Threat To Our Sovereignty & Security (Memorandum To Home Minister RR Patil)

Mumbai Police Confiscate Nakba Day Banners

ISRAEL HATAO - BHARAT BACHAO

جدوجہد

" مجھکو یہیں اترنا تھا"

زبیر حسن شیخ

آج کافی دنوں بعد شیفتہ اور بقراط کو چمن میں دیکھا. موسمِ گرما کی آمد کے آثار انکے چہروں پر دکھائی دے رہے تھے. لیکن لہجہ میں موسم بہار کا اثر قایم تھا. شیفتہ نے فرمایا، حضور ہندوستان کی مختلف ریاستوں میں الکشن تمام ہوئے اور قصہ پاک ہوا. محمود شام صاحب کا مضمون پڑھ کر معلوم ہوا پاکستان میں بھی الیکشن تمام ہوئے. وہاں کا قصہ بھی پاک ہی سمجھیے. افغانستان میں بھی امریکہ قصہ پاک کر بیٹھا ہے. اس سے اب جایا نہیں جاتا، تورا بورا میں پوشیدہ کشش ثقل کا اسے اندازہ نہیں تھا، گردن نکال چکے تو پیر پھنس گئے. اب یہ حال ہے کہ "کھینچتا ہے جسقدر، اتنا ہی کھنچتا جائے ہے". ہائے افسوس اس سیم تن کے پاؤں، آج مرزا ہوتے تو ضرور کچھ کرتے یا کہتے. ایران نے بھی کیا خوب قصہ پاک کیا. بزرگ کہا کرتے تھے، کنویں سے ناراض ہوکر اگر کوئی اپنی حاجتیں پوری نہ کرے تو کنویں کا کچھ نہیں جاتا، بیٹھے رہیے تصورِ جاناں کیے ہوئے، ایرانی تیل کے کنووں کے ساتھ اہل مغرب اب یہی کر رہے ہیں. حال ہی میں کئی ملکوں کے کنویں جلا کر بیٹھے ہیں اور اپنی حاجات کو معطل کر بیٹھے ہیں. اسرائیل سے کانگریس کی دل لگی کا قصہ بھی اب طشت از بام ہورہا ہے. یہ وہی دل لگی ہے جسکی ابتدا تب ہوئی تھی جب بی جے پی اسرائیل کے اعمالِ سیاہ کی اسیر ہوئی تھی، بلکہ دونوں ایکدوسرے کے سیاہ اعمال میں الجھ کر گر پڑے. عشق کی ابتدا بس ہوئی ہی تھی کہ رقیب درمیان میں آگیا. پھر رقیب بھی اسی کافر ادا کا اسیر نکلا. اسکی ادائے کافرانہ پر سارے شیطان قربان. کانگریس نے اسرائیل کے ساتھ تجدید وفا کی رسم ادا کر سب کو متحیر کر دیا. کانگریس کے آبا و اجداد کبھی اس کافر ادا کو اغیار میں شمار کرتے تھے اور "غیر وابستگی" کا کھل کر مظاہرہ کیا کرتے تھے. لیکن اب تو یہ حال ہے کہ کانگریسی رہنما مسلمانوں کی غیر وابستگی دیکھ کر کہتے ہیں، "اب جفا سے بھی ہیں محروم ہم، اللہ اللہ". ویسے کانگریس اپنے انجام سے بے خبر نہیں ہوگی، اور اگر ہوگی بھی تو یو پی کے الیکشن کے بعد ضرور خبردار ہو گئی ہوگی. بی جے پی کے متعلق تو ویسے بھی یہی کہا جاتا رہا ہے کہ"کرتے ہیں محبت تو گزرتا ہے گماں اور". بی جے پی کو جو اشارے آر ایس ایس سے ملتے ہیں اور جس بلاغت سے ذرائع ابلاغ اسے پیش کرتے ہیں، دیکھکر بی جے پی یہی کہتی ہے کہ "ہے بس کہ ہر اک ان کے اشارے میں نشاں اور" ...... ان ذرائع ابلاغ میں چند ایسے بھی ہیں جو ابھی تک سن بلوغت کو نہیں پہنچ پائے اور اکثر بازیچہء اطفال سجائے بیٹھتے ہیں. ایسے ہی ایک نام چین ذرائع ابلاغ کی گود میں رشدی مردود کو حال ہی میں بیٹھایا گیا، ایسی نشست کو انگریزی میں 'کونکلیو" کہتےہیں.

بقراط نے کہا، حضور صحافت اور ٹی و ی میڈیا کا یہ حال ہوا ہے کہ... "بک جاتے ہیں ہم آپ، متاع سخن کے ساتھ....لیکن عیار طبع خریدار دیکھ کر".. اس شعر میں لفظ "بک" کو آپ زیر و زبر کر کے پڑھ سکتے ہیں اور دونوں طرح سے یہ ان کے حال کی غمازی کرتا ہے. سنا ہے اس بار شیطان مردود کو علمائے دین سے شکایت نہیں رہی بلکہ حکومت اور خاصکر کانگریس سے رہی. اور اس نے اپنے ہم نفسوں کی جھوٹی افواہوں کی خود ہی پول کھول دی. پچھلی بار اسکی آمد پر لگی روک تھام کا ٹھیکرا مسلمانوں کے سر سے اب ہٹادیا گیا. ہندوستانی صحافت میں اپنی روزی روٹی حاصل کرنے کے لئے صرف اتنی زحمت کرنی ہوتی کہ امن پسند مسلمانوں کو ہدف بنانا ہوتا ہے، اور مختلف حیلے بہانوں سے انھیں چھیڑنے کا موقع ڈھونڈنا ہوتا ہے، بلکہ انھیں احساس دلانا ہوتا ہے کہ جب تک آپ سیکولر نہیں بن جاتے آپ ایک امن پسند اور معزز شہری نہیں ہو سکتے .

بقراط نے کہا، لیکن مسلمان بھی گرمی دکھانے سے کب باز آتا ہے. فرمایا ، کوئی کرگس ہے جو باز آئے. مسلمان کو پتہ ہے کہ چند گروہ ایسے ہیں جو اسکے ایمان کی گرمی کا مسلسل اندازہ لگاتے رہتے ہیں، کب یہ ذرا سرد ہو تو اسکے گلے میں "سیکولر ازم " کی مے ناب کے چند قطرے ڈال دیں.اب اس مشہور و معروف ٹی و ی چینل کو ہی لے لیجیے ، اسے دنیا میں کوئی شریف انسان ملا ہی نہیں. افسوس کہ سترہویں صدی کے زٹلی اور پچھلی صدی کے چرکن زندہ نہیں رہے ورنہ رشدی کے ساتھ ملکر ایسے "کونکلیو" کی شان بڑھاتے. عمران خان نے ٹھیک ہی کیا جو رشدی مردود کے ساتھ بیٹھنے سے انکار کر دیا. کہتے ہیں مہذب لباس زیب تن کر کسی برہنہ کے ساتھ بیٹھنا بڑا صبر آزما ہوتا ہے. ایسے "کونکلیو" کا مقصد تو یہی ہونا چاہیے کہ عالمی رواداری اور بھائی چارگی کو فروغ دیا جائے، کسی کو خوش کرنا اور کسی کے دل میں نفرت پیدا کرنا چہ معنی . ذرائع ابلاغ اور صحافت میں ایسے کئی ادارے ہیں جن پر مسلمانوں کی ایک کثیر تعداد ملتفت رہی ہے لیکن کیا کریں اب تو یہی کہتے ہیں کہ. "ہم تم سے چشم رکھتے تھے، دلدار یاں بہت.....سو ، التفات کم ہے، دل آزاریاں بہت" . ذرائع ابلاغ اور صحافت کے چند ادارے اب بھی ایسے ہیں جو مسلمانوں کو اپنی طرف راغب رکھنے میں کوشاں رہتے ہیں اور انکے جائز حقوق کی اور انکی اہمیت کی ترجمانی کرتے رہتے ہیں. "زی سلام" اور "ای ٹی و ی" کا نام قابل ذکر ہے. چھوٹی موٹی ستم ظریفی اور غیر ارادی دل شکنی کہاں نہیں ہوتی اور جو قابل در گزر ہونی چاہیے.

بقراط نے کہا جناب ، چند انگریزی اخباروں میں منافقت سے بھر پور مضامین پڑھیے اور غور فرمائیے کہ سیکولر ازم کی نئی تعریف لکھی جا رہی ہے . لکھنے والے نام سے تو مسلمان ہی لگتے ہیں اور شجرے سے کچھ کچھ مشکوک. چند ہزار روپوں کی نوکری کی خاطر اپنے ہی بھائیوں پر الزام تراشی کرنا اور علمائے دین کا مذاق اڑا کر واہ واہی بٹورنا، عوام کو گمراہ کرنا، ایسا طرز فکر و عمل بزدلی اور منافقت کی غمازی کرتا ہے. شیفتہ نے فرمایا، افسوس تب ہوتا ہے جب مسلمانوں کا تعلیم یافتہ طبقہ ایسے طرز فکر و عمل کی تائید کرتا ہے. زرد صحافت کے ٹکڑوں پر پلنے والوں میں چند مسلمان بھی ہیں اور نہ ہی انکے کوئی اصول ہوتے ہیں اور نہ اخلاقی قدریں. آئے دن دین و مذہب پر کیچڑ اچھال کر یہ جتا تے ہیں کہ دیکھیے ہم نے کیسے اسلام پر یعنی خود اپنے عقیدے پر چوٹ کی ہے، اور اپنے اعلی تعلیم یافتہ، ماڈرن اور وفادار ہونے کا ثبوت دیا ہے. آسمان پر تھوک کر آئینہ دیکھنا بھول جاتے ہیں یہ احمق. اگر سیکولرازم کے معنی میں تمام مذاہب کی تقلید یا توہین کا ڈھونگ رچانا ہے تو مسلمان جانتا ہے کہ اس سے بڑھکر کوئی منافقت نہیں، اور اگر اسکے معنی میں تمام مذاہب کا احترام کرنا ہے تو مسلمان سب سے بڑا سیکولرسٹ ہے . کیونکہ تمام مذاہب کا احترام کرنا اس پر واجب ہے اور اسکے دینی احکامات کا حصہ ہے . ایک امن پسند شہری اور مخلص انسان ہونے کے لئے سیکولر ہونا ضروری نہیں، کروڑوں مسلمان، ہندو، سکھ، عیسائی اور یہودی بھائی اور بہنیں ہیں جو مذہبی ہیں اور ان اوصاف کے حامل بھی ہیں.

شیفتہ کی لن ترانی جاری تھی کہ ایک سائیکل سوار لڑکا کرتب دکھاتے ہوئے ہماری نشست کے قریب آکر اچانک گر پڑا اور فورا دامن جھاڑ کر اٹھا، اور مسکراتے ہوئے کہنے لگا "مجھکو یہیں اترنا تھا". پھر اپنے حواس مجتمع کرنے کی خاطر شیفتہ کے قریب بیٹھ گیا. شیفتہ نے شفقت بھری نظروں سے اس لڑکے کی آنکھوں میں جھانکا اور جیب میں موجود واحد دس روپوں کا نوٹ نکال کر اسکی مٹھی میں بند کر دیا. لڑکاسائیکل اٹھا کر یہ جا اور وہ جا. بقراط نے تعجب سے شیفتہ کی طرف دیکھا. شیفتہ نے فرمایا، جن حالات حاضرہ پر ہم دونوں ابھی ابھی تبصرہ کر رہے تھے اس ذہین و فتین لڑکے نے اپنے ایک جملے میں ان سب کی بہتر ترجمانی کر دی. اردو ادب میں خجالت اور شرمندگی سے بچنے یا اسے چھپانے سے متعلق مختلف الفاظ، محاورے اور ضرب الامثال موجود ہیں، جیسے کھسیانی بلی کھمبا نوچے، انگور کھٹے ہیں.. وغیرہ وغیرہ . اس دور پر فتن میں اب جو بھی گرپڑتا ہے یہی کہتا ہے کہ میں گرا نہیں ہوں بلکہ "مجھکو یہیں اترنا تھا". یہی وہ طرز فکر و عمل ہے جو انسان کو ہر بار ٹھوکر کھانے پر آمادہ کرتا ہے اور پھر وہ کبھی نہیں سنبھلتا. "مجھکو یہیں اترنا تھا" کی عکاسی مذکورہ "کونکلیو" میں بھی دیکھنے ملی. کانگریس اور بی جی پی کے رہنماوں کا بھی یہی حال تھا جب یو پی اسمبلی الیکشن میں شکست کھا کر وہ میڈیا میں اپنے تاثرات پیش کر رہے تھے. "گجرات کے شیطان" کا ابتدا سے یہی حال رہا، بلکہ وہ تو پاتال تک گر کر دیکھ چکا ہے، اور اسکا یہ کہنا کہ "یہیں اترنا تھا" بلکل بجا ہے . یہی موقف امریکہ کا افغانستان کے معاملہ میں رہا ہے، امریکہ اب ایران کے معاملے میں بھی یہی کہتا ہے کہ "مجھکو یہیں اترنا تھا". اسرائیل کی ہٹ دھرمی سے پریشان اہل مغرب کی معیشت منہ کے بل گر پڑی، لیکن وہ بھی یہی کہتے ہیں کہ "ہمیں یہیں اترنا تھا". یہی طرز فکر و عمل پاکستانی سیاست کا امریکہ کے ساتھ رہا. عرب لیگ اور عرب حکمرانوں کا کیا کہنا، جب جب اتحاد کا سوال اٹھا تو لڑ کر ایکدوسرے کو گرا کر ہی دم لیا، اور یہی تاثر دیا کہ "ہمیں یہیں اترنا تھا".

بقراط نے پوچھا، حضور سماج وادی پارٹی کا وہ نو جوان جو سائیکل پر کرتب دکھانے میں کامیاب رہا، اسکے بارے میں کیا خیال ہے ؟ فرمایا ابتدائے عشق ہے......... یو پی کے مسلمانوں اور مسلم رہنماؤں پر دوہری ذمہ داری آن پڑی ہے اورپتہ نہیں وہ اب ایس پی سے کون کون سے کرتب کروائے. پہلے مرحلہ میں ہی قوم و ملت کے دیرینہ اور غیر حل شدہ مسائل کو حل کروالیں تو غنیمت ہے. اور سب سے اہم یہ کہ صحیح اور مناسب ترجیحات پیش کریں. پسماندگی کے دلدل سے نکلنے کے لئے سب سے پہلے مسلمانوں کے وہ حقوق حاصل کرلیں جو غصب کر لیے گیے ہیں اور جسے حاصل کرنے میں مرکزی یا ریاستی حکومت کا احسان مند ہونے کی ضرورت بھی نہیں. اور ان پر فوری عمل در آمد کی مانگ کریں . باقی تمام مرحلے جب ہونگے تو سب کے لئے ہونگے. غور کریں اور خوب کریں . کہیں یہ نہ سننا پڑے کہ "مجھکو یہیں اترنا تھا"

بقراط نے کہا، حضور، دنیا جہان میں اب سیاست نے تجارت کی شکل اختیار کر لی ہے. عوام ہو یا سیاسی جماعتیں ہوں یا رہنما، اب کوئی بھی اسے معیوب نہیں سمجھتا، اور ایک حد تک قانون بھی نہیں. ورنہ کیا وجہ ہے کہ جمہوری قوانین میں سیاستدانوں کے تجارت میں حصہ لینے پر، یا تاجروں کے سیاست میں حصہ لینے پر کوئی پابندی نہیں، بلکہ دونوں حضرات دھڑلے سے اپنا اپنا حصہ لوٹنے میں مصروف نظر آتے ہیں. نظام جمہوریت میں یہ وہ آزادی ہے جو تجارت اور سیاست کے "لیونگ ریلیشن" کو ثابت کرتی ہے. سیاست کو تمام اخلاقی ضابطوں سے بری کر دیتی ہے. جمہوریت کے علمبردار مغربی مفکر یہی کہتے رہے ہیں کہ جمہوری طرز حکومت و سیاست "نان ایکونومک ایکٹیویٹیز" یعنی غیر تجارتی اور بے لوث سماجی خدمات میں شمار ہوتی ہے، شاید عہد فاروقی کی نظیر کہیں پڑھ لی ہوگی. یہ مسئلہ اب جمہوریت کے گلے کا کانٹا بن گیا ہے اور سیاستدانوں کا تجارت کے ساتھ گہرا تعلق عوام کے حق میں مضر ثابت ہورہا ہے. اب تو سلطانیء جمہور بھی یہی کہتے ہونگے "مجھکو یہیں اترنا تھا".

فرمایا، ایک سیاست داں تب ہی دیانت دار ہوسکتا ہے جب وہ حکومت سے حاصل شدہ بنیادی ضرورتوں کے علاوہ زندگی میں اور کسی بھی مادی چیز کے حصول کا روا دار نہ ہو. جمہوریت کی کامیابی اور سیاست میں دیانت داری ثابت کرنے کے لئے اسکے علاوہ اور کوئی نسخہ کار گر نہیں ہو سکتا ، اور نہ ہی کوئی اور اصول کارگر ہو سکتا ہے. بقراط نے کہا، حضور، ہمارے ملکوں کی جمہوریت اور موجودہ سیاست اتنی سخت آزمائیش سے گزرنے کی متحمل نہیں ہے، خدارا کچھ رحم کیجیے، جمہوریت کی عمرِ شباب کا ہی کچھ خیال کیجیے. اور یہ نہ بھولیے گا کہ بہت بڑی خَلقت ہے جو جمہوریت کی محبت میں گرفتار ہے. فرمایا، پتہ ہے. خلقت بھی یہی کہہ رہی ہے کہ. "مست شباب وہ ہیں، میں سر شار عشق ہوں......میری خبر انھیں ہے، نہ ان کی خبر مجھے ". اگر مذکورہ اصول ناقابل قبول یا ناقابل نفاذ ہے تو پھر جمہوریت میں سیاست کو خالص تجارتی نقطہء نظر سے دیکھا جائے اور بطور تجارت اسے قبول کیا جائے . ہر امید وار اپنے "مینیفیسٹو" میں جدید تجارت کے اصولوں کے تحت پروجیکٹ کا تخمینہ پیش کرے جسکا وہ وعدہ کر رہا ہے، آخر جدید تجارت میں یہی تو ہوتا ہے. ویسے بھی آجکل سیاست سرمایہ داروں اور دولتمندوں کی کنیز بنکر رہ گئی ہے. اپنے سرمایہ دار آقاؤں سے تجارت کے پینترے سیکھ کر کھل کر تجارت کے کھیل کھیلیے . وقت اور ذرائع، فواید و نقصانات، حصہ داری اور ذمہ داری، اجزائے ترکیبی و ترتیبی، الغرض تجارت کے ہر ایک پہلو سے منظم و مرتب لائحہ عمل عوام کے سامنے پیش کیجیے، تاکہ امیدوار کی قابلیت کا اندازہ ہو اور عوام کی بھلائی اور ترقی یقینی ہو . پل بنانا، بجلی فراہم کرنا، آبپاشی کے منصوبے بنانا، نئے شہر بسانا، تعلیم اور صحت عامہ کا انتظام کرنا، صنعت و حرفت کو فروغ دینا اور ایسے ہی دیگر عظیم الشان کام کرنے کا ذمہ اٹھانے والوں اور دعوی کرنے والوں کا ذرا پس منظر تو دیکھیے، خاص کر بر صغیر میں. ایسے کاموں کو گڑیوں کا کھیل یا بچوں کا "بلڈنگ بلاک" سمجھ رکھا ہے اور جمہوریت کو مذاق بنا کر رکھ دیا ہے. اکثر سیاسی امیدوار ایسے کاموں کی بنیادی معلومات تک نہیں رکھتے اور اس پر طرا یہ کہ جمہوریت پر سوار ہو کر کرتب دکھاتے ہیں، اور جب جب ان میں سے کوئی گر پڑتا ہے تو یہی کہتا ہے کہ "مجھکو یہیں اترنا تھا".

معافی

شاہ نواز فاروقی

-اسلامی تہذیب کی تعریف جن تصورات، اقدار اور رویوں سے متعین ہوتی ہے اُن میں ایک تصور، ایک قدر اور ایک رویہ معاف کرنے کا بھی ہے۔ اس کی ایک وجہ یہ ہے کہ اصل تہذیب احترامِ آدمیت ہے۔ احترامِ آدمیت کی دو صورتیں ہیں۔ ایک صورت یہ ہے کہ انسان کی عظمت، بزرگی، اس کے جلال و جمال اور اس کے علم و ذہانت کی وجہ سے اس کا احترام کیا جائے۔ لیکن اس احترام میں کوئی کمال نہیں ہے۔ احترام کا کمال یہ ہے کہ انسان کا احترام اس کی کمزوری کی حالت میں کیا جائے۔ معافی کا عمل ایک فرد کی طاقت اور ایک فرد کی کمزوری کی حالت میں ہی وقوع پذیر ہوتا ہے۔ چنانچہ معافی احترامِ آدمی کی زیادہ کامل مثال ہے۔ لیکن یہ معاملہ صرف دو افراد کے تعلق تک محدود نہیں۔ اسلام ہمیں بتاتا ہے کہ کسی معاشرے کے مہذب ہونے کا انحصار اس بات پر ہے کہ وہ اپنے کمزور لوگوں کے ساتھ کیا معاملہ کرتا ہے۔ لیکن سوال یہ ہے کہ اسلامی تہذیب میں معاف کرنے کی اتنی اہمیت کیوں ہی؟ اس سوال کا ایک جواب یہ ہے کہ اللہ تعالیٰ خالق ہی، مالک ہی، رازق ہی، قادرِ مطلق ہی.... لیکن وہ سب سے زیادہ معاف کرنے والا بھی ہے۔ اس نے شریعتِ محمدی کے ذریعے انسانوں کو بتادیا ہے کہ گناہ کیا ہے اور وہ گناہ سے کتنا ناراض ہوتا ہے۔ مگر اس کے معاف کرنے کا یہ عالم ہے کہ اگر کسی انسان سے سمندر کے قطروں اور صحرا کے ذروں کے برابر بھی گناہ ہوجائیں اور وہ سچی توبہ لے کر اللہ تعالیٰ کے حضور حاضر ہو تو اللہ تعالیٰ اس کے تمام گناہ معاف کردے گا۔ حدیث شریف میں آیا ہے کہ قیامت کے روز ایک ایسا شخص خدا کے حضور پیش ہوگا جس کے بے حد طویل نامہ ¿ اعمال میں گناہوں کے سوا کچھ بھی نہ لکھا ہوگا، چنانچہ وہ شخص اپنے مستقبل سے مایوس ہوگا اور اس کا خیال ہوگا کہ جہنم اس کا مقدر ہے۔ مگر اچانک اس کے پاس سے کلمہ طیبہ برآمد ہوجائے گا۔ یعنی وہ شخص اللہ اور اس کے رسول پر ایمان رکھنے والا ہوگا۔ چنانچہ میزان کے ایک پلڑے میں اس کے گناہ رکھے جائیں گے اور دوسرے پلڑے میں کلمہ طیبہ رکھا جائے گا، اور اس کے ایمان کا وزن اس کے گناہوں سے بڑھ جائے گا۔ یہ بھی اللہ تعالیٰ کی معافی کی ایک صورت ہوگی۔ حضرت ابوذر غفاریؓ کا مشہور واقعہ ہے کہ انہوں نے آپ سے پوچھا کہ کیا انسان کے سارے گناہ معاف کردیئے جائیں گی؟ آپ نے فرمایا کہ ہاں سارے گناہ۔ حضرت ابوذرؓ نے کہا کہ خواہ انسان نے چوری کی ہو؟ حضور صلی اللہ علیہ وسلم نے فرمایا کہ ہاں خواہ اس نے چوری کی ہو۔ حضرت ابوذرؓ نے پوچھا: خواہ اس نے زنا کیا ہو؟ آپ نے فرمایاکہ ہاں خواہ اس نے زنا کیا ہو۔ اس کے بعد حضور صلی اللہ علیہ وسلم نے تبسم فرمایا اور کہاکہ خواہ ابوذرؓ کو اپنی ناک ہی کیوں نہ رگڑنی پڑے۔ حضور اکرم صلی اللہ علیہ وسلم افضل البشر ہی نہیں افضل الانبیا بھی ہیں۔ چنانچہ آپ کی معاف کرنے کی صلاحیت کُل عالم سے زیادہ تھی۔ اہلِ مکہ نے کون سا ظلم ہے جو آپ کے ساتھ نہیں کیا؟ آپ کی نبوت کو جھٹلایا، آپ کو شاعر اور کاہن کہا، آپ اور آپ کے اصحاب پر بدترین تشدد کیا، آپ کو آپ کے اہلِ خانہ کے ساتھ شعب ابی طالب میں ساڑھے تین سال تک محدود کردیا، جہاں تنگی ترشی کا یہ عالم ہوا کہ آپ اور آپ کے اہلِ خانہ کو پیڑ پودوں کی جڑیں تک ابال کر کھانا پڑیں۔ یہاں تک کہ آپ کو مکہ چھوڑنے پر مجبور کردیا گیا۔ لیکن جب آپ طاقت ور بن کر مکہ آئے اور آپ نے مکہ فتح کرلیا تو آپ نے اپنے بدترین دشمنوں کو بھی معاف کردیا۔ آپ سے ایک بار دریافت کیا گیا کہ گھروں میں کام کرنے والے نوکر غلطیاں کرتے ہیں، آخر انہیں کتنا معاف کیا جائی؟ آپ نے فرمایا: ایک دن میں 70 بار۔ ظاہر ہے کہ کوئی نوکر ایک دن میں 70 غلطیاں نہیں کرسکتا۔ چنانچہ آپ کے ارشادِ مبارک کا مفہوم یہ ہے کہ نوکر بہت زیادہ غلطیاں بھی کرے تو اسے معاف کردیا جائے۔ حضرت زیدؓ دس سال تک حضور صلی اللہ علیہ وسلم کی خدمت میں حاضر رہی، اور ان کا بیان ہے کہ دس برسوں میں آپ نے ایک بار بھی مجھے کسی غلطی پر برا بھلا نہیں کہا۔ آپ کے اسوہ حسنہ کو صحابہ کرامؓ نے مکمل طور پر جذب کیا۔ چنانچہ صحابہ کرامؓ خود معاف کرنے کی علامت بن کر ابھرے۔ ایک سفر کے دوران جن لوگوں نے حضرت عائشہ ؓ پر تہمت لگائی اُن میں ایک ایسے صاحب بھی تھے جو حضرت ابوبکرؓ کے رشتے دار تھے اور حضرت ابوبکرؓ ان کی مالی مدد کیا کرتے تھے۔ حضرت عائشہؓ پر تہمت کا واقعہ بہت ہی بڑا تھا اور حضرت ابوبکرؓ حضرت عائشہؓ کے والد تھی، چنانچہ انہیں حضرت عائشہؓ پر تہمت سے فطری طور پر گہرا دکھ ہوا اور انہوں نے کہاکہ اب وہ اپنے اس عزیز کی مالی اعانت نہیں کریں گے جس نے حضرت عائشہؓ پر تہمت لگائی۔ مگر اللہ تعالیٰ نے کہاکہ یہ طرزعمل صدیق اکبرؓ کے شایانِ شان نہیں ہے۔ چنانچہ حضرت ابوبکرؓ نے نہ صرف یہ کہ اپنے اس عزیز کو معاف کردیا بلکہ ان کی مالی مدد میں اضافہ کردیا۔ حضرت امام حسینؓ پر ایک بار ان کی ایک ملازمہ نے سالن گرادیا۔ حضرت امام حسینؓ کے چہرے پر ناگواری ظاہر ہوئی۔ ملازمہ ذہین تھی، کہنے لگی: مومنوں کی شان یہ ہے کہ وہ غصے کو پی جاتے ہیں۔ امام حسینؓ نے فرمایا: میں نے غصے کو پی لیا۔ ملازمہ نے کہاکہ مومنین معاف کرنے والے ہوتے ہیں۔ حضرت امام حسینؓ نے فرمایا: میں نے تجھے معاف کیا۔ ملازمہ نے کہاکہ مومنین احسان کرنے والے ہوتے ہیں۔ حضرت امام حسینؓ نے فرمایا: میں نے تجھے آزاد کیا۔ یہاں سوال یہ ہے کہ معاف کرنے کے عمل کے فوائد کیا ہیں؟ قرآن مجید فرقانِ حمید مسلمانوں کو ہدایت کرتا ہے کہ خود کو اللہ کے رنگ میں رنگ لو۔ معاف کرنے کے عمل کی سب سے بڑی بات یہ ہے کہ معاف کرنے والا صبغت اللہ یعنی اللہ تعالیٰ کا رنگ اختیار کرتا ہے۔ وہ بتاتا ہے کہ وہ اپنے خالق، مالک، رازق اور معبود کے تابع ہے۔ یہاں سوال یہ ہے کہ اللہ کے رنگ میں رنگنے کا مفہوم کیا ہی؟ اللہ اہلِ ایمان کو انصاف قائم کرنے کا حکم دیتا ہے۔ اس لیے کہ انصاف قائم کیے بغیر معاشرے کو قائم نہیں رکھا جاسکتا۔ انصاف کا تقاضا یہ ہے کہ اگر کسی نے ظلم کیا ہے تو اس سے اس ظلم کے مساوی بدلہ لیا جائے۔ لیکن اللہ تعالیٰ یہ بھی کہتا ہے کہ اگر تم کسی کے جرم کو معاف کردو تو یہ انصاف سے زیادہ بڑی بات ہی، کیونکہ معاف کرنے والا اپنے حق سے دستبرداری کا اعلان کرتا ہے۔ یہ احسان کا مرتبہ ہی، اور اللہ تعالیٰ خود احسان کرتا ہے اس لیے وہ احسان کرنے والوں سے محبت کرتا ہے۔ غور کیا جائے تو معاف کرنا احسان کرنے کا عمل ہی، اور یہی اللہ کے رنگ میں رنگنے کا مفہوم ہے۔ معاف کرنے کی صلاحیت انسان کی روح، قلب، نفس اور ذہن میں وسعت پیدا کردیتی ہے۔ اس اعتبار سے معاف کرنے کا عمل انسان کی مجموعی شخصیت کے ارتقا کی ضمانت ہے۔ انسان کی ساخت ایسی ہے کہ تمام منفی خیالات، جذبات اور احساسات انسان کے باطنی ارتقا کے عمل کو روک دیتے ہیں، یہاں تک کہ یہ چیزیں انسان کے لیے قید خانہ بن جاتی ہیں اور انسان ساری عمر اپنے باطن کے زنداں میں کاٹ دیتا ہے۔ دنیا کی ہر قید اس قید کے مقابلے میں ہیچ ہے۔ اس لیے کہ ظاہر کی قید نظر آتی ہے مگر باطن میں انسان کی گرفتاری کسی اور کو کیا خود انسان کو بھی نظر نہیں آتی۔ اس تناظر میں دیکھا جائے تو معاف کرنے کا عمل دراصل انسان سازی کا عمل ہے۔ اور انسان سازی کا دوسرا مفہوم تہذیب ہی، اس لیے کہ تہذیب انسان سازی یا Humanization کے مستقلاً جاری عمل کو کہتے ہیں۔ تجزیہ کیا جائے تو معافی جسمانی طاقت کو روحانی طاقت میں بدل دینے کا عمل ہے۔ جسمانی طاقت انسان کو بدلہ لینے پر اکساتی ہی، انتقام پر مائل کرتی ہے۔ جسمانی طاقت اخلاق کی پابند ہو تو انسان کو ”انصاف“ کے تصور سے آگے نہیں بڑھنے دیتی۔ اسلام کے تصورِ حیات میں انصاف بہت اہم ہے۔ اس پر معاشرے کی بقا کا انحصار ہے۔ لیکن اسلام اہلِ ایمان کو انصاف کے تصور سے بھی بلند کرنا چاہتا ہے۔ اس لیے کہ اپنی مخلوق کے ساتھ اللہ تعالیٰ کا معاملہ انصاف کا نہیں کامل احسان کا ہے۔ اللہ تعالیٰ اگر انسانوں کے ساتھ انصاف کرنے لگیں تو کوئی انسان بھی بربادی سے نہ بچے۔ یہی معاملہ حضور اکرم صلی اللہ علیہ وسلم کا تھا۔ اگر آپ فتح مکہ کے دن احسان کے بجائے انصاف کرتے تو مکے کے اکثر لوگ سزا سے نہ بچتے۔ معافی ایک عظیم روحانی، اخلاقی، نفسیاتی، جذباتی، ذہنی اور احساساتی ”مساوات“ کا نام ہے۔ معاف کرنے والا اعلان کرتا ہے کہ وہ اس شخص سے کسی طرح ”برتر“ نہیں ہے جس کو معاف کیا گیا۔ روحانی، اخلاقی، نفسیاتی، جذباتی، ذہنی اور احساساتی مساوات کا یہ عمل انسانوں کے ظاہر اور باطن کو مسخ نہیں ہونے دیتا۔ حضرت نظام الدینؒ نے فرمایا ہے کہ اگر کانٹوں کے جواب میں کانٹے رکھے جائیں تو پوری دنیا کانٹوں سے بھر جائے گی۔ اس کا سب سے بڑا ثبوت معاصر دنیا ہے جہاں انفرادی زندگی سے لے کر قومی زندگی تک، اور قومی زندگی سے بین الاقوامی زندگی تک معافی کا عمل زندگی سے خارج ہوچکا ہے۔ چنانچہ پوری دنیا کانٹوں سے بھرگئی ہے۔ کانٹوں کے جواب میں کانٹے رکھنے کا عمل کہیں ذہانت کہلاتا ہی، کہیں اسے ڈپلومیسی کہا جاتا ہی، کہیں اُسے خوف کے توازن کا نام دیا جاتا ہے۔ تجزیہ کیا جائے تو معاف نہ کرسکنے کا عمل ایک روحانی، اخلاقی، نفسیاتی، جذباتی اور احساساتی معذوری ہے۔ لیکن کتنی عجیب بات ہے کہ اربوں انسان اس معذوری کو اپنی اہلیت اور اپنی طاقت سمجھتے ہیں اور اس پر فخر کرتے ہیں۔